1. Base ta Hebreo 12:1, anni i mawag nga kuattam tapenu mabalittam i pareha na inango?

 NIKUMPARA na Biblia i pattolay na Cristiano ira ta pareha. Makala tu mannanayun nga inango i sinni laman nga mabalin na i pareha. (2 Tim. 4:7, 8) Mawag gafu tu kuattam i ngamin nga mawayya tam tapenu tulu-tuloy nga makkarela, netallugaring ta araranni ngana i finish line. Nabalin ni apostol Pablo i pareha na inango. Kinagi na ta nittam i makoffun tapenu mabalittam gapa i pareha. Nitabaranna nga “ariat-tam i anni laman nga makagurun [“mamakadammo,” NW], . . . ay pasikannat-tam i nono tam nga mangibalin ta pareha nga arubangat-tam.”​—Bibbigan i Hebreo 12:1.

2. Anni i kebalinan na “ariat-tam i anni laman nga mamakadammo”?

² Turi ta nitura ni Pablo nga mawag tu “ariat-tam i anni laman nga mamakadammo,” kayà na kari kagian nga awan ngana tu responsibilidad na Cristiano ira nga mawag tu iyakka da? Ari gapa. Lallagu, kayà na kagian nga ariattam i agga-kattu tam nga ari mabba kawagan. Makagurun anna mamannag gare yatun ta nittam. Tapenu makapagattam, mawag tu alistu tam nga masingan anna ibbattan i maski anni laman nga ari kawagan nga mamakadammo ta nittam. Ngem ari tam ikaya nga ibbattan i importante ira nga responsibilidad nga agga-kattu tam. Nu ari tam kuan yatun, baka ari ittam ngana makapattulu-tuloy nga makkarela ta pareha. (2 Tim. 2:5) Anni gafu ira nga responsibilidad i mawag nga tulu-tuloy nga iyakka tam?

3. (a) Base ta Galacia 6:5, anni i mawag tu iyakka tam? (b) Anni i gigiammuattam taw nga artikulo, anna ngatta?

 ³ Bibbigan i Galacia 6:5. Kinagi ni Pablo i gannug nga mawag tu iyakka tam. Nitura na nga ‘mawag tu akkatan na kataggi-tadday i karga na lagapa.’ Tukuyan ni Pablo taw i personal nga responsibilidad tam ta Dios, i karga nga mawag tu akkatattam lagapa. Taw nga artikulo, gigiammuattam nu anni i nelavu tatun nga ‘karga tam lagapa’ anna nu kunnasi tam meyakka yatun. Innattam gapa i ari kuruga kawagan nga karga nga awayya na tu agga-kattu tam anna nu kunnasi tam ibbattan danatun. Makoffun i pangiyakka tam ta karga tam lagapa anna pangibbo tam ta ari kuruga kawagan nga karga tapenu mabalittam i pareha na inango.

4. Ngatta ari tu mamakadammo i tabba na dedikasiottam? (Innan gapa i letratu.)

⁴ I tabba na dedikasiottam. Turi ta nidedika tam i baggi tam kani Jehova, nitabba tam nga yayya i dayawattam anna kuattam i urena. Mawag tu tuttulattam yatun nga tabba. Madammo nga responsibilidad i pattolay segun tatun nga dedikasion. Ngem ari tu mamakadammo  yatun. Pinaratu gare ittam ni Jehova nga kuan i urena. (Nep. 4:11) Kingngua na ittam nga egga i espiritual nga kawagan na anna pinaratu na ittam segun ta imahe na. Megafu tatun, makaranni ittam ta nisa anna magayayya ta pagangngua ta urena. (Sal. 40:8) Ari laman tu yatun, nu kuattam i uray na Dios anna tuttulan i Ana na, ‘malerattam i hustu nga pagibannag.’—Mat. 11:28-30.

5. Anni i makoffun ta niko tapenu makuam i dedikasiommu? (1 Juan 5:3)

⁵ Kunnasim nga meyakka i karga? Egga i dua nga makoffun. Ollu, itulu-tuloy mu nga padakallan i aya mu kani Jehova. Makuam yatun nu pannonopammu tu mapia i ngamin nga makasta nga kiningngua na para niko anna i bendision ira nga nipromesa na ta niko. Durante nga mas dumakal i aya mu ta Dios, mas mabi para ta niko nga tuttulan yayya. (Bibbigan i 1 Juan 5:3.) Mekadua, parigan si Jesus. Nawayya na nga kuan i uray na Dios megafu ta nappoffun yayya kani Jehova ta pakimallo anna naffokus ta bendision ta mappange. (Heb. 5:7; 12:2) Kagitta ni Jesus, ipakimallo mu kani Jehova nga pasikannan naka anna maffokus ta iddanama nga mannanayun nga inango. Durante nga dumakal i aya mu ta Dios anna parigammu i Ana na, makuam i dedikasiommu.

6. Ngatta mawag tu kuattam i obligasiottam ira ta familia? (Innan gapa i letratu.)

⁶ I obligasiottam ira ta familia. Ta pareha na inango, mawag tu mas ayatattam si Jehova anna si Jesus anne ta kafamilia tam ira. (Mat. 10:37) Ngem ari na gapa kebalinan yaw nga pagurayattam ngana i obligasiottam ira ta familia tam. Kakurugan na, tapenu mapagayayya tam i Dios anna si Cristo, mawag tu tuppalattam i annungattam ta familia. (1 Tim. 5:4, 8) Nu kuattam yatun, mas magayayya ittam. Ginakkag mabba talaga ni Jehova nga mabbalin tu magayayya i familia nu ayatan anna irespeto na magatawa i kataggi-tadday, nu ayatan anna sanayan na magana ira i ána da, anna nu tuppalan na ána i magana da.​—Efe. 5:33; 6:1, 4.

7. Kunnasim nga metuppal i annungammu ta familia?

⁷ Kunnasim nga meyakka i karga? Maski anni paga i annungammu ta familia, mattalo ka ta ka-uto nga egga ta Biblia. Ari ka mattalo ta emosiommu, kultura, onu ta kakkagian na eksperto ira. (Prov. 24:3, 4) Usammu tu mapia i nebase-Biblia ira nga publikasiottam. Mabibbig tatun i suhestion ira nu kunnasi nga meyaplika i prinsipio ira na Biblia. Angngarigan na, ta website tam nga jw.org, egga ira i informasion nga nebagay para ta espesipiko nga problema nga ara-arubangan na magatawa, mappagana, anna na tinedyer ira sangawe. b Mabbalikka tu determinadu nga iyaplika i kakkagian na Biblia maski paga ari nga tumuttul tatun i karuan nga kafamiliam. Nu kuammu yatun, mabbenefisio i familiam anna bendisionan naka ni Jehova.​—1 Ped. 3:1, 2.

8. Kunnasi ittam mafektan na desisiottam ira?

⁸ I tattabbagattam ta desisiottam ira. Niddan ittam ni Jehova tu regalu nga lallaguray nga mappili, anna ikaya na nga mabbenefisio ittam ta makasta ira nga desisiottam. Ngem ari na gapa ittam ilisi ta resulta ira na marake ira nga desisiottam. (Gal. 6:7, 8) Megafu tatun, mawag tu akseptattam i resulta na ugal ira nga pinili tam anna i ari nga pinannonopan nga uvovug anna annangngua. Depende ta nakua tam, awayya na tu makokkonsensia ittam. Ngem nu ammu tam nga tattabbagattam i desisiottam  ira, awayya na tu mapaguyu ittam tapenu ikagi i liwa tam ira, itunung i nakkamaliattam, anna ibita nga kuan uli danatun. Nu kuattam yatun ira, makapattalupaddian ittam ta pareha na inango.

9. Anni i kuammu nu ugal i desisiommu? (Innan gapa i letratu.)

⁹ Kunnasim nga meyakka i karga? Nu kammu ngana mebabawi i ugal nga desision, akseptammu i maddaggun nga situasiommu. Daddammammu nga ari mu ngana moli i nabalin ngana. Kammu ufutan i tiempo anna sikammu nga pakurugan nga fustu ka onu paliwatan i baggim onu i tanakuan megafu ta ugal nga desisiommu. Lallagu, akseptammu i kamalim anna kuammu i adde na mawayyam base ta maddaggun nga situasiommu. Nu makokkonsensia ka ta nakaliwatammu, mapakalinno nga umaranni ka kani Jehova ta pakimallo. Aminammu i nakkamaliammu anna makkiddaw ka tu pamakoma. (Sal. 25:11; 51:3, 4) Makkiddaw ka tu pamakoma ta natakitammu anna nu kawagan, mappoffukka ta elder ira. (Sant. 5:14, 15) Makagigiammu ka nakuan ta nakkamaliammu ira anna ikagumammu nga ari ngana nga ulian danatun. Habang kuammu yatun, makasiguradu ka nga ikallo naka ni Jehova anna iyawa na i uffun nga kawagammu.​—Sal. 103:8-13.

10. Ngatta mamakadammo i ari tu realistiko nga ekspektasion? (Galacia 6:4)

¹⁰ Ari tu realistiko nga ekspektasion. Baka mamakadammo ta nittam i ari tu realistiko nga ekspektasion nu ikumpara tam i baggi tam ta tanakuan. (Bibbigan i Galacia 6:4.) Nu kanayuttam nga ikumpara i baggi tam ta tanakuan, baka mabbalin ittam tu passil anna minakkikompetensia. (Gal. 5:26) Nu puruebattam nga gawatan i nakua na tanakuan maski kattam mawayya yatun, baka matakitattam laman i baggi tam. Nu “i gannug nga iddanaman nu ari nga mesimmu ay mamattaki ta futu,” mas ngana gafu nu i iddanamattam ay ari tam talaga magawa! (Prov. 13:12) Mofu gare nu kua i sikattam anna makagurun yatun ta pakkarela tam ta pareha na inango.​—Prov. 24:10.

11. Anni i makoffun ta niko tapenu ari ka nga mapeggan tu ari tu realistiko nga ekspektasion?

¹¹ Kunnasim nga mebbattan yatun nga mamakadammo? Ari mu nga ekspektan ta baggim i mas paga anne ta ikiddaw ni Jehova niko. Ari na vuluvuga ikiddaw nga iyawa mu i gannug nga awan ta niko. (2 Cor. 8:12) Makasiguradu ka nga ari vuluvuga ikumpara ni Jehova i makuam ta makua na tanakuan. (Mat. 25:20-23) Tagibaloran na i interu-kararua nga passerbim, i kinamatalo mu, anna i pagattattammu. Sigga-pakalinno nga akseptammu nga awayya na tu malimitan i makuam sangawe megafu ta edad, gawa-gawayyan, anna situasiommu. Kagitta ni Barzilai, awayyam nga panakitan i pribilehio ira nu ari ngana nga ipamavulun na gawa-gawayyan anna edad mu. (2 Sam. 19:35, 36) Kagitta ni Moises, akseptammu i uffun anna italo mu ta tanakuan i responsibilidad ira nu mepangngo yatun. (Ex. 18:21, 22) Nu minappakalinno ka, ari ka mannono tu ari realistiko nga ekspektasion gafu ta makofu yatun ta sikammu nga makkarela ta pareha na inango.

12. Tattabbagattam kari i ugal nga desision na tanakuan? Ipakanawag.

¹² Pakatageno nga egga i tattabbagammu ta ugal nga desision na tanakuan. Ari nga puede tu sittam i maddesision para ta tanakuan. Ari tam gapa ira kanayun nga melilli ta efekto na marake nga desisiodda. Angngarigan na, baka naddesision i tadday nga ana nga magimmang ngana nga masserbi kani Jehova. Magga matakitan i magana ira tatun nga desision.  Ngem madammakkan laman ira nu paliwatadda i baggi da ta ugal nga desision na ana da. Ari nga ekspektan ni Jehova nga kattuadda i kunnatun nga mamakadammo.​—Roma 14:12.

13. Anni i kuan na magana nu marake i desision na ana da?

¹³ Kunnasim nga mebbattan yatun nga mamakadammo? Daddammammu nakuan nga niddan ittam ngamin ni Jehova tu lallaguray nga mappili. Ipamavulu na nga magangngua tu desision i kada tolay. Nelavu tatun i desision nga passerbian yayya onu ari. Ammu ni Jehova nga ari ka nga perfekto nga magana. Ikaya na laman nga kuammu i adde na mawayyam. Tattabbagan lagapa na ana mu i desision nga kuan na, ari tu siko. (Prov. 20:11) Ngem baka agga-nono mu lagapa i nakkamaliammu ira bilang magana. Nu kunnatun, ikagim kani Jehova i matageno mu anna makkiddaw ka tu pamakoma ta nisa. Kammu ngana metoli i nappasa anna moli yatun. Ari na gapa ekspektan nga kanayummu nga ililli i ana mu ta efekto na desision na ira. Sigga-nono ka nakuan nga nu ikaguman na ana mu nga manoli, magayayya si Jehova nga alawatan yayya uli.​—Luc. 15:18-20.

14. Ngatta mawag tu ibbattattam i sossobra nga pakkakonsensia?

¹⁴ Sossobra nga pakkakonsensia. Nu makaliwa ittam, gagangay laman nga makonsensia ittam. Ngem manaki ni Jehova nga sossobra nga makonsensia ittam megafu ta mamakadammo yatun ta nittam. Mawag gafu tu ibbattattam yatun. Kunnasi tam nga makagi nga sossobra i pakkakonsensia tam? Nu nikagi tam ngana i naliwatattam, nabbabawi ittam ngana, anna kukukuattam i ngamin tapenu ari ngana nga makua yatun uli, makapattalo ittam nga pinakoma ngana ittam ni Jehova. (King. 3:19) Nu nakua tam ngana danatun, manaki ni Jehova nga makokkonsensia ittam pagalaman. Ammu na nga makaperwisiu yatun ta nittam. (Sal. 31:10) Nu sossobra gare i paddaddam tam, baka magimmang ittam ngana nga makkarela ta pareha na inango.​—2 Cor. 2:7.

15. Anni i kuammu nu sossobra i pakkakonsensiam? (1 Juan 3:19, 20) (Innan gapa i letratu.)

 ¹⁵ Kunnasim nga mebbattan yatun nga mamakadammo? Nu makokkonsensia ka lagapa, sigga-nono ka nakuan ta kurug nga “pamakoma” nga iyawa na Dios. (Sal. 130:4) Nu pakoman na danuri kurug nga mabbabawi, ipromesa na: “Ari ku ngana daddamman i liwa da.” (Jer. 31:34) Kayà na gafu kagian nga ari ngana vuluvuga ituki ni Jehova ta niko i naliwatammu ira. Yayya nga nu marigi-rigatakka megafu ta resulta na naliwatammu ira, ari mu nakuan nga nonopan nga ari naka pinakoma ni Jehova. Ari ka nakuan gapa madismaya ta baggim megafu ta nawawammu i karuan nga responsibilidad mu ta kongregasion. Ari nga agga-nono ni Jehova i naliwatammu ira. Ari mu nakuan gapa agga-nono danatun.​—Bibbigan i 1 Juan 3:19, 20.

16. Durante ta pakkarela tam, anni i mawag tu malippawa tam?

¹⁶ Durante ta pakkarela tam ta pareha na inango, mawag tu ‘makkarela ittam tapenu mala tam i premyo.’ (1 Cor. 9:24) Makua tam yatun nu malippawa tam i nadduman na karga ira nga mawag tu akkatattam ta mamakadammo ira nga mawag tu ibbattattam. Taw nga artikulo, nagigiammu tam i karuan ta mawag tu iyakka tam anna i mawag tu ibbattattam. Ngem egga paga i tanakuan. Kinagi ni Jesus nga madammakkan ittam ‘nu i talattangngawattam laman ay i kabattug tam, pagillellaw tam, tuange ta avvuru-vurung tam nga meyannung toye ta maddaggun nga pattolay.’ (Luc. 21:34) Yatun anna i tanakuan paga nga teksto taw nga parapo i makoffun ta nittam nga masingan i mawag nga uliattam tapenu metulu-tuloy tam i makkarela ta pareha na inango.

17. Ngatta makasiguradu ittam nga mangaffu ittam ta pareha na inango?

¹⁷ Makasiguradu ittam nga mangaffu ittam ta pareha na inango megafu ta iyawa ni Jehova i sikan nga kawagattam. (Isa. 40:29-31) Ari ka gafu magimmang ta pakkarela! Parigammu si apostol Pablo nga kingngua na i ngamin tapenu mala na i premyo. (Fil. 3:13, 14) Awan tu tanakuan nga makkarela para ta niko, ngem ta uffun ni Jehova awayyam i mangaffu. Uffunan naka ni Jehova nga iyakka i kargam ira anna ibbattan i ari kawagan ira nga mamakadammo. (Sal. 68:19) Gukaban na uffun ni Jehova, makapagattam ka anna mangaffu ka ta pareha!