MASIKI-SIKAN i pakapangngua na pangurug. Angngariganna, maski kayà ni Satanas nga patayan ittam ta espiritual, mawayya tam nga ‘addappan i ngamin nga umafa-afi nga pana na Demonio’ gafu ta pangurug tam. (Efe. 6:16) Nu egga i pangurug tam, maattammattam i problema ira nga kunna vuku-vukig. Kinagi ni Jesus ta disipulosna: “Nu egga i pangurug nu nga maski laman kagitta na kadakal na vullung na mustasa, awayya nu nga kagian toye nga vukig, ‘Magali ka tari!’ ay magali.” (Mat. 17:20) Megafu ta ammu tam nga mas mapaladda na pangurug i relasiottam kani Jehova, mawag tu pannonopattam danaw nga pakkiavu: Anni i pangurug? Kunnasi nga afektan na kondision na futu tam i pangurug tam? Kunnasi tam mapaladda i pangurug tam? Anna sinni nakuan i pangipasingannattam tu pangurug?​—Roma 4:3.

I pangurug ay ari laman tu basta panganugu ta kakkagian na Biblia megafu ta “mangurug gapa i demonio ira [nga egga i Dios] anna mamippig paga ira ta assing da.” (Sant. 2:19) Anni gafu i pangurug?

Segun ta Biblia, egga i dua nga aspeto na pangurug onu angngurug. Ollu, “i angngurug ay i pammakatalo ta gannug ira nga iddanamat-tam.” (Heb. 11:1a) Nu egga i pangurug mu, kumbinsidu ka nga ngamin nga kagian ni Jehova ay kurug anna mesimmu noka. Angngariganna, yaw i kinagi ni Jehova ta Israelita ira: “Nu madaralnu i pakipakkasinabbakku ta aggaw anna ta gabi, tapenu fugaddan i dattal na aggaw anna gabi ta mepangngo nga tiempo, tatun laman madaral i nipakkasinabbakku ta aripakku nga si David.” (Jer. 33:20, 21) Maganassikka kari nga baka duttal noka i tiempo nga ari ngana nga luttuag anna lummag i bilag, yatutta mawawan ngana gapa i aggaw anna i gabi? Nu ariammu paddudan i pisikal nga dorob nga mamattalupaddian ta davvun ta axis-na anna ta pallevu natun ta bilag, paddudammu kari nu mawayya na Namaratu tatun nga dorob nga tuppalan i promesana ira? Siempre ari!​—Isa. 55:10, 11; Mat. 5:18.

Mekadua, i pangurug ay “manawag nga pamakurug nga kurug i gannug ira nga ari masingan.” Nakagi tatun nga i pangurug ay “manawag nga pamakurug,” onu i “makakumbinsi nga ebidensia” na ganna-gannug nga ari masingan na mata ngem kuru-kurug. (Heb. 11:1b, NW; ftn.) Kunnasi nga kunnatun? Angngariganna, niyavu nikaw na tadday nga abbing, ‘Kunnasim makagi nga egga i paddag?’ Maski nu kammu vuluvuga masingan i paddag, baka ikagim ta abbing i meyannung ta ganna-gannug nga mamakurug ta kegga natun, gitta na paginango tam, i efekto na paddag, anna karuan paga. Oras tu makumbinsi i abbing tatun ira nga ebidensia, malippawana nga posible nga kurugan i tadday nga gannug nga ari masingan. Kunnatun gapa i pangurug. Nebase yatun ta masikan nga ebidensia.​—Roma 1:20.

Megafu ta nebase ta ebidensia i pangurug, mawag labbi nga i tadday nga tolay ay ‘kannammuanna i kurug’ tapenu mapeggan yayya tu pangurug. (1 Tim. 2:4) Ngem ari tu makalanno i pakannammu. Kunnaw i nitura ni apostol Pablo: “Ta mapakatunung i tolay ta arubang na Dios gafu ta napafutu nga angngurug na.” (Roma 10:10) Ari laman nakuan nga kurugan na tadday nga tolay i kinakurug,  nu ari, tagibaloranna paga yatun. Nu kuanna yatun, mapaguyu yayya nga mangipasingan tu pangurug, kayàna kagian, mattolay yayya segun ta kinakurug. (Sant. 2:20) I tolay nga ari napafutu i appabalona para ta kinakurug ay awayyana nga pammanakitan maski i makakumbinsi nga ebidensia megafu ta manakina nga ulian i kuruganna ira onu matagga i uluna. (2 Ped. 3:3, 4; Jud. 18) Yatun i gafuna nu ngatta ta tiempo na Biblia, ari tu ngamin danuri nakemamma tu milagro ay napeggan tu pangurug. (Num. 14:11; Juan 12:37) Mamalattuag tu pangurug i masanto nga espiritu na Dios turi laman ira ta talaga mangiddu ta kinakurug.​—Gal. 5:22, NW; 2 Tes. 2:10, 11.

Tadday ta egga maladda nga pangurugna ay si Patul David. (Heb. 11:32, 33) Ngem ari tu ngamin nga kafamiliana ay kunnatun i pangurugda. Mittan, nangipasingan tu kawan na pangurug i kaka nga manung ni David nga si Eliab turi ta kinuestionna i motibo ni David nga mavurung ta pangararu ni Goliat. (1 Sam. 17:26-28) Awan tu neyana nga automatiko nga egga i pangurugna; ni tu egga i maski sinni nga mamanana i pangurug na mappaganana, yatutta i pangurug ni David ay resulta na mismu nga relasionna ta Dios.

Ta Salmo 27, kinagi ni David nu kunnasi nalladda i pangurugna. (Ver. 1) Monag nga pinannonopan ni David i nappasa ira nga ekspiriensana anna nu kunnasi nga pinaliag yayya ni Jehova ta kalabanna ira. (Ver. 2, 3) Kuruga tinagibalorna i unnug ni Jehova ta paddayaw. (Ver. 4) Zinayaw ni David i Dios ta tabernakulo kavulu i kapangngurugna ira. (Ver. 6) Napafutuan nga kiniddona i uffun ni Jehova ta pakimallo. (Ver. 7, 8) Kayàna gapa nga matudduan yayya ta estandarte na Dios. (Ver. 11) Para kani David, dakal i importansia na pangurug yatutta niyavuna: “Sitaw i diakku ngana sangawe nu awan tu pangurug ku?”​—Ver. 13, NW.

Mapeggakka tu pangurug nga kagitta na pangurug ni David nu parigammu i appana-panono anna i annangnguana nga nadeskriba ta Salmo 27. Megafu ta nebase ta fustu nga pakannammu i pangurug, durante nga mas gigiammuammu i Biblia anna i nebase-Biblia ira nga publikasion, mas malogon ngana laman nga kultiban yaw nga aspeto na vunga na espiritu na Dios. (Sal. 1:2, 3) Iddan tu tiempo nga pannonopan tu mapia i magiggigiammum. Nu monag nga pannonopattam i gigiammuattam, mas dumakal i pangappresia tam kani Jehova. Durante nga dumakal i appresasiommu kani Jehova, mas karagatammu nga ipasingan i pangurug gukaban na pangidayaw nisa ta study ira anna pangilayyagayya ta tanakuan ta iddanamam. (Heb. 10:23-25) Mapakurug tam paga nga egga i pangurug tam nu tulu-tuloy tam nga ‘maddasal anna ari vuluvuga nga pakkafian i nono tam.’ (Luc. 18:1-8) Yatutta, ‘maddasal kanayun’ kani Jehova anna mattalo nga ‘tangngallan nakamu.’ (1 Tes. 5:17; 1 Ped. 5:7) Paguyuan ittam na pangurug tapenu kuan nu anni i mapia, anna durante nga kukukuattam i mapia, mas malladda i pangurug tam.​—Sant. 2:22.

Ta gabi nige na patay ni Jesus, kinagina ta disipulosna: “Mangurug kamu ta Dios anna mangurug kamu gapa niakan.” (Juan 14:1) Yatutta mawag tu mangurug ittam ari laman kani Jehova, nu ari, pati kani Jesus. Kunnasi ittam mangurug kani Jesus? Ikonsidera i tallu nga makua tam.

Ollu, imammatan nga i tavvu ay personal nga regalu nikaw na Dios. Kinagi ni apostol Pablo: “Mattolay ngà ngana gafu ta angngurug ku ta Ana na Dios nga nangaya niakan anna nangitavvung ta inango na megafu niakan.” (Gal. 2:20) Nu mangurug ka kani Jesus, kuruga kumbinsidu ka nga makoffun nikaw i tavvu, nga yatun i basehan na kapakoma na liwi-liwa mu, mangiyawa nikaw tu iddanama nga mannanayun nga inango, anna yatun i pinakamasikan nga pamakurug nga iddukan naka na Dios. (Roma 8:32, 38, 39; Efe. 1:7) Nu talaga kurugammu nga moffunan naka na tavvu, ariammu makatageno tu pakkakonsensia anna negatibo ta baggim.​—2 Tes. 2:16, 17.

Mekadua, umaranni ka kani Jehova ta pakimallo base ta sakrifisio ni Jesus. Megafu ta tavvu, kada makimallo ittam, ‘awan tu babang nga umaranni ittam ta Dios, tapenu alawatattam i allo anna bendision nga manguffun nittam ta tiempo nga pagawag tam.’ (Heb. 4:15, 16; 10:19-22) Megafu ta pakimallo, mas determinadu ittam nga labanan i tentasion nga makaliwa.​—Luc. 22:40.

Mekatallu, parulattan si Jesus. Nitura ni apostol Juan: “I sinni laman nga mangurug ta Ana na Dios ay egga sa i inango nga adde ta ngangangay. Ngem i sinni laman nga ari mangurug ta Ana na Dios ay awan sa yaw nga inango ngem mannanayun sa i batù na Dios.” (Juan 3:36) Daddamman nga nitura ni Juan nga makkontra i pangipasingan tu pangurug anna i ari pamarulo. Makepasingakka gafu tu pangurug kani Jesus nu parulattammu yayya. Maparulo mu si Jesus ta pattuttul mu ta “dob ni Cristo,” nga tumukoy ta ngamin nga nitudduna anna nibilinna. (Gal. 6:2) Maparulo mu paga yayya gukaban na panuttul ta direksion nga iyawana maggafu ta “mekatalo anna nannono nga doroban.” (Mat. 24:45) Gukaban na pamarulo kani Jesus, mapeggakka tu sikan tapenu attamman i problema ira nga kagitta na kasikan na bagiu.​—Luc. 6:47, 48.

Mittan, nikulle na tadday nga lalaki kani Jesus: “Mangurug ngà, ngem makkurang paga, pannuam-mu gafu i angngurug ku!” (Mar. 9:24) Egga gapa i pangurugna, ngem mapakalinno nga nirekunnisi naw nga lalaki nga mawagna paga nga ammungan i pangurugna. Kagitta naw nga lalaki, egga i tiempo nga makatageno tam ngamin nga mawag tam i mas dakal nga pangurug. Posible nga mapaladda tam ngamin ngana sangawe i pangurug tam. Gitta na nammuattam ngana, mapaladda i pangurug tam nu gigiammuattam i Biblia anna monag nga pannonopan yatun, nga yatun i mamadakal ta appresasiottam para kani Jehova. Mas malladda paga i pangurug tam durante nga idayaw tam si Jehova kavulu i kapangngurug ira, anna nu ilayyagayya ta tanakuan i iddanama tam, anna mappursigi ittam nga makimallo. Anna nu mas paladdattam i pangurug tam, malawa tam i kadakallan nga bala-balo ta ngamin. Kunnaw i ipagaram nittam na Biblia: “Ngem sikamu nga kakkofuk-ku ira, pakaladdan nu i kuruga masanto nga angngurug nu. . . . Ari kamu nga umarayyu ta aya na Dios.”​—Jud. 20, 21.