1. Anni i makaduffun tapenu magganas ittam nga gigiammuan i profesiya ta Biblia?

 “KAKAYÀ ku nga gigiammuan i profesiya ta Biblia,” kagian na kabataan nga brother nga si Ben. Kunnatukka kari gapa? Onu marigatakka nga alippawatan i profesiya ira? Baka awan paga lagu tu ganas mu nga gigiammuan danatun. Ngem nu mammuammu nu ngatta nipetura ni Jehova yatun ta Uvovug na, baka manguli i nono mu.

2. Anni i gigiammuattam taw nga artikulo?

² Taw nga artikulo, ammuattam nu ngatta anna nu kunnasi nga gigiammuan i profesiya ira ta Biblia. Innattam gapa tu mapia i dua nga profesiya ta libru na Daniel tapenu mammuattam nu kunnasi nga makoffun ta nittam nu malippawa tam danatun.

3. Anni i mawag nga kuattam tapenu malippawa tam i profesiya ta Biblia?

³ Malippawa tam i profesiya ta Biblia nu mappoffun ittam. Imajinammu nga nappasiar ka ta tadday nga lugar nga bagu laman nga nangngayammu. Ngem kavulu mu i kofummu nga kabisadu na yatun nga lugar. Ammu na nu sitaw i mismu nga dian nu anna i paffuntan na kada dalan. Siguradu nga mappabalo ka nga vinulu naka na kofummu! Kunnatun nga kofun si Jehova. Ammu na nu sitaw ngana i tiempo nga pattotolayattam anna i pappangetattam. Tapenu gafu malippawa tam i profesiya ta Biblia, mawag nga mapakalinno ittam nga mappoffun kani Jehova.​—Dan. 2:28; 2 Ped. 1:19, 20.

4. Ngatta nipetura ni Jehova i profesiya ira ta Uvovug na? (Jeremias 29:11) (Innan gapa i letratu.)

⁴ Kagitta na maski sinni nga mapia nga magana, kayà ni Jehova nga makasta i pappangetan na ána na. (Bibbigan i Jeremias 29:11.) Ngem egga i nadduman ni Jehova ta tolay nga mappagana. Mekagi ni Jehova i mesimmu ta mappange anna  kanayun nga fustu i ikagi na. Nipetura na i profesiya ira ta Uvovug na tapenu dati ngana nga mammuattam i importante ira nga mesimmu. (Isa. 46:10) Niyawa na Yama tam ta langi i profesiya ira ta Biblia megafu ta iddukan na ittam. Ngem kunnasi ka makasiguradu nga talaga mesimmu i neprofesiya ira ta Biblia?

5. Anni i magigiammu na tadday nga kabataan ta ekspiriensa ni Max?

⁵ Ta eskuela, aru i kavulu na kabataan tam ira nga awan kuruga tu pangirespeto da ta Biblia. Megafu ta kakkagian anna kukukuadda, awayya na nga paddudan na tadday nga kabataan nga Saksi i kuru-kurugan na. Kunnatun i ekspiriensa ni Brother Max. Istorian na, “Turi ta magiskuela ngà paga, nadduda ngà nu ituttuddu kari na magana ku ta niakan i kurug nga relihion anna nu talaga kari nga naggafu ta Dios i Biblia.” Anni i kingngua na mappagana ni Max? Kagian na, “Kalmadu laman i reaksiodda maski nu ammù nga mavurung ira.” Inusa na mappagana ni Max i Biblia tapenu tabbagan i pakkiavu na ira. Egga gapa i kingngua ni Max. Kagian na, “Ginigiammù mismu i profesiya ira ta Biblia tapus nipakiyuvovug ku i nagigiammù ta tanakuan ira nga kabataan ta kongregasion.” Anni i resulta natun? Kagian ni Max, “Megafu tatun, nakumbinsi ngà nga talaga naggafu ta Dios i Biblia!”

6. Anni i mawag nga kuammu nu madduda ka, anna ngatta?

⁶ Nu kagittam si Max nga mamegafu ka ngana nga madduda nu kurug kari i Biblia, ari ka nakuan nga makonsensia. Ngem egga gapa i mawag nga kuammu tatun. Nonopan yaw. Sisinu nga madaral i tadday nga nabalor nga gannug nu magattay yatun. Kunnatun i kuan na padduda ta pangurug mu. Nu pagurayammu laman yatun, sisinu nga daralan natun i pangurug mu. Tapenu gafu mapegafuanammu nga alsan i padduda, mawag nga iyavu mu yaw ta baggim, ‘Kurugakku kari i kagian na Biblia meyannung ta mappange?’ Nu ari ka nga siguradu tatun, mawag nga gigiammuammu i profesiya ira ta Biblia nga natuppal ngana. Kunnasim nga makua yatun?

7. Anni i makasta nga ehemplo ni Daniel ta paggigiammu ta profesiya ta Biblia? (Daniel 12:10) (Innan gapa i letratu.)

⁷ Makasta nga ehemplo si Daniel ta paggigiammu tu profesiya ira. Fustu i motibo na ta paggigiammu—kayà na nga mammuan i kurug. Mapakalinno gapa yayya. Ammu na nga iddan ni Jehova tu pakalippawa danuri makannammu ta nisa anna mattolay segun ta marenu ira nga estandarte na. (Dan. 2:27, 28; bibbigan i Daniel 12:10.) Pinakurug ni Daniel nga mapakalinno yayya gukaban na paddepende na ta uffun ni Jehova. (Dan. 2:18) Ginigiammu gapa tu mapia ni Daniel i profesiya ira. Inusito na i kopia ira na Katurakan nga puede na nga mala. (Jer. 25:11, 12; Dan. 9:2) Kunnasim nga maparigan si Daniel?

8. Ngatta ari nga mangurug i karuan nga matuppal i profesiya ira ta Biblia, ngem anni i mawag nga kuattam?

⁸ Ammuan i motibom. Gigiammuammu kari i profesiya ta Biblia megafu ta kakayà mu nga  mammuan i kinakurug? Nu kunnatun i motibom, uffunan naka ni Jehova. (Juan 4:23, 24; 14:16, 17) Ngem tanakuan i motibo na karuan ta paggigiammu da ta profesiya ira. Kayà da laman nga makaleg tu ebidensia tapenu mapakurug da nga ari nga naggafu ta Dios i Biblia. Nu makua da gare yatun, egga ngana saw i irasodda tapenu ira ngana lagapa i mappili nu anni i fustu anna i ugal. Ngem mawag nga fustu i motibo tam ta paggigiammu. Fuera tatun, egga paga i importante nga kualidad nga kawagattam tapenu malippawa tam i profesiya ta Biblia.

9. Anni nga kualidad i kawagattam tapenu malippawa tam i profesiya ta Biblia? Ipakanawag.

⁹ Mappakalinno ka. Nipromesa ni Jehova nga uffunan na danuri mapakalinno. (Sant. 4:6) Mawag tam gafu nga ipakimallo i uffun na tapenu malippawa tam i profesiya ta Biblia. Mawag gapa nga nonopattam nga kawagattam i uffun na matalo nga doroban nga usu-usan ni Jehova tapenu iyawa nittam i espiritual nga makan ta fustu nga tiempo. (Luc. 12:42) Si Jehova ay Dios na unnug. Rasonable laman gafu nga nonopattam nga tadday laman nga grupo i usan na tapenu uffunan ittam nga malippawa i kinakurug ira ta Uvovug na.​—1 Cor. 14:33; Efe. 4:4-6.

10. Anni i magigiammum ta ekspiriensa ni Esther?

¹⁰ Gigiammuan tu mapia i profesiya ira. Mappili ka tu tadday nga profesiya nga kayà mu nga gigiammuan tapus i-research mu yatun. Kunnatun i kingngua ni Sister Esther. Interesadu yayya ta profesiya ira meyannung ta paddattal na Mesias. Istorian na, “Turi ta 15 i dagukku, pinegafuanakku nga i-research i ebidensia ira nga netura talaga yatun ira nga profesiya nige na tiempo nga nattolay si Jesus.” Nakumbinsi yayya ta nagigiammu na meyannung ta Dead Sea Scrolls. Kagian na, “Netura i karuan tatun nige na tiempo ni Cristo, yayya nga talaga makagì nga naggafu yatun ira nga profesiya ta Dios.” Ngem inamin gapa ni Esther, “Mamippigà nga binibbig danatun tapenu laman malippawa ku.” Ngem sulit yatun nga kingngua na. Kabalin na nga gigiammuan tu mapia i aru nga profesiya ta Biblia, kinagi na, “Napakurug ku mismu nga talaga fustu i Biblia!”

11. Kunnasi ittam nga mammakapia nu mapakurug tam mismu nga fustu i Biblia?

¹¹ Nu mammuattam nu kunnasi nga natuppal i karuan ta profesiya ira ta Uvovug na Dios, mas nga mattalo ittam kani Jehova anna ta pangigiya na. Fuera tatun, makoffun i profesiya ira ta Biblia tapenu kanayun ittam nga magiddanama ta mappange maski nu anni paga i kapurueba nga pappasattam sangawe. Ammuattam i dua nga profesiya nga nitura ni Daniel nga matuttuppal ngana sangawe. Makoffun i pakalippawa tam tatun ira tapenu makangngua ittam tu makasta ira nga desision.

12. Anni i irepresenta na takki nga ‘balayang nga nakivuan tu malapo nga pila’? (Daniel 2:41-43)

¹² Bibbigan i Daniel 2:41-43. Ta tatageno nga nipakanawag ni Daniel para kani Patul Nabucodonosor,  i takki na estatua nga nasingan na patul ay napadday ta ‘balayang nga nakivuan tu malapo nga pila.’ Nu ikumpara tam yatun nga profesiya ta karuan paga nga profesiya ta libru na Daniel anna Nepakannammu, masingattam nga irepresenta na takki i alyansa na Anglo-American World Power, i pinakamasikan nga world power ta tiempo tam. Meyannung tatun nga world power, kinagi ni Daniel nga “egga i parte na pappatulan nga masikan anna egga i parte na nga makafi.” Ngatta egga i parte na nga makafi? Megafu ta pakkafian na ordinariu nga totolay, nga irepresenta na malapo nga pila, i pakapangngua na nga megitta ta sikan na balayang. b

13. Anni ira nga importante nga kinakurug i magigiammu tam taw nga profesiya?

¹³ Egga ira i importante nga kinakurug nga magigiammu tam ta pangideskriba ni Daniel ta estatua, mas ngana ta takki natun. Ollu, nipasingan na Anglo-American World Power nga masiki-sikan ira. Angngarigan na, tadday i alyansa na Anglo-America ta nasion ira nga nangaffu ta World War I anna World War II. Ngem nakkafi yatun nga world power anna mas paga makkafi yatun megafu ta makkorontra i totolena anna kontradda gapa i gobiernu. Mekadua, yatun nga alyansa i ultimu nga world power nga mammaguray nige nga daralan na Pappatulan na Dios i ngamin nga gobiernu na tolay. Maski nu egga ira i nasion nga makillaban ta Anglo-American World Power, ari da vuluvuga nga matalianan yatun. Ammu tam yatun megafu ta mammokan saw na “batu” nga mangirepresenta ta Pappatulan na Dios i takki na estatua nga mangirepresenta ta Anglo-American World Power.​—Dan. 2:34, 35, 44, 45.

14. Kunnasi nga makoffun nu malippawa tam i profesiya meyannung ta takki nga balayang nga nakivuan tu pila?

¹⁴ Kumbinsidu ka kari nga kurug i profesiya ni Daniel meyannung ta takki nga balayang nga nakivuan tu pila? Nu wan, afektan natun i desision ira nga kuammu ta pattolem. Ari ka ngana nga mappariku taw nga mundo ta ammum mabba nga aranni ngana nga madaral yatun. (Luc. 12:16-21; 1 Juan 2:15-17) Nu malippawa mu gapa yatun nga profesiya, maappresiam nga importante i trabahu nga pallayyagayya anna panuddu. (Mat. 6:33; 28:18-20) Kabalimmu nga gigiammuan yatun nga profesiya, puedem nga iyavu ta baggim, ‘Masingan kari ta desisiokku ira nga kumbinsidu ngà nga aranni ngana nga daralan na Pappatulan na Dios i ngamin nga gobiernu na tolay?’

15. Sinni i “patul na sigiran” anna i “patul na zita” ta tiempo tam? (Daniel 11:40)

¹⁵ Bibbigan i Daniel 11:40. Mabibbig ta Daniel kapitulo 11 i meyannung ta dua nga patul onu gobiernu nga makkalaba-laban tapenu mabbalin tu pinakamakapangngua nga gobiernu ta mundo. Nu ikumpara tam yatun nga profesiya ta karuan paga nga profesiya ta Biblia, mammuattam nga i Russia anna i kaalyadu na ira i “patul na sigiran” anna i Anglo-American World Power i “patul na zita.” c

16. Kunnasi i pattratu na “patul na sigiran” ta totolay na Dios?

¹⁶ Atta-attamman na totolay na Dios i pameppersigi nga kukukuan na “patul na sigiran.” Naziga-riga anna nefuku i karuan nga Saksi megafu ta pangurug da. Ngem imbes tu maganassing i wawwaragi tam megafu ta kukukuan na “patul na sigiran,” mas lallagu  nga nassikan i pangurug da. Ngatta? Ammu da gare nga ketuppalan na profesiya ni Daniel i kapeppersigi na totolay na Dios. d (Dan. 11:41) Nu ammu tam yatun, ari tam nga mawawan i pagiddanama anna i kinamatalo tam.

17. Anni ira nga mariga nga situasion i neparubang ta totolay na Dios nga sakup na “patul na zita”?

¹⁷ Ta nappasa, egga gapa ira i direkta nga pangatake na “patul na zita” ta totolay ni Jehova. Angngarigan na, ta tiempo na World War I anna World War II, aru nga wawwaragi i nefuku megafu ta neutral ira. Neutral gapa i Saksi nga abbarabbing yayya nga napapanaw ta eskuela i karuan ta nira. Ngem ta nikanni laman ira nga dekada, neparubang i aripan ira ni Jehova ta ari kuruga mataga-tageno nga kapurueba ta nasion ira nga sakup na patul na zita. Mas namarriga yatun ta nira nga mabbalin tu matalo ta Pappatulan na Dios. Angngarigan na, nu kampania ta eleksion, baka matenta i tadday nga Cristiano nga suportan i tadday nga partidu ta pulitika onu kandidato. Baka ari mabba yayya nga mabboto, ngem baka ta  nono anna futu na, egga ngana i supu-suportan na. Tapenu gafu makagi tam nga kurug tu neutral ittam, mawag nga magimmugug ittam ari laman ta kukukuattam, nu ari, maski gapa ta nononopan anna mataga-tageno tam!—Juan 15:18, 19; 18:36.

18. Anni i reaksiottam ta pakkalaba-laban na “patul na sigiran” anna na “patul na zita”? (Innan gapa i letratu.)

¹⁸ Baka mavuru-vurung danuri ari nga mangurug ta profesiya ta Biblia nu masingadda i ‘pakkatotoru’ na “patul na zita” anna na “patul na sigiran.” (Dan. 11:40, ftn.) Parehu nga egga i makalanno nga nuklear nga armas natun ira nga patul tapenu patayan i ngamin taw ta davvun. Ngem ammu tam nga ari vuluvuga ipamavulun ni Jehova nga mesimmu yatun. (Isa. 45:18) Imbes gafu tu mavvuru-vurung ittam, mapasikan i pangurug tam ta pakkalaba-laban na “patul na sigiran” anna na “patul na zita.” Pakurugan gare natun nga araranni ngana nga mangultimu yaw nga sistema.

19. Anni i daddammattam meyannung ta profesiya ta Biblia?

¹⁹ Ari tam nga ammu nu kunnasi saw nga matuppal i karuan ta profesiya ira ta Biblia. Maski si profeta Daniel, ari na nga nalippawa i kebalinan na ngamin nga nitura na. (Dan. 12:8, 9) Ngem makagi tam kari nga ari nga matuppal i tadday nga profesiya megafu laman ta ari tam nga eksakto nga malippawa nu kunnasi nga matuppal yatun? Ari. Makapattalo ittam nga ipakannammu ni Jehova nu anni i mawag nga mammuattam ta eksakto nga tiempo, kagitta na kingngua na ta nappasa.​—Amos 3:7.

20. Anni ira nga profesiya ta Biblia i aranni tam ngana nga masingan nga matuppal, anna anni i mawag nga tulu-tuloy tam nga kuan?

²⁰ Meyanunsio saw i “imammo anna seguridad.” (1 Tes. 5:3, NW ) Tapus bueltan na gobiernu ira taw nga mundo i falsu nga relihion anna daraladda yatun. (Nep. 17:16, 17) Itunug da gapa nga atakeyan i totolay na Dios. (Eze. 38:18, 19) Nu mesimmu ngana danatun, mamegafu ngana i ultimu nga gerra na Armagedon. (Nep. 16:14, 16) Makasiguradu ittam nga araranni ngana nga mesimmu danatun. Ngem adde ta ari paga nga nesimmu danatun, itulu-tuloy tam nakuan nga ipasingan i pappabalo tam ta minaggiddu nga Yama tam ta langi. Kunnasi? Innaggattam nga matuppal i profesiya ira ta Biblia anna uffunattam i tanakuan tapenu kunnatun gapa i kuadda.