1. Anni i kayà tam ngamin para ta kafamilia onu parientes tam?

“NAMEGAFU tagga ta nammuakku i kinakurug, kayà ku nga makavulu nakuan noka ta Paraiso i interu familià,” kunna sister nga si Pauline. * “Guggustù nakuan nga kavulu ku i atawà nga si Wayne, anna i abbimmi nga lalaki ta passerbi kani Jehova.” Egga kari ira i kafamiliam onu parientes mu nga ariadda paga ammammu onu ayatan si Jehova? Baka matageno mu gapa i gitta na natageno ni Pauline ta familiana.

2. Anni ira nga pakkiavu i tabbagattam taw nga artikulo?

² Ariattam puede nga fuersan i kafamilia onu parientes tam nga alawatan i mapia nga dumug, ngem awayya tam ira nga pagaramman nga vukatadda i ginnonopan anna giffutuadda ta mensahe na Biblia. (2 Tim. 3:14, 15) Ngatta mawag tu layyagayyattam ira? Ngatta alippawatattam nakuan i mataga-tagenoda? Anni i makua tam tapenu moffunan ira nga ayatadda si Jehova gitta tam? Anni i meyuffun nittam na kongregasiottam?

3. Segun ta 2 Pedro 3:9, ngatta mawag tu layyagayyattam i kafamilia anna parientes tam?

³ Aranni ngana nga daralan ni Jehova yaw nga sistema. Danuri laman “mepangngo nga mangalawa tu mannanayun nga inango” i mepaliag. (King. 13:48, NW ) Aru nga tiempo anna sikan i usattam tapenu layyagayyan danuri estrangheru ta lugar tam, yayya nga natural laman nga kayà tam gapa nga layyagayyan i kafamilia tam tapenu makavulu tam ira nga masserbi kani Jehova. Si Jehova ay meddu nga Yama tam, yatutta “arian na nga ikaya tu egga i madaral, ngem ikaya na tu pallikuran na ngamin  nga totolay i katagaruliad-da.”​—Bibbigan i 2 Pedro 3:9.

4. Anni i kamali nga awayya nga makua tam nu layyagayyattam i kafamilia tam?

⁴ Daddammattam nga egga i fustu anna egga gapa i mali nga pangikagi ta mensahe na kapaliag. Angngariganna, baka mas masippo ittam nu estrangheru i layyagayyattam, ngem baka bombastiko ittam nu ta kafamilia tam.

5. Anni nakuan i daddammattam nige tam ipakiyuvovug i kinakurug ta kafamilia onu parientes tam?

⁵ Nu keraddammattam turi ta ollu nga nilayyagayyattam i kafamilia onu parientes tam, baka mabbabawi ittam onu nonopattam nga tanakuan nakuan i pinakiyuvovug tam nira. Nitabarang yaw ni apostol Pablo ta Cristiano ira: “Kanayun gapa nakuan nga makapagayaya anna makapagustu i uvovugan nu, anna ammu nu nakuan i mepangngo nga itabba-tabbag nu ta ngamin nga totolay.” (Col. 4:5, 6) Makasta nu agga-nono tam yatun nu kibbidattam i parientes tam. Ta nu ari, baka matakitattam ira imbes nga moffunan ira nga magginna nakuan nittam.

6-7. Mangistoria tu ekspiriensa nga mangipasingan nga importante ta Cristiano ira nga mangipasingan tu empatia ta ari-Saksi nga atawada.

⁶ Maki-empatia. Kunnaw i kinagi ni Pauline nga natukoy ta gafu: “Ta ollu, puru espiritual laman nga gannug i kayà ku nga ipakiyuvovug ta atawà. Awan tu ‘normal’ nga pagistoriammi.” Ngem awan kuruga tu ammu na atawa ni Pauline nga si Wayne meyannung ta Biblia, yatutta arianna matindian i kakkagian ni Pauline. Para kani Wayne, puru meyannung ta relihion ni Pauline i iistorianna. Mavurung si Wayne nga baka delikadu i sekta nga sinallungan na atawana anna baka nelogo yayya.

⁷ Inamin ni Pauline nga ta ollu, napakaru i  tiempo nga puru wawwaragi ta kongregasion i kakavvuluna kada gabi anna kada weekend​—ta study ira, ta ministerio, anna ta okasion ira. “Nu mittan, awan tu danganan ni Wayne ta balemi, yatutta matagenona nga magitetadday yayya,” istorian ni Pauline. Siempre, kanappan ni Wayne i atawana anna i anada nga lalaki. Arianna ammu nu sinni ira i kakavvuluda, anna gittana mas nabalor ngana kani Pauline i bagu ira nga kofunna anne nisa. Anni i reaksion ni Wayne? Inananassinna si Pauline nga idiborsiona yayya. Anni nakuan i kingngua ni Pauline tapenu nakepasingan yayya tu empatia?

8. Segun ta 1 Pedro 3:1, 2, anni i mas dakal i efektona ta kafamilia anna parientes tam?

⁸ Mangipasingan tu makasta nga ehemplo. Maruddu nga mas dakal i efektona ta kafamilia tam i kuattam anne ta kagiattam. (Bibbigan i 1 Pedro 3:1, 2.) Nalippawa gabbalaman ni Pauline yatun. “Ammù nga iddeddukan nakami ni Wayne anna manakina mabba talaga i makidiborsio,” kunna. “Ngem gafu ta pangananassinna nga idiborsionà, narekunnisì nga mawag tu iyaplikà i kakkagian ni Jehova meyannung ta pagatawa. Mas importante nga mabbalin ngà tu makasta nga ehemplo anne ta puru pallayyagayyà nisa.” Niyemmang ni Pauline nga fuersan si Wayne nga makiyuvovug meyannung ta Biblia, anna pinegafuananna nga makibbida nisa meyannung ta inaggaw ira nga mesissimmu. Nasingan ni Wayne nga mas nabbalin tu memammo si Pauline, anna mas nassippo anna minattuppal i anada. (Prov. 31:18, 27, 28) Ta pakasingan ni Wayne ta makasta nga efekto na mensahe na Biblia ta familiana, vinukatanna i nono anna i futuna ta mensahe na Biblia.​—1 Cor. 7:12-14, 16.

9. Ngatta tulu-tuloy nakuan nga mappursigi ittam nga uffunan i kafamilia anna parientes tam?

⁹ Tulu-tuloy nga mappursigi nga uffunan i kafamilia  anna parientes mu. Si Jehova i nangipasingan tu ehemplo nittam. “Pakatotoli” nga niddanna i totolay tu tiansa nga alawatan i mapia nga dumug tapenu mapeggan ira tu inango. (Jer. 44:4) Kinagi ni apostol Pablo kani Timoteo nga mappursigi yayya nga uffunan i tanakuan. Ngatta? Megafu ta nu kunnatun i kuanna, mepaliagna i baggina anna danuri i magginna nisa. (1 Tim. 4:16) Ayatattam i kafamilia anna parientes tam, yatutta kayà tam nga mammuadda i kinakurug ira ta Biblia. Ta pappasa na tiempo, navvunga gabbalaman i kinaga-kagi anna i kikkingngua ni Pauline para ta familiana. Magayayya ngana yayya sangawe nga masserbi kani Jehova kavulu i atawana. Parehu ira nga payunir, anna elder ngana si Wayne.

10. Ngatta mawag nga mabbalittam tu mapasensia?

¹⁰ Mabbalin tu mapasensia. Turi ta nigafu tam ngana nga iyaplika ta pattoletam i estandarte ira na Dios, awayyana nga marigatan i kafamilia anna parientes tam nga makibagay ta bagu nga pangurug tam anna pattoletam. Maruddu nga i ollu nga mapansidda ay ariattam ngana nga makipasselebra nira ta relihioso ira nga okasion anna ariattam ngana nga makisali ta pulitika. Posible nga ikalussaw ittam na karuan nira ta gafu. (Mat. 10:35, 36) Ngem ariattam nakuan nga nonopan nga ariadda ngana manguli. Nu iyemmattam ngana ira nga uffunan nga alippawatan i pangurug tam, gittana hinusgattam ngana ira nga ari ira mepangngo nga mangalawa tu mannanayun nga inango. Ari nga niyawa ni Jehova nittam i trabahu nga manghusga​—trabahu yatun ni Jesus. (Juan 5:22) Nu mapasensia ittam, awayyana nga magginna gabbalaman noka ta mensahe tam i kafamilia anna parientes tam.​—Innan i kahon nga “ Usattam tu Mapia i Website Tam.”

11-13. Anni i magigiammu tam ta pinattratu ni Alice ta maganana?

¹¹ Masippo ka nakuan ngem kammu ipamavulun nga ulian na kafamiliam onu parientes mu i desisiommu. (Prov. 15:2) Ikonsidera i ekspiriensa ni Alice. Nagigiammuna i meyannung kani Jehova ta keggana ta tanakuan nga nasion nga arayyu ta maganana nga ateista anna aktibo ta pulitika. Natagenona nga mawag tu insigida nga mekagina ta maganana i makasta ira nga gannug nga nagigiammuna. “Nu ibaya-bayag mu nige mu nga ikagi i panguli ira ta kurugammu anna annangnguam,” kunni Alice, “mas makaddagan sangaw i kafamiliam.” Namadday yayya tu tura ira ta maganana nga iyavuna nira nu anni i makagida ta tuddu ira na Biblia meyannung ta topiko ira nga ammuna nga paginteresadda, gitta na aya. (1 Cor. 13:1-13) Nappabalo yayya ta maganana ta pinamadakal anna pinanangngawda nisa, anna nangipatuvug yayya nira tu regaluna ira. Kada mabbisita yayya ta dian na maganana, uffunanna i yenana ta trabahu ira ta unag na balay. Ta gafu, ari umanugu i magana ni Alice turi ta kinagina nira i bagu nga pangurugna.

¹² Turi ta egga si Alice ta baleda kavulu i maganana, kagaggaw yayya nga mabbibbig tu Biblia. “Nakoffun yaw tapenu malippawa na yenà nu kunnasi kaimportante niakan i Biblia,” kunni Alice. Ginigiammu gapa na yama ni Alice i Biblia tapenu matindianna nu ngatta nanguli i appana-panono na anana, anna kayàna i magaleg tu kamali ta Biblia. “Niddakku yayya tu Biblia,” kunni Alice, “tapus sinurakakku i pahina natun tu mensahè para nisa.” Anni i resultana? Imbes nga makaleg tu mali, natukkal i futu na yama ni Alice ta nabibbigna ta Biblia.

¹³ Masippo tam nakuan ngem ariattam ulian i desisiottam maski nu mawag nga attammattam i kapurueba ira. (1 Cor. 4:12b) Kagitta ni Alice, inattammanna i pangokkontra na yenana. “Turi ta nabawtisowan ngà, kinagi niakan ni Mamà nga ‘matagga i ulù.’” Anni i reaksion ni Alice? “Imbes nga lisiakku nga ipakiyuvovug  i bagu nga relihiokku, marespetò nga niyesplika nga nakapaddesision ngà ngana nga mabbalin tu Saksi ni Jehova anna kakku ngana ulian yatun. Ngem nipasiguradù ta yenà nga iddeddu ku yayya. Siminangi kami dua, tapus nallutu ngà tu masingngo nga kananna. Namegafu tatun, masingi-singan ngana na yenà nga talaga pinakasta na Biblia i kata-katolè.”

14. Ngatta ariattam nakuan pamavulunan i kafamilia anna parientes tam nga ulian i desisiottam nga passerbian si Jehova?

¹⁴ Awayyana nga mawag i apaddu nga tiempo nige nga matindian tu mapia na kafamilia anna parientes tam nu kunnasi ka-importante nittam i passerbi kani Jehova. Angngariganna, turi ta naddesision si Alice nga mappayunir imbes nga tuttulan i kurso nga kayà na maganana para nisa, siminangi mangana i yenana. Ngem nitaddaggan lagapa ni Alice i pangurugna. “Nu pamavulunammu i kafamiliam anna parientes mu nga ulian i desisiommu ta tadday nga gannug,” kunni Alice, “siguradu nga pilitaddaka mangana ta tanakuan nga gannug. Ngem nu determinadu ka anna masippo ka ta kafamiliam, posible nga magginna nikaw i karuan nira.” Kunnatun mismu i nesimmu kani Alice. Parehu nga payunir ngana sangawe i maganana, anna elder i yamana.

15. Segun ta Mateo 5:14-16 anna 1 Pedro 2:12, kunnasi makoffun ta kafamilia anna parientes tam i ‘mapia nga kukukuan’ na tanakuan?

¹⁵ Iyaranni ni Jehova i totolay sa gukaban na ‘mapia nga kukukuan’ na Cristiano nga kongregasion. (Bibbigan i Mateo 5:14-16; 1 Pedro 2:12.) Nu ari nga Saksi ni Jehova i atawam, egga ngana kari i nakilalana ira nga kakongregasiommu? Si Pauline nga nakagi ta gafu ay nagimbita tu wawwaragi ta baleda tapenu makilala  ira ni Wayne. Keraddamman ni Wayne nu kunnasi yayya inuffunan na tadday nga brother nga malippawa nu anni talaga i kata-katolay na Saksi ira: “Nabbakasion paga yatun nga brother ta trabahuna tapenu laman makapaggiraw kami tu isports. Tapus nanono ku, ‘Ari gabba gapa yayya nga fanatiko!’”

16. Ngatta imbitattam nakuan i kafamilia anna parientes tam nga mevulu nittam ta study?

¹⁶ I tadday ta kapianan nga panguffun ta kafamilia anna parientes ay pangimbita nira nga mevulu nittam ta study. (1 Cor. 14:24, 25) I ollu nga paggarammammung nga inatendeyan ni Wayne ay i Memorial​—megafu ta sakto ta kabalin na trabahuna yatun nga programa anna ababba laman. “Ariakku natindian nu anni yari nepalappa,” kunni Wayne, “ngem keraddammakku i totolay. Inaranniaddà anna inalawadà anna inalamanudà. Makagì nga talaga masippo ira nga totolay.” Egga i tadday nga magatawa nga masissippo kani Pauline, anna uuffunadda yayya ta anana ta study anna ta ministerio. Yatutta turi ta nakapaddesision si Wayne nga mawag nga ammuanna paga i bagu nga kuru-kurugan ni Pauline, nikiddona tatun nga atawa nga lalaki nga makipaggigiammu yayya tu Biblia nisa.

17. Anni nakuan i ariattam nga ipaliwa ta baggi tam, ngem ngatta ariattam nakuan nonopan nga ari vuluvuga manguli i kafamilia anna parientes tam?

¹⁷ Iddanamattam nga kavulu tam noka nga masserbi kani Jehova i kafamilia anna parientes tam. Ngem, maski nu kuattam i adde na mawayya tam ta panguffun nira nga mabbalin nga aripan na Dios, awayyana nga ariadda alawatan i kinakurug. Nu kunnatun i mesimmu, ariattam nakuan nga paliwatan i baggi tam ta desisiodda. Ariattam puede nga fuersan i maski sinni nga alawatan i pangurug tam. Ngem nu masingan na kafamilia anna parientes tam nga magayayya ittam ta passerbi kani Jehova, dakal i efekto natun nira. Ipakimallo ira. Masippo ira nga kiyuvovugan. Kammu nga magimmang nga uffunan ira! (King. 20:20) Makkomfiansa ka nga bendisionan ni Jehova i appursigim. Nu pilian na kafamiliam anna parientes mu nga magginna nikaw, mapaliag ira noka!