1-2. (a) Anni i awayya tam nga matageno nu pannonopattam i nipattolay ni Jesus anna i ministerio na? (b) Anni i gigiammuattam taw nga artikulo?

 NU MATAYAN ittam tu iddeddukan, talaga nga ma-miss tam yayya! Ta gafu na, baka mataka-taki ta nittam nu nonopattam i tiempo ira nage na nga natay, mas ngana nu nazziga-riga yayya. Ngem ta pappasa na tiempo, sisinu nga matageno tam i pagayayya nu nonopattam i tadday nga gannug nga nituddu na, kingngua na, kinagi na tapenu pagaramman ittam, onu tapenu pagalakkan ittam.

² Maraddam ittam gapa nu mabibbig tam i pazziga-riga anna patay ni Jesus. Ta tiempo na Memorial, ikagumattam nga pannonopan i importansia na tavvu na. (1 Cor. 11:24, 25) Ngem magayayya ittam nu pannonopattam i ngamin nga kingngua anna kinagi ni Jesus ta kegga na ta davvun. Mapagaram ittam gapa nu nonopattam i kukukuan na sangawe anna i kuan na para ta nittam ta mappange. Nu pannonopattam tu mapia danatun anna i pangaya na para ta nittam, mapaguyu ittam nga ipasingan i pappabalo tam. Gigiammuattam taw nga artikulo nu kunnasi tam nga mepasingan yatun.

3. Ngatta mappappabalo ittam ta tavvu?

³ Mappappabalo ittam kada pannonopattam i nipattolay anna patay ni Jesus. Ta kegga ni Jesus ta davvun, sinudduan na i totolay meyannung ta bendision ira na Pappatulan na Dios. Kakayà tam i tuttuddu na Biblia meyannung ta tavvu anna ta bendision ira nga malawa tam megafu tatun. Mappabalo ittam ta tavvu ta awayya tam i mapeggan tu madukko nga pakikkofun ta Dios anna kani Jesus megafu tatun. Egga gapa i iddanama danuri mangurug kani Jesus nga mattolay tu mannanayun  anna masingan uli i natay nga iddeddukadda. (Juan 5:28, 29; Roma 6:23) Awan vuluvuga tu nakua tam tapenu mepangngo ittam nga mangalawa tatun ira nga bendision, ni tu mapagattam i Dios anna si Cristo ta kingngua da para ta nittam. (Roma 5:8, 20, 21) Ngem mepasingattam ta nira nga talaga mappappabalo ittam. Kunnasi?

4. Kunnasi nga nipasingan ni Maria Magdalena i pappabalo na ta kingngua ni Jesus para ta nisa? (Innan i letratu.)

⁴ Ikonsidera i nesimmu ta Judio nga babay nga mangngagan tu Maria Magdalena. Kakkabbi yayya megafu ta pinarigatan yayya na pitu nga demonio. Posible nga natageno na nga awan tu makaduffun ta nisa. Yayya nga imajinammu i pappabalo na turi ta pinapanaw ni Jesus i demonio ira nga mamarriga ta nisa! Pinaguyu yayya na pappabalo na nga mabbalin tu disipulo ni Jesus anna usan i tiempo, sikan, anna i pakkukua na tapenu suportan si Jesus ta ministerio. (Luc. 8:1-3) Maski talaga mappabalo si Maria ta kingngua ni Jesus para ta nisa, awayya na tu ari na paga nga ammu i kadakallan nga regalu nga iyawa ta nisa ni Jesus. Iyawa na i inango na para ta ngamin nga totolay “tapenu ngamin i mangurug sa” ay awayya na nga mattolay tu mannanayun. (Juan 3:16) Ngem nipasingan lagapa ni Maria i pappabalo na kani Jesus ta pabbalin na tu matalo. Turi ta mazziga-riga si Jesus megafu ta nepato yayya ta kayu, ari yayya pinanawan ni Maria. Ikavurungan na gare si Jesus anna kayà na nga banna-bannayan i tanakuan. (Juan 19:25) Turi ta natay ngana si Jesus, nangiyangay si Maria anna i dua paga nga babay tu bangug para ta ketanam na. (Mar. 16:1, 2) Talaga nabendisionan i kinamatalo ni Maria. Turi ta napaginnolay si Jesus, nappasingan yayya kani Maria anna kinibbida na yayya. Pilippiga laman nga disipulo i nakka-pribilehio tu kunnatun.—Juan 20:11-18.

5. Kunnasi tam ipasingan i pappabalo tam ta ngamin nga kingngua ni Jehova anna ni Jesus para nittam?

⁵ Mepasingattam gapa i pappabalo tam ta ngamin nga kingngua ni Jehova anna ni ­Jesus  para nittam nu usattam i tiempo, sikan, anna kuartu tam tapenu suportan i trabahu na Pappatulan. Angngarigan na, awayya tam i manguffun ta pamataddag anna pammentena ta building ira nga usu-usattam para ta marenu nga paddayaw.

6. Ngatta makagi tam nga regalu para ta kada tadday ta nittam i tavvu?

⁶ Nu nonopattam i kadakal na pangaya ni Jehova anna ni Jesus para ta nittam, mapaguyu ittam gapa nga ayatan ira. (1 Juan 4:10, 19) Mas nga ayatattam ira nu nonopattam nga natay si Jesus para ta kada tadday nittam. Ammu ni apostol Pablo yatun anna nipappabalo na yatun ta tura na ta taga-Galacia ira. Kunna: “Mattolay ngà ngana gafu ta angngurug ku ta Ana na Dios nga nangaya niakan anna nangitavvung ta inango na megafu niakan.” (Gal. 2:20) Megafu ta tavvu ni Jesus, niyaranni ittam ni Jehova ta nisa tapenu mabbalin tu kofun na. (Juan 6:44) Ari kari nga matukkal i futum nga egga i nasingan ni Jehova tu mapia ta niko anna mangini-ngina i nipaga na tapenu laman mabbalikka tu kofun na? Ari kari tu paladdan natun i pangaya mu kani Jehova anna kani Jesus? Makasta gafu nu iyavu tam ta baggi tam, ‘Paguyuan nà natun nga aya nga kuan i anni?’

7. Base ta picture, kunnasi tam mepasingan i pangaya tam kani Jehova anna kani Jesus? (2 Corinto 5:14, 15; 6:1, 2)

⁷ I pangaya tam ta Dios anna kani Cristo i mamaguyu ta nittam nga ayatan i tanakuan. (Bibbigan i 2 Corinto 5:14, 15; 6:1, 2.) Tadday nga makua tam tapenu mepasingattam i aya tam ay gukaban na malallappo nga pallayyagayya. Kibbidattam i ngamin nga masimmuattam, maski nu anni paga i lahi da onu tribu. Ari ittam gapa nga mangireruma maski anni paga i estado da ta pattolay. Nu kunnatun  i kuattam, matuttul tam i uray ni Jehova nga “mapaliag ngamin i totolay anna kannammuad-da i kurug.”—1 Tim. 2:4.

8. Kunnasi tam ipasingan i pangaya tam ta wawwaragi tam?

⁸ Mapakurug tam gapa nga ayatattam i Dios anna si Cristo nu ayatattam i wawwaragi tam. (1 Juan 4:21) Ipasingattam i personal nga interes tam ta nira anna uffunattam ira ta problema da. Banna-bannayattam ira nu natayan ira. Bisitattam ira nu mataki ira. Kuattam gapa i ngamin nga mawayya tam nga pagaramman ira nu nakkafi i nono da. (2 Cor. 1:3-7; 1 Tes. 5:11, 14) Itulu-tuloy tam ira nga ­ipakimallo megafu ta ammu tam nga “dakal i pakawayya na pakimallo na tolay nga matunung.”—Sant. 5:16.

9. Anni paga i makua tam tapenu mepasingan i aya tam ta wawwaragi?

⁹ Mepasingattam gapa i pangaya ta wawwaragi tam nu ikagumattam nga pattalupaddianan i memammo nga relasion ta nira. Ikagumattam nga parigan i ehemplo ni Jehova ta pamakoma. Sigga-paran nga nisakrifisio ni Jehova i ana na para ta liwi-liwa tam. Mawag gafu gapa nga sigga-paran nga pakomattam i wawwaragi tam nu nakaliwa ira ta nittam. Manaki tam i mabbalin tu kagitta na marake nga doroban ta ilustrasion ni Jesus. Daka-dakal i gatu natun nga doroban, ngem ari ngana nipapaga yatun na yafu na. Ngem turi ta nakagatu i kavulu na nga doroban ta nisa, nipapaga na lagapa yatun maski nu balabaddi yatun kumpara ta gatu na. (Mat. 18:23-35) Nu egga i ari nu pakkarantindian na tadday nga wagi, awayya na kari tu siko i ollu nga makippakoma nige mu nga magatende ta Memorial? (Mat. 5:23, 24) Nu kuammu yatun, mepasingammu nga dakal i pangaya mu kani Jehova anna kani Jesus.

10-11. Kunnasi nga mepasingan na elder ira i pangaya da kani Jehova anna kani Jesus? (1 Pedro 5:1, 2)

¹⁰ Kunnasi nga mepasingan na elder ira nga ayatadda si Jehova anna si Jesus? Tadday nga importante nga makua da ay gukaban na panangngaw ta pakawagan ira na karneru ni Jesus. (Bibbigan i 1 Pedro 5:1, 2.) Yatun i nituddu ni Jesus kani apostol Pedro. Kabalin nga mamillu nga kinagi ni Pedro nga ari na nga kilala si Jesus, siguradu nga kakayà na nga pakurugan nga iddukan na si Jesus. Turi ta napaginnolay si Jesus, niyavu na kani Pedro: “Simon nga ana ni Juan, ayatam-mà kari?” Makasiguradu ittam nga kuan ni Pedro i maski anni tapenu pakurugan nga ayatan na i Yafu na. Kinagi ni Jesus kani Pedro: “Tangngallam-mu i karnerù ira.” (Juan 21:15-17) Namegafu tatun nga tiempo adde ta patena, sinangngallan ni Pedro i karneru ira na Yafu. Pinakurug na nga talaga ayatan na si Jesus.

¹¹ Elder ira, kunnasi nu mepasingan ta tiempo na Memorial nga importante ta nikamu i kinagi ni Jesus kani Pedro? Mepasingan nu i dakal nga aya nu kani Jehova anna kani Jesus nu kanayukkamu nga mash-shepherding anna nu mappursigi kamu tapenu uffunan danuri inactive nga manoli kani Jehova. (Eze. 34:11, 12) Awayya nu gapa kumustan i Bible study ira anna i bagu ira nga nagatende ta Memorial. Kayà tam nga mabbalin gapa ira tu disipulo ni Jesus, yatun ta ipatageno nu nakuan nga magayayya kamu nga makavulu ira.

12. Ngatta maggutu ittam nu nonopattam i kinagi ni Jesus ta gabi nige na nga natay? (Juan 16:32, 33)

¹² Ta gabi nige nga natay si Jesus, kinagi na ta disipulos na: “Mazziga-riga kamu toye ta utun na davvun ngem pasikannan nu i nono nu! Inaffu ku ngana i mundo!” (Bibbigan i  Juan 16:32, 33.) Anni i nakoffun kani Jesus tapenu magutu nga arubangan i kumontra ira nisa anna mattalupaddian nga matalo adde ta patena? Nattalo yayya kani Jehova. Ammu ni Jesus nga kunnatun gapa i meparubang ta disipulos na ira. Yatutta nikiddona kani Jehova nga tangngallan na nakuan ira. (Juan 17:11) Ngatta mamaggutu nittam yatun? Megafu ta mas makapangngua si Jehova anne ta maski sinni nga kumontra ta nittam. (1 Juan 4:4) Masingan ngamin ni Jehova. Makasiguradu ittam nga nu mattalo ittam kani Jehova, mawawwan i assing tam anna maggutu ittam.

13. Kunnasi nga nipasingan ni Jose nga taga-Arimatea i gutu?

¹³ Ikonsidera i nesimmu kani Jose nga taga-Arimatea. Respetadu yayya na Judio ira. Miembro yayya na Sanhedrin, i katannangan nga korte na Judio ira. Ngem ta kegga ni Jesus ta davvun, ari nga magutu si Jose. Kinagi ni Juan nga “tadday si Jose ta mangurug ira kani Jesus, ngem arian na nga nipaka-pakannammu, ta maganassing ta Judio ira.” (Juan 19:38) Maski nu interesadu si Jose ta mapia nga dumug na Pappatulan, ari na nga kinagi ta tanakuan nga egga i pangurug na kani Jesus. Maganassing gare yayya nga malsa ta atatannang nga posision na nu makannammuan na Judio ira nga disipulo yayya ni Jesus. Ngem mabibbig ta Biblia nga turi ta natay si Jesus, “nigutu ni Jose i minay kani Pilato anna kiniddaw na i baggi ni Jesus.” (Mar. 15:42, 43) Ari ngana nitagu ni Jose nga disipulo yayya ni Jesus.

14. Anni i kuammu nu maganassikka ta tolay?

¹⁴ Kagitta ni Jose, maganassing ka kari ta tolay? Nu mittan kari mappasirakka nga mappakilala ta kaeskuelam onu katrabahum nga tadday ka nga Saksi ni Jehova? Itala-talattammu kari i mabbalin tu unbaptized publisher onu mappa-baptize megafu ta mavurukka ta kagian na tanakuan ta niko? Ari mu nakuan pagurayan nga yatun nga matageno mu i mangifugag niko tapenu kuammu i ammum tu fustu. Makimemallo ka kani Jehova. Ikiddom ta nisa nga paggutukan naka tapenu makuam i uray na. Nu masingammu nga tattabbagan ni Jehova i pakimallo mu, mas nga maggutu ka.—Isa. 41:10, 13.

15. Kabalin nga nappasingan si Jesus ta disipulos na, pinaguyu ira na pagayayya da nga kuan i anni? (Lucas 24:52, 53)

¹⁵ Kuruga maraddam i disipulos ni Jesus nguri ta natay yayya. Imajinammu nga egga ka ta situasion da. Ari laman ira nawanan tu  meddu nga kofun, natageno da gapa nga baka ari ngana mesimmu i iddanamadda. (Luc. 24:17-21) Ngem turi ta nappasingan si Jesus ta nira, inuffunan na ira tapenu malippawa da i papel na ta ketuppal na profesiya na Biblia. Niddan na gapa ira tu importante nga trabahu. (Luc. 24:26, 27, 45-48) Kuarenta nga aggaw kabalin nga napaginnolay si Jesus, nappalangi yayya. Ari ngana nga maraddam i disipulos na. Magayayya ngana ira ta ammu da nga matolay i Yafu da anna sigga-paran yayya nga uffunan ira ta trabahu nga nipakua na ta nira. Pinaguyu ira na pagayayya da nga ari magimmang nga dayawan si Jehova.—Bibbigan i Lucas 24:52, 53; King. 5:42.

16. Kunnasi tam nga maparigan i disipulos ni Jesus?

¹⁶ Kunnasi tam nga maparigan i disipulos ni Jesus? Kanayun ittam nakuan nga magayayya nga masserbi kani Jehova ari ­laman tu ta tiempo na Memorial. Tapenu makua tam yatun, mawag tu pagolluattam i Pappatulan na Dios ta pattoletam. Angngarigan na, aru i mangi-adjust ta iskediul da ta trabahu tapenu regular ira ta ministerio, pakistudy, anna paf-family worship. Ari ngana gapa giminatang i karuan tu pakkukua ira nga ikonsidera na tanakuan tu importante tapenu mas masuportadda i kongregasion onu tapenu makapasserbi ira nu sitaw mas dakal i pakawagan. Kawagattam i magattam tapenu tulu-tuloy tam nga mapasserbian si Jehova. Ngem nipromesa na nga bendisionan na ittam nu pagolluattam ta pattoletam i Pappatulan.—Prov. 10:22; Mat. 6:32, 33.

17. Anni nakuan i approbetchammu nga kuan ta tiempo na Memorial? (Innan i letratu.)

¹⁷ Excited ittam nga iselebra i Memorial sonu Martes, Abril 4. Ngem ari tam ngana nakuan innaggan yatun nga aggaw tapenu pannonopan i pattolay anna patay ni Jesus, kunne na gapa i pangaya nga nipasingan na anna ni Jehova para ta nittam. Approbetchattam nakuan i tiempo na Memorial tapenu kanayun nga pannonopan yatun ira nga gannug. Angngarigan na, mangiskediul ka nakuan tu tiempo tapenu bibbigan anna pannonopan tu mapia i mabibbig ira ta chart nga “I Ultimo nga Ligguan na Pattolay ni Jesus ta Davvun.” Ta pabbibbig mu tatun, alegammu i teksto ira na Biblia nga manguffun ta niko tapenu mas mabbalikka tu minappabalo, minaggiddu, magutu, anna magayayya. Tapus nonopammu i espesipiko ira nga makuam tapenu mepasingammu i napafutuan nga pappabalo mu. Makasiguradu ka nga appresian ni Jesus i ngamin nga kukukuammu tapenu daddamman yayya ta tiempo na Memorial.—Nep. 2:19.