1. Anni i matageno na karuan meyannung ta pakibbida da ta tanakuan ta ministerio? (Innan gapa i letratu.)

 BILANG totolay ni Jehova, layyagayyattam i tanakuan megafu ta ayatattam i nelangitan nga Yama tam anna ikaya tam ira nga maduffunan nga makilala yayya. Magayayya i aru nga publisher ta pallayyagayya, ngem ari gapa ma-enjoy yatun na tanakuan. Ngatta? Awayya na tu minappasiran i karuan anna matageno da nga ari ira nga malalaki nga gumattuddu. Ari gapa nga komfortable i karuan nga basta umay ta balay na tanakuan. Maganassing i tanakuan megafu ta baka mapporay i totolay ta nira. Nasanay gapa i tanakuan nga iwasan i ari pakkakomprendi. Maski paga ayatan natun nga wawwaragi si Jehova, marigatan lapa ira nga layyagayyan danuri ari da kilala. Ngem ammu da nu kunnasi kabalor yaw nga trabahu anna kanayun ira nga makiparte tatun. Siguradu nga magayayya si Jehova ta nira!

2. Nu ari ka magayayya ta ministerio nu karuan, ngatta ariammu nakuan madismaya?

² Nu karuan, ari ka kari magayayya ta ministerio megafu ta kunnatun nga mataga-tageno mu? Nu wan, ariammu madismaya. Nu nonopammu nga ari ka malalaki nga gumattuddu, ipasingan natun nga minappakalinno ka anna ariammu ikaya nga siko i mapansidda. Ipasingan gapa natun nga ariammu kayà i makipporfia ta totolay. Awan gapa tu maya maporyan mas ngana nu ikaya na nga kuan i mapia ta tanakuan. Ammu na nelangitan nga Yama tam nu anni talaga i mataga-tageno mu anna ikaya naka nga uffunan. (Isa. 41:13) Taw nga artikulo,  gigiammuattam i lima nga makua tam tapenu marubang i kunnatun ira nga panageno anna nu kunnasi mabbalin tu magayayya ta ministerio.

IPAMAVULUMMU NGA PASIKANNAN NAKA NA UVOVUG NA DIOS

3. Anni i nakoffun kani profeta Jeremias nga layyagayyan i tanakuan?

³ Maski ta nappasa, pinasikan na Uvovug na Dios i aripan ira ni Jehova nu egga i mariga nga annungadda. Innattam i angngarigan ni profeta Jeremias. Mavurung yayya turi ta niddan yayya ni Jehova tu annungan nga mallayyagayya. Kinagi ni Jeremias: “Ariakku ammu nu kunnasi i maguvovug, ta abbing ngà pagalaman.” (Jer. 1:6) Anni i nakoffun ta nisa tapenu maggutu nga mallayyagayya? Pinasikan yayya na uvovug na Dios. Kinagi na: “Nabbalin yatun tu gitta na zumozzozzog nga afi nga nafuku ta tulu-tulakku, anna nabannag ngà ngana nga gaggaddan yatun.” (Jer. 20:​8, 9) Maski nu mariga i teritoria ni Jeremias, pinasikan yayya na uvovug nga nepa-annung nisa nga ilayyagayya na.

4. Anni i efekto na nu bibbigattam i Uvovug na Dios anna pannonopan yatun? (Colosas 1:​9, 10)

⁴ Mapasikan i Cristiano ira ta Uvovug na Dios. Turi ta nattura si apostol Pablo ta kongregasion ta Colosas, kinagi na nga i panga tu fustu nga pakannammu i mamaguyu ta wawwaragi na nga ‘mattolay nga kanayun nga mekunnay ta Yafu’ habang ‘mavvunga i pattoleda ta mapia nga pangnga-pangngua.’ (Bibbigan i Colosas 1:​9, 10.) Nelavu tatun nga mapia nga pangnga-pangngua i pallayyagayya ta mapia nga dumug. Yatun ta nu bibbigattam i Uvovug na Dios anna pannonopan yatun, massikan i pangurug tam kani Jehova anna mas malippawa tam i balor na pallayyagayya.

5. Kunnasi tam talaga mammakapia ta pabbibbig tu Biblia anna paggigiammu?

⁵ Tapenu talaga mammakapia ittam ta Biblia, ari ittam nakuan mappabibibi ta pabbibbig, paggigiammu, anna pannono. Siguraduammu tu egga makalanno nga tiempom tapenu makuam danatun. Nu egga i teksto nga marigatakka nga makomprendi, ariammu lampasan yatun. Usammu i Watch Tower Publications Index onu i Tulong sa Pag-aaral ng mga Saksi ni Jehova tapenu makaleg ka tu pakanawag meyannung tatun nga teksto. Nu makalanno i tiempom ta paggigiammu, mas makasiguradu ka nga kurug i kagian na  Biblia. (1 Tes. 5:21) Nu mas kumbinsidu ka, mas mabbalikka tu magayayya ta pangikagi ta tanakuan meyannung ta nagigiammum.

MAPPREPARA TU MAPIA

6. Ngatta mapprepara ittam tu mapia ta ministerio?

⁶ Nu mapprepara ka tu mapia ta ministerio, ari ka kuruga mannerbios nga makibbida ta tanakuan. Zinuffunan ni Jesus i disipulos ira nga mapprepara nige na nga zinog ira ta ministerio. (Luc. 10:​1-11) Megafu ta sinuppal na disipulos i nituddu ni Jesus, kuruga magayayya ira megafu ta aru i makasta nga netuppal da.—Luc. 10:17.

7. Kunnasi ittam mapprepara para ta ministerio? (Innan gapa i letratu.)

⁷ Kunnasi ittam gafu mapprepara para ta ministerio? Mawag tu pannonopattam nu anni i kayà tam ikagi. Gitta na makistoria laman nakuan i pallayyagayya tam anna usattam i sarili tam nga uvovug. Makoffun gapa nu dati tam pannonopan nu anni i gagangay nga reaksion na totolay ta teritoria anna nu kunnasi i tubbag. Nu makibbida tam i totolay, ikagumattam i marrelaks, mangngizzi, anna mabbalin tu masippo.

8. Anni i napparefuan na Cristiano ira ta banga nga napadday ta pila nga kinagi ni apostol Pablo?

⁸ Nikagi ni apostol Pablo ta Cristiano ira nga wawwaragi na: “Sikami nga neyaluvuan naw nga nespirituan nga gannug, ay kagitta na banga nga napadday ta pila.” (2 Cor. 4:7) Anni yatun nga nespirituan nga gannug onu minas? Yatun i makepaliag nga trabahu nga pallayyagayya ta mensahe na Pappatulan. (2 Cor. 4:1) Anni gapa i banga nga napadday ta pila? Tukuyan natun i aripan ira na Dios nga mangikagi ta mapia nga dumug ta tanakuan. Ta tiempo ni Pablo, inusa na negosiante ira i banga nga napadday ta pila tapenu pagipayyan tu nabalor ira nga gannug, gitta na makan, binarayang, anna kuartu. Kunnatun gapa, italo ni Jehova ta nittam i nabalor nga mensahe na mapia nga dumug. Ta uffun ni Jehova, massikan ittam nga tulu-tuloy nga mallayyagayya.

MAKIMALLO TAPENU MAGGUTU

9. Kunnasi ittam maggutu nu maganassing ittam ta totolay? (Innan gapa i letratu.)

⁹ Nu karuan, maganassing ittam ta tolay ta baka manaki da i magginna nittam. Kunnasi ittam maggutu? Makoffun nittam i pakimallo  na apostol ira turi ta negamma i pallayyagayya da. Imbes tu maganassing ira, nakiyoffun ira kani Jehova nga iddan na ira tu “gutu nga mangilayya-gayya ta uvovug [na].” Insigida nga sinabbag na i pakimallo da. (King. 4:​18, 29, 31) Nu maganassing ittam ta tolay nu mittan, makimallo ittam gapa kani Jehova. Mappoffukka ta nisa tapenu malabanammu i assing ta totolay gukaban na aya mu ta nira.

10. Kunnasi ittam uffunan ni Jehova tapenu makua tam i annungattam bilang Saksi na? (Isaias 43:​10-12)

¹⁰ Pinili ittam ni Jehova nga mabbalin tu Saksi na anna nipromesa na nga uffunan na ittam nga maggutu. (Bibbigan i Isaias 43:​10-12.) Egga i appa nga kukukuan na tapenu uffunan ittam. Ollu, kakkavulu tam si Jesus kada mallayyagayya ittam. (Mat. 28:​18-20) Mekadua, egga ira i sinunno ni Jehova nga anghel tapenu manguffun nittam. (Nep. 14:6) Mekatallu, niddan ittam ni Jehova tu masanto nga espiritu na tapenu mangiparaddam nittam ta nagigiammu tam ira. (Juan 14:​25, 26) Meka-appa, niyawa ni Jehova i wawwaragi tam nga kavvulu tam. Ta uffun ni Jehova anna na minaggiddu nga wawwaragi tam, maggutu ittam anna metulu-tuloy tam i pallayyagayya.

MAKIBAGAY ANNA MABBALIN TU POSITIBO

11. Kunnasi ka makaleg tu aru nga totolay ta ministerio? (Innan gapa i letratu.)

¹¹ Madismaya ka kari nu pilippiga laman i totolay nga egga ta babalay? Iyavu mu ta baggim: ‘Sitaw i dian na totolay ta teritoria sangawe?’ (King. 16:13) ‘Egga kari ira ta trabahu onu ta palengke?’ Nu kunnatun i situasion, mas aru kari i maleg mu nu ma-street witnessing ka? Kinagi ni Brother Joshua, “Makakkasta balo i map-preach ta plasa onu ta palengke ira anna ta papparkingan habang lumalakag.” Mas gapa aru i malegadda na atawa na nga si Bridget ta babalay nu mazzibbo ngana anna nu fugag na Liggu.—Efe. 5:​15, 16.

12. Anni i kuattam nu ari kuruga interesadu i totolay ta mensahe?

¹² Nu ari kuruga interesadu i totolay ta mensahe, puruebammu ammuan nu anni i kurugadda anna i paginteresadda. Angngarigan na, usan ni Joshua anna ni Bridget i  pakkiavu ta arubang na tract nu igafu da i makibbida. Kunnaw i kagiadda nu usadda i tract nga Para Nikaw Anni i Biblia?: “Kagian na karuan nga naggafu ta Dios i Biblia, ngem ari gapa mangurug tatun i karuan. Anni i makagim?” Megafu tatun, maruddu nga makibbida da i totolay.

13. Ngatta makasta lagapa i pattuppalan na ministerio tam maski nu kanna magginna na totolay? (Proverbio 27:11)

¹³ Makasta lagapa i pattuppalan na ministerio tam maski nu kanna magginna na totolay. Ngatta? Megafu ta kingngua tam nu anni i ikaya ni Jehova anna na Ana na nga kuattam—i mallayyagayya. (King. 10:42) Maski nu awan tu nakibbida tam onu ari ira nga nagginna ta mensahe tam, magayayya ittam lagapa megafu ta ammu tam nga mapagayayya tam i Yama tam ta langi.—Bibbigan i Proverbio 27:11.

14. Ngatta magayayya ittam nu nakaleg tu interesadu i tanakuan nga publisher ta teritoria?

¹⁴ Magayayya ittam gapa nu makaleg tu interesadu i tanakuan nga publisher ta teritoria tam. Nigitta na Passifusifutan i trabahu tam ta pagaleg tu nawawwan nga abbing. Aru i magaleg ta nisa anna alegadda yayya ta madduruma nga lugar. Sonu malegan i abbing, magayayya i ngamin, ari laman tu yari i nakaleg. Kunnatun gapa i pangngua tu disipulo. Makka-uffu-uffun i ngamin ta kongregasion. Mawag i ngamin tapenu mabalin i teritoria anna magayayya i ngamin nu egga i bagu nga magatende ta study.

MAFFOKUS KA TA AYA MU KANI JEHOVA ANNA TA KASITTOLEM

15. Kunnasi makoffun i Mateo 22:​37-39 tapenu mas magganas ittam nga mallayyagayya? (Innan gapa i letratu.)

¹⁵ Mas magganas ittam nga mallayyagayya nu pannonopattam i aya tam kani Jehova anna ta kasittoletam. (Bibbigan i Mateo 22:​37-39.) Nonopan i pagayayya ni Jehova nu masingan na nga mallayyagayya ittam anna i pagayayya na totolay nu maki-Bible study ngana ira! Nonopammu gapa nga mapaliag danuri magginna ta mensahe tam.—Juan 6:40; 1 Tim. 4:16.

16. Kunnasi ittam magayayya ta ministerio tam maski nu ari ittam makalawan ta balay tam? Mangistoria tu angngarigan.

¹⁶ Ari ka kari makalawan ta balay nu? Nu  wan, maffokus ka ta aya mu kani Jehova anna ta kasittolem. Turi ta COVID-19 pandemic, ari makalawan si Samuel anna i atawa na nga si Dania ta baleda. Tatun nga mariga nga tiempo, kanayun ira nga mat-telephone witnessing, letter writing, anna nab-Bible study ira ta Zoom. Nilayyagayyan gapa ni Samuel danuri nakilala na ta clinic nu sitaw yayya mapporu ta cancer na. Kinagi na: “Nu makkaproblema ittam, mavuru-vurung ittam, mabannag, anna pakkafian natun i espiritualidad tam. Mawag tu kuattam i mawayya tam tapenu magayayya ta passerbi kani Jehova.” Ngem ari laman tu yatun i problema da. Neduya gapa si Dania, yatun ta tallu vulan nga kanna nakalakka ta pagiddan na. Tapus agga-wheelchair yayya ta tumunug nga annam nga vulan. Kinagi na: “Kingnguà lagapa i mawayyà maski nu kunnatun i nesimmu nio. Nalayyagayyakku i nabbisita niakan tu nurse anna kinibbidà danuri i maddeliver ta balay. Namippiga gapa nga nakibbidà i babay nga mattrabahu ta kumpania nga mallaku tu medical equipment.” Limitadu i nakua da Samuel anna Dania megafu ta situasiodda, ngem kingngua da i adde na mawayya da, yari ta magayayya ira.

17. Kunnasi ittam mas mammakapia ta suhestion ira naw nga artikulo?

¹⁷ Makasta nu kuammu i ngamin nga suhestion taw nga artikulo. I kada suhestion ay kagitta na rekadu ta tadday nga recipe. Nu pakkivuammu i ngamin nga rekadu, siguradu nga masingngo i pabbalinan natun. Nu kuattam i ngamin nga suhestion, malabanattam i negatibo ira nga mataga-tageno tam anna mas magayayya ittam ta ministerio.