MAGIGIAMMU NGA ARTIKULO 3
KANSION 124 Matalo nga Kanayun
Duffunan Naka ni Jehova nu Madammo i Problemam
“[Si Jehova] i mamatuyag niko.”—ISA. 33:6.
I MAGIGIAMMU TAM
Nu anni i kuattam tapenu duffunan ittam ni Jehova nu egga i madammo nga problema tam.
1-2. Anni ira i madammo nga problema nga awayya na tu arubangan na matalo ira nga aripan ni Jehova?
NU EGGA i grabe nga mesimmu nittam, awayya na tu manguli i pattoletam. Angngarigan na, turi ta nappa-check-up si Brother Luis, a kinagi na doktor nga piga vulan ngana laman yayya nga mattolay gafu ta dumu-duma i cancer na. Busy gapa si Monika anna i atawa na ta espiritual ira nga gannug. Ngem tadday nga aggaw, nakannammuan ni Monika nga piga ragun ngana balo nga mattotolay tu doble-kara i atawa na nga elder. Fersadu gapa nga pinanawan na single nga sister nga si Olivia i balena megafu ta egga i duttal nga masiki-sikan nga bagiu. Ta panoli na, nasingan na tu zinaral na bagiu i balena. Keppaspas danatun ira nga nesimmu ngem inuli natun i pattoleda. Naekspiriensam ngana kari i kunnatun? Egga kari i nesimmu ta niko nga gavva nga inuli na i pattolem?
2 Maski nu matalo ittam nga massesserbi kani Jehova, egga lagapa ira i problema tam anna mattaki ittam, gitta gabbalaman na karuan nga totolay. Awayya na gapa tu mawag nga attammattam i pangokkontra onu pameppersigi danuri na mangikalussaw ta totolay na Dios. Ari ittam nga ilisi ni Jehova ta kunnatun nga ziga-riga. Ngem nipromesa na nga duffunan na ittam. (Isa. 41:10) Ta uffun na, puede ittam lagapa nga magayayya, makangngua tu makasta ira nga desision, anna mattalupaddian nga matalo ta nisa maski ta karigatan nga situasion. Taw nga artikulo, gigiammuattam i appa nga panguffun nittam ni Jehova nu egga ira i nepallo nga problema tam. Gigiammuattam gapa i mawag tu kuattam tapenu uffunan na ittam.
TANGNGALLAN NAKA NI JEHOVA
3. Nu egga i grabe nga mesimmu, anni i awayya na nga marigatan ittam nga kuan?
3 I madammo nga problema. Nu egga i grabe nga mesimmu, baka marigatan ittam nga mannono tu mapia anna mariga gapa i maddesision. Ngatta? Baka madaddammo i gakaw tam. Awayya na gapa nga makkonsimision ittam gafu ta vurung tam. Baka matageno tam nga gitta tam i maddalan ta makannag nga lumay nga ari tam ammu nu sitaw ngana i angngayattam. Kunnatun i nesimmu ta dua nga sister nga nakagi ta gafu turi ta namroblema ira. Kagian ni Olivia: “Turi ta zinara-daral na bagiu i balè, kakku ngana ammu i kuakku anna ari ku ngana makaya.” Kunnaw gapa i kagian ni Monika ta pangilloku ta nisa na atawa na: “Fermi i nikadismayà. Gitta na egga i nanuddug ta nio. Ari ku ngana ammu nu kunnasi i mattolay tu normal. Nesimmu nio i abbo ku tu imposible.” Anni i nipromesa ni Jehova nga kuan na nu matageno tam nga ari tam ngana nga makaya?
4. Anni i nipromesa ni Jehova ta nittam ta Filipos 4:6, 7?
4 I panguffun ni Jehova. Ipromesa ni Jehova nga iddan na ittam tu magalan ta Biblia nga ‘imammo na Dios.’ (Bibbigan i Filipos 4:6, 7.) Tumukoy yatun nga imammo ta kalmadu anna memammo nga nono anna futu megafu ta madukko i relasiottam nisa. “Ari malippawa na tolay” yatun. Mas makapabbaw yatun anne ta mawayya nga addetan na nono. Napuruebammu ngana kari nga nakkalma i panageno mu kabalimmu nga makimemallo kani Jehova? Yatun nga panageno i ‘imammo na Dios.’
5. Kunnasi nga guardian na imammo na Dios i ginnonopan anna i giffutuattam?
5 Ta Filipos 4:7 gabbalaman, nakagi nga i imammo na Dios i “manangngal” onu mapprotekta ta “ta nono anna giffutuan nu.” I orihinal nga uvovug para ta “manangngal” ay tadday nga termino ta militar anna neyusa yatun tapenu deskriban i suddalu ira nga magguardia ta tadday nga siudad tapenu ari nga makatallung i kalaban ira. Masingngo i katrug danuri na maddian tatun nga naguardian nga siudad megafu ta ammu da nga egga ira i suddalu nga agga-puestu ta trangka ira. Kunnatun gapa nu guardiadu na imammo na Dios i giffutuan anna ginnonopattam. Kalmadu ittam laman megafu ta ammu tam nga awan tu manganni nittam. (Sal. 4:8) Kagitta tam si Hana nga maski nu ari nga insigida nga manguli i situasiottam, memammo lagapa i panageno tam. (1 Sam. 1:16-18) Nu kalmadu gapa ittam, maruddu nga mas makapannono anna makapaddesision ittam tu mapia.
Makimallo adde ta matageno mu i ‘imammo na Dios’ nga manangngal ta nono anna ta futum (Innan i parapo 4-6)
6. Anni i kuattam tapenu mala tam i ‘imammo na Dios’? (Innan gapa i letratu.)
6 I mawag tu kuattam. Nu problemadu ittam, agalattam i guardia. Kunnasi? Ari ittam nga magimmang nga makimallo adde ta matageno tam i imammo na Dios. (Luc. 11:9; 1 Tes. 5:17) Istorian ni Luis nga nakagi ta gafu i kingngua da na atawa na nga si Ana tapenu makayanadda i situasiodda turi ta egga ngana i taning ni Luis. Kagian ni Luis: “Tatun nga tiempo, kitazziga i mangngua tu desision meyannung ta papporu anna ta karuan paga nga gannug. Ngem daka-dakal i neyuffun nikami na pakimallo tapenu memammo i nono mi.” Istorian ni Luis anna na atawa na nga grabe i pakimallo da anna ari ira nga nagiggimmang. Nikiddoda kani Jehova nga iddan na ira tu memammo nga nono, kalmadu nga futu, anna ka-uto tapenu makangngua ira tu makasta nga desision. Natageno da nga inuffunan ira ni Jehova. Nu problemadu ka gapa, ari ka magimmang nga makimallo tapenu mala mu i imammo ni Jehova nga magguardia ta futum anna ta nono mu.—Roma 12:12.
PATUYAGGAN NAKA NI JEHOVA
7. Anni i awayya na nga matageno tam nu mappasa ittam ta madammo nga problema?
7 I madammo nga problema. Nu egga i grabe nga problema tam, baka ari ngana tu normal i mataga-tageno, nononopan, anna reaksiottam. Megitta ittam gapa ta tadday nga mepala-palung nga barku ta tiempo na bagiu. Baka matageno tam nga mangulu-uli i panageno tam. Kinagi ni Ana nga nakagi ta gafu nga magganna-gannug bi i natageno na turi ta natay i atawa na nga si Luis. Istorian na: “Nu mittan, gitta na madepres ngà anna ikakkabbi ku i baggì. Nu mittan gapa, mapporay ngà gafu ta natay yayya.” Maraddam anna dismayadu gapa si Ana gafu ta yayya ngana i maddesision ta gannug ira nga dati bi nga kayang-kaya nga kuan ni Luis. Nu mittan, matageno na nga gitta na egga yayya ta bebay tapus maddaggun i bagiu. Kunnasi ittam nga duffunan ni Jehova nu malaggabban ittam ngana ta kuddanatun nga emosion?
8. Base ta Isaias 33:6, anni i ipasiguradu ta nittam ni Jehova?
8 I panguffun ni Jehova. Ipasiguradu na ta nittam nga patuyaggan na ittam. (Bibbigan i Isaias 33:6.) Nu mabbagiu, delikadu i paddian na barku megafu ta awayya na tu magugguyag yatun. Tapenu mafugaddan yatun nga kagugguyag na, egga i parte na barku nga palawanadda ta makka-abbagan nga agga-lammag ta danum. I itchura natun ay gitta na palippi na manango. Dakal i meduffun danatun ira nga parte na barku tapenu ari kuruga nga magugguyag yatun. Megafu tatun, safe ira i pasaheru anna ari da kuruga mawwang ta pabbiahe da. Ngem maffunsina laman tu mapia danatun nga parte na barku nu tulu-tuloy i biahe. Kunnatun gapa ta nittam. Patuyaggan ittam ni Jehova nu tulu-tuloy i matalo nga passerbi tam maski nu egga i problema.
Usan i research tool ira tapenu patuyaggan i baggim (Innan i parapo 8-9)
9. Anni i meduffun na research tool tam ira tapenu makontrol tam i emosiottam? (Innan gapa i letratu.)
9 I mawag tu kuattam. Nu madaddammo ngana i panageno mu, ari mu nakuan vuluvuga pagurayan i rutinam ta espiritual. Siempre, baddi ngana laman i makuam, ari tu kagitta na dati. Ngem tandaanammu nga rasonable si Jehova. (Ikumpara i Lucas 21:1-4.) Kanayun nakuan nga egga i tiempom nga map-personal study anna mannono tu mapia. Ngatta? Makakkarasta i artikulo anna video ira nga niyawa ni Jehova nittam gukaban na organisasion na. Duffunan ittam danatun tapenu makontrol tam i emosiottam nu problemadu ittam. Tapenu malegammu i informasion nga kawagammu, usammu i research tool ira nga available ta lengguahem, kagitta na JW Library® app, Watch Tower Publications Index, anna Tulong sa Pag-aaral ng mga Saksi ni Jehova. Istorian ni Monika nga nakagi ta nappasa ira nga parapo nga kada mamegafu ngana nga maddammo i panageno na, usan na i research tool ira tapenu makaleg tu tabarang. Angngarigan na, i-type na i uvovug nga “poray.” Nu mittan gapa, i-type na i uvovug ira nga “pangilloku” onu “kinamatalo.” Tapus mabbibbig yayya adde ta makkasta i panageno na. Kagian na: “Habang mar-research ngà, fermi nga mavuru-vurung ngà. Ngem nu mabbibbig ngà ngana ta na-research ku, natageno ku nga gitta na gaggakkopan nà ni Jehova. Ammù tu mantindian ni Jehova i ngamin nga mataga-tageno ku anna dudduffunan nà.” I kuddanatun nga panguffun ni Jehova ay makaduffun tapenu makontrol mu i emosiommu anna mabbalikka tu mas kalmadu.—Sal. 119:143, 144.
ALALAYAN NAKA NI JEHOVA
10. Anni i awayya na nga matageno tam nu egga i grabe nga mesimmu ta nittam?
10 I madammo nga problema. Nu egga i grabe nga nesimmu ta nittam, egga ira i tiempo nga matageno tam tu nakkafi i baggi tam anna i nono tam. Baka matageno tam tu megitta ittam ta tadday nga atleta nga naaksidente. Dati bi keppaspas ittam nga makkaru ngem mazzizzimpilay ngana. Awayya na gapa tu marigatan ittam nga kuan i gannug ira nga alappaw laman nittam dati onu awan ngana kuruga tu ganas tam nga kuan i gannug ira nga kakayà tam bi. Kagitta ni Elias, baka matageno tam nga manaki tam ngana i lukka nu umma. Mas kayà tam ngana laman i makkatrug. (1 Pat. 19:5-7) Anni i ipromesa ni Jehova nga kuan na nu makkafi ittam?
11. Anni paga i tadday nga panguffun ni Jehova nittam? (Salmo 94:18)
11 I panguffun ni Jehova. Ipromesa na nga kuragan onu alalayan na ittam. (Bibbigan i Salmo 94:18.) Megitta ittam ta naaksidente nga atleta nga magawag tu alalay tapenu makaguyu yayya. Baka mawag tam gapa i uffun tapenu aktibo ittam lagapa ta passerbi kani Jehova. Tatun ira nga tiempo, ipasiguradu ni Jehova ta nittam: “Sakan, si Jehova nga Dios mu, agga-tammi ku i ziwanan nga limam, i makkakkagi nikaw, ‘Ari ka maganassing. Uffunattaka.’” (Isa. 41:13) Nalawa ni Patul David i kunnatun nga uffun. Turi ta egga ira i problema na anna mangontra nisa, kinagi na kani Jehova: “Megafu ta pakapangnguam ay awan niakan tu nesimmu.” (Sal. 18:35) Ngem kunnasi ittam kari nga alalayan ni Jehova?
Alawatan i pangalalay na kafamilia, kokkofun, anna na elder ira (Innan i parapo 11-13)
12. Sinni i awayya nga usan ni Jehova tapenu duffunan ittam nu nakkafi ittam?
12 Kunnasi ittam nga alalayan ni Jehova? Maruddu nga paguyuan na i tanakuan nga manguffun nittam. Angngarigan na, turi ta nakkafi si David, binisita yayya na kofun na nga si Jonatan tapenu alalayan yayya anna pasikannan i nono na. (1 Sam. 23:16, 17) Inusa gapa ni Jehova si Eliseo tapenu uffunan si Elias. (1 Pat. 19:16, 21; 2 Pat. 2:2) Sangawe gapa, awayya nga usan ni Jehova i kafamilia, kokkofun, onu i elder ira tapenu alalayan ittam. Ngem nu sobra i daddam tam, baka mas kayà tam i magitadday. Normal laman yatun nga reaksion. Ngem anni i kuattam tapenu maalalayan ittam ni Jehova?
13. Anni i mawag tu kuattam tapenu maalalayan ittam ni Jehova? (Innan gapa i letratu.)
13 I mawag tu kuattam. Labanan i tendensia nga isina i baggim. Nu kunnatun gare i kuattam, baggi tam laman i agga-nono tam anna i problema nga pappasa-pasattam. Afektan natun nga appana-panono i desision ira nga kuattam. (Prov. 18:1) Siempre, egga ira i tiempo nga kayà tam i magitadday, jebi nu egga i grabe onu maka-trauma ira nga pappasa-pasattam. Ngem nu nabayag tam nga isisina i baggi tam, baka mapammanakitattam lallagu i panguffun danuri na usu-usan ni Jehova tapenu alalayan ittam. Yayya nga maski nu mariga nga mangalawa tu uffun nu problemadu ka, alawatammu nakuan i panguffun na kafamiliam, kokkofun, anna na elder ira. Imammatammu danatun nga pangalalay ni Jehova ta niko.—Prov. 17:17; Isa. 32:1, 2.
BANNA-BANNAYAN NAKA NI JEHOVA
14. Anni ira i situasion nga awayya na tu mamaganassing ta nittam?
14 I madammo nga problema. Awayya na tu mappasa ittam ta situasion ira nga mamaganassing nittam. Ta Biblia, mabibbig tam i matalo ira nga aripan na Dios nga namroblema anna naganassing megafu ta kalaban ira onu ta karuan paga nga mamakadammo. (Sal. 18:4; 55:1, 5) Kunnatun ittam gapa. Baka kokkontran ittam na kaeskuela tam, katrabahu, kafamilia, onu na gobiernu. Baka mappeppeligro i inango tam megafu ta taki. Ta kuddanatun nga tiempo, baka matageno tam nga awan tu awa-awayya tam kagitta na abbing. Kunnasi ittam nga uffunan ni Jehova?
15. Anni i ipasiguradu na Salmo 94:19 ta nittam?
15 I panguffun ni Jehova. Banna-bannayan anna pakalman na ittam. (Bibbigan i Salmo 94:19.) Ipanono ta nittam natun nga salmo i tadday nga abbing nga babay nga magana-anassing anna ari nga makakatrug megafu ta mabbagiu anna magarugug. Maimajittam i yama na nga angngayan na yayya tapus gabbayan na adde ta makakatrug ngana. Maski nu maddaggun paga nga magarugug, matageno natun nga abbing nga awan tu manganni ta nisa gafu ta agga-gakko yayya na yama na. Nu mappasa ittam ta situasion ira nga mamaganassing ta nittam, kawagattam i paggakko na Yama tam ta langi adde ta makkalma ittam. Kunnasi tam nga malawa i kunnatun nga pamanna-bannay ni Jehova?
Ipamavulu nga banna-bannayan naka na Yamam ta langi gukaban na Biblia (Innan i parapo 15-16)
16. Anni i kuattam tapenu mabanna-bannayan ittam ni Jehova? (Innan gapa i letratu.)
16 I mawag tu kuattam. Kanayun nakuan nga egga i tiempom para kani Jehova. Makimallo ka ta nisa anna bibbigammu i Uvovug na. (Sal. 77:1, 12-14) Tapus nu ma-stress ka, magga i ollu nga manono mu ay mappoffun ta Yamam ta langi. Ikagim kani Jehova i mamaganassing ira ta niko anna i pakavurungammu. Ipamavulu mu nga kibbidan anna banna-bannayan naka gukaban na Biblia. (Sal. 119:28) Baka makaleg ka tu espesipiko ira nga teksto onu libru na Biblia nga talaga makabannay ta niko nu maganassikka. Angngarigan na, mapagaram ka ta libru ira na Job, Salmo, anna Proverbio kunne na gapa ta kinagi ira ni Jesus ta Mateo kapitulo 6. Nu makimallo ka kani Jehova anna bibbigammu i Uvovug na, matageno mu i pamanna-bannay na.
17. Ta anni ittam nga makapattalo?
17 Makapattalo ittam nga duffunan ittam ni Jehova ta karigatan ira nga situasion. Ari na ittam vuluvuga nga pagurayan. (Sal. 23:4; 94:14) Ipromesa na nga tangngallan, patuyaggan, alalayan, anna banna-bannayan na ittam. Kagian na Isaias 26:3 meyannung kani Jehova: “Immugurammu danuri buu i pattalo da nikaw; iddammu ira tu tulu-tuloy nga imammo, megafu ta sikaw i pattalakkadda.” Yayya nga mattalo ka kani Jehova anna approbetchammu i usu-usan na ira tapenu duffunakka. Nu kuammu yatun, metoli i sikammu maski nu problemadu ka.
ANNI I TABBAG MU?
-
Ta anni nga situasion nga mas kawagattam i uffun ni Jehova?
-
Anni i appa nga kuan ni Jehova tapenu duffunan ittam ta problema tam?
-
Anni i kuattam tapenu duffunan ittam ni Jehova?
KANSION 12 Katannangan Ka, O Jehova
a Natalian i karuan nga ngagan.