1. Kunnasi nga naorganisa i totolay ni Jehova ta ollu nga siglo?

 KADA egga i ipakua ni Jehova ta totolena, ekspektan na nga organisadu i pangngua da tatun. (1 Cor. 14:33) Angngarigan na, uray na Dios nga melayyagayya i mapia nga dumug ta interu mundo. (Mat. 24:14) Sinunno ni Jehova si Jesus nga mangirollu tatun nga trabahu. Siniguradu ni Jesus nga organisadu i ketuppal natun. Ta ollu nga siglo, habang mepataddag i kongregasion ira ta nadduruma nga lugar, egga ira i natunno nga mannakam tapenu mangiyawa tu direksion anna mangirollu. (King. 14:23) Ta Jerusalem, egga i tadday nga grupo na mannakam ira, nelagum ngana i apostol anna i lallakay ira. Ira i mangngua tu desision ira nga mawag tu tuttulan na ngamin nga kongregasion. (King. 15:2; 16:4) Megafu ta sinuppal na kongregasion ira i instruksion ira nga nalawa da, ‘nassikan i angngurug da anna nammungan i bilang da ta kadaggaw.’—King. 16:5.

2. Namegafu ta 1919, kunnasi nga nigiya anna pinakan ni Jehova ta espiritual i totolena?

² Tulu-tuloy lagapa nga organisan ni Jehova i totolena ta tiempo tam. Namegafu ta 1919, nangusa si Jesus tu baddi nga grupo na nazelugan nga lallaki tapenu organisan i trabahu nga pallayyagayya anna tapenu mangiyawa tu espiritual nga makan ta tagatuttul na ira. a (Luc. 12:42) Manawag nga bebbendisionan ni Jehova i trabahu natun nga grupo.—Isa. 60:22; 65:​13, 14.

3-4. (a) Mangusa tu angngarigan nu kunnasi ittam nga mabbenefisio ta pabbalin tu organisadu. (b) Anni i gigiammuattam taw nga artikulo?

³ Nu ari ittam nga organisadu, ari tam nga makua i nipatrabahu ni Jesus ta nittam. (Mat. 28:​19, 20) Nonopammu yaw: Awan  tu asayment tam nga teritoria. Gafu tatun, kada tadday ay mallayyagayya lagapa ta maski sitaw nga kayà na. Baka pakatotoli gapa nga malayyagayyan na nadduruma nga publisher i karuan nga teritoria, ngem egga ira i teritoria nga ari vuluvuga malayyagayyan. Anni paga i karuan nga pammakapiammu nu organisadu ittam?

⁴ Awayya tam nga pamarigan i kingngua ni Jesus taw ta davvun nu kunnasi ittam mabbalin tu organisadu ta tiempo tam. Taw nga artikulo, gigiammuattam i ammarigan ni Jesus anna nu kunnasi nga tuttulan na organisasion yatun. Ammuattam gapa nu kunnasi tam mepasingan nga mattalo ittam ta organisasion ni Jehova.

TUTTULAN NA ORGANISASIOTTAM I AMMARIGAN NI JESUS

5. Anni i kukukuan na organisasion tapenu matuttul i ammarigan ni Jesus? (Juan 8:28)

⁵ Nagigiammu ni Jesus ta Yama na ta langi nu anni i kuan na anna nu anni i ikagi na. Tuttulan na organisasion ni Jehova i ammarigan ni Jesus, yayya nga ibase natun i moral ira nga tuddu na anna i direksion natun ta Uvovug na Dios. (Bibbigan i Juan 8:28; 2 Tim. 3:​16, 17) Kanayun ittam nga maperaddamman nga bibbigan anna iyaplika i Biblia. Kunnasi ittam nga mammakapia nu tuttulattam yatun nga tabarang?

6. Anni i tadday nga kuattam tapenu mammakapia ta paggigiammu tu Biblia?

⁶ Dakal i pammakapiattam nu gigiammuattam i Biblia ta uffun na nebase-Biblia ira nga publikasiottam. Angngarigan na, mekumpara tam i ituttuddu na Biblia ta direksion nga malawa tam ta organisasion gukaban na publikasiottam ira. Nu masingattam nga nebase ta Biblia i direksion nga nalawa tam, mas dumakal i pattalo tam ta organisasion ni Jehova.—Roma 12:2.

7. Anni nga mensahe i nilayyagayya ni Jesus, anna kunnasi nga tuttulan na organisasion ni Jehova i ammarigan na?

⁷ Nilayyagayya ni Jesus “i Mapia nga Dumug nga meyannung ta Pammaguray na Dios.” (Luc. 4:​43, 44) Zinog gapa ni Jesus i disipulos na nga ilayyagayya i meyannung ta Pappatulan. (Luc. 9:​1, 2; 10:​8, 9) Ngamin sangawe nga netadday ta organisasion ni Jehova ay ilayyagayya da i mensahe na Pappatulan maski sitaw paga i diadda onu maski kunnasi paga kakaru i responsibilidad da.

8. Anni nga pribilehio i neyawa ta nittam?

⁸ Pribilehio tam nga ilayyagayya ta tanakuan i kinakurug meyannung ta Pappatulan na Dios! Ari nga kualipikadu i ngamin nga tolay para tatun nga pribilehio. Angngarigan na, ta kegga ni Jesus ta davvun, minanduan na i demonio ira nga ari ira nga makkagi nu sinni yayya. (Luc. 4:41) Maski sangawe, nige nga mevulu ta totolay ni Jehova i tadday nga tolay ta pallayyagayya, mawag tu kualipikadu yayya para tatun. Ipasingattam nga talaga appresiattam i pribilehio nga mallayyagayya nu approbetchattam yatun ta maski sitaw i diattam anna nu maski anni nga tiempo. Parigattam si Jesus nga goal tam nakuan nga imula anna bayatan i vukal ira na kinakurug na Pappatulan ta giffutuan na totolay.—Mat. 13:​3, 23; 1 Cor. 3:6.

9. Kunnasi nga nipakannammu na organisasion i ngagan na Dios?

⁹ Nipakannammu ni Jesus i ngagan na Dios. Ta pakimallo ni Jesus ta Yama na ta langi, kinagi na: “Nipakannammu taka nira.” (Juan 17:26) Gafu ta tuttulan na organisasion ni Jehova yatun nga ammarigan ni Jesus, kukukuan natun i adde na mawayya na tapenu makannammuan na tanakuan i ngagan na Dios. Dakal nga uffun tatun i New World Translation of the Holy Scriptures. Nitoli natun nga  translation i ngagan na Dios ta teksto ira nu sitaw orihinal nga nallawan yatun. Available ngana i interu nga translation natun onu i karuan nga libru ta maturu tu 270 nga lengguahe. Ta Appendix A4 anna A5 natun nga translation, mabibbig mu i informasion ira meyannung ta ketoli na ngagan na Dios ta Biblia. Masingan gapa ta Appendix C na Study Bible i aru nga ebidensia nga mamakurug nga mawag tu mallawan i ngagan na Dios ta Cristiano nga Griego nga Katurakan tu mami-237 nga beses.

10. Anni i magigiammum ta kinagi na babay nga taga-Myanmar?

¹⁰ Kagitta ni Jesus, kayà tam gapa nga duffunan i mas aru nga totolay adde ta posible tapenu mammuan i ngagan na Dios. Tadday nga 67 anios nga babay nga taga-Myanmar i nakatangi tagga ta nammuan na nga egga balo i ngagan na Dios. Kinagi na: “Yaw i first time ta pattolè nga naginnà nga Jehova i ngagan na Dios. . . . Nituddu nu ta nio i pinaka-importante nga awayyà nga mammuan.” Ipasingan natun nga ekspiriensa nga dakal i efekto na tari ira ta mapia i giffutuadda nu mammuadda i ngagan na Dios.

TULU-TULOY NGA IPASINGAN NGA MATTALO KA TA ORGANISASION

11. Kunnasi nga mepasingan na elder ira nga mattalo ira ta organisasion ni Jehova? (Innan gapa i letratu.)

¹¹ Anni i kuan na elder ira tapenu mepasingan nga mattalo ira ta organisasion na Dios? Nu makalawa i elder ira tu direksion, mawag tu bibbigadda tu mapia yatun anna iyaplika da yatun ta adde na mawayya da. Angngarigan na, makalawa ira tu direksion ari laman ta nu kunnasi nga ipresenta i parte ira ta study anna nu kunnasi nga makimallo para ta kongregasion, nu ari, nu kunnasi gapa nga tangngallan i karneru ira ni Cristo. Nu tuttulan na elder ira i direksion na organisasion, matageno na wawwaragi ta kongregasiodda nga awan tu manganni nira anna meddu ira.

12. (a) Ngatta makimoray ittam nakuan ta elder ira? (Hebreo 13:​7, 17) (b) Ngatta i positibo ira nakuan nga ugali na elder ira i agga-singattam?

¹² Nu makalawa ittam tu direksion maggafu ta elder ira, mawag tu sigga-paran nga tuttulattam yatun. Nu kuattam gare yatun, mas malogon para ta nira nga kuan i trabahu da. Pagaramman ittam na Biblia nga mabbalin tu minattuppal anna minakkimoray tari ira ta mangirollu. (Bibbigan i Hebreo 13:​7, 17.) Nu mittan, mariga yatun nga kuan. Ngatta? Megafu ta imperfekto danatun nga lalaki. Kayà gapa na kalabattam ira nga paddudattam nga usu-usan na Dios i organisasion na tapenu igiya ittam. Yayya nga nu negatibo i nononopattam meyannung ta elder ira, baka mamegafu ittam ngana gapa nga mannono tu negatibo meyannung ta organisasion anna mawawattam i pattalo tam tatun. Anni gafu i kuattam tapenu mammuattam anna malisiattam i kinaladdug ira na kalabattam?

ARI IPAMAVULUN NGA PAKKAFIAN NA TANAKUAN I PATTALO MU

13. Kunnasi nga puru-purueban nga daralan na kalaban ira na Dios i organisasion na?

¹³ Puru-purueban na kalaban ira na Dios nga palawanan tu negatibo danuri positibo nga gannug meyannung ta organisasion na. Angngarigan na, nagigiammu tam ta Biblia nga ekspektan ni Jehova nga mabbalin tu marenu ta pisikal, moral, anna espiritual danuri maddayaw ta nisa. Ikikkiddona nga malsa ta kongregasion i maski sinni nga pakakuan na i makaliwa ngem ari nga mabbabawi. (1 Cor. 5:​11-13; 6:​9, 10) Tuttulattam yatun nga dob ta Biblia. Ngem purueban na kalabattam ira nga usan yatun kontra ta nittam. Akusadda ittam nga sobra i ka-istrikto tam, mina-husga ittam, anna awan tu aya tam.

14. Sinni i promotor na laddug ira nga istoria meyannung ta organisasion?

 ¹⁴ Alippawatan nu sinni talaga i naggafuan na pangatake ira ta organisasion. Si Satanas nga Diablo i promotor na laddug ira nga istoria. Yayya “i yama ngamin na siri.” (Juan 8:44; Gen. 3:​1-5) Yayya nga ari tam ngana gafu makaddag nga usan ni Satanas i alipores na ira tapenu mangiwara tu kinaladdug ira meyannung ta organisasion ni Jehova. Nesimmu yatun ta ollu nga siglo.

15. Anni i kingngua na lider ira na relihion kani Jesus anna ta tagatuttul na ira?

¹⁵ Ta ollu nga siglo, maski nu perfekto si Jesus anna makapabbaw i milagro ira nga kingngua na, inusa ni Satanas i alipores na tapenu mangiwara tu aru nga kinaladdug meyannung ta nisa. Angngarigan na, kinagi na lider ira na relihion ta totolay nga i pakapangngua ni Jesus nga mamalawan tu demonio ay niyawa ta nisa na “prinsipe na demonio ira.” (Mar. 3:22) Ta kabista gapa ni Jesus, inakusan yayya na lider ira na relihion nga ininsulto na i Dios anna inengganyo da i magaru nga ipapatay yayya. (Mat. 27:20) Turi ta nallayyagayya gapa i tagatuttul ni Cristo, danuri kumokkontra ta nira ay “zinudduppangad-da i ginnonopan na Hentil ira tapenu kontrad-da” ira. (King. 14:​2, 19) Meyannung ta Kingngua 14:​2, kunnaw i nipakanawag na Disiembre 1, 1998 nga Passifusifutan: “Fuera paga ta ari nga nipangalawa danatun nga kumokkontra nga Judio ta mensahe na Cristiano ira, zinara-daral da gapa ira tapenu ikalussaw ira danuri na Hentil.”

16. Anni nakuan i daddammattam nu makaginna ittam tu laddug ira nga istoria?

¹⁶ Ari laman tu ta ollu nga siglo nga nalladda-laddug si Satanas. Maski adde sangawe, ilogo onu ‘tabagan na lagapa i interu nga tangaravvunan.’ (Nep. 12:9) Nu makaginna ka gafu  tu laddug ira nga istoria meyannung ta organisasion onu ta brother ira nga mangirollu, daddamman nu kunnasi nga trinatu na kalaban ira na Dios si Jesus anna i disipulo ira tagga. Sangawe, mapeppersigi anna mapara-parake lagapa i totolay na Dios, gitta na neprofesiya ta Biblia. (Mat. 5:​11, 12) Ngem ari ittam nga melogo na kinaladdug ira nu ammu tam nu sinni i naggafuan natun anna nu insigida ittam nga magguyu. Anni nakuan gafu i kuattam?

17. Kunnasi tam nga malillitan i peligro na laddug ira nga istoria? (2 Timoteo 1:13) (Innan gapa i kahon nga “ Anni Nakuan i Reaksiommu ta Laddug ira nga Istoria?”)

¹⁷ Panakitan i laddug ira nga istoria. Manawag i instruksion ira nga niyawa ni apostol Pablo nu anni i kuattam nu makaginna ittam tu laddug ira nga istoria. Nibilin na kani Timoteo nga ‘kagian na ta karuan tu ariadda nga ufutan i oras da ta paka-pakoli nga awan tu kakurugan na’ anna ‘ibita da i istoria ira nga ari mekunnay ta Dios, ta awan tu serbi danaw.’ (1 Tim. 1:​3, 4; 4:7) Nonopammu yaw: Baka dammokan na inosente nga abbing i tadday nga gannug ta datag tapus ipena yatun ta simu na. Ngem ari vuluvuga nga kuan yatun na adulto gafu ta ammu na tu delikadu yatun. Panakitattam gafu i laddug ira nga istoria megafu ta ammu tam nu sinni i naggafuan natun ira nga informasion. Imbes tu kunna, tuttulattam i ‘kinakurug.’—Bibbigan i 2 Timoteo 1:13.

18. Kunnasi tam mepasingan nga mattalo ittam ta organisasion ni Jehova?

¹⁸ Ginigiammu tam i tallu laman ta kukukuan na organisasion na Dios tapenu maparigan si Jesus. Ta paggigiammum paga tu Biblia, innammu i tanakuan paga nga kukukuan na organisasion tapenu matuttul i ammarigan ni Jesus. Duffunammu i wawwaragi ta kongregasion nga mas paga nga mattalo ta organisasion. Tulu-tuloy mu gapa nga ipasingan nga mattalo ka tatun. Matalo mu nakuan nga passerbian si Jehova anna ari mu vuluvuga panawan i organisasion nga usu-usan na tapenu kuan i urena. (Sal. 37:28) Nakuan gafu ta tulu-tuloy nga tagibalorattam i pribilehio nga metadday ta organisasion nu sitaw kavulu tam i minaggiddu anna matalo nga totolay ni Jehova.