Nitura ni apostol Pablo ta Cristiano ira ta Tesalonica: “Nu egga i ari nga mamarulo ta nibili-bilim-mi ira toye nga tura, takkilalan nu [“markan nu,” NW] yatun nga tolay.” (2 Tes. 3:14) Ta nappasa, kinagi tam nga elder ira i mangngua tatun. Mangiyawa tu warning talk i elder ira ta kongregasion nu egga i wagi nga tulu-tuloy lagapa nga balewalaan na i prinsipio ira na Biblia maski nu mamippiga da ngana yayya nga sinabarangngan. Kabalin natun nga palappa, ari ngana makikakkavvulu tatun nga markadu nga wagi i indibidual ira nga wawwaragi.

Ngem mawag tu moli yatun nga pakalippawa tam. Sangawe, malippawa tam ngana nga i tabarang ni Pablo ay tumukoy ta tadday nga desision nga mawag tu kuan na indibidual ira nga wawwaragi ta kongregasion megafu ta espesipiko ira nga situasion. Ari ngana gafu kawagan i warning talk na elder ira. Ngatta nanguli yatun? Ikonsidera tam i konteksto na tabarang ni Pablo.

Napansin ni Pablo nga egga ira i wawwaragi ta kongregasion nga “magulu i attolena.” Manaki da nga magginna ta tabarang nga egga ta Katurakan. Ta mas nga nappollu bi nga pinabbisita ni Pablo ta nira, nidog na yaw: “I sinni laman nga manaki nga mattrabahu ay ari nga mapakan.” Ngem egga lagapa danuri manaki da i mattrabahu tapenu masuportan i pakawagadda maski nu mawayya da mabba nga kuan yatun. Minammiti-miti gapa ira onu makialam ta kukukuan na tanakuan. Kunnasi nga tratuan na Cristiano ira i kuddanatun nga magulu i attoleda?—2 Tes. 3:​6, 10-12, NW.

Kinagi ni Pablo nga markan onu “takkilalan nu yatun nga tolay.” I Griego nga uvovug nga neyusa tatun kebalinan na nga ammu da nu sinni yatun nga tolay anna magimmugug ira tapenu ari na ira mainfluwensian. Interu nga kongregasion i sinurakkan ni Pablo tatun nga dob na, ari laman tu i elder ira. (2 Tes. 1:1; 3:6) Yayya nga nu mapansin na indibidual ira nga Cristiano nga egga i kapangngurug da nga ari na gigginnan i tabarang ta Biblia, ira ngana mismu i maddesision nga “arayyuan” yatun nga magulu i attolena.

Kebalinan na kari natun nga tratuattam ngana yayya kagitta na pattratu tam ta tadday nga nalsa ta kongregasion? Ari, megafu ta niyammung ni Pablo: ‘Tabarangngan nu yayya kunna tadday nga wagi.’ Yayya nga awayya na lagapa nga makikavulu ta markadu i indibidual ira nga Cristiano ta study anna ta ministerio, ngem maddesision ira nga ari vuluvuga nga makikavulu nisa ta gatherings anna ta paddibersion. Ngatta? Kinagi ni Pablo nga “tapenu mepasiranan” yayya. Megafu gare tatun nga pammarka, awayya na tu mappasirang i magulu nga Cristiano ta kingngua na anna manguli yayya.—2 Tes. 3:​14, 15.

Kunnasi tam nga meyaplika sangawe yaw nga tabarang? Mawag tu siguraduattam labbi nga i nakua na wagi ay talaga “magulu” kagitta na pinangideskriba ni Pablo. Ari nga tukuyan ni Pablo danuri neruma i piliadda nittam gafu laman ta madduma i konsensia tam onu i ikaya tam. Ari na gapa nga tukuyan danuri natakitadda garay i panageno tam. Imbes tu kunnatun, i nononopan ni Pablo ay danuri sinadya da nga ari nga tuttulan i manawag nga tabarang nga egga ta Biblia.

Nu mapansin tam sangawe nga egga i wagi tam nga kunnatun katagga i ulu na, a mangngua ittam tu personal nga desision nga ari ngana makikavulu ta nisa ta gatherings onu ta paddibersion. Megafu ta personal yaw nga desision, ari tam nga istorian yatun ta tanakuan nga ari tam mabba kafamilia nga kabbalay tam. Awayya tam gapa nga makikavvulu tatun nga tolay ta study anna ta ministerio. Tapus sonu ipasingan na ta appana-panono anna kondukta na nga nanguli ngana yayya, puede tam ngana saw uli makikavulu nisa.