Tatun nga artikulo, nagigiammu tam nga tadday laman talaga i importante nga isyu nga meparubang ta ngamin nga intelihente nga pinaratu: i pamakasanto ta makapabbaw nga ngagan ni Jehova. I isyu na soberania—nu kapianan kari i pammaguray ni Jehova—ay tadday nga aspeto natun nga importante nga isyu. I isyu gapa na integridad na totolay ay tadday paga nga aspeto natun nga importante nga isyu.

Ngatta ipasigo tam ngana sangawe nga i pinaka-importante nga isyu ay meyannung ta ngagan ni Jehova anna ta pamakasanto tatun? Innattam i tallu nga rason.

Ollu, zinaral ni Satanas i ngagan onu i reputasion ni Jehova ta hardin na Eden. Ta pakkiavu ni Satanas kani Eva, pinalawan na tu si Jehova ay itu nga Dios anna ari tu patas i instruksion na ira kada Adan anna Eva. Tapus nakkagi si Satanas tu katulia mismu na kinagi ni Jehova nga gitta na palawanan na tu laddug i Dios. Pinara-parake na gafu i ngagan ni Jehova. Yatutta nabbalin yayya tu i “Diablo” nga kayà na kagian, “minammara-parake.” (Juan 8:44, NW ) Megafu ta kinurug ni Eva i kinaladdug ira ni Satanas, ari yayya nattuppal ta Dios anna narrebelde yayya kontra ta soberania na Dios. (Gen. 3:1-6) Magadde sangawe, para-paraketan ni Satanas i ngagan na Dios anna mangiwara-wara yayya tu kinaladdug meyannung ta ka-Dios ni Jehova. Mas dakal i posibilidad na nga ari mattuppal kani Jehova danuri mangurug tatun ira nga kinaladdug. Yayya nga para ta totolay na Dios, i pamarake kontra ta masanto nga ngagan ni Jehova i kadaketan nga kawan tu hustisia. Yatun i pinakagamu na ngamin nga pazziga-riga anna kinarake ta mundo.

Mekadua, para ta pammakapian na ngamin nga pinaratu, determinadu si Jehova nga pakasantowan i ngagan na tapenu pakarenuan i ngamin nga pamara-parake tatun. Yatun i pinaka importante kani Jehova. Yayya nga kinagi na: “Siguradu nga pakasantowakku i makapabbaw nga ngagakku.” (Eze. 36:23) Manawag gapa nga kinagi ni Jesus nu anni nakuan i pinaka-importante nga ipakimallo na ngamin nga matalo nga aripan ni Jehova. Kinagi na: “Marayaw paray i ngagam-mu.” (Mat. 6:9) Pakatotoli nga nipasigo na Biblia i importansia na pamakasanto ta ngagan ni Jehova. Yaw i karuan ta angngarigan: “Iyawa nu kani Jehova i gloria nga mepangngo ta ngagan na.” (1 Cro. 16:29; Sal. 96:8) “Ikansion nu i dayaw na ngagan na.” (Sal. 66:2) “Daya-rayawakku i ngagammu ta mannanayun.” (Sal. 86:12, NW ) I tadday ta tiempo ira nga naginna nga naguvovug si Jehova maggafu ta langi ay nesimmu ta templo na Jerusalem turi ta kinagi ni Jesus: “Ama, ipasingam-mu ngana i dayaw na ngagam-mu!” Simibbag gapa si Jehova: “Nipasingak-ku ngana, ay ek-ku mangana nga ipasingan noka!”—Juan 12:28. a

Mekatallu, namegafu tagga, i gakkag ni Jehova ay kanayun ngana nga konektadu ta ngagan onu reputasion na. Nonopan yaw: Mesimmu saw i ultimu nga kapurueba kabalin na Tanga-rivu Dagun nga Pammaguray ni Cristo. Tapus, anni ngana saw i tumunug? Anni saw i matageno na ngamin nga intelihente nga pinaratu meyannung ta ngagan ni Jehova  tatun nga tiempo? Tapenu matabbag yatun, daddammattam i dua nga konektadu nga aspeto ira natun—i integridad na totolay anna i soberania. Arubangan kari paga noka danuri na totolay nga napakurug da tu matalo ira i isyu meyannung ta pamattalupaddian ta integridad da? Ari, perfekto gare ngana noka ira anna nakapasa ngana ira ta ultimu nga kapurueba. Malawa da ngana noka i mannanayun nga inango. Ari ngana gapa saw kawagan nga pakurugan tu kapianan i pammaguray ni Jehova. Tatun nga tiempo, ngamin ngana saw nga egga ta langi anna ta davvun ay mattaradday anna alawatadda noka i pammaguray ni Jehova. Kunnasi gapa saw i meyannung ta ngagan ni Jehova?

Tatun nga tiempo, mammuan ngana saw na ngamin i kinakurug meyannung kani Jehova anna interamente ngana saw nga mapakasanto i ngagan na. Ngem tulu-tuloy lagapa saw nga i ngagan ni Jehova i pinaka-importante nga gannug para ta ngamin nga aripan na ta langi anna ta davvun. Ngatta? Megafu ta masingadda saw nga tulu-tuloy nga magangngua si Jehova tu kappabbaw ira nga gannug. Nonopan yaw: Megafu ta mapakalinno ngana saw nga itoli ni Jesus i ngamin nga pammaguray kani Jehova, i Dios ngana saw “i mammaguray ta ngamin nga adde na.” (1 Cor. 15:28) Kabalin natun, magayayya saw i totolay ta davvun megafu ta “makapabbaw nga kapalubbang na ána na Dios.” (Roma 8:21) Tuppalan ngana noka ni Jehova i nabayag ngana nga gakkag na nga mattaradday i ána na ta langi anna ta davvun bilang tattadday nga familia.​—Efe. 1:10.

Kabalin saw nga mesimmu ngamin danatun nga gannug, anni ngana saw i matageno na familia ni Jehova ta langi anna ta davvun? Magga tulu-tuloy lagapa saw nga kakayà tam nga dayawan i makakkasta nga ngagan ni Jehova. Kinagi na salmista nga si David: ‘I YAFU ay maraya-rayaw! I makapabbaw nga ngagan na ay dayawan nu adde noka!’ (Sal. 72:18, 19) Tulu-tuloy ittam saw nga makaleg tu bagu anna kappagayayya ira nga rason nga kuan yatun adde ta mannanayun.

Irepresenta na ngagan ni Jehova i ngamin meyannung ta nisa. Kada manono tam i meyannung ta ngagan ni Jehova, manono tam gapa i meyannung ta aya na. (1 Juan 4:8) Kanayun tam noka nga daddamman nga pinaratu ittam ni Jehova megafu ta aya, niyawa na i sakrifisio nga tavvu megafu ta aya, anna nipasingan na nga matunung i pammagurena megafu ta aya. Ngem tulu-tuloy nga matageno tam i pangaya ta nittam ni Jehova adde ta mannanayun. Mapaguyu ittam nga mas paga nga maddukko ta nisa bilang Yama tam anna makkansion tu paddayarayaw ta makapabbaw nga ngagan na magadde ta mannanayun.​—Sal. 73:28.