1-2. (a) Ngatta ari ittam ngana makaddag nga mappasa ittam ta kapurueba ira? (b) Anni i gigiammuattam taw nga artikulo?

 MEGAFU ta totolay ittam ni Jehova, ari ittam ngana nga makaddag nu mappasa ittam ta kapurueba ira. Ammu tam gare nga nakagi ta Biblia nga “mawag tu mappasa ittam ta napakaru nga ziga-riga nage tam nga tullung ta Pammagurayan na Dios.” (King. 14:22) Ammu tam gapa nga ari nga masolba i karuan nga problema tam adde ta awan paga i napabagu nga mundo na Dios nu sitaw “awan ngana noka tu matay, onu maraddam, onu tumangi-tangi, onu magattam ta taki.”—Nep. 21:4.

² Ari ittam nga ililli ni Jehova ta kapurueba ira. Ngem moffunan na ittam tapenu maattammattam yatun ira. Kunnatun i kinagi ni apostol Pablo ta Cristiano ira nga maddian ta Roma. Nakkagi labbi yayya tu karuan nga kapurueba nga pappasa-pasan na anna na wawwaragi na. Tapus kinagi na: “Ngamin danaw nga ganna-gannug ay affutat-tam nga affutan gafu sa nga mangaya nittam!” (Roma 8:35-37) Ituddu na ta nittam yatun nga pavviktorian ittam ni Jehova maski nu maddaggun pagalaman i kapurueba tam. Gigiammuattam nu kunnasi nga pinavviktoria ni Jehova si Jose anna nu kunnasi naka gapa nga moffunan.

3. Kunnasi nga gavva nga nanguli i pattolay ni Jose?

³ Masingan kani Jacob nga talaga iddeddu na i ana na nga si Jose. (Gen. 37:3, 4) Megafu tatun, nappassil i manung ira ni Jose ta nisa. Turi ta egga i chansa da, nilaku da si Jose ta tadday nga grupo na Midianita ira nga negosiante. Ararayyu i biniahe natun ira nga negosiante. Niyangay da si Jose ta Ehipto  tapus nelaku mangana yayya tari ta panakallan na guardia ira ni Faraon nga si Potifar. Gaggavva nga nanguli i pattolay ni Jose! Nu dati, yayya i iddeddu nga ana na yama na, sangawe, kakkabbi ngana yayya nga aripan na tadday nga Ehipsio.—Gen. 39:1.

4. Kunnasi ittam posible nga mapurueban kagitta ni Jose?

⁴ Nakagi ta Biblia nga “mesimmu ta ngamin i marake ira nga gannug.” (Ecl. 9:11, Holy Bible—Easy-to-Read Version) Nu karuan, mappasa ittam ta kapurueba ira nga “negagangay tu duttal ta tolay.” (1 Cor. 10:13) Awayya na gapa nga mazziga-riga ittam megafu ta disipulo ittam ni Jesus. Angngarigan na, baka mauyu-uyaw ittam, makokkontra, onu mapersigi paga lagu megafu ta pangurug tam. (2 Tim. 3:12) Ngem maski anni paga nga kapurueba i pappasattam, pavviktorian ittam ni Jehova. Kunnasi kari nga pinavviktoria ni Jehova si Jose?

5. Anni i ammu ni Potifar nga rason nu ngatta mavviktoria si Jose? (Genesis 39:2-6)

⁵ Bibbigan i Genesis 39:2-6. Napansin ni Potifar nga malalaki anna malallappo i kabataan nga si Jose. Ammu na gapa nu ngatta. Nasingan ni Potifar nga “pinavviktoria ni Jehova i ngamin nga kukukuan [ni Jose].” b Turi kua, pinabbalin ni Potifar si Jose tu katiwala na. Sinunno na gapa si Jose nga tangngallan i interu nga balena. Megafu tatun, nappopprogreso si Potifar.

6. Anni i posible nga natageno ni Jose ta situasion na?

⁶ Imajinammu i natageno ni Jose. Anni kari i pinakakayà na nakuan nga mesimmu? Kayà na kari nga mapansin yayya ni Potifar tapenu mabala-balattan? Ari. Magga i kayà na ay mapalubbangan yayya tapenu makavulu na ngana uli i yama na. Maski gare nu napakaru i pribilehio na ta balay ni Potifar, aripan lagapa yayya na yafu nga ari nga maddayaw kani Jehova. Ari nga pinaguyu ni Jehova si Potifar tapenu mapalubbangan si Jose anna mas maggrabe paga lagu i situasion na.

7. Kunnasi nga mas naggrabe i situasion ni Jose? (Genesis 39:14, 15)

⁷ Mabibbig tam ta Genesis kapitulo 39 nga korsunada na atawa ni Potifar si Jose yatutta  namippiga na yayya nga sinenta onu inakit. Kada kuan yatun na atawa ni Potifar, kanayun nga mammanaki si Jose, adde ta nakaporay i babay anna inakusan na si Jose nga finersa na yayya nga makibbiko nisa. (Bibbigan i Genesis 39:14, 15.) Turi ta nammuan yatun ni Potifar, nipefuku na si Jose. Naddian yayya tu piga nga dagun ta affukutan. (Gen. 39:19, 20) Kunnasi kari i paddia-paddian ta affukutan? I Hebreo nga uvovug nga inusa ni Jose para ta “affukutan” ay awayya na nga tumukoy ta “pagunnugan” onu “avvu.” Kayà na gafu kagian nga kitarribbo i naddianan ni Jose anna abbo na tu ari ngana yayya nga makalawan tatun. (Gen. 40:15; ftn.) Mabibbig tam gapa ta Biblia nga egga i tiempo nga kinawagadda i takki ni Jose anna nipay da ta vullaw na i balayang nga koliar. (Sal. 105:17, 18) Talaga mas naggrabe i situasion ni Jose. Dati, tadday yayya nga aripan nga pattalakkadda. Ngem nabbalin lallagu yayya tu kakkabbi nga presu.

8. Maski nu maggrabe i kapurueba tam, ta anni ittam nga makasiguradu?

⁸ Nappasammu ngana kari nga mas naggrabe i kapuruebam maski nu fermi i pakimallo mu? Posible nga mesimmu yatun. Ari ittam gare ililli ni Jehova ta kapurueba ira taw nga mundo nga immagurayan ni Satanas. (1 Juan 5:19) Ngem maski paga kunnatun, makasiguradu ka taw: Masingi-singan ni Jehova i ngamin nga pappasa-pasammu anna ikavurungan naka. (Mat. 10:29-31; 1 Ped. 5:6, 7) Nipromesa na gapa: “Ariat-taka vuluvuga nga panawan, ni et-taka nga pagurayan.” (Heb. 13:5) Moffunan naka ni Jehova tapenu makapagattam maski nu gitta na awan ngana tu makuam ta situasiommu. Innattam nu kunnasi na nga kingngua yatun kani Jose.

9. Anni i mangipasingan nga igigiya ni Jehova si Jose turi ta nefuku yayya? (Genesis 39:21-23)

⁹ Bibbigan i Genesis 39:21-23. Maski tatun nga mariga nga tiempo nga agga-fuku si Jose, pinavviktoria lagapa yayya ni Jehova. Kunnasi? Sisinu nga nala ni Jose i pattalo na panakallan nga ofisial, gitta na nakua na kani Potifar. Tapus turi kua, nitalo na panakallan nga ofisial i ngamin nga presu kani Jose. Mabibbig tam paga lagu ta Biblia nga “ari ngana vuluvuga nga naki-alam i panakallan nga ofisial na affukutan ta panangngal ni Jose.” Aru ngana i makasta nga trabahuan ni Jose imbes tu agga-nono na i situasion na. Dakal i nangulian na paddia-paddian na! Nonopan yaw: Posible kari talaga nga mekargo i dakal nga responsibilidad ta presu nga naakusan nga finersa na nga bikattan i atawa na ofisial na korte? Egga laman i tadday nga rason tatun. Nakagi ta Genesis 39:23 nga “giggiyyan ni Jehova si Jose anna pinavviktoria ni Jehova i ngamin nga kuan na.”

10. Ngatta posible nga natageno ni Jose nga ari yayya nga navviktoria ta ngamin?

¹⁰ Imajinammu nu anni ngana i mataga-tageno ni Jose. Ta ngamin nga nappasan na namegafu ta naakusan adde ta nefuku yayya, natageno na kari nga navviktoria ngana yayya ta ngamin? Anni kari i pinakakayà nakuan ni Jose? Kayà na kari nga mala i fabor na panakallan nga ofisial na affukutan? Ari. Magga i kayà na ay mapakurug nga awan tu liwa na anna mapalawan nakuan ngana yayya. Nakifabor paga lagu yayya ta mallawan ngana nga kasi-presu na nga makibbida kani Faraon tapenu makalawan ngana gapa yayya tatun nga kappaganassing nga affukutan. (Gen. 40:14) Ngem ari nga insigida nga kinibbida natun nga lalaki si Faraon. Yatutta dua ragun paga nga naddian si Jose ta affukutan. (Gen. 40:23; 41:1, 14) Ngem pinavviktoria lagapa ni Jehova si Jose. Kunnasi?

11. Anni nga espesial nga abilidad i niyawa ni Jehova kani Jose, anna kunnasi nga nakoffun yatun ta ketuppal na gakkag ni Jehova?

¹¹ Ta kegga ni Jose ta affukutan, pinattatageno  ni Jehova si Faraon tu dua nga tatageno nga ari na mantindian. Desperadu si Faraon nga ammuan i kebalinan natun. Turi ta nakannammuan na nga egga i abilidad ni Jose nga mangipakanawag tu tatageno ira, nipagal na yayya. Ta uffun ni Jehova, nipakanawag ni Jose i tatageno ira. Nappabbaw gapa si Faraon ta makoffun nga tabarang nga niyawa ni Jose ta nisa. Gafu ta masingi-singan ni Faraon nga igigiya ni Jehova si Jose, sinunno na yayya nga manangngal ta ngamin nga suplay na makan ta interu nga Ehipto. (Gen. 41:38, 41-44) Turi kua, egga i nepallo nga bisin ta Ehipto anna maski ta Canaan nga paddianan na familia ni Jose. Egga ngana i pakawayya ni Jose nga uffunan i familia na tapenu ari ira nga mabbisin anna mattulu-tuloy i gaka nga paggafuan na Mesias.

12. Anni ira i kingngua ni Jehova nga namavviktoria kani Jose?

¹² Nonopammu i kappabbaw ira nga nesimmu kani Jose. Sinni kari i namaguyu kani Potifar tapenu mapansin na si Jose nga tadday laman nga aripan? Sinni i makagafu nu ngatta finaboran na panakallan nga ofisial na affukutan i kakkabbi nga presu nga si Jose? Sinni i namattatageno kani Faraon tu kavvuru-vurung ira nga tatageno anna nangiyawa tu abilidad kani Jose nga ipakanawag danatun? Sinni i namaguyu kani Faraon nga pilian si Jose nga manangngal ta ngamin nga suplay na makan ta Ehipto? (Gen. 45:5) Manawag nga si Jehova i namavviktoria ta ngamin nga kingngua ni Jose. Masingattam gafu tatun nga minaniobra ni Jehova i ganna-gannug tapenu yari i marake nga plano na manung ira ni Jose ay meyusa na ta pangituppal na ta uray na.

13. Kanayun kari nga egga i kuan ni Jehova ta kada situasion nga pappasattam? Ipakanawag.

¹³ Anni i magigiammu tam ta istoria ni Jose? Kanayun kari nga egga i kuan ni Jehova ta kada situasion nga pappasattam? Imaniobra na kari i kada mesissimmu ta pattolay tam tapenu makasta lagapa i pattuppalan na ngamin nga marake nga mesissimmu ta nittam? Ari tu kunnatun i ituttuddu na Biblia. (Ecl. 8:9; 9:11) Ngem yaw i ammu tam: Nu egga i pappasattam nga problema, gigginnan ni Jehova i daga-raging tam nga mappoffun. (Sal. 34:15; 55:22;  Isa. 59:1) Moffunan ittam gapa ni Jehova nga attamman i kapurueba tam anna mavviktoria. Kunnasi?

14. Kunnasi ittam nga uffunan ni Jehova ta tiempo na ziga-riga?

¹⁴ I tadday nga panguffun ni Jehova ta nittam ay gukaban na pamanna-bannay anna pamasikan na ta nittam ta eksakto nga tiempo nga kawagattam yatun. (2 Cor. 1:3, 4) Kunnatun i ekspiriensa ni Brother Eziz nga taga-Turkmenistan. Nefuku yayya tu dua nga ragun megafu ta pangurug na. Istorian na: “Ta mismu nga aggaw na kabistà, nipabibbig niakan na tadday nga brother i Isaias 30:15. Nakagi tari: ‘Massikakkamu nu mattalupaddiakkamu nga kalmadu anna nu mattalo kamu.’ Nakoffun yatun nga teksto ta niakan tapenu kanayun ngà nga kalmadu anna italo ku ngana laman i ngamin kani Jehova. Pinannonopakku tu mapia yatun nga teksto anna nakoffun yatun ta interu nga tiempo nga agga-fuku ngà.” Egga kari i manono mu nga tiempo ta pattolem nga inuffunan naka ni Jehova gukaban na pamanna-bannay anna pamasikan na nikaw ta tiempo nga kakawagammu yatun?

15-16. Anni i magigiammum ta ekspiriensa ni Tori?

¹⁵ Maruddu nga saka tam laman nga manono nu kunnasi ittam nga inuffunan ni Jehova nga makapagattam ta kapurueba tam nu nabalin ngana yatun. Napakurug yatun ni Sister Tori. Annam nga ragun nga inatta-attamman na ana na nga si Mason i cancer adde ta patena. Siempre, fermi i daddam ni Tori ta nesimmu. Kinagi na: “Yaw ngana siguru i pinakamataki nga nappasakku bilang tadday nga yena.” Kinagi na paga: “Maski gapa siguru sinni nga magana umanugu niakan nga mas mataki nga masingan i ana mu nga marigi-rigatan anne ta sikaw mismu i marigatan.”

¹⁶ Mataka-taki i futu ni Tori gafu ta narigi-rigatan i ana na. Ngem turi kua, pinannonopan  na nu kunnasi yayya inuffunan ni Jehova nga makapagattam. Kinagi na: “Nu nonopakku yari i nesimmu, matageno ku i aya anna panguffun ni Jehova ta nikami na ana ku. Angngarigan na, egga ira i tiempo nga ari ngana nga makua ni Mason nga umarubang ta bisita na ira megafu ta taki na. Ngem mabbiahe lagapa tu dua nga oras i wawwaragi tapenu umay ta hospital. Kanayun nga egga i wagi ta waiting room nga preparadu anna sigga-paran nga manguffun ta nikami. Niyawa gapa na wawwaragi i material nga pakawagammi. Maski ta pinakagrabe ira nga situasion, ari kami vuluvuga nakkurang.” Niyawa ni Jehova i kawagan ni Tori tapenu makapagattam, anna kunnatun gapa i kingngua na para kani Mason.—Innan i kahon nga “ Niyawa ni Jehova i Mismu nga Kawagammi.”

17-18. Anni i makoffun ta nittam tapenu ipappabalo tam i panguffun ni Jehova maski maddaggun i kapurueba? (Salmo 40:5)

¹⁷ Bibbigan i Salmo 40:5. Goal na tadday nga mountain climber nga madde i katannangan nga parte na vukig. Ngem ta ruta nga mawag tu dalanan na, egga ira i puede na nga pagimmangan tapenu ma-enjoy na i makakkasta nga pallevu. Kunnatun gapa ta nittam. Mawag tu kanayun ittam nga magimmang tapus pannonopattam nu kunnasi ittam nga pavviktorian ni Jehova maski nu egga i pappasa-pasattam nga kapurueba. Kada kabalin na tangaggaw, iyavu mu ta baggim: ‘Anni ira i bendision ni Jehova niakan sangawe nga aggaw? Maski nu egga i paddaggunakku nga pappasan nga kapurueba, kunnasi ngà nga uuffunan ni Jehova nga makapagattam?’ Puruebammu nga mannono tu maski tadday nga bendision maggafu kani Jehova nga nakoffun ta nikaw tapenu mavviktoria.

¹⁸ Baka ipaka-pakimallo mu nga mawawan ngana nakuan i kapuruebam. Gagangay laman gapa nga manono mu yatun anna mepangngo gapa nga mepakimallo yatun. (Fil. 4:6) Ngem ipromesa ni Jehova nga pasikannan naka anna uffunan naka nga makapagattam. Yatutta kammu nakuan kattaman i bendisiommu ira sangawe. Kanayummu nakuan gapa nga ipappabalo nga uuffunan naka ni Jehova. Nu kuammu i kunnatun, masingammu nu kunnasi naka nga uuffunan ni Jehova tapenu mavviktoria kagitta ni Jose maski nu maddaggun i kapuruebam.—Gen. 41:51, 52.