MAGIGIAMMU NGA ARTIKULO 31
KANSION 12 Katannangan Ka, O Jehova
Pinaliag ni Jehova i Totolay ta Liwa Anna Patay
“Kuruga iddukan na Dios i mundo. Yatun tu zinog na i tattadday nga Ana na.”—JUAN 3:16.
I MAGIGIAMMU TAM
I kingngua ni Jehova tapenu moffunan na ittam nga malabanan i liwa anna nu kunnasi na pinapposible nga mattolay ittam tu mannanayun anna mapalubbangan ittam ta liwa.
1-2. (a) Anni i liwa, anna kunnasi tam nga maffu yatun? (Innan gapa i “Kebalinan na Termino.”) (b) Anni i gigiammuattam taw nga artikulo anna ta karuan paga nga artikulo taw nga isyu na Passifusifutan? (Innan gapa i “Meperaddam ta Mabbibbig Ira” taw nga isyu.)
KAYÀ mu kari nga mammuan nu kunnasi kadakal i pangaya ni Jehova ta niko? Kunnaw i kuammu: Gigiammuammu i kingngua na tapenu mepaliag naka ta liwa anna patay. Kappaganassing nga kalaban i liwa. a Ari mu nga maffu yatun nga sikaw laman. Inaggaw ittam ngamin nga makaliwa anna matay ittam megafu ta liwa. (Roma 5:12) Ngem ta uffun ni Jehova, maffu tam i liwa. Kakurugan na, siniguradu ni Jehova nga mangaffu ittam!
2 Ma-6,000 dagun ngana nga uuffunan ni Jehova nga Dios i totolay tapenu malabanadda i liwa. Ngatta? Iddeddu na gare ittam. Ta gafa-gafu paga laman, iddeddu na ngana i totolay. Yayya nga napakaru i kingngua na tapenu uffunan ira nga malabanan i liwa. Ammu na nga marresulta ta patay i liwa anna manaki na nga matay ittam. Kayà na nga mattolay ittam tu mannanayun. (Roma 6:23) Yatun mismu i kayà na para ta niko. Taw nga artikulo, tabbagattam i tallu nga pakkiavu: (1) Kunnasi nga niyawa ni Jehova i iddanama para ta minakkaliwa nga totolay? (2) Kunnasi nga napagayayya na minakkaliwa nga totolay ta tiempo na Biblia si Jehova? (3) Kunnasi nga nipaliag ni Jesus i totolay ta liwa anna ta patay?
KUNNASI NGA NIYAWA NI JEHOVA I IDDANAMA TA MINAKKALIWA NGA TOTOLAY?
3. Kunnasi nga nakaliwa i ollu nga magana tam?
3 Turi ta pinaratu ni Jehova i ollu nga lalaki anna babay, kayà na nga magayayya ira. Niddan na ira tu makakkasta nga paddianan. Niyawa na gapa nira i regalu nga pagatawa anna egga i makakkasta nga annungadda. Pannuadda i davvun tu gaka da anna pabbalinadda i interu mundo tu paraiso nga kagitta na hardin na Eden. Ngem egga laman i tattadday nga bilin ni Jehova nira nga ari da nga kuan. Kinagi ni Jehova nga nu ariadda tuttulan yatun nga bilin, makaliwa ira anna matay. Ammu tam nu anni i nesimmu. Egga i tadday nga espiritu nga awan tu pangaya na ta Dios onu ta nira. Sinenta na si Adan anna si Eva tapenu makaliwa ira. Nappatenta gapa si Adan anna si Eva. Megafu ta ari ira nattalo ta minangngaya nga Yama da, nakaliwa ira. Nesimmu i kinagi ni Jehova. Namegafu tatun nga aggaw, naekspiriensa da i resulta ira na liwa da: nallakay anna nabbako ira, tapus natay ira ta pangurianan na.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Ngatta kala-kalussaw ni Jehova i liwa anna uuffunan na ittam nga labanan yatun? (Roma 8:20, 21)
4 Nipetura ni Jehova ta Biblia i nesimmu ta Eden tapenu mammakapia ittam. Makoffun gare yatun tapenu malippawa tam nu ngatta kala-kalussona i liwa. Iyarayyu ittam na liwa ta Yama tam anna marresulta yatun ta patay. (Isa. 59:2) Kala-kalussaw ni Satanas si Jehova anna i totolay yayya nga sinenta na si Adan anna si Eva tapenu makaliwa anna kakayà na gapa nga makaliwa ittam. Abbo na tamma tu nangaffu ngana yayya ta Eden. Ngem ari na nantindian nga minaggiddu si Jehova. Ari nga inuli ni Jehova i gakkag na para ta gaka da Adan anna Eva. Iddeddu na i totolay, yatutta insigida yayya nga nangiyawa tu iddanama para ta ngamin. (Bibbigan i Roma 8:20, 21.) Ammu ni Jehova nga pilian na karuan tatun nga gaka nga ayatan yayya anna mappoffun ira ta nisa tapenu malabanadda i liwa. Megafu ta yayya i Yama da anna i Namaratu nira, palubbangan na ira ta liwa anna egga i chansa da nga makiddukko ta nisa. Anni i kuan ni Jehova tapenu mabbalin tu posible ngamin danatun?
5. Kanni nga ollollu nga niyawa ni Jehova i iddanama ta minakkaliwa nga totolay? Ipakanawag. (Genesis 3:15)
5 Bibbigan i Genesis 3:15. I ollollu nga pangiyawa ni Jehova ta iddanama para ta minakkaliwa nga totolay ay turi ta kinagi na nga daralan na saw si Satanas. Niprofesiya na Dios nga egga saw i “gaka” nga mangipaliag ta totolay. Yatun saw nga gaka i manaral kani Satanas anna i massolba ta ngamin nga problema nga niyawa ni Satanas ta Eden. (1 Juan 3:8) Ngem mazziga labbi yatun nga gaka. Bigaran gare yayya ni Satanas, nga kebalinan na, matay labbi i gaka. Magga mataka-taki saw yatun para kani Jehova. Ngem sigga-paran nga kuan yatun ni Jehova maski nu matakitan saw yayya tapenu laman mepaliag na i totolay ta liwa anna patay.
KUNNASI NGA NAPAGAYAYYA NA MINAKKALIWA NGA TOTOLAY TA TIEMPO NA BIBLIA SI JEHOVA?
6. Anni i kingngua na matalo nga lallaki kagitta da Abel anna Noe tapenu makiddukko kani Jehova?
6 Ta tumunug ira nga siglo, sisinu nga nipakannammu ni Jehova nu anni i kuan na minakkaliwa nga tolay tapenu makiddukko ira ta nisa. Kabalin na rebelyon ta Eden, si Abel nga mekadua nga ana da Adan anna Eva i ollollu nga tolay nga nangurug kani Jehova. Megafu ta iddeddu ni Abel si Jehova anna kayà na nga mapagayayya yayya anna makiddukko nisa, nangitavvung yayya. Tadday nga pastor si Abel yatutta nanga yayya tu karuan ta uvvung nga karneru na anna pinatena yatun tapus nitavvunna. Anni i reaksion ni Jehova? ‘Nagayayya yayya kani Abel anna ta tavvunna.’ (Gen. 4:4) Nipasingan ni Jehova nga nagayayya yayya ta kunnatun ira nga tavvung na karuan paga nga totolay nga mangiddu anna mattalo nisa, kagitta ni Noe. (Gen. 8:20, 21) Gukaban na pangalawa ni Jehova ta kunnatun ira nga tavvung, nipasingan na nga posible para ta minakkaliwa nga totolay nga mapagayayya yayya anna makiddukko ta nisa. b
7. Anni i magigiammu tam ta sigga-paran nga pangisakrifisio ni Abraham ta mismu nga ana na?
7 Masikan i pangurug ni Abraham. Ngem mittan, egga i kitazziga nga nipakua ni Jehova ta nisa. Mawag nga itavvung na i ana na nga si Isaac. Magga mataka-taki yatun para nisa. Ngem sinuttul na lagapa si Jehova. Turi ta patayan na ngana si Isaac, finugaddan yayya ni Jehova. Ngem egga i magigiammu tatun na ngamin nga totolay nga egga i pangurug na. Sigga-paran si Jehova nga isakrifisio i iddeddu nga Ana na. Kunnatun kadakal i pangaya na ta totolay.—Gen. 22:1-18.
8. Anni i magigiammu tam ta tavvung ira nga ayam nga ikiddaw na Mosaiko nga Dob? (Levitico 4:27-29; 17:11)
8 Ta pappasa na aru nga siglo, neyawa i Mosaiko nga Dob ta nasion na Israel. Segun tatun nga Dob, mawag i aru nga tavvung tapenu mapakoma i liwi-liwa na totolay na Dios. (Bibbigan i Levitico 4:27-29; 17:11.) Ipasingan natun ira nga tavvung nga egga i mas makasta nga tavvung onu sakrifisio nga iyawa ni Jehova tapenu mepaliag i totolay ta liwa. Kinagi na Dios ta profeta na ira nga itura da i meyannung ta promesa nga gaka. Nipakanawag natun ira nga profeta nga mawag nga mazziga anna matay i itatana nga Ana na Dios. Mapatay yayya kagitta na tavvung nga karneru. (Isa. 53:1-12) Imajinammu yaw: Niyunnug ni Jehova nga mesakrifisio i iddeddu na nga Ana na tapenu laman mepaliag na i totolay ta liwa anna ta patay. Nelagum ka tatun!
KUNNASI NGA NANGIPALIAG SI JESUS?
9. Anni i kinagi ni Juan Bautista meyannung kani Jesus? (Hebreo 9:22; 10:1-4, 12)
9 Turi ta 29 C.E., nasingan ni Juan Bautista si Jesus nga taga-Nazaret tapus kinagi na: “Yatun i Kordero na Dios nga mamakoma ta katagarulian na mundo.” (Juan 1:29) Ipasingan natun nga kinagi na nga si Jesus i gaka nga nabayag ngana nga nipromesa ni Jehova. Matay yayya tapenu meyawa i nepromesa nga sakrifisio. Tatun mismu nga tiempo, mas nabbalin tu kuru-kurug i iddanama para ta minakkaliwa nga totolay. Talaga mepaliag ngana ira ta liwa.—Bibbigan i Hebreo 9:22; 10:1-4, 12.
10. Kunnasi nga nipasingan ni Jesus nga i inangngayan na ay tapenu “magagal” ta minakkaliwa ira?
10 Naffokus si Jesus ta totolay nga madaddammakkan gafu ta nakaliwatadda ira. Inagalan na ira nga mabbalin tu disipulos na. Ammu gare ni Jesus nga mazziga-riga i totolay megafu ta liwa. Yayya nga inuffunan na danuri marigi-rigatan megafu ta nakaliwatadda ira. Nangusa si Jesus tu tadday nga ilustrasion. Kinagi na: “Ari nga magawag ta manguru danuri i mapia i gawa-gawayyad-da nu ari danuri makkataki laman.” Tapus kinagi na paga: “I inangayak-ku ay ari tu magagal ta matunung ira nga totolay, nu ari ta minattagaruli ira.” (Mat. 9:12, 13) Kunnatun mismu i kingngua ni Jesus. Turi ta binaggawan na tadday nga babay i takki ni Jesus ta lulua na, masippo i pinakibbida ni Jesus ta nisa anna pinakoma na yayya ta liwi-liwa na. (Luc. 7:37-50) Sinudduan na gapa tu importante ira nga kinakurug i tadday nga Samaritana ta posu maski nu ammu na nga imoral i pattolay natun nga babay. (Juan 4:7, 17-19, 25, 26) Niddan paga lagu na Dios si Jesus tu pakapangngua tapenu pawanan i patay nga resulta na ngamin nga liwa. Nakua ni Jesus nga paginnolayan i lallaki, babbay, anna abbarabbing.—Mat. 11:5.
11. Ngatta kakayà na minakkaliwa nga totolay si Jesus?
11 Ari ngana nga kattaka-taka nga kakayà na minakkaliwa nga totolay si Jesus. Minangngikallo gare yayya anna minakkipattageno. Ari ira nga maganassing nga makibbida nisa. (Luc. 15:1, 2) Masippo gapa si Jesus ta nira anna kinomendan na ira megafu ta nangurug ira ta nisa. (Luc. 19:1-10) Minaggallallo si Jesus kagitta balaman na Yama na. (Juan 14:9) Masingan ta kinakkagi anna kinikkingngua na nga minangngikallo i Yama na. Nipasingan na gapa nga iddukan ni Jehova i totolay anna kakayà na nga uffunan i kada tadday ta nira tapenu maffu da i liwa. Inuffunan ni Jesus i minakkaliwa nga totolay tapenu mapaguyu ira nga ulian i kata-katoleda anna tumuttul nisa.—Luc. 5:27, 28.
12. Anni i nituddu ni Jesus meyannung ta patena?
12 Ammu ni Jesus nu anni i mesimmu nisa. Ari laman tu mittan nga kinagi na ta disipulos na nga matraydor yayya anna mepato ta kayu. (Mat. 17:22; 20:18, 19) Kagitta na kinagi ni Juan Bautista anna niprofesiya na profeta ira, ammu ni Jesus nga mapakoma i liwi-liwa na totolay megafu ta passakrifisio na. Nituddu gapa ni Jesus nga kabalin na nga matay, ‘mala na i nono na ngamin nga totolay tu umaranni nisa.’ (Juan 12:32) Mapagayayya na minakkaliwa nga totolay si Jehova nu alawatadda si Jesus bilang Yafu da anna nu parigadda yayya. Nu kunnatun i kuadda, ‘mapalubbangan ira ta pakawayya na katagarulian.’ (Roma 6:14, 18, 22; Juan 8:32) Yatutta magutu si Jesus anna sigga-paran yayya nga natay para ta nittam.—Juan 10:17, 18.
13. Kunnasi nga natay si Jesus, anna anni i ituddu na patena meyannung kani Jehova? (Innan gapa i letratu.)
13 Natraidor si Jesus, naaresto, napasa-pasiranan, naakusan tu gannug ira nga ari na kingngua, anna napara-parigatan. Tapus nipato yayya na suddalu ira ta kayu tapenu matay yayya. Habang attattamman ni Jesus ngamin yatun ta aya na nga mattalupaddian nga matalo, egga i tadday nga mas mataka-takitan—si Jehova. Egga nakuan i pakapangngua ni Jehova nga paliaran i Ana na, ngem ari na nga kingngua yatun. Iddeddu ni Jehova i Ana na, yayya nga ngatta nipamavulu na nga mazziga-riga anna matay yayya? Megafu ta ayatan na ittam. Kinagi ni Jesus: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”—Juan 3:16.
Turi ta nipamavulun ni Jehova nga matay i Ana na, sobra i taki nga inattamman na tapenu laman mapalubbangan ittam ta liwa anna patay (Innan i parapo 13)
14. Anni i magigiammum ta passakrifisio ni Jesus?
14 I passakrifisio ni Jesus i kadakallan nga ebidensia nga kuruga iddeddu ni Jehova i gaka-gaka da Adan anna Eva. Pakurugan gapa natun nga iddeddu naka ni Jehova. Kekkadakal i nisakrifisio ni Jehova anna sobra i taki nga inattamman na tapenu laman mepaliag naka ta liwa anna patay. (1 Juan 4:9, 10) Kakayà na nga uffunan i kada tadday nittam tapenu malabanan anna maffu tam i liwa!
15. Anni i mawag nga kuattam tapenu mammakapia ittam ta regalu na Dios nga sakrifisio nga tavvu ni Jesus?
15 Megafu ta regalu na Dios nga sakrifisio nga tavvu na tattadday nga Ana na, nabbalin tu posible nga mapakoma i liwi-liwa tam. Ngem tapenu pakoman ittam na Dios, mawag nga egga gapa i kuattam. Anni yatun? Kunnaw i kinagi ni Juan Bautista anna ni Jesu-Cristo: “Mabbabawi kamu ta katagarulian nu, ta aranni ngana i Pammaguray na Dios.” (Mat. 3:1, 2; 4:17) Nu kayà tam gafu nga maffu i liwa anna maddukko ta minaggiddu nga Yama tam, mawag nga mabbabawi ittam. Ngem anni i kayà kagian na pabbabawi, anna kunnasi makoffun yatun tapenu makua tam lagapa i fustu maski nu minakkaliwa ittam? Gigiammuattam yatun ta tumunug nga artikulo.
KANSION 18 Mabbala-balo Megafu ta Tavvu
a KEBALINAN NA TERMINO: Ta Biblia, i “liwa” ay puede nga tumukoy ta mali ira nga annangngua megafu ta ari tam nga natuttul i estandarte ni Jehova ta fustu. Ngem puede gapa nga tumukoy i “liwa” ta kina-imperfekto tam ngamin megafu ta narensia tam kani Adan. Megafu tatun nga narensia tam nga liwa, matay ittam ngamin.
