1. Anni i kuan na Cristiano ira tapenu mabalidda i pareha na inango?

MAKIPPAREHA i Cristiano ira para ta inango. Maski nu bagu ittam pagalaman nga makkarela onu piga ragun ittam ngana nga makippareha, mawag tu tulu-tuloy ittam nga makkarela adde ta pagaddetan. Pagaramman ittam na tabarang ni apostol Pablo ta Cristiano ira ta Filipos nga balinan i pareha. Piga dagun ngana nga massesserbi kani Jehova i karuan nga miembro na ollu-siglo nga kongregasion turi ta nalawada i tura ni Pablo. Matalo ira ta passerbi kani Jehova, ngem niperaddam ni Pablo nira nga mawag tu tulu-tuloy ira nga magattam ta pareha. Kayàna nga tulu-tuloy nga tuttuladda i ehemplona nga ‘ikaguman nga makkarela adde ta pantay’ onu pagaddetan na karera.​—Fil. 3:14.

2. Ngatta mepangngo i tabarang ni Pablo ta taga-Filipos ira?

² Mepangngo yatun nga tabarang ni Pablo ta taga-Filipos ira. Ta gafu pagalaman, madara-darum ngana i kongregasion. Namegafu yatun turi ta zimittal da Pablo anni Silas ta Filipos ta dagun 50 C.E. gafu ta imbitasion na Dios nga ‘umay ira ta Macedonia.’ (King. 16:9) Nasimmuadda i babay nga mangngagan tu Lydia, nga ‘nagginna nira anna sinuluan na Yafu i nono na’ tapenu ginnan i mapia nga dumug. (King. 16:14) Nabawtisowan yayya kavulu i tangabbalayanna. Ngem namegafu ngana nga guluan ira na Diablo. Ginugguggun na lallaki na siudad da Pablo anni Silas anna niyarubadda ira ta ofisiales anna inakusadda ira nga mamanggulu. Megafu tatun, napala-palu, nefuku, anna napapanaw ta siudad da Pablo anni Silas. (King. 16:16-40) Simmuku kari ira? Ari vuluvuga! Kunnasi gapa i wawwaragi ta bagu pataddag nga kongregasion? Nagattam gapa ira! Siguradu nga kuruga napagaram ira ta makasta nga ehemplo da Pablo anni Silas.

3. Anni i ammu ni Pablo, anna anni ira nga pakkiavu i ikonsidera tam?

³ Determinadu si Pablo nga ari sumuku. (2 Cor. 4:16, NW ) Ngem ammuna nga tapenu mabalinna i pareha para ta inango,  mawag tu nakafokus yayya ta premyona. Anni i magigiammu tam ta ehemplo ni Pablo? Anni ira i moderno nga ehemplo na pangurug i mangipasingan nga makapagattam ittam maski problemadu? Kunnasi ittam moffunan na iddanama tam ta mappange tapenu ari vuluvuga nga sumuku?

4. Kunnasi nga nattalupaddian nga aktibo si Pablo maski nu anni i sirkumstansiana?

⁴ Nonopan i ngamin nga kukukuan ni Pablo turi ta nattura yayya ta taga-Filipos ira. Agga-fuku yayya ta balena ta Roma. Arianna makalawan tapenu mallayyagayya. Ngem, matalikarag lagapa nga layyagayyanna i bisita ira anna mattutura ta arayyu ira nga kongregasion. Ta maddaggun gapa, aru nga Cristiano nga ari makapanaw ta baleda gafu ta taki onu kinamanakam i mangapprobetsa ta kada oportunidad tapenu melayyagayya i mapia nga dumug turi ira ta mabbisita ta baleda. Magangngua gapa ira tu makapagaram ira nga tura ta totolay nga ariadda masimmuan tu personal.

5. Segun ta kinagi ni Pablo ta Filipos 3:12-14, anni i nakoffun tapenu makafokus yayya ta pamalinna ta pareha?

⁵ Ari nga nalsa i fokus ni Pablo ta passerbi kani Jehova megafu ta nappasa ira nga netuppalna onu ta nappasa ira nga liwana. Kakuruganna, kinagina nga mawag tu ‘kattamanna ngana i nappasa’ tapenu ‘makuana i adde na mawayyana nga madde i mappange,’ nga tumukoy ta pamalinna ta pareha. (Bibbigan i Filipos 3:12-14.) Anni i nakoffun kani Pablo tapenu makafokus yayya ta pamalinna ta pareha? Ollu, maski nu atannang ira i naddena ta Judaismo, minammatanna nga “basura” ngamin danatun. (Fil. 3:3-8) Mekadua, arianna nipamavulun nga magimmang yayya gafu ta pakkakonsensiana ta nappasa nga panara-darumna ta Cristiano ira. Mekatallu, ari yayya narrason nga makalanno ngana i nakuana kani Jehova. Aru i netuppal ni Pablo ta ministerio maski nefuku, nabara-barag, nasissillagan, anna nappeligro i inangona ta nadaral i barku nga nattakayanna, anna nakkurang yayya tu makan anna sinnun. (2 Cor. 11:23-27) Ngem, maski paga ta ngamin nga netuppal anna inattamman ni Pablo, ammuna nga mawag tu tulu-tuloy i passerbina kani Jehova. Kunnatun ittam nakuan gapa.

6. Anni i karuan ta “nappasa” nga mawag tu kattamattam ngana?

⁶ Kunnasi tam maparigan i ehemplo ni Pablo nga ‘kattaman ngana i nappasa’? Awayyana nga laba-labanan na karuan nittam i pakkakonsensia megafu ta nappasa ira nga liwa. Nu kunnatukka, ngatta ariammu personal nga gigiammuan i sakrifisio nga tavvu ni Cristo? Nu gigiammuan, nonopan tu mapia, anna ipakimallo mu yatun nga makapagaram nga topiko, ariammu ngana makonsensia megafu ta malippawa anna akseptammu nga napakoma ka ngana ni Jehova. Innattam paga i tadday nga leksion nga mala tam kani Pablo. Pinanawan na karuan i trabahuda nga posible nga mamarriku nira tapenu pagolluan i interes na Pappatulan. Nu kunnatun, mawayya tam kari nga kattaman ngana i nappasa gukaban na ari ngana pakkaraga ta material ira nga gannug nga posible nga nala tam nakuan? (Num. 11:4-6; Ecl. 7:10) Kasali paga ta “nappasa” danuri gannug nga netuppal tam onu ziga-riga ira nga naattammattam dati. Siempre, nu nonopattam nu kunnasi ittam binendisionan anna sinuportan ni Jehova ta nappasa, mas nga maddukko ittam ta Yama tam. Ngem, ariattam nakuan nonopan nga kontentu tam ngana anna hustu ngana i nakua tam para kani Jehova.​—1 Cor. 15:58.

7. Segun ta 1 Corinto 9:24-27, anni i mawag nga kuan na makkarela tapenu mangaffu ta pareha? Iyilustra.

⁷ Natindian tu mapia ni Pablo yaw nga kinagi ni Jesus: “Kuan nu i adde na awayya nu.”  (Luc. 13:23, 24) Ammu ni Pablo nga kagitta ni Cristo, mawag tu kuanna i adde na mawayyana ta interu nga pattolena. Yayya nga nikumparana i pattolay na Cristiano ta tadday nga pareha. (Bibbigan i 1 Corinto 9:24-27.) I makkarela ta pareha ay mawag tu nakafokus ta pagaddetanna anna arianna mappa-afekto ta maski anni. Angngariganna, ta pakkarelanna, baka maddalan yayya ta dalan nga aru i pallakuan anna gannug ira nga makalsa ta fokusna. Magimmang kari i tadday nga makippareha tapenu innan i nakaplasta ira nga laku tatun? Arianna kuan yatun nu kayàna i mangaffu! Ta pareha para ta inango, mawag tu ibita tam gapa danuri maka-istorbo nittam. Nu nakafokus ittam ta premyo ta pareha tam, anna kuattam i adde na mawayya tam gitta ni Pablo, malawa tam gapa i premyo!

8. Anni i tallu nga kapurueba nga ikonsidera tam?

⁸ Ikonsidera tam ngana i tallu nga kapurueba nga posible nga mamagimmang nittam. Danatun ay ekspektasion ira nga ari paga nesimmu, pakkafi na gawa-gawayyan, anna mabayag ira nga kapurueba. Mabenefisiowan ittam ta pinagattam na tanakuan tatun ira nga situasion.​—Fil. 3:17.

9. Anni i efekto nittam na ekspektasion ira nga ari paga nesimmu?

⁹ Ekspektasion ira nga ari paga nesimmu. Normal laman nga ekspektattam i makasta ira nga gannug nga nipromesa ni Jehova. Kunnatun gapa si profeta Habakuk turi ta inekspektana nga pagultimuan ni Jehova i marake nga paddia-paddian ta Juda. Ngem kinagi ni Jehova nisa nga ‘tulu-tuloy nga innagganna yatun.’ (Hab. 2:3) Nu gittana ari paga nesimmu i ekspektattam ira, awayyana nga mawawan i talikarag tam. Baka makkafi paga lagu i nono tam. (Prov. 13:12) Nesimmu yaw ta karuan nga wawwaragi ta gafu na meka-20 nga siglo. Tatun nga tiempo, aru ta nazelugan ira nga Cristiano i magekspekta nga umay ira ta langi ta 1914. Ngem turi ta ari nesimmu yatun, anni i kingngua na matalo ira tapenu marubang i ari paga nesimmu nga ekspektadda?

10. Anni i kingngua na tadday nga magatawa turi ta ari paga nesimmu i ekspektadda?

¹⁰ Ikonsidera i ehemplo na dua nga matalo nga Cristiano nga naattammadda i kunnatun  nga pakkadismaya. Nabawtisowan si Brother Royal Spatz turi ta 1908 ta edad nga 20. Dakal i komfiansana nga aranni ngana yayya nga umay ta langi. Kakuruganna, turi ta kiddawanna ngana i lima na mabbalin tu atawana nga si Pearl turi ta 1911, kinagina nisa: “Ammum nu anni i mesimmu sonu 1914. Nu makkasal itta, mawag tu ariatta ngana italattan!” Nagimmang kari nga nakippareha para ta inango yaw nga magatawa turi ta ariadda minay ta langi ta 1914? Ari, megafu ta nakafokus ira ta matalo nga passerbi kani Jehova, ari tu ta paggangeda ta langi. Determinadu ira nga magatta-attam durante nga makippareha. Kakuruganna, nattalupaddian nga aktibo anna matalo ta aru paga nga dagun da Royal anni Pearl adde ta nabalidda i neravvunan nga pattoleda. Siguradu nga iinnaggammu gapa i tiempo sonu idefensa ni Jehova i ngaganna anna i soberaniana, anna tuppalanna i ngamin nga promesana. Makasiguradu ka nga danatun nga gannug ay mesimmu noka ta tiempo nga pinili ni Jehova. Adde ta ari paga nesimmu danatun, kanayun nakuan nga okupadu ittam ta passerbi ta Dios tam anna ari ipamavulun i ekspektasion ira nga ari paga nesimmu nga mamakkafi ta nono tam onu mamagimmang nittam.

11-12. Ngatta makapattalupaddian nga matalo ta passerbi kani Jehova maski nu makkafi ngana i gawa-gawayyattam? Mangiyawa tu angngarigan.

¹¹ Pakkafi na gawa-gawayyan. Ari tu kagitta na literal nga makippareha, ari kawagan nga masikakka ta pisikal tapenu tulu-tuloy i papprogresom ta espiritual. Kakuruganna, aru danuri maski nakkafi ngana i gawa-gawayyadda i napattalupaddiadda lagapa i determinasiodda nga mapprogreso ta espiritual. (2 Cor. 4:16) Angngariganna, turi ta 88 anios ngana si Brother Arthur Secord, * 55 dagun ngana yayya ta Bethel. Makafi ngana i gawa-gawayyanna. Tadday aggaw, minaranni nisa i tadday nga nars tapenu iyawa i pakawaganna. Iningan yayya na nars anna masippo nga kinagina nisa: “Brother Secord, ararayyu ngana i biniahe naw nga baggi ta passerbi kani Jehova.” Ngem ari nakafokus si Brother Secord ta nappasa ira nga nakuana. Nallipay yayya ta nars, giminalo, anna kinagina: “Wan fustu yatun. Ngem ari tu importante nu anni ngana i nakua tam. Mas importante nu anni ngana i kukukuattam mamegafu sangawe.”

¹² Baka aru nga dagun ka ngana nga massesserbi kani Jehova anna sangawe, ariammu ngana makua i dati ira nga makuam megafu ta pakkafi na gawa-gawayyammu. Nu kunnatun, ari nakuan makkafi i nono mu. Makasiguradu ka nga tagibaloran ni Jehova i matalo nga passerbim nisa ta nappasa. (Heb. 6:10) Ngem ta maddaggun, daddamman nga i interu-kararua nga  debosion ay ari magukug ta karu na kingnguam ta passerbi kani Jehova. Mepasingattam lallagu i konag na debosiottam gukaban na pangipasingan tu positibo nga espiritu anna pagangngua ta adde na mawayya tam maski makafi ittam ngana. (Col. 3:23) Ammu ni Jehova i limitasiottam ira anna arianna ikiddaw i gannug nga ariattam meyawa.​—Mar. 12:43, 44.

13. Kunnasi ittam pagaramman na ekspiriensa da Anatoly anni Lidiya nga tulu-tuloy ta matalo nga passerbi kani Jehova maski ta aru nga kapurueba?

¹³ Mabayag ira nga kapurueba. Piga dekada nga inattamman na karuan nga aripan ni Jehova i ziga anna kadara-darum. Angngariganna, 12 anios laman si Anatoly Melnik * turi ta naaresto i yamana, nefuku, anna netabbo ta Siberia nga maturu tu 7,000 kilometro i karayyuna ta familiana ta Moldova. Kabalin na tanga-ragun, netabbo gapa ta Siberia si Anatoly, i yenana, anna i kako anna kakena. Ta pappasa na tiempo, maka-atende ngana ira tu study ta tanakuan nga ili, ngem mawag tu lumakag ira tu 30 kilometro ta tiempo na payyelo, anna attammadda i grabe nga lammin. Tapus, tallu ragun gapa nga nefuku si Brother Melnik anna neyarayyu ta atawana nga si Lidiya anna ta tanga-ragun pagalaman nga anada nga babay. Maski piga dagun nga naziga-rigatan da Anatoly anna i familiana, ariadda lagapa nga nagimmang ta matalo nga passerbi kani Jehova. Sangawe, 82 anios ngana si Anatoly anna miembro na Branch Committee ta Central Asia. Kagitta ni Anatoly anni Lidiya, kuattam nakuan i adde na mawayya tam ta passerbi kani Jehova anna itulu-tuloy tam i magattam gitta na kingngua tam ta nappasa.​—Gal. 6:9.

14. Anni i nalippawa ni Pablo nga mawag tu kuanna tapenu madde i addetanna?

¹⁴ Siguradu si Pablo nga mabalinna i karera anna maddena i addetanna. Bilang nazelugan nga Cristiano, iddanamanna nga mala i ‘premyo nga yaw i bagu nga attolay nga pagagalan na Dios.’ Ngem, tapenu maddena yatun nga addetanna, nalippawana nga mawag tu ‘kagumananna i makkarela.’ (Fil. 3:14) Nangiyusa si Pablo tu interesante nga ilustrasion tapenu duffunan i taga-Filipos ira nga pattalupaddianan i fokusda ta addetadda.

15. Kunnasi nga inusa ni Pablo i ilustrasion na pakipagileli tapenu ipagaram ta Cristiano ira ta Filipos nga ‘kagumanadda i makkarela’?

¹⁵ Niperaddam ni Pablo ta taga-Filipos ira i pakipagilelida ta langi. (Fil. 3:20) Ngatta mawag tu daddammadda yatun? Tatun nga tiempo,  aru i benefisio na makipagileli ta Roma. * Ngem, egga i mas makasta nga pakipagileli na nazelugan ira nga Cristiano, megafu ta mangiyawa yatun nira tu mas aru nga benefisio. Balabaddi laman i benefisio na pakipagileli ta Roma kumpara ta pakipagileli ta langi! Gafu tatun pinagaram ni Pablo i taga-Filipos ira nga ‘mawag nga mattolay [“makipagileli,” NW ] ira nga mekunnay ta evanghelio ni Cristo.’ (Fil. 1:27) Makakkasta i ehemplo na nazelugan ira nga Cristiano ta maddaggun nga tulu-tuloy nga masserbi adde ta maddeda i addetadda nga mannanayun nga inango ta langi.

16. Maski anni paga i iddanama tam, anni nakuan i itulu-tuloy tam nga kuan segun ta Filipos 4:6, 7?

¹⁶ Maski paga mannanayun nga inango ta langi onu ta paraiso nga davvun i iddanama tam, mawag tu ikagumattam nga makkarela tapenu mala yatun. Maski anni paga i sirkumstansia tam, mawag tu ariattam ngana lipayan i gannug ira nga nappasa; onu ipamavulun i maski anni nga makefugag ta papprogreso tam. (Fil. 3:16) Baka ari paga nesimmu i ekspektasiottam ira, onu makkafi ngana i gawa-gawayyattam. Onu inattammattam i kaziga-riga anna kadara-darum ta napakaru nga dagun. Maski anni paga i situasionnu, “arian nu nga kavurungan i anni laman nga gannug.” Ipakannammunu lallagu ta Dios i kayànu ira nga kiddawan anna i pakimemallonu ira, anna iyawana nikamu i imammo nga mas paga anne ta manononu.​—Bibbigan i Filipos 4:6, 7.

17. Anni i ikonsidera tam ta tumunug nga artikulo?

¹⁷ Gitta na tadday nga makippareha nga kuanna i adde na mawayyana durante nga umara-aranni ta pagaddetan, paray nakuan tu kanayuttam nga nakafokus ta addetattam nga balinan i pareha na inango. Adde ta ipamavulun na gawa-gawayyattam anna sirkumstansia tam, kuattam nakuan i adde na mawayya tam anna mapprogreso tapenu madde i makasta ira nga gannug ta mappange. Anni i kuattam tapenu mattulu-tuloy ittam ta fustu nga direksion anna makapagattam durante nga makkarela? Uffunan ittam na tumunug nga artikulo tapenu makangngua tu fustu ira nga prayoridad anna tapenu ‘mapili i kapianan ta ngamin.’​—Fil. 1:9, 10.