1-2. (a) Anni i pagimamma ni Jehova turi ira ta nakaliwa nga ari mabbabawi? (b) Anni i iddanaman ni Jehova nga kuan na nakaliwa ira?

 ARI tu kunsintidor nga Dios si Jehova. Ikalussona i liwa. (Sal. 5:​4-6) Ekspektan ni Jehova nga tuttulattam i dob na ira nga egga ta Biblia. Ngem ammu na nga imperfekto ittam anna ari tam yayya nga perfekto nga matuttul. (Sal. 130:​3, 4) Ari na gapa kunsintian danuri ‘awan tu Dios da anna pabbalinadda i allo na tu ponnakig da nga mangngua ta neravvunan nga karagatan na baggi da.’ (Jud. 4) Yatutta mabibbig ta Biblia i “kakastigo na totolay nga awan tu agganassing da ta Dios” sonu gerra na Armagedon.—2 Ped. 3:7; Nep. 16:16.

² Ngem, ari nga kayà ni Jehova nga egga i maski sinni nga madaral. Kagitta na nagigiammu tam ngana ta artikulo ira taw nga isyu, manawag nga kagian na Biblia nga “ikaya na tu pallikuran na ngamin nga totolay i katagaruliad-da.” (2 Ped. 3:9) Paparigan na elder ira si Jehova. Pasensiadda nga uffunan i nakaliwa tapenu mabbabawi anna metoli i relasion na kani Jehova. Ngem ari tu ngamin nga nakaliwa ay mabbabawi. (Isa. 6:9) Pakakuan lapa gare na karuan i marake nga annangngua  da maski nu mamippiga ngana nga nikaguman na elder ira nga uffunan yayya nga mabbabawi. Anni i mawag nga kuan na elder ira tatun nga situasion?

“PAPANAWAN NU I MARAKAY NGA TOLAY”

3. (a) Anni i kagian na Biblia nga mawag tu makua ta nakaliwa nga ari mabbabawi? (b) Nu manaki na nakaliwa i mabbabawi, ngatta makagi tam nga pinili na i malsa ta kongregasion?

³ Nu manaki na nakaliwa i mabbabawi, mawag tu tuttulan na elder ira i direksion ta 1 Corinto 5:13: “Papanawan nu i marakay nga tolay ta grupo nu.” Ammu na nakaliwa nga nu ari yayya nga mabbabawi, malsa yayya ta kongregasion. Gitta na pinili na gafu lagapa i malsa. Gataban na lapa i nimula na. (Gal. 6:7) Ngatta makagi tam yatun? Megafu ta manaki na i manguli maski nu mamippiga nga inuffunan yayya na elder ira tapenu mabbabawi. (2 Pat. 17:​12-15) Ipasingan na kukukuan na nga pinili na nga ari tuttulan i dob ira ni Jehova.—Deut. 30:​19, 20.

4. Ngatta meyanunsio ta kongregasion i kalsa na nakaliwa nga ari tu mabbabawi?

⁴ Nu nalsa ta kongregasion i nakaliwa nga ari mabbabawi, meyanunsio yatun tapenu mannammuan na wawwaragi nga ari ngana yayya nga Saksi ni Jehova. a Ari tu gakkag natun nga anunsio nga pasiranan i nakaliwa. Nakua yatun tapenu matuttul na kongregasion i dob na Biblia nga “ari kamu nga mevulu-vulu” tatun nga tolay, ni tu “makiyarubang ta akkakanan.” (1 Cor. 5:​9-11) Makasta i rason ni Jehova nu ngatta nidob na yatun. Nitura ni apostol Pablo: “I baddi nga lebadura ay pagalsan na i interu nga masa.” (1 Cor. 5:6) Nu ari gare nga malsa ta kongregasion i nakaliwa nga ari mabbabawi, baka nonopan na karuan nga ari da kawagan nga tuttulan i dorob ni Jehova.—Prov. 13:20; 1 Cor. 15:33.

5. Anni nakuan i pagimamma tam ta tolay nga nalsa ta kongregasion, anna ngatta?

⁵ Anni nakuan i pagimamma tam ta wagi nga nalsa ta kongregasion? Maski nu ari ittam nga makikakkavulu nisa, ari tam imammatan nga awan ngana tu iddanama na. Megitta laman yayya ta karneru nga nawawwan nga awayya na makatoli ta kural. Daddammattam nakuan nga nidedika natun nga tolay i inango na kani Jehova. Kaddaraddam ta ari yayya nga mattotolay segun ta dedikasion na ta maddaggun. Kuruga delikadu yatun. (Eze. 18:31) Ngem habang egga paga i tiempo anna sigga-paran si Jehova nga mangipasingan tu allo, egga i iddanama natun nga tolay nga makatoli. Kunnasi gafu nga moffunan na elder ira i nakaliwa nga nalsa ta kongregasion?

KUNNASI NGA UFFUNAN NA ELDER IRA DANURI NALSA?

6. Anni i kuan na elder ira tapenu moffunan i nalsa ta kongregasion?

⁶ Nu nalsa i tadday ta kongregasion, ari ngana kari yayya vuluvuga nga uffunan na elder ira tapenu makatoli kani Jehova? Ari gapa. Nu mekagi ta nakaliwa nga ari mabbabawi nga malsa yayya ta kongregasion, ipakanawag na komite na elder ira i mawag nga kuan na tapenu makatoli yayya ta kongregasion. Ngem egga paga i kuan na elder ira. Ta magaru nga situasion, ikagi da ta nakaliwa nga kibbidadda saw mana uli yayya pappasa na piga nga vulan tapenu masingan nu egga i panguloli nisa. Nu umanugu i nakaliwa nga makibbida uli ta elder ira, pagarammadda yayya tatun nga tiempo nga mabbabawi anna manoli. Maski nu ari paga yayya nga nanguli tatun nga  tiempo, ikaguman lagapa na elder ira nga kibbidan mana saw yayya uli anna pagaramman nga mabbabawi.

7. Kunnasi nga ipasingan na elder ira i allo ni Jehova ta pattratu da ta tolay nga nalsa ta kongregasion? (Jeremias 3:12)

⁷ Ikaguman na elder ira nga ipasingan i allo ni Jehova ta pattratu da ta tadday nga nalsa ta kongregasion. Angngarigan na, ari nga iniddaggan ni Jehova i Israelita ira nga mabbabawi labbi nige na ira nga inuffunan. Lallagu, zinog na ta nira i profeta na ira maski nu awan paga tu pakasingannan tu nabbabawi ira. Gitta na nepakanawag ta mekadua nga artikulo taw nga isyu, kinagi ni Jehova ta profeta na nga si Oseas nga pakoman na i atawa na maski nu magaggangngua pagalaman yayya tu madammo nga liwa. (Os. 3:1; Mal. 3:7) Bilang pamarig kani Jehova, kakayà na elder ira nga manoli i nakaliwa anna ari da yayya parigatan nga kuan yatun.—Bibbigan i Jeremias 3:12.

8. Kunnasi nga makoffun i angngarigan ni Jesus meyannung ta ana nga lalaki nga nawawwan tapenu mas malippawa tam i allo ni Jehova? (Lucas 15:7)

⁸ Nonopan i angngarigan ni Jesus meyannung ta ana nga lalaki nga nawawwan nga nepakanawag ta mekadua nga artikulo taw nga isyu. Ta pakasingan na yama ta ana na, ‘nakkara-karela yayya nga ziminafung sa, ginakkappan na yayya, anna inummakkan na.’ (Luc. 15:20) Sifutan nga ari ngana nga iniddaggan na yama nga makkiddaw tu pamakoma i ana na. Lallagu, nakkara-karela yayya ta ana na megafu ta iddeddukan na yayya. Kunnatun i matageno ni Jehova turi ira ta nalsa ta kongregasion. Kukukuan gapa na elder ira i ngamin tapenu maparigan yayya. Ikaya da nga manoli kani Jehova i nawawwan nga karneru. (Luc. 15:​22-24, 32) Nu manoli i tadday nga nakaliwa, fermi nga magayayya si Jehova, si Jesus, i anghel ira, anna i interu kongregasion!—Bibbigan i Lucas 15:7.

9. Anni i ipagaram ni Jehova ta nakaliwa ira?

⁹ Manawag ta nagigiammu tam nga ari nga kunsintian ni Jehova i nakaliwa nga ari mabbabawi. Ngem ari na nga likuran danuri i nakaliwa. Kayà na nga manoli ira. Nipetura ni Jehova ta Oseas 14:4 i mataga-tageno na para tari ira ta nakaliwa nga mabbabawi: “Uruakku i pabbalidda tu ari matalo. Napafutuan nga ayatakku ira, megafu ta nawawwan ngana i porè.” Megafu ta ammu na elder ira yatun nga mataga-tageno ni Jehova, ikagumadda nga maningan tu maski anni nga seniales nga mabbabbabawi ngana i tadday. Megafu gapa tatun, mapaguyu nakuan danuri i pinanawadda si Jehova nga insigida nga manoli.

10-11. Kunnasi nga ikaguman na elder ira nga uffunan danuri nalsa ta kongregasion ta nappasa?

¹⁰ Kunnasi gafu danuri nalsa ta kongregasion ta nappasa nga awayya na tu nabayag ngana? Baka ari da ngana nga pakakuan i liwa nga nabbalin tu rason nu ngatta nalsa ira. Baka kadda paga lagu ngana nga manono nu ngatta nalsa ira. Ngem maski nu kunnasi paga kabayag nga nalsa i tadday ta kongregasion, ikaguman na elder ira nga alegan yayya anna bisitan. Ta pabbisita na elder ira, awayya da paga lagu i makimallo kavvulu i nakaliwa anna pagaramman yayya nga manoli ta kongregasion. Siempre nu nabayag ngana nga nalsa ta kongregasion i tadday, magga makakafi yayya ta espiritual. Nu kagian na gafu nga kayà na i manoli ta kongregasion, awayya nga iyunnug na elder ira nga egga i mangi-Bible study nisa maski nu ari paga yayya nga netoli. Kanayun nga elder laman i mangiyunnug nu sinni i mangi-Bible study nisa.

¹¹ Kakayà na elder ira nga parigan i allo ni  Jehova, yatutta kuadda i adde na mawayya da nga alegan anna uffunan i ngamin nga nalsa ta kongregasion anna pagaramman ira nga manoli kani Jehova. Nu ipasingan na tadday nga nakaliwa nga mabbabbabawi yayya anna nilikuran na ngana i marake nga annangngua na, awayya na tu insigida yayya nga metoli.—2 Cor. 2:​6-8.

12. (a) Anni ira nga situasion i mawag nga pagimmuguran na elder ira? (b) Ngatta ari tam nakuan nonopan nga imposible nga makalawa tu allo ni Jehova danuri talaga keddammo i liwa nga nakua da? (Innan gapa i footnote.)

¹² Egga ira i situasion nga mawag tu magimmugug i elder ira nige da nga itoli i tadday. Angngarigan na, nu nakaliwa i tadday ta pangabuso ta abbing, apostasia, onu ginakkag  anna niplano na nga massina ira na atawa na, mawag nga siguraduan na elder ira nga kurug tu mabbabbabawi yayya. (Mal. 2:14; 2 Tim. 3:6) Mawag gare tu protektadda i kural. Ngem mawag gapa nga daddammattam nga alawatan ni Jehova i maski sinni nga nakaliwa nu ipasingan na nga kurug i pabbabawi na anna niyemmang na ngana i marake ira nga annangngua. Maski gafu nu mawag na elder ira i magimmugug tari ira ta nakaliwa nga nilogo anna tinakitadda i tanakuan, ari da nakuan nonopan nga imposible nga malawa na kuddanatun nga totolay i allo ni Jehova. b—1 Ped. 2:10.

I MAKUA NA KONGREGASION

13. Anni i nadduman na pattratu tam ta tadday nga nivuya na elder ira anna ta tadday nga nalsa ta kongregasion?

¹³ Kagitta na nagigiammu tam ta nappasa nga artikulo, nu mittan, meyanunsio nga nevuya i tadday. Ta kunnatun nga situasion, puede tam lagapa i makikavulu ta nisa ta ammu tam nga nabbabawi ngana yayya anna niyemmanna ngana i marake nga annangngua na. (1 Tim. 5:20) Parte lagapa yayya na kongregasion anna mawag na i pamagaram na wawwaragi tapenu mattulu-tuloy yayya nga mangngua tu mapia. (Heb. 10:​24, 25) Ngem, ari nga kunnatun i pattratu tam ta tadday nga nalsa ta kongregasion. ‘Ari ittam nga mevulu’ tatun nga tolay, ni tu ‘makiyarubang ta nisa ta akkakanan.’—1 Cor. 5:11.

14. Kunnasi nga meyusa na Cristiano ira i nasanay ta Biblia nga konsensia da ta pattratu da ta tadday nga nalsa ta kongregasion? (Innan gapa i letratu.)

¹⁴ Kayà kari gafu kagian na ginigiammu tam nga ari tam ngana vuluvuga pansinan i tadday nga nalsa ta kongregasion? Ari. Kurug tu ari ittam nga makikavulu ta nisa. Ngem usan na Cristiano ira i nasanay ta Biblia nga konsensia da ta paddesision nu imbitadda nga makistudy i tolay nga nalsa ta kongregasion, nga posible tu kafamilia onu parientes da onu ka-close da dati. Kunnasi gafu nu makistudy yayya? Dati, ari tam vuluvuga pansinan i kunnatun nga tolay. Ngem tatun nga gannug, usan lagapa na kada Cristiano i nasanay ta Biblia  nga konsensia na. Baka makaya na konsensia na karuan nga maddios tatun nga tolay onu i-welcome onu alawatan yayya ta study. Ngem ari ittam vuluvuga nga makibbida ta nisa tu mabayag onu makikavulu ta nisa ta tanakuan nga tiempo.

15. Sinni danuri minakkaliwa nga tukuyan na 2 Juan 9-11? (Innan gapa i kahon nga “ Parehu Kari nga Klase na Liwa i Nitura Da Juan anna Pablo?”)

¹⁵ Baka iyavu na karuan, ‘Ari kari tu kinagi na Biblia nga i tadday nga Cristiano nga maddios ta kunnatun nga tolay ay mesipo ta marakay nga kuan na?’ (Bibbigan i 2 Juan 9-11.) Masingan ta konteksto natun nga yatun nga direksion ay tumukoy ta apostata ira anna turi ira ta influwensiadda i tanakuan nga mangngua tu marake. (Nep. 2:20) Nu ipaga-pagaram gafu na tadday i apostata ira nga tuttuddu anna i pangngua tu liwa, ari nga iyunnug na elder ira nga mabisita yayya. Siempre, posible lagapa para tatun nga tolay nga manono i mapia tapus mabbabawi. Ngem adde ta ari paga nga mesimmu yatun, ari ittam vuluvuga maddios ta nisa onu pansinan yayya, ni tu imbitattam yayya nga makistudy.

PAMARIG TA ALLO NI JEHOVA

16-17. (a) Anni i kayà ni Jehova nga kuan na nakaliwa ira? (Ezekiel 18:32) (b) Kunnasi mepasingan na elder ira nga katrabahu da si Jehova ta panguffudda ta nakaliwa ira?

¹⁶ Anni i nagigiammu tam taw nga isyu nga egga i lima nga artikulo na? Manaki ni Jehova nga madaral i maski sinni! (Bibbigan i Ezekiel 18:32.) Kayà na nga makipammapia ta nisa danuri nakaliwa. (2 Cor. 5:20) Yayya nga namegafu paga tagga, kanayun nga pagaramman ni Jehova i totolena nga matagga i ulu da nga mabbabawi anna manoli nisa. Dakal nga pribilehio para ta elder ira ta kongregasion nga mabbalin tu katrabahu ni Jehova ta panguffudda ta nakaliwa ira tapenu mabbabawi.—Roma 2:4; 1 Cor. 3:9.

¹⁷ Maimajimmu kari i pagayayya da ta langi nu mabbabawi danuri nakaliwa? Magayayya mismu i Yama tam ta langi nga si Jehova kada egga i tadday ta neyawawan nga karneru na nga manoli ta kongregasion. Mas iddukattam si Jehova nu mapannonopattam tu mapia i ari maguku-gukug nga inaggallallo anna kinasippo na.—Luc. 1:78.