1. Anni i kayà ni Jehova para ta ngamin nga totolay?

 NIDDAN ni Jehova i totolay tu lallaguray nga mappili. Kanayummu nga usu-usan yatun nga regalu nu mangngua ka tu desision. I pinaka-importante nga desision nga kuan na tadday nga tolay ay i desision nga idedika i baggi na kani Jehova anna mabbalin tu parte na familia na. Yatun i kayà ni Jehova nga kuan na ngamin nga totolay. Ngatta? Megafu ta iddukan na i totolay anna kayà na nga magayayya ira. Kayà na nga mabbalin ira tu kofun na anna mattolay tu mannanayun.—Deut. 30:​19, 20; Gal. 6:​7, 8.

2. Anni i kayà ni Jehova nga kuan danuri na ari paga nabbabawi? (1 Juan 2:1)

² Ari nga fersan ni Jehova i maski sinni nga tolay nga masserbi ta nisa. Pagurayan na nga maddesision lagapa i kada tolay nu anni i kuan na. Ngem kunnasi nu ari nga natuttul na tadday nga bawtisadu nga Cristiano i dob na Dios anna nakakua yayya tu madammo nga liwa? Nu ari yayya nga mabbabawi, mawag tu malsa yayya ta kongregasion. (1 Cor. 5:13) Ngem maski nu kunnatun, talaga kayà ni Jehova nga manoli ta Nisa i nakaliwa. I kurug, yatun i tadday nga importante  nga rason nu ngatta niyawa na i tavvu—tapenu mapakoma na danuri mabbabawi ta nakaliwatadda ira. (Bibbigan i 1 Juan 2:1.) Minaggiddu i Dios tam yayya nga kakayà na nga pagaramman danuri nakaliwa nga mabbabawi.—Zac. 1:3; Roma 2:4; Sant. 4:8.

3. Anni i gigiammuattam tam taw nga artikulo?

³ Kakkagian nittam ni Jehova nu anni i matageno na meyannung ta liwa anna tari ira ta nakaliwa tu madammo. Kayà na nga kunnatun gapa nakuan i matageno tam. Magigiammu taw nga artikulo nu kunnasi tam nga makua yatun. Habang bibbigammu yaw, innan (1) nu kunnasi nga naasikasu ta ollu-siglo nga kongregasion ta Corinto i tadday nga kaso na madammo nga liwa, (2) nu anni i instruksion nga niyawa ni apostol Pablo turi ta nabbabawi i nakaliwa, anna (3) nu anni i ituddu ta nittam naw meyannung ta matageno ni Jehova tari ira ta nakaliwa tu madammo.

PANGASIKASU TU MADAMMO NGA LIWA TA OLLU SIGLO

4. Anni i nesimmu ta kongregasion ta Corinto? (1 Corinto 5:​1, 2)

⁴ Bibbigan i 1 Corinto 5:​1, 2. Ta mekatallu nga pabbiahe ni Pablo bilang misionero, egga i nadumug na nga grabe nga mesissimmu ta bagu nga kongregasion ta Corinto. Egga i tadday nga lalaki tatun nga sinadday na i atawa na yama na. Kakkadda-kaddag i kunnatun nga annangngua anna “maski paga i ari nga mangurug ira ta Dios ay ariad-da nga kuan i kunnatun”! Ari laman tu kinunsinti na kongregasion yatun nga kingngua na, nu ari, baka nipara-parayag da paga lagu yatun. Abbo siguru na karuan nga ipasingan laman natun nu kunnasi nga minaggallallo anna minangngalippawa i Dios ta imperfekto nga totolay. Ngem ari nga kunsintian ni Jehova i totolay na nu magangngua ira tu marake. Megafu tatun nga kappasirang nga kingngua natun nga lalaki, magga nadaral i makasta nga reputasion na kongregasion. Posible gapa nga iinfluwensian na i kasi-Cristiano na ira nga makikavvulu nisa. Anni gafu i nidog ni Pablo nga kuan na kongregasion?

5. Anni i nidog ni Pablo nga kuan na kongregasion, anna anni i kayà na kagian tatun? (1 Corinto 5:13) (Innan gapa i letratu.)

⁵ Bibbigan i 1 Corinto 5:13. Pinaguyu ni Jehova si Pablo nga turakkan i kongregasion anna ikagi ta nira nga mawag tu malsa ta kongregasion yatun nga ari nga mabbabawi nga nakaliwa. Kunnasi gafu i pattratu ta nisa na matalo ira nga Cristiano? Kinagi ni Pablo nga ‘ari ira nga mevulu’ ta nisa. Anni i kayà  kagian natun? Nipakanawag ni Pablo nga kasali tatun nga dob i ‘ari da pakiyarubang ta akkakanan ta kunnaw nga tolay.’ (1 Cor. 5:11) Nu kaarubang mu garay nga kumang i tadday nga tolay, maruddu nga kibbidammu yayya anna sonu kua, mas aru ngana i tiempo nu nga makkavulu. Manawag gafu nga i kayà kagian ni Pablo ay ari nakuan nga makikakkavulu i kongregasion ta kunnatun nga tolay. Protektan natun i kongregasion ta marake nga influwensia na. (1 Cor. 5:​5-7) Awayya na gapa tu yatun i mamappanono ta nisa nga talaga marake i kingngua na anna awayya na tu mappasirang yayya ta kingngua na anna mapaguyu nga mabbabawi.

6. Anni i efekto na tura ni Pablo ta kongregasion anna ta tolay nga nakaliwa?

⁶ Agga-nono ni Pablo nu anni tamma i reaksion na kongregasion ta Corinto ta tura na. Turi kua, egga i nipadumug ta nisa ni  Tito nga kuruga namagayayya ta nisa. Makasta i nipangalawa na kongregasion ta tura na. (2 Cor. 7:​6, 7) Sinuttul da i nipakua na ira. Piga vulan gapa i nappasa kabalidda nga kingngua yatun, nabbabawi ngana i nakaliwa! Inuli na ngana i kondukta na anna i appana-panono na anna tuttulan na ngana i matunung nga estandarte ira ni Jehova. (2 Cor. 7:​8-11) Anni gafu i tumunug nga nipakua ni Pablo ta kongregasion?

NU KUNNASI TRATUAN NA KONGREGASION I NABBABAWI NGA NAKALIWA

7. Anni i makasta nga resulta na nikalsa na nakaliwa ta kongregasion? (2 Corinto 2:​5-8)

⁷ Bibbigan i 2 Corinto 2:​5-8. Kinagi ni Pablo nga ‘hustu ngana i nipangastigu na aru nira ta kunnatun nga tolay.’ Kayà na kagian, netuppal ngana i gakkag na disiplina para ta nisa. Anni yatun nga gakkag? Tapenu mapaguyu yayya nga mabbabawi.—Heb. 12:11.

8. Anni i tumunug nga nipakua ni Pablo ta kongregasion?

⁸ Kunnaw i tumunug nga nipakua ni Pablo ta kongregasion: “Mawag tu pakoman nu ngana anna pasikannan nu i nono” na wagi nu nga nakaliwa, anna “ipasingan nu i kurug nga pangaya nu sa.” Tatun nga kinagi ni Pablo, ari na laman ikikkiddaw nga pamavulunan na kongregasion nga makatoli yatun nga tolay nga nabbabawi. Kayà na gapa nga ipasingadda ta kakkagian anna ta pattratu da ta nisa nga talaga pinakoma da ngana yayya anna iddeddu da yayya. Manawag gafu nakuan nga ipasingadda tu magayayya ira nga nanoli yayya ta kongregasion.

9. Ngatta narigatan i karuan nga pakoman i wagi da nga nabbabawi?

⁹ Awayya na tu ari magayayya i karuan turi ta nadumug da nga metoli ngana ta kongregasion i tolay nga nakaliwa tu madammo. Ngatta makagi tam yatun? Siempre, namroblema i interu kongregasion megafu ta kinikkingngua na anna awayya na tu nepasiranan i karuan nga wagi tatun nga kingngua na. Ikakkaguman gapa na kongregasion nga tuttulan i dorob ni Jehova yayya nga baka natageno na karuan nga ari tu patas nga metoli i kunnatun nga tolay nga grabe i nakaliwatan na ira. (Ikumpara i Lucas 15:​28-30.) Ngatta gafu mawag nga ipasingan na kongregasion i kurug nga aya tatun nga wagi da nga nanoli?

10-11. Anni i posible nga mesimmu nu panakitan na elder ira nga pakoman i nakaliwa?

¹⁰ Anni tamma i matageno na nakaliwa nu manaki na elder ira nga itoli yayya ta kongregasion maski nu nabbabawi ngana mabba yayya? Anni gapa i matageno na nu nakatoli ngana yayya ngem ari lagapa nga ipasingan na wawwaragi nga iddukadda yayya? Baka makkafi i nono na megafu ta sobra nga “daddam na.” Awayya na paga lagu tu nonopan na nga ari talaga yayya mapakoma ni Jehova yatutta ari na ngana ikaguman nga manguli.

¹¹ Anni paga i awayya na nga mesimmu nu manaki na wawwaragi nga pakoman i wagi da nga nabbabawi? Awayya na tu mafektan i mismu nga relasiodda kani Jehova. Ngatta? Megafu ta si Satanas nga awan tu allo na i paparigadda, ari tu si Jehova nga minammakoma. Ipamavuludda gapa nga usan ira na Diablo tapenu pakkafian i nono na wagi da anna pagimmangan yayya ta passerbi kani Jehova.—2 Cor. 2:​10, 11; Efe. 4:27.

12. Kunnasi nga maparigan na kongregasion si Jehova?

¹² Kunnasi gafu nga maparigan na kongregasion ta Corinto si Jehova, ari tu si Satanas? Mawag tu parigadda i pattratu ni Jehova ta nakaliwa ira nga mabbabawi. Kunnatun i mabibbig ta teksto ira na Biblia meyannung kani  Jehova. Kinagi ni David nga ‘mapia anna minammakoma’ si Jehova. (Sal. 86:5) Nitura gapa ni Mikias: “Sinni i Dios nga kagittam, mamakoma ta kamali anna mamalampas ta tagaruli?” (Mik. 7:18) Kinagi gapa ni Isaias: “Panawan nakuan na marake nga tolay i dalan na anna i marake nga appana-panono na; mattoli nakuan yayya kani Jehova nga mangikabbi sa, ta Dios tam, megafu ta dakal i pamakoma na.”—Isa. 55:7.

13. Ngatta mepangngo tu metoli ngana ta kongregasion i nakaliwa? (Innan i kahon nga “ Kanni nga Netoli i Lalaki nga Taga-Corinto?”)

¹³ Maparigan na kongregasion ta Corinto si Jehova nu ipasingadda ta nanoli nga iddeddu da yayya anna magayayya ira ta nanoli yayya. Nu tuttulan na kongregasion i kinagi ni Pablo nga alawatadda uli yayya, mepasingadda nga ‘mamarulo ira ta ngamin nga bili-bilin.’ (2 Cor. 2:9) Maski nu piga vulan pagalaman i nappasa turi ta nikalsa na ta kongregasion, nabbabawi ngana yayya. Yatutta awan tu rason nga italattadda i ketoli na ta kongregasion.

PATAS ANNA MINAGGALLALLO SI JEHOVA

14-15. Anni ira i nagigiammu tam ta nesimmu ta Corinto? (2 Pedro 3:9) (Innan gapa i letratu.)

¹⁴ Netura ta Biblia i nesimmu ta Corinto tapenu “matudduan ittam.” (Roma 15:4) Nagigiammu tam tatun nga nesimmu nga ari nga  kunsintian ni Jehova i totolena nu makangngua ira tu madammo nga liwa. Abbo na karuan nga megafu ta minaggallallo si Jehova, mattalupaddian lagapa ta kongregasion i tolay nga ari mabbabawi. Kurug tu minaggallallo yayya ngem ari yayya nga kunsintidor. Ari na gapa nga ulian i estandarte na ira ta mapia anna marake. (Jud. 4) Ta nu kuan na gare i kunnatun, mabbalin yayya tu awan tu allo na, megafu ta makaperwisiu yatun ta kongregasion.—Prov. 13:20; 1 Cor. 15:33.

¹⁵ Ngem nagigiammu tam gapa nga manaki ni Jehova nga egga i maski sinni nga tolay nga madaral. Kayà na nga ipaliag i totolay adde ta posible. Mangipasingan yayya tu allo tari ira ta manguli anna maya nga pakappian i nadaral nga relasiodda nisa. (Eze. 33:11; bibbigan i 2 Pedro 3:9.) Nabbabawi i lalaki nga taga-Corinto anna nilikuran na i marake nga kikkingngua na. Megafu tatun, nibilin ni Jehova ta kongregasion nga mawag tu pakoman anna alawatadda uli yayya.

16. Anni i makagim kani Jehova ta nesimmu ta Corinto?

¹⁶ Nagigiammu tam ta nesimmu ta Corinto nga minaggiddeddu, matunung, anna patas si Jehova. (Sal. 33:5) Ari kari nga paguyuan ittam natun nga mas paga nga dayawan i Dios tam? I kurug, makaliwa ittam ngamin yatutta mawag tam ngamin i pamakoma na. Mappabalo ittam kani Jehova ta niyawa na i tavvu nga namapposible ta kapakoma tam. Kuruga makapabannay gapa nga mammuan nga talaga iddeddu ni Jehova i totolena anna kayà na nga magayayya ittam nga mattolay tu mannanayun!

17. Anni i gigiammuattam ta tumunug ira nga artikulo?

¹⁷ Kunnasi gapa i pangasikasu ta madammo ira nga liwa ta tiempo tam? Kunnasi nga mepasingan na elder ira ta kongregasion nga paparigadda si Jehova nga kayà na tu mabbabawi i nakaliwa? Anni nakuan i reaksion na kongregasion nu nadesision na elder ira nga alsan onu itoli i tadday nga tolay? Matabbag danatun ta tumunug ira nga artikulo.