1. Anni i awayya na nga mesimmu kabalin nga makaliwa tu madammo i tadday?

 TA NAPPASA nga artikulo, nagigiammu tam i kinagi ni Pablo nga mawag tu kuan na kongregasion ta Corinto ta lalaki nga nakaliwa tu madammo. Ari nga nabbabawi i nakaliwa yatutta nalsa yayya ta kongregasion. Ngem gitta na mabibbig ta tema nga teksto, awayya nga ituttul na Dios i tadday nga tolay tapenu mabbabawi. (Roma 2:4) Kunnasi ira nga moffunan na elder ira tapenu mabbabawi?

2-3. Anni i mawag nga kuattam nu nakannammuattam nga nakaliwa tu madammo i tadday nga wagi, anna ngatta?

² Nige nga manguffun na elder ira, mawag labbi nga ammu da nu anni i nesimmu. Anni gafu i mawag tu kuattam nu nakannammuattam nga nakaliwa tu madammo i tadday nga wagi anna awayya na i malsa ta kongregasion megafu tatun? Mawag nga pagarammattam yayya nga mappoffun ta elder ira.—Isa. 1:18; King. 20:28; 1 Ped. 5:2.

³ Ngem kunnasi nu manaki na nakaliwa i makibbida ta elder ira? Sittam ngana i mangikagi ta elder ira tapenu masiguradu tam nga malawa na i kawagan na nga uffun. Pangipasingan yatun tu aya tam tari ta nakaliwa. Nu pakakuan na gare i liwa na, mas nga madaral na i relasion na kani Jehova. Baka mepasiranan gapa i kongregasion. Maski gafu nu mariga nga kuan yatun, igutu-gutu tam lagapa nga ikagi yatun ta elder ira megafu ta iddeddu tam si Jehova anna i wagi tam.—Sal. 27:14.

 NU KUNNASI NGA UFFUNAN NA ELDER IRA DANURI NAKALIWA TU MADAMMO

4. Anni i ikaguman nga kuan na elder ira nu kibbidadda i nakaliwa tu madammo?

⁴ Nu egga i nakaliwa tu madammo ta kongregasion, mappili i baggi na elder ira tu tallu nga kualipikadu nga elder nga maggafu nira tapenu mabbuu tu tadday nga komite. a Mawag tu mapakalinno danatun nga lallaki anna ammu da i limitasiodda. Kurug tu ikagumadda nga uffunan i nakaliwa tapenu mabbabawi, ngem ammu da nga ariadda yayya nga mafersa nga manguli. (Deut. 30:19) Ammu na elder ira nga ari tu ngamin nga nakaliwa ay kagitta ni Patul David nga mabbabawi. (2 Sam. 12:13) Awayya na tu ari nga magginna ta tabarang ni Jehova i karuan nga nakaliwa. (Gen. 4:​6-8) Ngem ikaguman lagapa na elder ira nga uffunan i nakaliwa tapenu mabbabawi. Anni ira nga prinsipio i tuttuladda ta pakibbida da ta nakaliwa?

5. Anni nga tabarang i agga-nono na elder ira nu kibbidadda i nakaliwa? (2 Timoteo 2:​24-26) (Innan gapa i letratu.)

⁵ Imammatan na elder ira nga i nakaliwa ay gitta na neyawawan nga karneru anna nabalor lagapa yayya. (Luc. 15:​4, 6) Nu kibbidadda gafu i nakaliwa, ari nga makapataki i pabbibida anna pattratu da ta nisa. Ari da gapa nonopan nga i mawag da laman nga kuan ay makkiavu anna ammuan i detalye ira na nakaliwatan na. Mawag nga ipasingadda i kualidad ira nga mabibbig ta 2 Timoteo 2:​24-26. (Bibbigan.) Kanayun gafu nga malumamo anna masippo i elder ira ta pangikagumadda nga addetan i futu na nakaliwa.

6. Kunnasi nga iprepara na elder ira i futu da nige da nga kibbidan i nakaliwa? (Roma 2:4)

⁶ Iprepara na elder ira i futu da. Ikagumadda nga parigan si Jehova ta pattratu da ta nakaliwa. Agga-nono da gapa i kinagi ni Pablo: “I pagallo na Dios i mangituttul nikaw ta pabbabawi.” (Bibbigan i Roma 2:4.) Pastor i elder ira yatutta mawag tu tuttuladda i pangigiya ni Cristo anna parigan i panangngal na ta kongregasion. (Isa. 11:​3, 4; Mat. 18:​18-20) Nige nga kibbidan na elder ira i nakaliwa, makimallo ira anna agga-nono da nga i gakkag da ay uffunan i nakaliwa nga mabbabawi. Mar-research ira ta Biblia anna ta publikasiottam ira anna makimallo ira kani Jehova tapenu mas malippawa da i nakaliwa anna i situasion na. Ikonsidera da gapa i mawag ira nga ammuadda nga detalye tatun nga tolay nu ngatta kunnari i ninono anna i kingngua na.—Prov. 20:5.

7-8. Kunnasi nga maparigan na elder ira i appasa-pasensia ni Jehova nu kibbidadda i nakaliwa?

 ⁷ Parigan na elder ira i appasa-pasensia ni Jehova. Daddammadda nu kunnasi nga inuffunan ni Jehova i nakaliwa ira ta nappasa. Angngarigan na, pinasensian ni Jehova si Cain. Inabisowan na yayya ta mesimmu nu ari yayya nga manguli anna kinagi na gapa nga bendisionan na yayya nu magginna yayya. (Gen. 4:​6, 7) Sinabarangngan gapa ni Jehova si David gukaban ni profeta Natan. Nangusa si Natan tu ilustrasion nga nakatukkal ta futu na patul. (2 Sam. 12:​1-7) ‘Pakatotoli gapa nga zinog’ ni Jehova i profeta na ira ta Israelita ira nga matagga i ulu da. (Jer. 7:​24, 25) Ari nga ininnaggan ni Jehova nga mabbabawi labbi i totolena nige na ira nga uffunan. Yayya i nagollu nga nagguyu tapenu pagaramman ira nga mabbabawi.

⁸ Paparigan na elder ira si Jehova ta pangikagumadda nga uffunan danuri nakaliwa tu madammo. ‘Papidduadda i appasensia da’ ta pattratu da ta nira gitta na nakagi ta 2 Timoteo 4:2. Mawag gafu nga kanayun nga kalmadu anna minappasensia i tadday nga elder tapenu mapaguyu na i nakaliwa nga kuan i fustu. Nu mapporay onu mallussaw gare i elder, awayya na nga ari nga magginna ta tabarang i nakaliwa onu ari yayya nga mabbabawi.

9-10. Kunnasi nga mepalippawa na elder ira ta nakaliwa nga marake ira i pinili na yayya nga nakaliwa yayya?

⁹ Ikaguman na elder ira nga ammuan nu ngatta nakaliwa i tadday. Angngarigan na, yaw i karuan ta puede da nga ammuan: Sisinu kari nga nakkafi i espiritualidad na megafu ta pinagurayan na i personal study na onu i ministerio na? Sinaggi-mittan kari ngana laman yayya nga makimallo kani Jehova onu ari ngana nga napafutuan i pakimallo na ira? Nagimmang kari yayya nga labanan i marake ira nga pakkaraga? Sinni ira i kakkavulu na? Anni ira i dibersion na? Anni i efekto natun ira nga pinili na ta appana-panono anna ta pakkaraga na? Malippawa na kari nu kunnasi nga nafektan i Yama na nga si Jehova ta desision anna kinikkingngua na?

¹⁰ Pakkiavutan na elder ira i nakaliwa tapenu mapannonopan na i gannug ira nga namakkafi ta relasion na kani Jehova yatutta nakaliwa yayya. Masippo da nga kuan yatun anna ari ira nga makkiavu tu personal ira nga gannug nga ari mabba nga mawag nga mannammuan na elder ira. (Prov. 20:5) Awayya da gapa i mangusa tu ilustrasion ira tapenu mepa-intindi ta nakaliwa nga madammo i kingngua na, gitta na kingngua ni Natan kani David. Awayya na nga ta gafu nga pakibbida na elder ira, maraddam i nakaliwa ta kinikkingngua na. Baka tatun paga lagu nga tiempo, mabbabawi ngana yayya.

11. Kunnasi i pattratu ni Jesus ta nakaliwa ira?

¹¹ Ikaguman na elder ira nga parigan si Jesus. Kinibbida na napaginnolay nga si Jesus si Saulo na Tarso. Kunnaw i mamappanono nga pakkiavu nga kinagi na, “Saulo, Saulo! Ngatta ta dara-darumam-mà?” Inuffunan yayya ni Jesus tapenu malippawa na nga marake i kukukuan na. (King. 9:​3-6) Nu meyannung gapa ‘ta babay nga si Jezebel,’ kinagi ni Jesus: “Niddak-ku yaya ta tiempo na nga mabbabawi.”—Nep. 2:​20, 21.

12-13. Anni i kuan na elder ira tapenu meddan i nakaliwa tu chansa nga mabbabawi? (Innan gapa i letratu.)

¹² Paparigan na elder ira si Jesus yatutta ariadda insigida nonopan nga ari nga mabbabawi i tadday nga nakaliwa. Egga ira i nakaliwa nga awayya na tu mabbabawi ta ollu pagalaman nga pakibbida ta nira na komite. Ngem mawag gapa na karuan i mas aru paga nga tiempo. Yatutta ari laman tu mittan nga iyunnug na elder ira nga kibbidan i nakaliwa. Awayya  na gare nga kabalin na ollu nga pakibbida da ta nisa, pannonopan na tu mapia i nakagi nisa. Awayya na gapa nga mappakalinno yayya anna makimallo kani Jehova nga pakoman na yayya. (Sal. 32:5; 38:18) Tapus ta tumunug ira nga pakibbida ta nisa, awayya na nga nanguli ngana i pagimamma anna i reaksion na kumpara turi ta ollu da yayya nga kinibbida.

¹³ Makipattageno anna masippo nakuan i elder ira tapenu moffunadda nga mabbabawi i nakaliwa. Ipaka-pakimallo da kani Jehova nga bendisionan na i pangikagumadda anna nakuan tu manono gabbalaman na nakaliwa i mapia anna mabbabawi yayya.—2 Tim. 2:​25, 26.

14. Sinni talaga i mangungnguffun ta nakaliwa tapenu mabbabawi yayya, anna ngatta makagi tam yatun?

¹⁴ Magayayya ittam nu mabbabawi i tadday nga nakaliwa! (Luc. 15:​7, 10) Sinni gafu talaga i mangungnguffun ta nisa? I elder kari ira? Kunnaw i nitura ni Pablo meyannung ta nakaliwa ira: “Aber laman nu ipamavulun na Dios tu mabbabawi ira.” (2 Tim. 2:25) Si Jehova gafu, ari tu maski sinni nga tolay, i mangungnguffun ta tadday nga Cristiano tapenu moli na i appana-panono anna i pagimamma na. Ipakanawag gapa ni Pablo i makasta ira nga mesimmu kabalin nga mabbabawi i tadday. Mapeggan yatun nga tolay tu mas fustu nga pakannammu ta kinakurug, manawagan i annonono na, anna matammangngan na i silu ira ni Satanas.

15. Kunnasi nga metulu-tuloy nga moffunan na elder ira i nabbabawi nga nakaliwa?

¹⁵ Nu mabbabawi i tadday nga nakaliwa, iyunnug na komite nga mabisita yayya tapenu ma-shepherding. Uffunadda yayya nga pasikannan i pangurug na anna lisian i silu ira ni Satanas anna kuan i fustu. (Heb. 12:​12, 13) Ngem siempre, ari nga istorian na elder ira ta maski sinni i detalye ira na nakua na nakaliwa. Ngem anni i mawag nga mammuan na kongregasion?

“PORAYAM-MU TA PAGARA-ARUBANGAN NA NGAMIN NGA MANGURUG”

16. Segun ta 1 Timoteo 5:​20, sinni danuri “ngamin nga mangurug” nga tuktukuyan ni Pablo?

¹⁶ Bibbigan i 1 Timoteo 5:20. Kinagi ni Pablo ta kavulu na nga elder nga si Timoteo  nga ivuya na danuri magaggangngua tu marake ta pagara-arubangan na “ngamin nga mangurug.” Sinni i tukuyan ni Pablo tatun? Ari tu i interu nga kongregasion i tukuyan na ta kinagi na nga mangurug. I tukuyan na laman tatun ay danuri pilippiga nga awayya na tu makannammu ta kingngua na tadday nga nakaliwa. Awayya na gare nga nasingadda mismu i kingngua na onu ta nira yayya nga nakkumpable. Ta nira laman gafu nga ikagi na elder ira nga naasikasu ngana yatun anna nevuya ngana i nakaliwa.

17. Ta anni nga situasion nga meyanunsio ta kongregasion nga nevuya i tadday, anna ngatta?

¹⁷ Egga ira i situasion nga aru ngana ta kongregasion i makannammu nga nakaliwa tu madammo i tadday onu magga makannammuadda balaman saw yatun. Nu kunnatun, i interu nga kongregasion ngana i nelagum ta tinukoy ni Pablo nga “ngamin nga mangurug.” Iyanunsio gafu na tadday nga elder ta kongregasion nga nevuya i tadday nga wagi. Ngatta? Kagian ni Pablo: “Tapenu egga i paganassingan na karuan” anna ari ira nga makaliwa tu madammo.

18. Nu nakaliwa tu madammo i tadday nga bawtisadu nga menor-de-edad, anni i kuan na elder ira? (Innan gapa i letratu.)

¹⁸ Kunnasi nu nakaliwa tu madammo i baptize nga menor-de-edad onu danuri awan paga tu 18 i dagun na? Iyunnug na baggi na elder ira nga makibbida i dua nga elder ta nisa kavulu i magana na nga Saksi. b Ammuadda nu anni ngana i kingngua na magana tapenu moffunan i ana da nga mabbabawi. Nu magginna i abbing ta tabarang na magana na anna masingan ta nisa nga egga ngana i panguli ta  appana-panono anna agguyu-guyu na, awayya na nga madisidi na dua nga elder nga ari ngana nga kawagan i tadday nga komite tapenu kibbidan i abbing anna i magana na. Ammu na elder ira nga niyawa ni Jehova ta magana ira i responsibilidad tapenu meddu nga itunung i ána da. (Deut. 6:​6, 7; Prov. 6:20; 22:6; Efe. 6:​2-4) Tapus kanayun saw nga kumustan na elder ira i magana tapenu siguraduan nga malawa na abbing i espiritual nga uffun nga kawagan na. Ngem kunnasi gapa nu pakakuan lagapa na tadday nga bawtisadu nga menor-de-edad i makaliwa anna manaki na i mabbabawi? Tatun ngana nga mabbuu tu komite na elder ira nga makibbida ta nisa kavulu i magana na nga Saksi.

“MINAGGALLALLO ANNA MINAGGIDDEDDU” SI JEHOVA

19. Kunnasi nga ikakkaguman na elder ira nga parigan si Jehova nu kibbidadda i nakaliwa?

¹⁹ Responsibilidad na elder ira nga miembro na komite nga pattalupaddianan nga marenu i kongregasion. (1 Cor. 5:7) Kayà da gapa nga mapaguyu nga mabbabawi i nakaliwa ira nu posible yatun. Yayya nga kanayun nga positibo i elder ira anna ari nga mawawan i pagiddanama da nga manguli i nakaliwa. Ngatta? Kayà da gare nga mabbalin tu “minaggallallo anna minaggiddeddu” kagitta ni Jehova. (Sant. 5:11) Kunnatun ira nga kualidad i nipasingan na manakam ngana nga si apostol Juan. Nitura na: “Ana ku ira, itura ku yaw nikamu tapenu ari kamu nga mattagaruli. Ngem nu egga i mattagaruli, egga i mangipakimemallo nittam ta Yama: si Jesu-Cristo nga matunung.”—1 Juan 2:1.

20. Anni i gigiammuattam ta ultimu nga artikulo naw nga isyu?

²⁰ Kaddaraddam ta egga ira i tiempo nga manaki na tadday nga Cristiano i mabbabawi. Nu kunnatun, mawag tu malsa yayya ta kongregasion. Nu mesimmu yatun, anni i kuan na elder ira? Gigiammuattam yatun ta ultimu nga artikulo taw nga isyu.