Kinagi ni apostol Pablo ta kavulu na nga manakam nga si Timoteo: “Ta arubang na Dios tuange kani Cristo Jesus, anna ngamin i masanto nga anghel ira, manduat-taka tu parulattam-mu danaw nga bili-bilin. Ari ka nga mamadduma-ruma onu egga i faboram-mu ta anni laman nga kuam-mu.”—1 Tim. 5:21.

Ammuattam labbi nu sinni i anghel ira nga ari nga kasali tatun nga grupo na anghel ira. Magga ari nga kasali tatun i 144,000. Turi gare ta nattura si Pablo kani Timoteo, ari paga nga namegafu i kapaginnolay ta langi na nazelugan ira nga Cristiano. Ari paga gafu nga nabbalin tu espiritu nga pinaratu i apostol ira anna i karuan paga nga nazelugan. Imposible gafu nga tumukoy ta nira i “masanto nga anghel ira.”—1 Cor. 15:​50-54; 1 Tes. 4:​13-17; 1 Juan 3:2.

Ari gapa nga tumukoy i “masanto nga anghel ira” ta anghel ira nga narrebelde ta tiempo na Delubio. Sinuportan natun ira nga anghel si Satanas anna nabbalin ira tu demonio. Kalaban ira ni Jesus. (Gen. 6:2; Luc. 8:​30, 31; 2 Ped. 2:4) Ta mappange, metabbo ira ta avvu nga ari matuku-tukug i karalam na anna mefuku tari tu 1,000 nga dagun. Kabalin natun, madaral ira kavulu ni Satanas.—Jud. 6; Nep. 20:​1-3, 10.

I nakagi gafu ni Pablo nga “masanto nga anghel ira” ay anghel ira ta langi nga matalo nga massuporta ta “Dios tuange kani Cristo Jesus.”

Rinivu-rivu i matalo ira nga anghel. (Heb. 12:​22, 23) Ari nga para-parehu i annungan na kada tadday nira. (Nep. 14:​17, 18) Angngarigan na, zinog ni Jehova i tadday nga anghel tapenu patayan i 185,000 nga Asiriano ira nga suddalu. (2 Pat. 19:35) Aru gapa nga anghel i neddan tu annungan nga “mangammung ta totolay nga kegafuan na pattagaruli na ikattolay da, tuange ta ngamin nga minaggangngua ta marakay” tapenu ‘mesina ira ta Pammagurayan ni Jesus.’ (Mat. 13:​39-41) Netalo gapa ta tanakuan nga anghel nga “ammungad-da ngamin i totolay, nga pinili na Dios” mappange ta langi. (Mat. 24:31) Nadog gapa i karuan nga anghel tapenu ta ‘ngamin nga angngayattam ay igutadda ittam.’—Sal. 91:11; Mat. 18:10; ikumpara i Mateo 4:11; Luc. 22:43.

I nakagi gafu ta 1 Timoteo 5:21 nga “masanto nga anghel ira” ay posible tu anghel ira nga neddan tu espesial nga annungan nga manguffun ta panangngaw ta kongregasion. Ta konteksto natun, nangiyawa si Pablo tu masirib nga tabarang meyannung ta mannakam onu elder ira nga mepappangngo ta pangikakua na kongregasion. Kinagi na nga i elder ira ay mawag tu ‘ari nga mamadduma-ruma onu egga i faboradda ta anni laman nga kuadda’ anna ari nakuan gapa ira daliduru ta paddesisiodda. I tadday nga importante nga rason nu ngatta mawag nga tuttulan na elder ira yatun nga tabarang ni Pablo ay megafu ta kukukuadda i annungadda “ta arubang na Dios tuange kani Cristo Jesus, anna ngamin i masanto nga anghel ira.” Manawag gafu nga neddan i karuan nga anghel tu annungan tapenu manguffun ta panangngaw ta kongregasion, kagitta na papprotekta ta aripan ira na Dios, panguffun ta pallayyagayya, anna pangikagi kani Jehova ta anni laman nga naobserba da.—Mat. 18:10; Nep. 14:6.