Ammum Kari?
Ngatta egga ira i ari tu Israelita nga suddalu ni Patul David?
TA SUDDALU ira ni Patul David, egga ira i ari tu Israelita, kasali da Zelek nga Amonita, Urias nga Hiteo, anna si Itma nga Moabita. a (1 Cro. 11:39, 41, 46) Kasali gapa ta armada ni David danuri “Kereteo, Peleteo, anna Giteo.” (2 Sam. 15:18) Awayya na tu i Kereteo anna i Peleteo ira ay aranni ta lahi na Filisteo ira. (Eze. 25:16) Naggafu i Giteo ira ta siudad na Filisteo nga Gat.—Jos. 13:2, 3; 1 Sam. 6:17, 18.
Ngatta nipamavulu ni David i kuddanatun nga lallaki nga mabbalin tu suddalu na? Dakal gare i pattalo na nga matalo ira ta nisa anna mas ngana kani Jehova. Angngarigan na, kunnaw i kagian na The New Interpreter’s Dictionary of the Bible meyannung ta Kereteo anna Peleteo ira: “Matalo lagapa ira kani David maski ta karigatan ira nga paddia-paddian ta pappatul na.” Kunnasi? Tagga bi ta pinanawan na “ngamin nga lallaki na Israel” si Patul David tapenu tuttulan i “lalaki nga mamanggulu nga mangngagan tu Sheba,” matalo lagapa kani David i Kereteo anna i Peleteo ira anna zinuffunadda yayya nga pagimmangan i parrebelde ni Sheba. (2 Sam. 20:1, 2, 7) Mittan gapa, pinurueban na ana ni Patul David nga si Adonias nga agawan i trono. Ngem matalo lagapa i Kereteo anna i Peleteo ira kani David anna nanguffun ira tapenu matunno si Solomon, i pinili ni Jehova bilang tumunug nga patul.—1 Pat. 1:24-27, 38, 39.
I tadday paga nga ari tu Israelita nga kuruga matalo lagapa kani David ay si Ittai nga Giteo. Sinuportan ni Ittai anna na 600 suddalu na si Patul David tagga bi ta narrebelde i ana ni David nga si Absalom anna pinurueban na nga engganyuan i lallaki ta Israel nga pabbalinan yayya tu patul. Ta ollu, kinagi ni David kani Ittai nga ari yayya nga makiggerra para kani David gafu ta dayu mabba yayya. Ngem kinagi ni Ittai: “Itabbà nga adde ta sigga-matolay si Jehova anna sigga-matolay i yafù nga patul, maski sitaw i angngayan na yafù nga patul, maski ta patay onu ta inango, mevulu i aripammu!”—2 Sam. 15:6, 18-21.
Si Ittai ay matalo kani David, i pinili ni Jehova nga mappatul
Maski nu ari tu Israelita i Kereteo, i Peleteo, anna i Giteo ira, mangurug ira tu si Jehova i kurug nga Dios anna si David i pinili ni Jehova nga mappatul. Magga mappappabalo si David ta egga i kuddanatun nga matalo nga lalaki nga massuporta ta nisa!
a Mabibbig ta Deuteronomio 23:3-6 i dob na Dios nga mangigamma ta Amonita anna ta Moabita ira nga tullung ta kongregasion na Israel. Ngem yaw nga dob ay tumukoy laman ta pabbalin tu legal nga miembro na nasion anna ari nga igamma natun i ari tu Israelita ira nga makillivu-livu anna makipaddian ta totolay na Dios. Innan i Kaunawaan Mula sa Kasulatan, Tomo 1, p. 114.
