1-2. (a) Anni i efekto na mensahe na Isaias 41:10 kani sister Yoshiko? (b) Sinni paga i mammakapia ta mensahe nga nipetura ni Jehova ta Isaias 41:10?

ARI makasta nga balita i naginna ni sister Yoshiko. Kinagi na doktorana nga piga vulan ngana laman yayya nga matolay. Anni i reaksionna? Neraddamman ni Yoshiko i paboritona nga teksto ta Biblia, Isaias 41:10. (Bibbigan.) Tapus kalmaduna nga kinagi ta doktorana nga ari yayya maganassing, megafu ta agga-tammi ni Jehova i limana. * I makapabannay nga mensahe natun nga teksto i nakoffun ta meddu nga wagi tam nga mattalo tu buu kani Jehova. Uffunan ittam gapa natun tapenu mattalupaddian nga kalmadu nu meparubang ta grabe ira nga kapurueba. Tapenu malippawa yatun, gigiammuattam labbi nu ngatta yatun i mensahe na Dios kani Isaias.

² Nipetura ni Jehova kani Isaias yatun nga uvovug tapenu banna-bannayan i Judio ira nga maaripan ta Babilonia. Ngem, pinattalupaddian ni Jehova yatun nga mensahe para ta pammakapian ari laman na Judio ira nga naaripan, nu ari, nelagum i totolena adde ta maddaggun. (Isa. 40:8; Roma 15:4) Maekspiriensa tam i “ziga-riga ta pangurianan ira nga aggaw,” yayya nga mas kawagattam i pamagaram na libru nga Isaias.​—2 Tim. 3:1.

3. (a) Anni ira nga promesa i mabibbig ta Isaias 41:10, i teksto ta dagun 2019? (b) Ngatta mawag tam danatun nga promesa?

³ Taw nga artikulo, maffokus ittam ta tallu nga makapatuyag tu pangurug nga promesa ira nga nerekord ta Isaias 41:10:  (1) egga si Jehova nittam, (2) yayya i Dios tam, anna (3) uffunanna ittam. Mawag tam danaw nga promesa * megafu ta gitta ni Yoshiko, makaekspiriensa ittam tu kapurueba ira ta pattolay. Marigatan ittam gapa megafu ta marake nga mesissimmu ta mundo. Attattamman paga na karuan i pameppersigi na makapangngua ira nga gobiernu. Sinaggi-taddayattam nga ikonsidera i tallu nga promesa.

4. (a) Anni i ollu nga promesa nga ikonsidera tam? (Innan gapa i footnote.) (b) Kunnasi nikagi ni Jehova i mataga-tagenona para nittam? (c) Anni i matageno mu ta kinagi na Dios?

⁴ Ollu, banna-bannayan ittam ni Jehova ta pakkagina: “Ari ka nga maganassing, ta egga ngà nikaw.” * Ipasingan ni Jehova nga egga yayya nittam gukaban na pangammu ta ngamin nga mesissimmu nittam anna ta meddu nga pangikavurunna nittam. Sifutan nu kunnasina nga kinagi i meddu anna monag nga mataga-tagenona nittam. “Nabbalikka tu nabalor ta paningakku,” kunni Jehova. “Nedayaw ka, anna iniddu taka.” (Isa. 43:4) Awan tu fuersa ta uniberso i mamagimmang ta aya ni Jehova turi ira ta masserbi sa; maladda i kinamatalona nittam. (Isa. 54:10) I aya anna pakikofunna i mas mamaggutu nittam. Protektanna ittam sangawe, gitta na pinapprotektana kani Abram (Abraham) nga kofunna. Kinagi ni Jehova sa: “Kammu maganassing, Abram. Sakan i kalatag mu.”​—Gen. 15:1.

5-6. (a) Ngatta ammu tam nga interesadu si Jehova nga uffunan ittam ta personal ira nga problema tam? (b) Anni i mala tam ta ekspiriensa ni Yoshiko?

⁵ Ammu tam nga interesadu si Jehova nga uffunan ittam ta personal ira nga problema tam megafu ta nipromesana ta totolena: “Nu maddaki ka ta danum, egga ngà nikaw, anna ta bannag ira, ariaddaka noka malaggabban. Nu maddalakka ta afi, ari ka noka malussiang, apenas tu lanzoban naka.” (Isa. 43:2) Anni i kayà kagian danatun nga uvovug?

⁶ Ari nipromesa ni Jehova nga alsanna i problema ira nga mamarriga ta pattoletam, ngem arianna ipamavulun nga malaggabban ittam ta “bannag ira” na problema onu  permanente nga matuggi onu “lanzoban” na kapurueba ira. Ginarantiyana nga egga yayya nittam, nga uffunanna ittam nga ‘dakitan’ onu kantayan yatun ira nga kapurueba. Anni i kuan ni Jehova? Pakalmanna ittam tapenu mapattalupaddiattam i integridad tam sa, maski paga mappeligro i inango tam. (Isa. 41:13) Napakurug yatun ni Yoshiko nga nakagi ta gafu. Kunna anana nga babay: “Nakaddag kami ta talaga kalmadu laman si Mama. Talaga nasingammi nu kunnasi yayya niddan ni Jehova tu memammo nga panageno. Adde ta aggaw na patena, ilayyagayya ni Mama ta nars anna pasiente ira i meyannung kani Jehova anna ta promesana ira.” Anni i mala tam ta ekspiriensa ni Yoshiko? Nu mattalo ittam ta promesa na Dios nga “egga ngà nikaw,” maggutu anna massikan ittam durante nga attattammattam i kapurueba ira.

7-8. (a) Anni i mekadua nga promesa nga ikonsidera tam, anna anni i kayà kagian natun? (b) Ngatta kinagi ni Jehova ta naaripan ira nga Judio: ‘Ari kamu mavurung’? (c) Anni i mabibbig ta Isaias 46:3, 4 nga namakkalma ta giffutuan na ili na Dios?

⁷ Sifutan i mekadua nga promesa nga nerekord gukaban ni Isaias: “Ari ka nga mavurung, ta sakan i Dios mu.” Anni i kayà kagian natun meyannung ta vuru-vurung? Taw nga bersikulo, i orihinal nga termino nga netransleyt tu “mavurung” ay egga i ideyana nga “kanayun nga agga-singan ta likug megafu ta maganassikka nga egga i gannug onu tolay nga mamappeligro nikaw” onu “gittana tadday nga mavuru-vurung megafu ta delikadu nga situasion.”

⁸ Ngatta kinagi ni Jehova ta Judio ira nga maaripan ta Babilonia nga ariadda “mavurung”? Megafu ta ammuna nga maganassing noka danuri maddian tatun. Ngatta? Ta pangultimo na 70-dagun nga ke-aripan na Judio ira, atakeyan na makapangngua nga armada na Medo-Persia i Babilonia. Usan ni Jehova yatun nga armada tapenu mapalubbang i totolena ta ke-aripan ta Babilonia. (Isa. 41:2-4) Turi ta ammu ngana na Babilonio ira anna na totolay na karuan nga nasion nga maddian tatun nga aranni ngana i kalabadda, pinaggutuda i kataggi-tadday ta pakkagida: “Massikakka.” Namadday gapa ira tu mas aru paga nga santo, ta pagabboda nga maprotektan ira danatun. (Isa. 41:5-7) Ngem, pinakalma ni Jehova i giffutuan na Judio ira nga aripan ta pakkagina nga: “Sikaw, O Israel, [ari tu kagitta na kakarrubam] ay aripakku . . . Ari ka nga mavurung, ta sakan i Dios mu.” (Isa. 41:8-10) Sifutan nga kinagi ni Jehova: “Sakan i Dios mu.” Gukaban natun nga kinagina, nipasiguraduna ta matalo ira sa nga arianna ira nakattaman​—yayya lagapa i Diosda, anna ira lagapa i ilina. Kinagina nira: “Sakan i mangakka nikaw . . . anna paliarattaka.” Siguradu nga napasikan i Judio ira nga naaripan megafu tatun ta makapagaram anna makapabannay ira nga uvovug.​—Bibbigan i Isaias 46:3, 4.

9-10. Ngatta ariattam mavurung? Iyilustra.

⁹ Mas nga mavuru-vurung i totolay ta maddaggun megafu ta maggagrabe nga kondision na mundo. Siempre, afektadu ittam tatun ira. Ngem kattam maganassing. Kunni Jehova nittam: “Sakan i Dios mu.” Ngatta mafuersa nga rason yatun tapenu mattalupaddian nga kalmadu?

¹⁰ Ikonsidera yaw nga ilustrasion: Egga dua nga pasaheru, da Jim anni Ben, nga nakatakay ta eroplano nga yayyaggan na masikan nga paddag. Durante nga gayaman na fuersa na paddag i eroplano, egga i ngaral nga naginna ta loudspeaker: “Mas-seat belt kamu. Megafu ta manganannuan nga ari tu kalmadu i pabbiahe tam.” Talaga mavuru-vurung si Jim.  Ngem kagian na piloto: “Ariannu mavurung. Sò yaw i piloto nu.” Tatun nga oras, mawwangiwang si Jim nga kunna, “Anni gapa nga pamasiguradu yatun?” Ngem, nasinganna nga ari vuluvuga nga mavurung si Ben. Niyavu ni Jim: “Ngatta kalmadu ka laman?” Agga-ngizzi nga kinagi ni Ben: “Gafu ta kilalà yatun nga piloto. Yayya i yamà!” Tapus kunni Ben: “Iyammammù nikaw si yamà. Siguradu nga nu makilalam si yamà anna i kalalakina nga piloto, magga makkalma ka.”

11. Anni ira nga leksion i magigiammu tam ta ilustrasion meyannung ta dua nga pasaheru?

¹¹ Anni ira nga leksion i magigiammu tam taw nga ilustrasion? Gitta ni Ben, kalmadu ittam gapa megafu ta talaga kilala tam i nelangitan nga Yama tam, si Jehova. Ammu tam nga uffunanna ittam nga magattam maski ta pinakamariga ira nga problema. (Isa. 35:4) Mattalo ittam kani Jehova, yayya nga kalmadu ittam maski nu napannu i mundo tu paganassing. (Isa. 30:15) Kagitta tam gapa si Ben nu ilayyagayya tam ta kakarruba tam i rason nu ngatta makkomfiansa ittam ta Dios. Nu kunnatun, makasiguradu gapa ira nga maski anni nga problema i meparubang nira, uffunan ira ni Jehova.

12. (a) Anni i mekatallu nga promesa nga ikonsidera tam? (b) Anni nga kinakurug i iperaddam nittam na pakkagi ta “lima” ni Jehova?

¹² Ikonsidera i mekatallu nga promesa nga nirekord ni Isaias: “Patuyaggattaka, wan, uffunattaka.” Dati ngana nga dineskriba ni Isaias nu kunnasi nga patuyaggan, onu pasikannan ni Jehova i ilina ta pakkagina: “[Si] Jehova ay duttal nga konsu pakapangngua anna i limana ay mammaguray para nisa.” (Isa. 40:10) Maruddu nga usan na Biblia i uvovug nga “lima” tapenu mangisimbolo tu pakapangngua. Yayya nga iperaddam nittam  na “i lima [ni Jehova] ay mammaguray” nga si Jehova ay makapangngua nga Patul. Niyusana i sikanna nga awan tu makaffu tapenu suportan anna defensan i aripanna ira ta nappasa, anna itulu-tuloyna nga pasikannan anna protektan danuri mattalo sa ta maddaggun.​—Deut. 1:30, 31; Isa. 43:10, ftn.

13. (a) Kanni nga mas tuppalan ni Jehova i promesana nga patuyagganna ittam? (b) Anni nga promesa i mangiyawa nittam tu sikan anna komfiansa?

¹³ Mas ngana nu peppersigian ittam na kalabattam ira, tuppalan ni Jehova yaw nga promesa: “Patuyaggattaka.” Ta karuan nga parte na mundo ta maddaggun, purueban na kalabattam ira nga pagimmangan i pallayyagayya tam, onu gamman i organisasiottam. Maski kunna, kattam kuruga mavurung ta kunnatun ira nga pangatake. Ginarantiya ni Jehova nittam nga iddanna ittam tu sikan anna komfiansa. Nipromesana: “Awan tu armas nga mapadday kontra nikaw i mavviktoria.” (Isa. 54:17) Ipanono nittam natun i tallu nga importante nga kinakurug.

14. Ngatta kattam ngana makaddag ta pangatake na kalaban ira na Dios?

¹⁴ Ollu, megafu ta disipulos ittam ni Cristo, ekspektattam nga mekalussaw ittam. (Mat. 10:22) Niprofesiya ni Jesus nga grabe noka i kapeppersigi na disipulosna ta pangurianan ira nga aggaw. (Mat. 24:9; Juan 15:20) Mekadua, abisowan ittam na profesiya ni Isaias nga ariadda ittam laman nga ikalussaw; mangusa paga ira tu madduruma nga armas kontra nittam. Nelagum ta kuddanatun nga armas i ari mataga-tageno nga pangilogo, tamanta nga palladda-laddug, anna grabe nga pamersigi. (Mat. 5:11) Ari pagimmangan ni Jehova i kalabattam ira ta pangusa ta kuddanatun nga armas kontra nittam. (Efe. 6:12; Nep. 12:17) Ngem kattam maganassing. Ngatta?

15-16. (a) Anni i mekatallu nga kinakurug nga mawag tam daddamman, anna kunnasi suportan yaw na Isaias 25:4, 5? (b) Kunnasi nga dineskriba na Isaias 41:11, 12 i mesimmu turi ira ta mangokkontra nittam?

¹⁵ Ikonsidera i mekatallu nga kinakurug nga mawag nga daddammattam. Kinagi ni Jehova  nga “awan tu armas” nga meyusa kontra nittam “i mavviktoria.” Nu kunnasi nga protektan ittam na pader kontra ta makadaral nga bagiu, protektan ittam gapa ni Jehova kontra ta “fuersa na manattazzi ira.” (Bibbigan i Isaias 25:4, 5.) Ari vuluvuga mavviktoria i kalabattam ira nga permanente nga perwisiuwan ittam.​—Isa. 65:17.

¹⁶ Patuyaggan gapa ni Jehova i pattalo tam sa gukaban na pangidetalye ta mesimmu turi ira ta ‘ngamin nga mappoporay’ nittam. (Bibbigan i Isaias 41:11, 12.) Maski paga fermi i pangokkontra na kalabattam ira nittam onu nu kunnasi kagrabe i pameppersigida, parehu laman i resultana: Ngamin nga kalaban na ili na Dios “ay mapawan noka anna madaral.”

17-18. (a) Kunnasi makoffun i pabbibbig tu Biblia tapenu mas mattalo ittam ta Dios? Mangiyawa tu angngarigan. (b) Kunnasi makoffun i monag nga pannono ta napili nga teksto para ta dagun 2019?

¹⁷ Mas mattalo ittam kani Jehova nu mas makilala tam yayya. Makua tam yatun nu bibbigan i Biblia anna monag nga nonopan i nabibbig tam ira. Egga i mapattalakkan ira nga rekord ta Biblia nu kunnasi pinrotektan ni Jehova i totolena ta nappasa. Yatun i mamakkomfiansa nittam nga tangngallanna gapa ittam ta maddaggun.

¹⁸ Ikonsidera i makakkasta nga pinangideskriba ni Isaias nu kunnasi ittam protektan ni Jehova. Tinukoyna si Jehova bilang i pastor anna i aripan ira na Dios bilang karneru. Kunni Isaias meyannung kani Jehova: “Gukaban na limana ay pattaraddayanna i kordero ira, anna ta gakona ay akkatanna ira.” (Isa. 40:11) Nu maekspiriensa tam i meggo nga gakko ni Jehova nittam, protektadu anna kalmadu ittam. Tapenu mattalupaddian ittam nga kalmadu maski ta arubang na problema ira, napili na matalo anna memmugug nga aripan i Isaias 41:10 bilang i teksto para ta dagun 2019, “Ari ka nga mavurung, ta sakan i Dios mu.” Monag nga pannonopan danatun nga makapabannay nga uvovug. Patuyaggan naka natun durante nga arubangammu i problema ira ta mappange.