1. Sinni i nanguffun ta pangipataddag tu kongregasion ta Filipos?

TURI ta zimittal da apostol Pablo, Silas, Lucas, anni Timoteo ta siudad na Filipos, aru nga totolay i nalegadda nga interesadu ta mensahe na Pappatulan. Nanguffun yaw nga appa nga matalikarag nga wawwaragi tapenu mangipataddag tu kongregasion, tapus maggarammammung ngana i ngamin nga wawwaragi, posible nga ta balay na minammadulo nga kapangngurugda nga si Lydia.​—King. 16:40.

2. Kunnasi napurueban i kongregasion na Filipos?

² Napurueban i bagu pataddag nga kongregasion. Sinulsulan ni Satanas i kontra ira ta kinakurug tapenu fugaddan i pallayyagayya danaw nga matalo nga Cristiano. Naaresto da Pablo anni Silas, nasissillagan, anna nefuku. Kustu napalawan ira ta affukutan, binisitada i bagu ira nga disipulos anna pinagaramda ira. Tapus, nanaw ta siudad da Pablo, Silas, anni Timoteo ngem posible nga nabattang si Lucas. Kunnasi ngana gafu i bagu pataddag nga kongregasion? Ta uffun na espiritu ni Jehova, nattulu-tuloy i bagu ira nga disipulos ta passerbi kani Jehova. (Fil. 2:12) Makasta nga rason tapenu idayaw ira ni Pablo!

3. Segun ta rekord na Filipos 1:9-11, anni i nipakimallo ni Pablo?

³ Kabalin na mammafulu dagun, nattura si Pablo ta kongregasion ta Filipos. Nu bibbigammu yatun nga tura, masingammu i kadakal na aya ni Pablo ta wawwaragina. “Maggafu ta futu ni Cristo Jesus i naperulay nga pagiddeddu ku nikamu ngamin,” niturana. (Fil. 1:8) Niturana nira nga nipakimallona ira. Nikiddona kani Jehova nga uffunanna ira tapenu dumakal  paga i pangayada, masiguradu i mas importante nga ganna-gannug, awan tu kapaliwatadda, ari ira makesiddukal ta tanakuan, anna tulu-tuloy nga makapavvunga tu matunung. Magga umanugu ka nga mabenefisiowan ittam tatun ta napafutuan nga uvuvog ni Pablo. Bibbigattam gafu i tura ni Pablo ta taga-Filipos. (Bibbigan i Filipos 1:9-11.) Tapus ikonsidera tam i punto ira nga niturana anna gigiammuattam nu kunnasi tam iyaplika i kada tadday tatun.

4. (a) Segun ta 1 Juan 4:9, 10, kunnasi nepasingan ni Jehova i kadakal na pangayana nittam? (b) Kunnasi nakuan kadakal i pangaya tam ta Dios?

⁴ Nipasingan ni Jehova i dakal nga pangayana nittam ta pamaddobna ta Anana ta davvun tapenu matay para ta liwi-liwa tam. (Bibbigan i 1 Juan 4:9, 10.) Gafu ta ari makasarili nga aya na Dios, mapaguyu ittam nga ayatan yayya. (Roma 5:8) Kunnasi nakuan kadakal i pangaya tam ta Dios? Sinabbag ni Jesus yatun nga pakkiavu tagga ta kinagina ta tadday nga Fariseo: “Ayatam-mu i Yafu nga Dios mu ta interu nga futum, interu nga ikararuam anna ta interu nga nono mu.” (Mat. 22:36, 37) Kayà tam nga interu-futu i pangaya tam ta Dios. Anna kayà tam nga mas dumakal paga yatun ta kada pappasa na aggaw. Kinagi ni Pablo ta taga-Filipos ira nga ‘mas dumakal paga [nakuan] i pangaya da ta kataggi-tadday.’ Anni i makua tam tapenu malladda i pangaya tam ta Dios?

5. Kunnasi nga mas dumakal i aya tam?

⁵ Mawag tu ammammu tam i Dios tapenu maaya tam yayya. Kagian na Biblia: “I tolay nga awan sa i aya ay arian na nga amma-ammu i Dios, ta i Dios ay aya.” (1 Juan 4:8) Nitura ni apostol Pablo nga mas dumakal paga i pangaya tam ta Dios durante nga mala tam i “kurug nga pakannammu anna pakalippawa” meyannung Nisa. (Fil. 1:9) Turi ta ollu tam nagigiammu i Biblia, namegafu tam nga ayatan si Jehova maski nu ariattam ammu i ngamin meyannung nisa. Ngem durante nga mas umaru i ammu tam, mas dumakal i aya tam kani Jehova. Yayya nga talaga importante nga regular nga gigiammuattam i Biblia anna monag nga pannonopan i mabibbig tam!​—Fil. 2:16, NW.

6. Segun ta 1 Juan 4:11, 20, 21, sinni paga i mawag nga ayatattam?

⁶ Paguyuan ittam na dakal nga pangaya na Dios nittam tapenu ayatattam i wawwaragi tam. (Bibbigan i 1 Juan 4:11, 20, 21.) Baka nonopattam nga mabi laman nga ayatan i wawwaragi tam. Ngatta? Megafu ta si Jehova i para-parehu nga dayawattam anna paparigattam i makasta ira nga kualidadna. Paparigattam i ehemplo ni Jesus nga niyawana mismu i inangona para nittam gafu ta kuruga dakal i pangayana. Ngem nu mittan marigatan ittam nga tuttulan i bilin nga makka-aya-aya ittam. Innan i tadday nga angngarigan ta kongregasion na Filipos.

7. Anni i mala tam nga leksion ta tabarang ni Pablo kada Euodia anni Sintike?

⁷ Da Euodia anni Sintike ay matalikarag nga babbay anna “nabbanna-bannag ira nga nanguffun” kani apostol Pablo. Ngem posible nga egga i ariadda nakka-anugutan yayya nga nakkakontra ira dua. Ta tura ni Pablo ta kongregasion danatun nga sister, espesipiko nga nitabaranna kada Euodia anni Sintike nga ‘pakappiadda i avvuluda.’ (Fil. 4:2, 3) Ammu ni Pablo nga mawag tu ikagina yaw ta interu kongregasion: “Ari kamu nga maddala-dalimudum onu makittuba-tubang ta ngamin nga kuan nu.” (Fil. 2:14) Siguradu nga nakoffun yaw nga direkta nga tabarang ni Pablo taw nga matalo nga babbay anna ta karuan nga wawwaragi ta kongregasion tapenu mas paga nga makka-aya-aya ira.

8. Nu mittan, anni i mamarriga nittam nga ayatan i wawwaragi tam, anna anni i makoffun tapenu malabanattam yatun?

 ⁸ Nu mittan, kiterriga nittam nga ayatan i wawwaragi tam gafu ta awayyana tu gitta da Euodia anni Sintike, baka nakafokus ittam ta kina-imperfekto. Ngamin ittam ay makaliwa ta kada aggaw. Nu kanayun nga agga-nono tam i mali ira na tanakuan, mamegafu nga mallammin i aya tam nira. Angngariganna, nu nakattaman na tadday nga brother nga uffunan ittam nga pakarenuan i Kingdom Hall, baka makalussaw ittam. Tapus nu nonopattam i tanakuan paga ira nga mali nga awayyana nga nakua natun nga wagi tam, mas dumakal i lussaw tam anna mawawan ngana i aya tam nisa. Nu egga i kunnatun nga problemam ta kakongregasiommu, makasta nu nonopammu yaw nga kinakurug: Masingi-singan ni Jehova i liwi-liwa tam kunne na gapa i liwi-liwa na wagi tam. Ngem, maski nu kunnatun, ayatanna ittam lagapa, maski i wagi tam. Megafu tatun, mawag tu parigattam i pangaya ni Jehova anna kanayuttam nakuan nga agga-fokus ta makasta ira nga ugali na wawwaragi tam. Nu mappursigi ittam nga ayatan i wawwaragi tam, mas malladda i pattaradday tam.​—Fil. 2:1, 2.

9. Anni i karuan ta “mas importante nga ganna-gannug” nga nikagi ni Pablo ta Cristiano ira ta Filipos?

⁹ Nidirekta ni Jehova si Pablo nga ikagi ta Cristiano ira ta Filipos nga “pilian i kapianan ta ngamin” [‘siguraduan i mas importante nga ganna-gannug,’ NW ]. (Fil. 1:10) Nelavu taw nga importante nga ganna-gannug i pamakasanto ta ngagan ni Jehova, i natuppal ira nga promesana, anna i imammo anna pattaradday na kongregasion. (Mat. 6:9, 10; Juan 13:35) Nu danatun i pinaka-importante nga gannug ta pattoletam, mapakurug tam nga ayatattam si Jehova.

10. Anni i mawag nga kuattam tapenu mabbalin ittam nga awan tu kapaliwatanna?

¹⁰ Kinagi paga ni Pablo nga ‘awan [nakuan] tu mancha anna kapaliwatattam.’ Ari kayà kagian natun nga mawag tu perfekto ittam. Ari ittam nga kagitta ni Jehova nga Dios nga awan vuluvuga tu kapaliwatanna. Ngem imammatan ittam ni Jehova nga awan tu kapaliwatattam nu kuattam i adde na mawayya tam tapenu ponaggan i aya tam anna siguraduattam i mas importante nga ganna-gannug. Mepasingattam i aya tam nu ibita tam nga mabbalin tu kesiddukallan na tanakuan.

11. Ngatta ibita tam nakuan nga mabbalin tu kesiddukallan na tanakuan?

¹¹ Kuruga serioso i bilin nga ibita nga mabbalin tu kesiddukallan na tanakuan. Kunnasi nga awayyana nga mesiddukal tam i tanakuan? Kasali tatun i piliattam nga dibersion, assissinnuttam, onu maski i trabahu tam. Baka ari gapa tu kondenan ni Jehova i kukukuattam. Ngem nu egga i mabigaran i konsensiana megafu ta pinili tam, tapus nesiddukal yayya gafu tatun, kuruga serioso yatun. Kinagi ni Jesus nga nu sittam i kegafuan na kesiddukallan na tadday ta kapangngurug tam, mas mapia nu mabesinan tu dakal nga aggilingan nga batu i vullaw tam anna mapalammag ittam ta bebay!​—Mat. 18:6.

12. Anni i mala tam nga leksion ta ehemplo na tadday nga magatawa nga payunir?

¹² Kunnasi niyaplika na tadday nga magatawa nga payunir i kinagi ni Jesus? Massesserbi ira ta tadday nga kongregasion nu sitaw egga i bagu bawtisadu nga magatawa nga napadakal ta kuruga istrikto nga familia anna aru i mebawal. Mangurug yaw nga bagu bawtisadu nga ari tu mepangngo nga umay ta sine i tadday nga Cristiano​—maski nu disente nga pelikula i girawanna. Nadismaya ira turi ta nammuadda nga minay nassine i magatawa nga  payunir. Turi ta nesimmu yatun, nibita ngana na magatawa nga payunir i umay ta sine adde ta nasanay na bagu bawtisadu nga magatawa i mismu nga konsensiada anna mas nalippawada nu anni i mapia anna nu anni i marake. (Heb. 5:14) Gafu tatun nga kingnguada, nepasingan na magatawa nga payunir nga ayatadda i bagu nga brother anna sister-da, ari laman ta simu, nu ari, ta pangnga-pangngua.​—Roma 14:19-21; 1 Juan 3:18.

13. Kunnasi nga posible nga mabbalin ittam tu rason nu ngatta makaliwa i tadday nga wagi?

¹³ Tadday paga nga posible nga mabbalin ittam tu kesiddukallan na tanakuan ay gukaban na pabbalin tu rason nu ngatta makaliwa yayya. Kunnasi mesimmu yatun? Imajinan yaw nga situasion. Kabalin na nabaya-bayag nga pakillaban na tadday nga Bible study ta pagillellawna, nakontrolna gabbalaman yatun. Nanonona nga mawag tu permanente nga iyemmanna i paginum. Yari tu nanguli yayya anna nappabawtiso. Nappasa i tiempo, egga tadday nga wagi nga nagimbita nisa ta party ta baleda anna niyoferanna yayya nga minum tu binarayang, nga kunna: “Cristiano ka ngana; magga uffunan naka na espiritu ni Jehova. Tadday nga aspeto na masanto nga espiritu ay i pangifugag ta baggi. Nu egga pangifugag mu ta baggim, mawayyam lagapa i minum tu baddi.” Baka manono tam i dakal nga perwisiu nu alawatan na bagu nga wagi yatun nga killu nga tabarang anna mabbalin mangana yayya nga adikto ta binarayang!

14. Anni i meyuffun na study tam ira tapenu meyaplika tam i tabarang ta Filipos 1:10?

¹⁴ Aru i meyuffun na study tam ira tapenu meyaplika tam i tabarang ta Filipos 1:10. Ollu, ipalippawa nittam na magigiammu tam ira  ta study nu anni i ikonsidera ni Jehova nga pinaka-importante. Mekadua, mammuattam nu kunnasi iyaplika i magigiammu tam ira tapenu awan tu kapaliwatattam. Anna mekatallu, mapagaram ittam nga ‘mangipasingan tu aya’ anna ‘mangngua ta mapia.’ (Heb. 10:24, 25) Kada pagaramman ittam na wawwaragi tam, mas dumakal i pangaya tam ta Dios kunne na gapa i pangaya tam tannira. Nu danaw nga dua nga pangaya ay egga ta futu tam, kuattam i adde na mawayya tam tapenu ibita nga mabbalin tu kesiddukallan na tanakuan.

15. Anni i kebalinan na ‘ipasingan i vunga na matunung nga pattolay’?

¹⁵ Napafutuan nga nipakimallo ni Pablo nga mepasingan nakuan na taga-Filipos ira i “vunga na matunung nga pattolay.” (Fil. 1:11) Siguradu nga nelagum taw nga “vunga” i pangayada kani Jehova anna ta totolena. Nelagum gapa tatun i pangibilleda ta tanakuan meyannung ta pangurugda kani Jesus anna ta makakkasta nga iddanamadda ta mappange. Inusa gapa na Filipos 2:15 i ilustrasion nga ‘nawag nga kunna biti-bitun nga dumallangarang ta langi.’ Mepangngo yatun megafu ta niyarig ni Jesus i disipulosna ta “tulu ta interu mundo.” (Mat. 5:14-16) Nidobna paga ta taga-tuttulna ira nga ‘pabbalinadda tu disipulos’ i totolay anna ira i ‘mamakurug nisa adde ta ngamin nga tuppu-tuppag na davvun.’ (Mat. 28:18-20; King. 1:8) Sittam ay ‘makepasingan tu vunga na matunung nga pattolay’ nu aktibo ittam taw nga importante nga trabahu.

16. Kunnasi ipasingan na Filipos 1:12-14 nga mawayya tam i mannawag tu kunna biti-bitun nga dumallangarang ta langi maski mariga ira i situasion? (Innan i letratu ta vungun.)

¹⁶ Maski anni paga i situasiottam, mawayya tam i mannawag tu kunna biti-bitun nga dumallangarang ta langi. Nu mittan, danuri gannug nga makefugag nakuan nittam ay posible nga mabbalin tu tiansa tapenu makapallayyagayya. Angngariganna, nakafuku si apostol  Pablo ta balena ta Roma turi ta nattura yayya ta taga-Filipos ira. Ngem maski nu agga-fuku si Pablo, arianna nagimmang nga layyagayyan i guardia anna bisita ira. Matalikarag nga nallayyagayya si Pablo maski tatun ira nga situasion, anna pinakkomfiansa anna pinaggutuna i wawwaragi nga “mangilayya-gayya ta uvovug na Dios anna awan vuluvuga tu ikassing da.”​—Bibbigan i Filipos 1:12-14; 4:22.

17. Mangistoria tu angngarigan nu kunnasi nakapavvunga lagapa i wawwaragi maski nu mariga i situasion.

¹⁷ Aru ta wawwaragi tam i nakepasingan tu parehu nga kinagutu gitta ni Pablo. Maddian ira ta nasion nga megamma i pallayyagayya ta babalay, yatutta nagaleg ira tu tanakuan nga tiansa tapenu ilayyagayya i mapia nga dumug. (Mat. 10:16-20) Mittan, ta kunnatun nga nasion, nangiyawa tu suhestion i manangngal ta sirkito nga mawag tu kuan na kada publisher nga “teritoria” i pallayyagayya ta parientesna, karruba, kaeskuela, katrabahu, anna kakilalada ira. Awan paga tu dua ragun, daka-dakal i pinakkaru na bilang na kongregasion tatun nga sirkito. Baka ari tu megamma i pallayyagayya ta lugar tam. Ngem egga i importante nga leksion nga mala tam tatun nga ehemplo na madiskarte nga wawwaragi tam: Kanayun nga magaleg tu tiansa tapenu makapallayyagayya, anna makkomfiansa ka nga iyawa ni Jehova i sikan nga kawagammu tapenu marubang i maski anni nga ziga.​—Fil. 2:13.

18. Anni nakuan i determinadu nga kuattam?

¹⁸ Mas kawagattam sangawe nga determinadu nga iyaplika i tabarang ni Pablo ta turana ta taga-Filipos ira. Siguraduattam nakuan i mas importante nga ganna-gannug, awan nakuan tu kapaliwatattam, ibita tam i mabbalin tu kesiddukallan na tanakuan, anna mavvunga ittam tu matunung. Nu kunnatun, mas dumakal i pangaya tam anna medayaw tam i meddu nga Yama tam, si Jehova.