1-2. Anni i mawag nga itulu-tuloy tam nga kuan kabalittam nga ma-baptize? Ipakanawag.

 MAMIPPIGAM nga pakarenuan i balenu? Baka nige nu naddian tatun, nad-general cleaning kamu labbi. Ngem kunnasi nu ari mu ngana vuluvuga pinakarenuan yatun uli? Siempre maba-mabi laman nga makamfuan onu maparittan yatun uli. Tapenu kanayun nga marenu i balenu, mawag tu kanayukka nga mappakarenu.

² Kunnatun nakuan gapa i pangikagumattam nga itulu-tuloy nga itunung i appana-panono anna i kata-katolay tam. Siempre nige tam nga nappa-baptize, nikagumattam nga manguli tapenu ‘mapakarenuattam i baggi anna espiritu tam ta anni laman nga makaparitta nittam.’ (2 Cor. 7:1) Ngem sangawe ta baptize ittam ngana, mawag tam ngana gapa nga tuttulan i tabarang ni apostol Pablo nga tulu-tuloy nga “talibaguan nu i appana-panono anna affutu-futu nu.” (Efe. 4:23) Ngatta mawag nga itulu-tuloy tam nga itunung i baggi tam? Megafu ta mabi ittam laman nga parittan naw nga mundo. Tapenu malillitattam yatun anna mattalupaddian ittam nga marenu ta arubang ni Jehova, mawag nga kanayuttam nga usitakkan i appana-panono, kata-katolay, anna pakkaraga tam.

3. Anni i kayà kagian na ‘talibaguan i appana-panono nu’? (Roma 12:2)

³ Anni i mawag nga kuattam tapenu matalibagu tam i appana-panono tam? (Bibbigan i Roma 12:2.) I Griego nga uvovug  nga ne-translate tu ‘talibaguan i appana-panono nu’ ay awayya na nga me-translate tu “pakappian i interu nga appana-panono nu.” Ari gafu nga makalanno nga basta magangngua ittam laman tu mapia. Mawag tu usitakkattam i kata-katoletam anna kuattam i mawag tam ira nga ulian tapenu matuttul tam tu mapia i estandarte ira ni Jehova. Mawag tu tulu-tuloy tam nga kuan yatun, ari laman tu mittan.

4. Kunnasi tam nga malillitan nga mainfluwensian naw nga marake nga mundo i appana-panono tam?

⁴ Sonu perfekto ittam ngana, kanayuttam ngana saw nga mapagayayya si Jehova ta ngamin nga kuattam. Ngem megafu ta imperfekto ittam paga, mawag tu mappursigi ittam tapenu mapagayayya tam si Jehova. Ta Roma 12:2, kinagi ni Pablo nga mawag tu talibaguattam i appana-panono tam tapenu mammuattam i uray na Dios. Imbes tu mappa-influwensia ittam taw nga marake nga mundo, mawag nga usitakkattam i baggi tam tapenu mammuattam nu appana-panono na Dios i manginfluwensia ta goal anna desisiottam ira, ari tu i appana-panono na mundo.

5. Kunnasi tam nga mammuan nu sigga-nono ittam ta dattal na aggaw ni Jehova? (Innan i letratu.)

⁵ Ikonsidera yaw nga angngarigan. Kayà ni Jehova nga ‘sigga-nono ittam ta dattal na aggaw na.’ (2 Ped. 3:12, NW) Iyavu mu ta baggim: ‘Masingan kari ta pattolè nga malippawa ku tu araranni ngana nga madaral yaw nga marake nga mundo? Masingan kari ta desisiokku meyannung ta pakkolehio anna ta pappilì tu trabahu nga i passerbi kani Jehova i prayoridad ku? Mangurug ngà kari nga iyawa ni Jehova i pakawagakku anna na familià, onu kanayun ngà kari nga mavuru-vurung ta material ira nga gannug?’ Siguradu nga magayayya si Jehova nu masingan na nga ikakkagumattam nga pagolluan i uray na ta ngamin nga kukukuattam.—Mat. 6:25-27, 33; Fil. 4:12, 13.

6. Anni i mawag nga itulu-tuloy tam nga kuan?

 ⁶ Mawag tu kanayuttam nga usitakkan i appana-panono tam tapus uliattam i maski anni nga mawag nga uliattam. Kinagi ni Pablo ta taga-Corinto ira: “Usitakkan nu ta mapia i baggi nu, tapenu kannammuan nu nu giminafu kamu ta angngurug.” (2 Cor. 13:5) Ari nga makalanno nga magatende ittam laman ta study anna mallayyagayya sinaggi-mittan tapenu makagi tam nga egga ‘i angngurug tam.’ Masingan gapa yatun ta appana-panono, pakkaraga, anna motibo tam. Yari tu mawag nga tulu-tuloy tam nga talibaguan i appana-panono tam. Kunnasi? Bibbigattam i Uvovug na Dios, gigiammuattam nga mannono kagitta na, anna kuattam i maski anni nga kawagan tapenu tuttulan i uray ni Jehova.—1 Cor. 2:14-16.

7. Segun ta Efeso 4:31, 32, anni paga i mawag nga kuattam, anna ngatta awayya na tu mariga nga kuan yatun?

⁷ Bibbigan i Efeso 4:31, 32. Fuera paga ta panguli ta appana-panono tam, mawag gapa nga mapeggan ittam tu “natalibagu nga kata-katolay.” (Efe. 4:24) Mawag tam i mappursigi tapenu makua tam yatun. Angngarigan na, mawag nga mappursigi ittam tapenu alsan i marake nga ugu-ugali kagitta na pattaki na nono, pallussaw, anna papporay. Ngatta mariga nga kuan yatun? Megafu ta negamu ngana i karuan ira nga marake nga ugu-ugali ta nittam. Angngarigan na, kagian na Biblia nga i karuan nga totolay ay “minappata-patu” anna “mabi nga mapporay.” (Prov. 29:22) Maski baptize ittam ngana, mawag nga itulu-tuloy tam nga alsan i kunnatun nga marake nga ugu-ugali. Masingattam yatun ta tumunug nga ekspiriensa.

8-9. Base ta ekspiriensa ni Stephen, ngatta mawag tam nga itulu-tuloy nga alsan i negatibo ira nga ugu-ugali?

⁸ Dati nga minappata-patu si Brother Stephen. Kinagi na: “Maski turi ta baptize ngà ngana, minappata-patu ngà lagapa nu mittan. Angngarigan na, turi ta ma-house-to-house kami, zinaddag ku i nakkoko ta radio na takè. Turi ta arannì ngana yayya madaddag, inibbattan na i radio tapus nattammang ngana yayya. Turi ta inistorià ta wawwaragi nu kunnasì nga nabawi i radiò, niyavu na tadday nga elder nga kavulu mi, ‘Stephen, anni kuammu nu nadaddag mu yayya?’ Pinannono nà na pakkiavu na anna napaguyu ngà natun nga mappursigi nga mabbalin tu memammo ta tanakuan.” b

⁹ Gitta na nasingattam ta ekspiriensa ni Stephen, awayya na tu gavva nga mallawan uli i negatibo ira nga ugu-ugali nga abbo tam nga nalsa tam ngana. Nu mesimmu niko yatun, ari nakuan nga makkafi i nono mu anna ariammu nakuan nonopan nga marake ka nga Cristiano. Maski si apostol Pablo, kunnaw i inamin na: ‘Nu i mapia i ikaya ku nga kuan, i marake lallagu i makuà.’ (Roma 7:21-23) Megafu ta imperfekto ittam ngamin nga Cristiano, egga i negatibo nga ugu-ugali nga manotoli kagitta na kamfu nga mamarritta ta baletam. Mappursigi ittam gafu nga kanayun nga mabbalin tu marenu. Kunnasi tam nga makua yatun?

10. Kunnasi tam malabanan i negatibo ira nga ugali? (1 Juan 5:14, 15)

¹⁰ Ipakimallo mu kani Jehova yari i negatibo nga ugali nga marigatakka nga alsan. Mattalo ka nga ginnan anna uffunan naka. (Bibbigan i 1 Juan 5:14, 15.) Ari nga mammilagro si Jehova tapenu alsan yatun nga negatibo nga ugali, ngem pasikannan naka tapenu malabanammu yatun. (1 Ped. 5:10) Siempre, mawag mu gapa i magguyu segun ta pakimallo mu. Lillitammu nakuan i manginfluwensia ta nikaw nga ipasingan i negatibo nga ugu-ugali. Angngarigan na, magimmugug ka ta paggiraw tu pelikula onu programa ira ta  TV, onu pabbibbig tu istoria ira nga kunsintian na i ugali ira nga laba-labanammu. Ari mu nakuan gapa nga agga-nono i gannug ira nga manikkag ta marake ira nga pakkaraga mu.—Fil. 4:8; Col. 3:2.

11. Anni ira i kuattam tapenu metulu-tuloy tam nga makultiba i bagu nga kata-katolay?

¹¹ Maski nu nalsam ngana i dana nga kata-katolay, importante lagapa nga kultibammu i bagu nga kata-katolay. Kunnasim nga makua yatun? Kuammu tu goal nga parigan si Jehova durante nga magigiammum i kualidad na ira. (Efe. 5:1, 2) Angngarigan na, nu mabibbig mu ta Biblia i meyannung ta pamakoma ni Jehova, iyavu mu ta baggim, ‘Minammakoma ngà kari?’ Nu mabibbig mu i meyannung ta pangikallo ni Jehova tari ira ta pobre, iyavu mu ta baggim, ‘Ikavurungakku kari gapa i kapangngurug ku ira nga makkukurang, anna ipasingakku kari yatun ta kukukuakku?’ Tulu-tuloy nga talibaguammu i appana-panono mu gukaban na pakkultiba ta bagu nga kata-katolay, anna mapasensia ka nakuan durante nga kuammu yatun.

12. Kunnasi nga inuli na Biblia i kata-katolay ni Stephen?

¹² Napansin ni Stephen nga nakagi ta nappasa ira nga parapo nga sisinu ngana nga makultiba na i bagu nga kata-katolay. Kinagi na: “Namegafu turi ta na-baptize ngà, namippiga ngà ngana nga neparubang ta situasion ira nga awayya na tu mamappatu ta ulù. Nagigiammù nga arayyuan ngana laman i totolay nga mamappatu ta ulù onu egga ira i kuakku tapenu makkalma i situasion. Kinomendan nà na aru nga totolay kasali ngana i atawà megafu ta nattalupaddian ngà nga kalmadu ta kunnatun ira nga situasion. Maski lagu sakan nakaddagan! Ammù nga ari ku nakua danatun megafu laman ta pappursigì. Pakurugan natun ira nga nesimmu niakan nga mawayya na Biblia nga ulian i kata-katolay na tadday.”

13. Anni i makoffun nittam tapenu malabanattam i marake ira nga pakkaraga? (Galacia 5:16)

¹³ Bibbigan i Galacia 5:16. Tapenu makua tam i fustu, mawag tu labanattam i marake ira nga pakkaraga. Duffunan ittam ni Jehova gukaban na vuka-palag nga pangiyawa na ta masanto nga espiritu na. Nu gigiammuattam i Uvovug na Dios, mappa-influwensia ittam tatun nga espiritu na. Malawa tam gapa i masanto nga espiritu nu magatende ittam ta study ira. Makapagaram gapa i study ira megafu ta makavulu tam i wawwaragi tam nga ikakkagumadda nga kuan i fustu kagitta tam. (Heb. 10:24, 25; 13:7) Nu makimemallo ittam kani Jehova nga uffunan na ittam ta pakkafiattam ira, iyawa na i masanto nga espiritu na tapenu pasikannan ittam nga metulu-tuloy nga labanan i marake nga pakkaraga. Ari nga malsa danatun nga aktibidad i marake ira nga pakkaraga tam. Ngem makoffun nittam danatun tapenu ari tam nga makua i marake ira nga pakkaraga tam. Nakagi ta Galacia 5:16 nga danuri mattolay ta pangirollu na espiritu ay ‘ariadda nga mapagustuan i karagatan na neravvunan nga kata-katoleda.’

14. Ngatta mawag tu ari ittam magimmang nga labanan i marake ira nga pakkaraga?

¹⁴ Nu egga ngana i nigafu tam nga rutina na espiritual ira nga aktibidad, mawag nga itulu-tuloy tam yatun anna ari ittam magimmang nga labanan i marake ira nga pakkaraga. Ngatta? Megafu ta ari vuluvuga magimmang nga makillaban i tadday ta kalaban tam ira. Anni yatun? I tentasion nga mangngua tu marake. Maski na-baptize ittam ngana, baka matenta ittam lagapa nga mangngua tu marake, gitta na passugal, pagillellaw, onu paggiraw tu pornograpia. (Efe. 5:3, 4) Inamin na tadday nga kabataan nga brother: “Tadday ta  pinakamariga nga laba-labanakku ay i pakkorsunadà ta kaparehù nga lalaki. Abbo ku nu mawawwan balaman saw yatun nga mataga-tageno ku ngem adde sangawe matageno ku yatun.” Anni i makoffun nikaw nu talaga masikan i marake nga pakkaraga mu?

15. Ngatta makapagaram nga mammuan nga “negagangay tu duttal ta tolay” i marake ira nga pakkaraga? (Innan i letratu.)

¹⁵ Nu labanammu i marake nga pakkaraga nga talaga masiki-sikan, daddammammu nga ari laman tu sikaw i maka-ekspiriensa tatun. Kagian na Biblia: “Anni laman nga tentasion nga duttal nikamu ay negagangay tu duttal ta tolay.” (1 Cor. 10:13a) Netura yatun nga teksto para ta lallaki anna babbay nga Cristiano nga maddian ta Corinto. I karuan ta nira ay dati nga namabay, nakilalaki, homoseksual, anna illawen. (1 Cor. 6:9-11) Kayà kari kagian natun nga turi ta na-baptize ira awan ngana tu marake nga pakkaraga nga laba-labanadda? Magga egga. Kurug tu nazelugan ira ngamin nga Cristiano, ngem imperfekto lagapa ira nga totolay. Siguradu nga egga i laba-labanadda tu marake ira nga pakkaraga. Makapagaram nittam yatun. Ngatta? Ipasingan gare natun nga maski nu anni paga i marake nga pakkaraga nga laba-labanattam, egga ngana i tanakuan nga nakaffu tatun. Mapattalupaddiammu gafu i ‘maladda nga angngurug mu, ta ammum tu kunnatun gapa i pazziga-riga na ngamin nga wawwagim ta angngurug ta interu mundo.’—1 Ped. 5:9.

16. Anni nga delikadu nga appana-panono i lillitattam, anna ngatta?

¹⁶ Ariammu nakuan nonopan nga awan tu makalippawa ta pakkafian nga laba-labanammu. Delikadu yatun. Nu kunnatun ka garay nga mannono, baka matageno mu nga ari ngana nga manguli i situasiommu anna ari mu ngana maffu i marake ira nga pakkaraga. Ngem kunnaw i kagian na Biblia: ‘Mapammakatalakkan i Dios, anna arian na nga ipamavulun tu duttal nikamu i tentasion nga arian nu awayya affutan. Ta oras na katenta nu, iddan  nakamu na Dios ta sikan nu nga magattam tapenu melilli kamu ta kataga ta tentasion.’ (1 Cor. 10:13b) Maski gafu nu masiki-sikan i marake nga pakkaraga tam, mawayya tam nga malabanan yatun. Ta uffun ni Jehova, tulu-tuloy nga mawayya tam nga ari pagustuan yatun.

17. Anni i kuattam kada egga i luttuag nga marake nga pakkaraga tam?

¹⁷ Daddammammu nakuan yaw: Megafu ta imperfekto ittam, magga egga lagapa i luttuag nga marake nga pakkaraga tam. Nu mesimmu yatun, insigida nakuan nga panakitammu, gitta na kingngua ni Jose turi ta insigida nga sinammangngan na i atawa ni Potifar. (Gen. 39:12) Ari tu megafu ta natageno mu i marake nga pakkaraga ay mawag nga pagustuammu ngana yatun!

18-19. Anni ira nga pakkiavu i iyavu tam ta baggi tam tapenu tulu-tuloy nga matalibagu i appana-panono tam?

¹⁸ Matalibagu tam i appana-panono tam nu ari ittam magimmang nga mappursigi nga tuttulan i uray ni Jehova ta nononopan anna kukukuattam. Makua tam yatun nu kanayun nga usitakkattam i baggi tam gukaban na pangiyavu: ‘Masingan kari ta kukukuakku nga mangurug ngà tu balabaddi ngana laman i tiempo nga nababbattang nige na panuppalan? Egga ngana kari ira i nangulian na kata-katolè? Mappepegiya ngà kari ta espiritu ni Jehova tapenu malisiakku i tentasion nga pagustuan i marake ira nga pakkaraga?’

¹⁹ Ta pangusito mu ta baggim, innammu nu anni ngana ira i nanguliammu, imbes tu ekspektammu nga perfekto nga makuam i ngamin. Nu masingammu tu egga paga ira i mawag tu uliammu, ari nakuan makkafi i nono mu. Tulu-tuloy ka lagapa nakuan nga mapprogreso gitta na nitabarang na Filipos 3:16: “Bala-balinattam i mattolay segun ta tuttuddu ira nga tuttuttulat-tam adde sangoye.” Nu kuammu yatun, magga bendisionan ni Jehova i appursigim nga tulu-tuloy nga talibaguan i appana-panono mu.