1-2. (a) Anni i masingi-singan ni Jehova sonu maggarammammung i minillion para ta Pamugag na Yafu? (Innan i letratu ta vungun.) (b) Anni i gigiammuattam taw nga artikulo?

IMAJINAN nu anni i masingi-singan ni Jehova sonu minillion ta interu mundo i maggarammammung para ta Pamugag na Yafu. Arianna laman innan i karu na totolay; ammuna paga nu sinni i kada indibidual nga presente. Angngariganna, masinganna danuri matalo nga magatende kada dagun. Awayyana nga nelagum tatun danuri nagatende maski neparubang ta grabe nga kadara-darum. I karuan gapa, ari tu regular ta study ira, ngem imammatadda nga kuruga importante nga gannug i pagatende ta Memorial. Masingi-singan ni Jehova maski danuri awayyana nga ollolluda pagalaman nga magatende tu Memorial, megafu ta kayàda magusioso ta study.

² Siguradu nga magayayya si Jehova nga masingan nga ara-aru i magatende ta Memorial. (Luc. 22:19) Ngem, ari tu i karu na nagatende i pinaka-importante kani Jehova. Mas interesadu yayya ta rason nu ngatta nagatende ira; mas nabalor kani Jehova i motiboda. Taw nga artikulo, gigiammuattam i importante nga pakkiavu: Ngatta magatende ittam ari laman ta passelebra ta Memorial, nu ari, maski ta linigguan nga study ira nga niyawa ni Jehova turi ira ta mangaya sa?

3-4. (a) Ngatta magatende ittam ta paggarammammung ira? (b) Anni nga kualidad i mamaguyu nittam tapenu magatende ta paggarammammung ira? (c) Segun ta kagian na 1 Corinto 11:23-26, ngatta ariattam nakuan lonan i Memorial?

³ I pinakarason nu ngatta magatende ittam ta study ay megafu ta parte yatun na paddayarayaw tam. Magatende ittam gapa  megafu ta tuttudduan ittam ni Jehova ta study ira. Manaki danuri minappakatannang i ideya nga mawagda nga matudduan tu maski anni. (3 Juan 9) Ngem sittam, kakayà tam nga tudduan ni Jehova anna na organisasion nga usu-usanna.​—Isa. 30:20; Juan 6:45.

⁴ Ipasingan na pagatende tam ta paggarammammung ira nga minappakalinno ittam anna sigga-paran nga matudduan. Ta gabi na Memorial na patay ni Jesus, atendeyattam yaw nga importante nga okasion ari laman megafu ta obligasiottam, nu ari, megafu ta mapakalinno nga pattuttul ta nibilin ni Jesus: “Kuan nu yaw tu panaddamman nu niakan.” (Bibbigan i 1 Corinto 11:23-26.) Pasikannan natun nga paggarammammung i iddanama tam ta mappange anna iperaddam natun nu kunnasi kadakal i aya ni Jehova nittam. Ngem, ammu ni Jehova nga kawagattam i pamanna-bannay anna pamasikan ari laman tu mittan kada dagun. Yayya nga, nangiyawa yayya tu linigguan nga study anna pagarammanna ittam nga atendeyan danatun. Kinapakalinno i mamaguyu nittam nga mattuppal. Aru nga oras i ufutattam kada ligguan tapenu mapprepara anna magatende tatun ira nga study.

5. Ngatta alawatan danuri minappakalinno nga totolay i imbitasion ni Jehova?

⁵ Kada dagun, aru nga minappakalinno nga totolay i mangalawa ta imbitasion nga matudduan ni Jehova. (Isa. 50:4) Guggustuda i magatende ta Memorial, anna nigafuda ngana gapa magatende ta study ira. (Zac. 8:20-23) Sittam ngamin ay magayayya nga matudduan anna megiya ni Jehova, ‘i mamaliag anna manguffun nittam.’ (Sal. 40:17) Kakuruganna, egga paga kari i mas makapagayayya​—onu mas importante—​anne ta pangalawa ta imbitasion nga tudduan ni Jehova anna ni Jesus, i Anana nga kuruga iddeddukanna?​—Mat. 17:5; 18:20; 28:20.

6. Kunnasi nga nakoffun i kinapakalinno ta tadday nga tolay tapenu magatende ta Memorial?

⁶ Kada dagun, mappursigi ittam nga magimbita tu totolay adde ta posible tapenu magatende ta Memorial na patay ni Jesus. Aru nga minappakalinno nga totolay i nabenefisiowan gukaban na pangalawa ta imbitasiottam. Ikonsidera i tadday nga ekspiriensa. Piga dagun ngana i nappasa, nakalawa i tadday nga lalaki tu neyimprenta nga imbitasion para ta Memorial, ngem kinagina ta brother nga nangiyawa nga arianna makangay. Ngem, ta gabi na Memorial, nakaddag i brother megafu ta nasinganna ta Kingdom Hall yatun nga lalaki. Talaga inappresia natun nga lalaki i pinangalawada sa, yayya nga regular ngana nga magatende ta linigguan nga study tam. Kakuruganna, namittallu laman yayya nga ari naka-atende tu study ta interu dagun kabalin natun. Anni i nakoffun sa nga magatende ta study ira? Talaga mapakalinno yayya yatutta inulina i desisionna. Kunna brother nga nagimbita sa, “Talaga minappakalinno yayya nga tolay.” Siguradu nga niyaranni ni Jehova yaw nga lalaki tapenu maddayaw Sa, yari tu bawtisadu ngana yayya.​—2 Sam. 22:28; Juan 6:44.

7. Kunnasi makoffun i nagigiammu tam ta study ira anna i nabibbig tam ta Biblia tapenu mabbalin tu minappakalinno?

⁷ Uffunan ittam na magigiammu tam ta study ira anna na mabibbig tam ta Biblia nga mabbalin tu minappakalinno. Piga ligguan nige na Memorial, maruddu nga nakafokus i study tam ira ta ehemplo ni Jesus anna ta kinapakalinno nga nipasinganna gukaban na pinangitavvu ta inangona. Piga aggaw nige na Memorial, mepagaram nittam nga bibbigan i rekord ira na Biblia meyannung ta nesimmu ira nige na patay ni Jesus anna ta kapaginnolena. Mas matagibalor tam i nisakrifisio ni Jesus para nittam ngamin megafu ta magigiammu tam ta study ira anna ta mabibbig tam ta rekord ira na Biblia.  Mapaguyu ittam nga parigan i kinapakalinnona anna kuan i uray ni Jehova, maski nu mariga para nittam.​—Luc. 22:41, 42.

8. Kunnasi nangipasingan tu gutu si Jesus?

⁸ Maparigattam gapa si Jesus gukaban na pangipasingan tu gutu. Nonopan i gutu nga nipasinganna piga aggaw nige na patena. Ammuna nga aranni ngana yayya nga paguyoyungan, latigowan, anna ipato na kalabanna ira. (Mat. 20:17-19) Ngem, sigga-paranna lagapa nga inarubang i patay. Turi ta zimittal ngana i oras, kinagina ta matalo nga apostolesna nga kavuluna ta Getsemani: “Tumaddag kamu ta et-tam ngana. Azzoye ngana i mappagafu niakan!” (Mat. 26:36, 46) Anna turi ta arestowan yayya na suddalu ira nga konsu armas, zinafunna ira, niyammammuna i baggina, anna nikiddona nira nga pavulunadda i apostolesna nga manaw. (Juan 18:3-8) Talaga kappabbaw nga gutu i nipasingan ni Jesus! Ta maddaggun, kuan na nazelugan ira nga Cristiano anna na tanakuan nga karneru i adde na mawayyada tapenu parigan i gutu ni Jesus. Kunnasi?

9. (a) Ngatta awayyana nga magawag ittam tu gutu tapenu maka-atende tu regular ta study ira? (b) Anni i posible nga efekto na ehemplo tam ta wawwaragi nga nefuku megafu ta pangurugda?

⁹ Tapenu regular nga maka-atende ta study ira, mawag tam mangipasingan tu gutu maski ta mariga ira nga situasion. Magatende i karuan nga wawwaragi maski mazziga-riga ira megafu ta natayan, nakkafi i nonoda, onu nattaki ira. Magutu gapa nga magatende i karuan maski grabe i pangokkontra na kafamiliada onu na gobiernu. Nonopan gapa nu kunnasi afektan na ehemplo tam i wawwaragi nga nefuku megafu ta pangurugda. (Heb. 13:3) Nu maginnada nga mappursigi ittam nga passerbian si Jehova maski egga ira i kapurueba tam, mapasikan ira nga pattalupaddianan i pangurug, gutu, anna integridadda. Kunnatun gapa i naekspiriensa ni apostol Pablo. Turi ta nefuku yayya ta Roma, magaya-ayayya yayya kada maginnana nga matalo nga massesserbi ta Dios i kapangngurugna. (Fil. 1:3-5, 12-14) Nige onu kabalin laman nga napalawan ni Pablo, nattura yayya ta Hebreo ira. Pinagaramna tatun nga tura danuri matalo nga Cristiano nga ariadda nga ‘immangan i pakka-aya-ayada nga kunna mawwaragi’ anna i paggarammammudda.​—Heb. 10:24, 25; 13:1.

10-11. (a) Sinni nakuan i imbitattam ta Memorial? (b) Segun ta Efeso 1:7, ngatta magimbita ittam?

¹⁰ Makepasingan ittam tu gutu nu imbitattam i parientes, katrabahu, anna karruba tam ira ta Memorial. Ngatta imbitattam ira? Talaga mappabalo ittam ta kingngua ni Jehova anna ni Jesus nittam yayya nga kakayà tam ira nga imbitan nga magatende ta Memorial. Gustu tam nga magigiammuda nu kunnasi gapa ira mabenefisiowan ta ari mepangngo nga “inaggallallo” ni Jehova gukaban na tavvu.​—Bibbigan i Efeso 1:7; Nep. 22:17.

¹¹ Nu mangipasingan ittam tu gutu gukaban na paggarammammung, mepasingattam paga i tadday nga nabalor nga kualidad, kualidad nga  parehu nga nepasingan na Dios anna na Anana ta kappabbaw ira nga gannug.

12. (a) Kunnasi nga mapasikan na study ira i aya tam kani Jehova anna kani Jesus? (b) Anni i ipagaram na 2 Corinto 5:14, 15 nga kuattam bilang pamarig kani Jesus?

¹² Itubba ittam na aya tam kani Jehova anna kani Jesus tapenu magatende ta paggarammammung ira. Tapus, mas mapasikan gapa i aya tam kani Jehova anna ta Anana megafu ta nagigiammu tam ira tatun. Regular nga meperaddam nittam ta study nu anni i kingnguada para nittam. (Roma 5:8) Angngariganna, iperaddam na Memorial nittam nu kunnasi konag na ayada, maski turi ira ta ari paga makalippawa ta balor na tavvu. Megafu ta pappabalo tam, kayà tam parigan si Jesus ta inaggaw nga pattoletam. (Bibbigan i 2 Corinto 5:14, 15.) Mapaguyu gapa i futu tam nga dayawan si Jehova megafu ta niyawana nittam i tavvu. Tadday nga makua tam tapenu medayaw tam yayya ay gukaban na napafutuan nga pakkomento ta study tam ira.

13. Kunnasi tam mepasingan i konag na aya tam kani Jehova anna ta Anana? Iyesplika.

¹³ Mepasingattam i konag na aya tam kani Jehova anna ta Anana gukaban na sigga-paran nga passakrifisio para nira. Maruddu nga nadduruma i isakrifisio tam tapenu maka-atende ta study ira. Makua i study ta aru nga kongregasion ta kabalin na tangaggaw nga pattrabahu nu sitaw nabannag ngana i karuan. Tapus, egga gapa i tadday nga study ta weekend nu kanni nga magibannag i totolay. Masingan kari ni Jehova nga magatende ittam tu study ira maski nu nabannag ittam? Siempre gapa! Kakuruganna, nu mas dakal i pappursigi tam, mas appresian ni Jehova i aya nga nipasingattam sa.​—Mar. 12:41-44.

14. Kunnasi nangipasingan si Jesus tu kakastan nga pamarigan na minassakrifisio nga aya?

¹⁴ Nipasingan ni Jesus nittam i pamarigan na minassakrifisio nga aya. Sigga-paran yayya ari laman nga matay para ta disipulosna, nu ari, maski paga mattolay kada aggaw nga pagolluan i pammakapianadda. Angngariganna, nakipassingan lagapa yayya ta disipulosna maski nu nababbannag yayya ta pisikal anna madammo i panagenona. (Luc. 22:39-46) Naffokus paga yayya ta meyawana ta tanakuan, ari tu ta malana nira. (Mat. 20:28) Nu kunnatun kasikan i aya tam kani Jehova anna ta wawwaragi tam, kuattam i adde na mawayya tam tapenu  magatende ta Pamugag na Yafu anna ta ngamin nga study.

15. Sinni i mas paginteresattam nga uffunan?

¹⁵ Kasali ittam ta tattadday nga kurug nga Cristiano nga pawwaragi, anna kakayà tam nga magimbita adde ta posible tu tanakuan nga makikavulu nittam. Ngem, mas interesadu ittam nga uffunan i “wawwagi tam ira ta angngurug” nga nabbalin ngana tu inaktibo. (Gal. 6:10) Mapakurug tam i aya tam nira gukaban na pamagaram nira nga magatende ta paggarammammung ira, mas ngana ta Memorial. Gitta ni Jehova anna ni Jesus, talaga magayayya ittam nu egga i inaktibo nga manoli kani Jehova, i meddu nga Yama anna Pastor tam.​—Mat. 18:14.

16. (a) Kunnasi tam pasikannan i kataggi-tadday, anna anni i meyuffun nittam na paggarammammung? (b) Ngatta makasta nga tiempo na dagun yaw tapenu daddamman i kinagi ni Jesus ta Juan 3:16?

¹⁶ Ta tumunug ira nga ligguan, magimbita tu aru adde ta posible tapenu magatende ta Memorial sonu gabi na Biernes, Abril 19, 2019. (Innan i kahon nga “ Imbitammu Kari Ira?”) Kayà tam nga kanayun nga kuan i adde na mawayya tam tapenu pasikannan i kataggi-tadday gukaban na regular nga pagatende tam ta ngamin nga paggarammammung nga niyawa ni Jehova para nittam. Durante nga aranni ngana i panuppalan naw nga sistema, mawag i paggarammammung tam tapenu mattalupaddian ittam nga minappakalinno, magutu, anna minaggiddu. (1 Tes. 5:8-11) Interu futu tam nakuan nga ipasingan i mataga-tageno tam kani Jehova anna ta Anana megafu ta daka-dakal nga ayada nittam!​—Bibbigan i Juan 3:16.