Nabibbig mu kari tu mapia i isyu ira na Passifusifutan taw nga dagun? Innammu nu matabbag mu yaw ira nga pakkiavu:

Anni i makasta nga ehemplo ni Jehova ta pattratu ta babbay?

Arianna ira nga ireruma. Arianna nga faboran i lallaki anne ta babbay. Ginnan na Dios i babbay. Kakayà na nga mammuan i mataga-tageno anna pakavurungadda ira. Italo na gapa ta nira i trabahu na.—w24.01, p. 15-16.

Kunnasi tam meyaplika i kagian na Efeso 5:7 nga: “Ari kamu gafu nga mevulu-vulu ta kunnaw ira nga totolay”?

Tabarangngan ittam ni apostol Pablo nga ari ittam makikavulu ta tolay nga mas mamakariga ta nittam nga tuttulan i estandarte ira na Dios. Kasali tatun yari ira i makavulu tam ta personal kunne na gapa yari ira i makavulu tam ta social media.—w24.03, p. 22-23.

Anni ira nga laddug nga istoria i mawag nga pagimmugurattam?

Mawag nga magimmugug ittam ta istoria ira nga naggafu ta wawwaragi nga makasta mabba i intensiodda ngem ari nga kumfirmadu, email nga naggafu ta totolay nga ari tam kilala, anna ta apostata ira nga magappappe nga interesadu ta kinakurug.—w24.04, p. 12.

Anni i ammu tam anna i ari tam ammu meyannung ta panentensia ni Jehova kani Patul Solomon kunne na gapa tari ira ta natay ta Sodoma anna Gomora anna ta Delubio?

Ari tam ammu nu mannanayun nga kadaral i nisentensia ni Jehova ta nira. Ngem ammu tam nga ammu ni Jehova i ngamin anna minaggallallo yayya. —w24.05, pp. 3-4.

Anni i masiguradu tam megafu ta si Jehova “i Batu”? (Deut. 32:4)

Awayya tam i makiyegu kani Jehova. Mapammakatalakkan yayya megafu ta kanayun na nga tuppalan i promesa na ira. Ari gapa yayya nga manguli megafu ta ari nga manguloli i kualidad na anna i gakkag na ira.—w24.06, p. 26-28.

Anni i kuammu tapenu maka-adjust ka ta bagu nga kongregasion?

Mammakatalo ka kani Jehova. Uffunan naka kagitta na kingngua na ta aripan na ira ta nappasa. Ariammu nga ikumpara i bagu nga kongregasiommu ta dati. Mabbalikka tu busy ta bagu nga kongregasiommu anna magaleg ka tu bagu nga kokkofun.—w24.07, p. 26-28.

Anni ira i magigiammu tam ta tallu nga ilustrasion ni Jesus ta Mateo kapitulo 25?

Ipasigo na ilustrasion meyannung ta karneru anna ta kazzing nga mawag tu matalo ittam. Ituddu na ilustrasion meyannung ta nannono anna awan tu nono na nga mammaginganay nga mawag tu agga-paran ittam anna alerto. Magigiammu tam gapa ta ilustrasion meyannung ta talento ira nga mawag tu malappo ittam.—w24.09, p. 20-24.

Kunnasi katannang i veranda na templo ni Solomon?

Ta 2 Cronicas 3:​4, mabibbig ta karuan nga dadana nga manuskrito i “120 nga siku.” Mabbalin gafu tu 53 nga metro i katannang na veranda. Ngem nakagi ta mapattalakkan ira nga manuskrito i “20 nga siku.” Siam nga metro gafu i katannang na veranda. Mas fustu i 20 nga siku megafu ta sakto yatun para ta kaba na pader na templo.—w24.10, p. 31.

Anni i kayà kagian na mawag tu “tadday laman i atawa” na ministerial servant? (1 Tim. 3:12)

Mawag tu tattadday laman i atawa na anna ari yayya vuluvuga magangngua tu seksual nga imoralidad. Ari nakuan gapa yayya mangipasingan tu romantiko nga interes ta tanakuan nga babay.—w24.11, p. 19.

Ngatta makagi tam nga ari mawag nga matuttul i Juan 6:53 ta Pamugag na Yafu?

Ta Juan 6:​53, nakagi nga mawag tu kanan na totolay i pattag ni Jesus anna mawag nga inumadda i daga na. Kinagi yatun ni Jesus tari ira ta Judio nga mawag da paga i mangipasingan tu pangurug sa. Nesimmu yatun turi ta 32 C.E. ta Galilea. Ngem nappasa labbi i mattanga-ragun nige nga napegafuanan i Pamugag na Yafu ta Jerusalem. Kikkibbidan tatun ni Jesus danuri makavulu na nga mammaguray ta langi.—w24.12, p. 10-11.