1-2. (a) Ngatta ekspektattam nga mangiyawa si Jesus tu simple nga metodo tapenu daddamman i patena? (b) Anni ira nga kualidad ni Jesus i ikonsidera tam?

MEKAGIM kari nu anni i mesimmu ta zinagun nga Memorial na patay ni Cristo? Siguradu nga meraddammattam i importante ira nga detalye ta Pamugag na Yafu. Ngatta? Megafu ta simple laman yatun. Ngem, importante yaw nga okasion. Yayya nga meyavu tam, ‘Ngatta simple laman yaw nga pamugag?’

² Ta ministerio ni Jesus ta davvun, madumug yayya megafu ta simple, manawag, anna mabi nga malippawa nga panudduna ta importante ira nga kinakurug. (Mat. 7:28, 29) Yari tu nangiyawa gapa yayya nittam tu simple ngem aru i kebalinanna nga metodo na panaddam * ta patena. Ikonsidera tam yaw nga pamugag ta Memorial anna karuan nga gannug nga kinagi anna kiningngua ni Jesus. Mas malippawa tam nu kunnasi nga talaga mapakalinno, magutu, anna minaggiddu si Jesus, anna magigiammu tam nu kunnasi tam mas maparigan yayya.

3. Segun ta Mateo 26:26-28, kunnasi kasimple i pamugag ta Memorial nga nigafu ni Jesus, anna anni i isimbolo na dua nga simple nga gannug?

³ Kavulu ni Jesus i 11 nga matalo nga apostolesna turi ta nigafuna i Memorial na patena. Inana i nabattang nga makan ta Paskua anna nagangngua tu simple nga panaddamman. (Bibbigan i Mateo 26:26-28, NW.) Inusana laman i pan nga awan  tu lebadurana anna i binarayang nga agga-tunnag tari. Kinagi ni Jesus ta apostolesna nga isimbolo natun nga dua nga gannug i perfekto nga baggi anna dagana, nga arannina ngana nga isakrifisio para nira. Awayyana nga ari ngana nga nakaddag i apostoles ta kinasimple naw nga importante nga okasion. Ngatta?

4. Kunnasi ittam uffunan na tabarang ni Jesus kani Marta tapenu malippawa tam nu ngatta simple laman i pamugag ta Memorial?

⁴ Ikonsidera nu anni i nesimmu piga vulan, ta mekatallu dagun nga ministerio ni Jesus, turi ta binisitana i balay na madukko nga kokkofunna nga da Lazaro, Marta, anni Maria. Turi ta maggiristoria ira, nigafu ni Jesus i manuddu. Maski presente si Marta, aburidu lagapa yayya nga mapprepara ta aru nga makan para ta espesial nga bisitana. Turi ta nasingan yatun ni Jesus, masippo nga nivuyana si Marta, nga zinuffunanna yayya nga masingan nga ari tu kanayun nga kawagan i napakaru nga makan. (Luc. 10:40-42) Kabalinna, turi ta piga oras ngana laman nige na patay ni Jesus, niyaplikana mismu i tabaranna. Siniguraduna nga simple laman i makan ta Memorial. Anni i ituddu naw nittam meyannung kani Jesus?

5. Anni i ipasingan na kinasimple na pamugag meyannung kani Jesus, anna kunnasi nga metonos yaw ta Filipos 2:5-8?

⁵ Ta ngamin nga kinagi anna kingngua ni Jesus, minappakalinno yayya. Yatutta ari ngana kakkadda-kaddag nga nangipasingan yayya tu kappabbaw nga kinapakalinno ta ultimo nga gabi na inangona taw ta davvun. (Mat. 11:29) Ammuna nga isakrifisiona ngana i kadakallan nga sakrifisio ta historia na tolay anna paginnolayan yayya ni Jehova tapenu mabbalin tu patul ta langi. Maski kunna, arianna nga kayà nga medayaw gukaban na pangikiddaw tu magarbo nga panaddamman ta patena. Kinagina lallagu ta disipulosna nga mittan kada dagun ay mawag tu daddammadda yayya gukaban naw nga simple nga pamugag. (Juan 13:15; 1 Cor. 11:23-25) Ipasingan na simple anna mepangngo nga pamugag nga ari tu minappakatannang nga tolay si Jesus. Magayayya ittam nga kinapakalinno i tadday ta kakkasta nga kualidad na nelangitan nga Patul tam.​—Bibbigan i Filipos 2:5-8.

6. Kunnasi tam maparigan i kinapakalinno ni Jesus nu meparubang ittam ta problema ira?

⁶ Kunnasi tam maparigan i kinapakalinno ni Jesus? Gukaban na pangipollu tam ta pammakapian na tanakuan anne ta baggi tam. (Fil. 2:3, 4) Nonopan uli i ultimo nga gabi na  pattolay ni Jesus ta davvun. Ammu ni Jesus nga arannina ngana nga maekspiriensa i mataki nga kapatay; ngem, kuruga mavurung lagapa yayya meyannung ta matalo nga apostolesna, nga aranni ngana nga maddaddam gafu ta patena. Yari tu inusana i ultimo nga gabina nga tudduan, pagaramman, anna banna-bannayan ira. (Juan 14:25-31) Minappakalinno nga nipasingan ni Jesus nga mas mavurung yayya ta pammakapian na tanakuan anne ta baggina. Anni mabba kastana nga ehemplo para nittam!

7. Kunnasi nangipasingan tu kappabbaw nga gutu si Jesus kabalin laman nga nigafuna i Pamugag na Yafu?

⁷ Kabalin laman nga nigafu ni Jesus i Pamugag na Yafu, nangipasingan yayya tu extraordinario nga gutu. Kunnasi? Inalawa ni Jesus i uray sa na Yamana, maski ammuna nga kappasirang i kapatena megafu ta akusasion nga pangigeg ta Dios. (Mat. 26:65, 66; Luc. 22:41, 42) Pinattalupaddian ni Jesus i perfekto nga integridadna tapenu idayaw i ngagan ni Jehova, idefensa i soberaniana, anna tapenu posible i mannanayun nga inango ta mabbabawi ira. Kunne na gapa, niprepara ni Jesus i disipulosna ta aranni ngana nga meparubang nira.

8. (a) Anni i kinagi ni Jesus ta matalo nga disipulosna? (b) Piga dagun kabalin na patay ni Jesus, kunnasi pinarigan na disipulosna i gutuna?

⁸ Nangipasingan si Jesus tu gutu gukaban na ari paffokus ta vuru-vurunna, nu ari, ta pakawagan na matalo nga apostolesna. I simple nga pamugag, nga pinegafuananna kabalinna nga pinapanaw si Judas ay mangiperaddam turi ira ta mabbalin tu nazelugan nga disipulosna ta benefisio ira na nevuvvu nga daga ni Jesus anna i pakiparte ta bagu nga pakkasinabban. (1 Cor. 10:16, 17) Tapenu uffunan ni Jesus i disipulosna nga mattalupaddian nga matalo anna makavuluda yayya ta langi, kinagina nira nu anni i ekspektanna anna na Yamana.  (Juan 15:12-15) Kinagi paga ni Jesus ta apostolesna i kapurueba ira nga meparubang nira. Tapus, pinagaramna ira nga ‘pasikannadda i nonoda’ gitta na kingnguana. (Juan 16:1-4a, 33) Piga dagun i nappasa, tuttuttulan lagapa na disipulos ni Jesus i minassakrifisio nga ehemplona anna i gutuna. Maski paga mawagda nga magattam, sinuportadda i kataggi-tadday ta nadduruma nga kapurueba.​—Heb. 10:33, 34.

9. Kunnasi tam maparigan si Jesus ta pangipasingan tu gutu?

⁹ Tuttuttulattam gapa ta maddaggun i ehemplo ni Jesus ta pangipasingan tu gutu. Angngariganna, mawag tam i gutu tapenu uffunan i wawwaragi nga mapeppersigi megafu ta pangurugda. Egga ira i tiempo nga ari patas nga mefuku i wawwaragi tam. Nu mesimmu yatun, kuattam nakuan i adde na mawayya tam para nira, nelagum ngana i pangidefensa nira. (Fil. 1:14; Heb. 13:19) Tadday paga nga gannug nga makepasingan ittam tu gutu ay gukaban na tulu-tuloy nga “awan vuluvuga tu assing” nga pallayyagayya. (King. 14:3) Gitta ni Jesus, determinadu ittam nga ilayyagayya i mensahe na Pappatulan, maski paga kontran anna persigian ittam na karuan. Ngem nu mittan, baka kurang i gutu tam. Anni gafu i kuattam?

10. Ta ligguan ira nige na Memorial, anni nakuan i kuattam, anna ngatta?

¹⁰ Mapasikattam i gutu tam nu nononopattam i meyannung ta iddanama nga posible nittam megafu ta sakrifisio nga tavvu ni Cristo. (Juan 3:16; Efe. 1:7) Piga ligguan nige na Memorial, egga i espesial nga oportunidad tam nga mas appresian i tavvu. Tatun nga tiempo, tuttulan i iskediul ta pabbibbig tu Biblia ta Memorial anna sigga-pakimallo nga nonopan i nesimmu ira nige na patay ni Jesus. Tapus sonu maggarammammung ittam ngana para ta Pamugag na Yafu, mas malippawa tam i importansia na emblema ira ta Memorial anna i nerumu-ruma nga sakrifisio nga isimbolo danatun. Nu malippawa tam nu anni  i kingngua ni Jesus anna ni Jehova nittam anna nu kunnasi ittam mammakapia tuange ta iddeddukattam, mas dumakal i iddanama tam ta mappange, anna mapaguyu ittam nga magattam adde ta panuppalan.​—Heb. 12:3.

11-12. Anni ngana i nagigiammu tam?

¹¹ Nagigiammu tam ngana nga ari laman tu iperaddam na Pamugag na Yafu nittam i nabalor nga tavvu, nu ari, maski gapa i kappabbaw ira nga kualidad ni Jesus nga kinapakalinno anna gutu. Talaga mappabalo ittam nga tulu-tuloy nga ipasingan ni Jesus danaw nga kualidad bilang nelangitan nga Atannang nga Pari tam, nga mangipepakimallo para nittam! (Heb. 7:24, 25) Tapenu ipasingan i napafutuan nga appresasiottam, sigga-makatalo tam nakuan nga daddamman i patay ni Jesus, segun ta nibilinna. (Luc. 22:19, 20) Kuattam yatun ta aggaw nga katumbas na Nisan 14, i pinaka-importante nga fetcha na dagun.

¹² Malippawa tam ta kinasimple na Pamugag na Yafu i tadday paga nga kualidad nga namaguyu kani Jesus nga matay para nittam. Tagga ta nattolay yayya ta davvun, kilala yayya taw nga kualidad. Anni yatun?

13. Kunnasi dineskriba na Juan 15:9 anna 1 Juan 4:8-10 i aya nga nipasingan ni Jehova anna ni Jesus, anna sinni i mabbenefisio ta ayada?

¹³ Ta ngamin nga kingngua ni Jesus, perfekto nga nipasinganna i monag nga aya ni Jehova para nittam. (Bibbigan i Juan 15:9; 1 Juan 4:8-10.) Pinaka-importante, napafutuan nga niyawa ni Jesus i inangona para nittam. Maski nu miembro ittam na nazelugan onu na “tanakuan nga karneru,” mabbenefisio ittam ta aya nga nipasingan ni Jehova anna na Anana gukaban natun nga sakrifisio. (Juan 10:16, NW; 1 Juan 2:2) Nonopan gapa i gannug ira nga neyusa ta pamugag ta Memorial; ipasingan danatun i aya ni Jesus anna i konsiderasionna ta disipulosna. Kunnasi?

14. Kunnasi nga nipasingan ni Jesus i aya ta nazelugan nga disipulosna?

¹⁴ Nipasingan ni Jesus i aya ta nazelugan nga disipulosna gukaban na pangigafu ta ari komplikadu nga ritual, nu ari, ta simple nga pamugag nga selebradda. Ta pappasa na tiempo, mawag tu kada dagun nga selebran danatun nga nazelugan nga disipulos i Memorial, maski ta nadduruma nga sirkumstansia, nelagum ngana ta affukutan. (Nep. 2:10) Natuttulda kari si Jesus? Wan!

15-16. Kunnasi nga nawayya na karuan nga iselebra i Pamugag na Yafu maski ta kitezziga ira nga situasion?

¹⁵ Namegafu ta ollu siglo adde sangawe, nappursigi i kurug ira nga Cristiano nga daddamman i patay ni Jesus. Sinuttulda i unnug na Pamugag na Yafu adde ta mawayyada, anna nu mittan maski ta mariga ira nga kondision. Innan i tumunug ira nga ekspiriensa. Magitetadday nga nefuku si Brother Harold King ta China, yayya nga mawag tu iremediuna i panaddam ta Memorial. Memmugug nga nipreparana i emblema ira na Memorial, nga nangusa tu gannug ira nga egga sa. Kingnguana gapa i ngamin nga mawayyana tapenu kalkulan i fetcha na Memorial. Tagga ta zimittal ngana yatun nga fetcha, maski nu tattadday yayya ta seldana, nakkansion yayya, nakimallo, anna nappalappa tu nebase-Biblia.

¹⁶ Yaw paga i tadday nga ekspiriensa. Egga grupo na sister ira nga nefuku ta kampu konsentrasion durante na World War II nga pinappeligroda i inangoda tapenu daddamman i Pamugag na Yafu. Ngem megafu ta kitessimple i gannug ira nga neyusa taw nga okasion, nawayyada nga selebran tu sekreto i Memorial. Niyistoriada: “Agga-taddagmi nga pinalevutan i tadday nga pagitubangngan nga navungunan tu furaw nga tela, nu sitaw nepotung i binarayang  anna i tinapay. Kandela laman i nawagmi ta kuarto, ari tu bombilia tapenu ari kami magafutan. . . . Namippiga nga nisikkami i napafutuan nga tabbami ta Yama tam nga usan i ngamin nga sikammi tapenu idayaw i masanto nga ngaganna.” Fugurammu yatun nga pangurug nga nipasingadda! Anna anni ngana mabba nga aya i nipasingan ni Jesus nguri ta pinapposiblena nga maselebrattam i Memorial maski ta kitezziga ira nga situasion!

17. Anni ira nga pakkiavu i iyavu tam ta baggi tam?

¹⁷ Durante nga umara-aranni ngana i Memorial, makasta nu iyavu tam ta baggi tam i tumunug ira nga pakkiavu: ‘Kunnasì paga mas maparigan si Jesus ta pangipasingan tu aya? Mas agga-nono ku kari i pakawagan na kapangngurug ku ira anne ta niò? Dakal kari i ekspektakku ta wawwaragì anne ta mawayyada, onu ammù i limitasiodda?’ Kanayun nakuan nga parigattam si Jesus anna mangipasingan tu “pakipattageno.”​—1 Ped. 3:8, NW.

18-19. (a) Ta anni ittam nga makasiguradu? (b) Anni i determinadu nga kuammu?

¹⁸ I kiddaw nga iselebra i Memorial na patay ni Cristo ay ari ngana mabbayag. Sonu ‘duttal’ si Jesus ta tiempo na dakal nga ziga, pattaraddayanna noka i nabattang paga ta “pinilina ira” ta langi, tapus tatun ngana nga magultimo i keselebra na Memorial.​—1 Cor. 11:26; Mat. 24:31.

¹⁹ Maski sonu ari ngana nga meselebra i Memorial, makasiguradu ittam nga manono lagapa noka na ili ni Jehova yaw nga simple nga pamugag bilang simbolo na pinaka-kappabbaw nga kinapakalinno, gutu, anna aya nga nepasingan na tadday nga tolay. Tatun nga tiempo, istorian noka danuri nakapasselebra taw nga extraordinario nga pamugag i meyannung tatun tari ira ta mattolay tatun nga tiempo tapenu mabbenefisio gapa ira. Ngem tapenu mabbenefisio sangawe taw nga pamugag, mawag tu determinadu ittam nga parigan i kinapakalinno, gutu, anna aya ni Jesus. Nu kuattam yatun, makapakkomfiansa ittam nga alawatattam noka i bala-balo tam kani Jehova.​—2 Ped. 1:10, 11.