EGGA kari i asayment ta kongregasion nga kakayà mu ngem ariammu paga madde sangawe? Awayyana nga responsibilidad yatun nga neyawa ta tanakuan. Onu baka tadday yatun nga asayment ta passerbi onu pribilehio nga dati nga responsibilidad mu. Ngem megafu ta edad, pakkafi na gawa-gawayyan, ziga ta pattolay, onu responsibilidad ira ta familia, limitadu ngana i makuam. Onu baka mawag tu ibbattammu ngana i nabayag nga responsibilidad mu megafu ta panguloli ta organisasion. Maski anni paga tatun, baka matageno mu nga ariammu ngana nga makua i ngamin nga kayà mu nga kuan ta passerbi ta Dios. Tatun ira nga situasion, normal laman nga makkafi i nono mu. Ngem kunnasim labanan i negatibo ira nga emosiommu​—gitta na pakkadismaya, papporay, onu pattaki na nono? Kunnasim mapattalupaddian i pagayayya mu?

Makagigiammu tam ta ehemplo ni Juan Bautista nu kunnasi pattalupaddianan i pagayayya tam. Aru nga makkarasta nga pribilehio i naekspiriensa ni Juan, maski nu tanakuan ta inekspektana i nesimmu ta serbisiuna kani Jehova. Arianna vuluvuga inekspekta nga mas apaddu i tiempo na kefukuna anne ta kapaddu na ministeriona. Ngem, magayayya lagapa si Juan, anna pinattalupaddianna yatun nga pagimamma ta interu pattolena. Anni i nakoffun nisa? Kunnasi ittam makapagayayya uli maski nu aru nga pakkadismaya i maekspiriensa tam?

Mga-Abril 29 C.E., nigafu ni Juan i asaymentna nga mangivuka tu dalan para ta Mesias, nu sitaw kakkagianna: “Mabbabawi kamu anna pallikuran nu i marakay nga kukukuan nu, ta aranni ngana i Pammaguray na Dios.” (Mat. 3:2; Luc. 1:12-17) Aru i nagginna nisa. Kakuruganna, naggafu paga ta arayyu ira nga lugar i totolay tapenu laman maginnada i mensahena, anna aru i nagguyu nga mabbabawi anna mappabawtiso. Magutu gapa nga inabisowan ni Juan danuri magappappe nga lider ira na relihion nga mapanunnutan ira nu ariadda manguli. (Mat. 3:5-12) Kingngua ni Juan i pinaka-importante nga gannug ta ministeriona turi ta binawtisowanna si Jesus mga-Oktubre 29 C.E. Namegafu tatun, inabisowan ni Juan i tanakuan nga tuttuladda si Jesus, i nepromesa nga Mesias.​—Juan 1:32-37.

 Kunnaw i makagi ni Jesus ta nerumu-ruma nga papel ni Juan: “Ta kakurugan na kagiak-ku nikamu: awan tu neyana nga mas dakal i kekwentan na anne kani Juan Bautista.” (Mat. 11:11) Siguradu nga nagayayya si Juan ta bendision ira nga nalawana. Gitta ni Juan, aru gapa sangawe i nakalawa tu aru nga bendision. Tadday nga angngarigan si Brother Terry. Maturu tu 50 dagun ira na atawana nga si Sandra ta ngamin-tiempo nga serbisiu. Kunni Terry: “Aru ira i nappasakku nga makkarasta nga pribilehio. Payunir, Bethelite, espesial payunir, manangngal ta sirkito, manangngal ta distrito, anna sangawe espesial payunir uli.” Talaga makapagayayya i makalawa tu teokratiko ira nga pribilehio, ngem gitta na nagigiammu tam ta ehemplo ni Juan, mawag tu mappursigi ittam tapenu mapattalupaddian yatun maski nu manguli i sirkumstansia tam.

I sekreto na sigga-pagayayya nga pagattam ni Juan Bautista ay i kanayun nga pangappresiana ta pribilehiona. Ikonsidera yaw. Kabalin na bawtismo ni Jesus, mas baddi ngana i tumuttul kani Juan anna mas aru ngana i tumuttul kani Jesus. Megafu ta mavurung i disipulos ni Juan, minay ira sa anna kinagida: “Egga yaya taw nga mamawtiso, ay umay ngana ngamin sa i totolay.” (Juan 3:26) Simibbag si Juan: “I nobio ay para sa i nobia. I kofun na nobio ay agga-taddag ta biko na anna kuruga magayaya nga maggigginna ta ngaral na. Kunnaw gapa nga awan ngana tu pakkurangan na pagayaya ku.” (Juan 3:29) Ari nga nakikompetensia si Juan kani Jesus; ni tu ninono ni Juan nga bimmaddi ngana i pribilehio ira nga nalawana megafu ta mas importante i trabahu ni Jesus. Nattalupaddian lagapa nga magayayya si Juan megafu ta tagibaloranna i papelna bilang i “kofun na nobio.”

Nakoffun i pagimamma ni Juan tapenu mattalupaddian nga magayayya maski nu mariga i asaymentna. Angngariganna, neyana si Juan nga Nazareo, yatutta megamma nisa i minum tu binarayang. (Luc. 1:15) “Zimittal si Juan nga nagayuno anna ari nga mininum ta binarayang,” kinagi ni Jesus, bilang pattukoy ta simple nga pattolay ni Juan. Ngem si Jesus anna i disipulosna ay ari tu sakup ta tabba na Nazareo anna normal lagapa i pattoleda. (Mat. 11:18, 19) Ari gapa nga nammilagro si Juan, ngem ammuna nga i disipulos ni Jesus, nelagum ngana i karuan nga dati nga disipulos ni Juan ay neddan tu pakapangngua nga mammilagro. (Mat. 10:1; Juan 10:41) Imbes nga agga-nonona i kunnatun nga nadduman na disipulosna anna na disipulos ni Jesus, matalikarag nga sinuppal ni Juan i asaymentna nga niyawa sa ni Jehova.

Nu tagibalorattam gapa i maddaggun nga asayment tam ta passerbi kani Jehova, memmugurattam i pagayayya tam. Kunni Terry nga nakagi ta gafu, “Nakafokus ngà ta kada asayment nga meyawa niakan.” Nu lipayanna i pattolena ta ngamin-tiempo nga serbisiu, kunna, “Awan vuluvuga tu pabbabawyakku, nu ari, puru makkarasta nga ekspiriensa i meraddammakku.”

Maponag tam i pagayayya tam nu nonopattam nu ngatta espesial i maski anni nga asayment onu responsibilidad ta passerbi kani Jehova. Yatun ay megafu ta pribilehio i mabbalin tu ‘katrabahu na Dios.’ (1 Cor. 3:9, NW ) Mapattalupaddian i kasta na tadday nga nabalor nga gannug nu kanayun nga memmuguran yatun. Kunne na gapa, mapattalupaddiattam i pagayayya tam nu agga-nono tam nga tadday nga pribilehio i makipattrabahu kani Jehova. Ibita tam nga ikumpara i sakrifisio tam ira ta sakrifisio ira na tanakuan. Ariattam nonopan nga mas nabalor i trabahu na tanakuan anne ta iyayawa nittam ni Jehova nga trabahu.​—Gal. 6:4.

Ammu ni Juan nga malimitan noka i ministeriona, ngem baka arianna inabbo nga insigida nga mangultimu yatun. (Juan 3:30) Ta 30 C.E., ma-annam nga vulan kabalin nga binawtisowan ni Juan si Jesus, nipefuku yayya ni Patul Herodes. Ngem, kingngua lagapa ni Juan i adde na mawayyana tapenu itulu-tuloyna nga kuan i fustu. (Mar. 6:17-20) Anni i nakoffun nisa tapenu mapattalupaddianna i pagayayyana taw nga panguloli? Nakafokus yayya ta espiritual ira nga gannug.

Durante nga egga ta affukutan si Juan, nadumugna i meyannung ta pamalawa ni Jesus ta ministeriona. (Mat. 11:2; Luc. 7:18) Kumbinsidu si Juan nga si Jesus i Mesias ngem awayyana nga  ninonona nu talaga metuppal ni Jesus i ngamin nga kinagi na Katurakan nga metuppal na Mesias. Megafu ta mabbalin tu patul i Mesias, mamegafu ngana kari i pammaguray ni Jesus? Yatun ngana kari i mangilawan kani Juan ta affukutan? Megafu ta kakayà ni Juan nga mas malippawa paga nu anni i papel ni Jesus, naddog yayya tu dua nga disipulosna tapenu makkiavu kani Jesus: “Sikaw kari yuri duttal nga kinagi ni Juan onu egga paga tanakuan nga innaggam-mi?” (Luc. 7:19) Ta panolida, siguradu nga nagginna tu mapia si Juan durante nga istoriadda i milagro nga pinanguru ni Jesus anna i pinaddogna nira nga ipakolida yaw kani Juan: “Makasingan i vuling ira, makalakag i pilay, mammapia i mallepproso, makaginna ngana i bangngag, maginnolay i natay ira, anna melayya-gayya i Mapia nga Dumug ta mariga ira.”​—Luc. 7:20-22.

Siguradu nga napasikan si Juan ta nipadumug na disipulosna. Pinakurug natun nga tuttuppalan ni Jesus i Mesianiko ira nga profesiya. Maski ari nga nilawan ni Jesus si Juan ta affukutan, ammu ni Juan nga nabala-balor i ministeriona. Maski kunnatun i situasionna, egga i rasonna tapenu magayayya.

Kagitta ni Juan, nu maffokus ittam ta espiritual ira nga gannug, magayayya anna mapasensia ittam nga makapagattam. (Col. 1:9-11) Makua tam yatun gukaban na pabbibbig tu Biblia anna monag nga pannono tatun anna i kanayun nga pannono nga nabalor i passerbi tam ta Dios. (1 Cor. 15:58) Kinagi ni Sandra: “I pabbibbig tu tadday nga kapitulo na Biblia kada aggaw i nakoffun nio tapenu mas maddukko kani Jehova. Zinuffunannà natun nga maffokus nisa anna ari tu ta baggì.” Puede tam gapa maffokus ta report ira na trabahu na wawwaragi para kani Jehova, anna makoffun yatun tapenu ari tu baggi tam laman i agga-nono tam. “Megafu ta vinulan nga programa na JW Broadcasting^®, natagenomi nga mas naddukko kami ta organisasion,” kunni Sandra, “anna napattalupaddiammi i pagayayyami ta asaymentmi.”

Maski nu ababba laman i tiempo nga pinallayyagayya ni Juan Bautista, ‘masikan anna makapangngua yayya nga kagitta gari ni Elias,’ anna gitta ni Elias, “kagitta tam gapa [yayya] nga tolay” ta panageno. (Luc. 1:17; Sant. 5:17) Nu parigattam i ehemplona ta pangappresia anna paffokus ta passerbi kani Jehova, mapattalupaddiattam gapa i pagayayya tam ta passerbi para ta Pappatulan maski anni paga i mesimmu.