I ORIHINAL nga lengguahe para ta uvovug nga ne-translate tu “karuahe” ta Biblia ay awayya na nga tumukoy ta nadduruma nga klase na karuahe. (King. 8:​28, 29, 38) Ngem posible nga mas dakal nga karuahe i nattakayan na ofisial nga taga-Etiopia kumpara ta baddi ira nga karuahe nga panggerra onu pangkarera. Yaw i karuan nga rason nu ngatta makagi tam yatun.

Atannang i posision na ofisial nga taga-Etiopia anna ararayyu i biniahe na. “Ingkargadu yaya ta ngamin nga kukua ni Candace nga reyna na Etiopia.” (King. 8:27) I Sudan anna i pinakazita nga parte na Egypt ta tiempo tam ay dati nga parte na Etiopia ta tiempo na Biblia. Maski nu awayya na nga ari laman tu tattadday nga karuahe i nattakayan natun nga lalaki ta interu nga pinabbiahe na, magga aru i bagahe na para tatun nga apaddu anna mabayag nga pabbiahe na. I tadday ta karuahe nga meyusu-usa ta ollu-siglo C.E. tapenu itakay i pasaheru ira ay i karuahe ira nga appa i lilli onu pilig na anna egga i takkag na. “Ta kunnatun nga karuahe, mas aru i metakay nga bagahe, mas komfortable i pabbiahe, anna makapabbiahe i totolay tu mas arayyu,” segun ta libru nga Acts—An Exegetical Commentary.

Mabbibbibbig i ofisial nga taga-Etiopia turi ta minaranni si Felipe ta nisa. Mabibbig ta Biblia nga “nakkara-karela [si Felipe] nga minaranni, ay naginna na tu maddaggun i ofisial nga mabbibbig ta libru ni Isaias.” (King. 8:30) Ari nga nadisenio nga makkaru tu paspas i karuahe ira nga meyusa ta pabbiahe. Megafu ta mas mabayag i karela na kunnatun ira nga karuahe, makua na ofisial nga taga-Etiopia i mabbibbig anna nadaddag yayya ni Felipe maski nu nakkarela laman yayya.

“Pinatakay [na ofisial] si Felipe anna pinagitubang na ta biko na.” (King. 8:31) Ta karuahe ira nga pangkarera, agga-taddag i mattakay tatun. Ngem ta karuahe ira nga meyusa ta pabbiahe, magga egga i pagitubangngan na ofisial nga taga-Etiopia anna ni Felipe.

Megafu ta detalye ira nga nakagi ta Kingngua kapitulo 8 anna ta history, masingan ta mas bagu ira nga publikasiottam sangawe nga agga-takay i ofisial nga taga-Etiopia ta mas dakal ira nga karuahe, ari nga ta karuahe ira nga panggerra onu pangkarera.