TAGGA ta umma na Mierkules, Enero 24, 2018, nagayayya i familia na United States anna Canada Bethel ta pakaginnada ta espesial nga anunsio: Si Brother Kenneth Cook, Jr., ay neyammung bilang miembro na Manangngal nga Baggi na Saksi ira ni Jehova.

Si Brother Cook ay neyana anna ziminakal ta south-central Pennsylvania, U.S.A. Nagigiammuna i kinakurug ta kaklasena nigena nga maggradua ta hayskul anna nabawtisowan turi ta Hunio 7, 1980. Namegafu yayya nga narregular payunir turi ta Setiembre 1, 1982. Kabalin na dua ragun nga pappayunir, naimbita yayya ta Bethel anna nigafuna i passerbina ta Bethel ta Wallkill, New York, turi Oktubre 12, 1984.

Ta tumunug nga 25 nga dagun, nasserbi si Brother Cook ta nadduruma nga annungan ta Printery anna ta Bethel Office. Nakkasal ira ni Jamie turi 1996, anna nakkavulu ira dua nga nasserbi ta Bethel ta Wallkill. Turi ta Disiembre 2009, neyali da Brother anni Sister Cook ta Watchtower Educational Center ta Patterson, New York, nu sitaw neyasayn si Brother Cook nga mattrabahu ta Writing Correspondence Department. Ta Abril 2016, kabalidda nga neyali tu manganannuan ta fasilidad ta Wallkill, neyali uli da Brother anni Sister Cook ta Brooklyn, New York. Kabalin na lima vulan, nagali ira ta hedkuarter ta Warwick, New York. Ta Enero 2017, natunno si Brother Cook nga masserbi bilang kaduffun na Writing Committee na Manangngal nga Baggi.