MAGIGIAMMU NGA ARTIKULO 4
KANSION 30 Yamà, Kofun, Anna Dios Ku
Iddeddu Naka ni Jehova
‘I Yafu ay minaggiddeddu.’—SANT. 5:11.
I MAGIGIAMMU TAM
Nu kunnasi nga megafu ta aya ni Jehova mas maddukko ittam ta nisa anna matageno tam tu safe ittam, matangngallan tu mapia, anna mabanna-bannayan.
1. Anni i maimajimmu nu nonopammu si Jehova?
PINURUEBAMMU ngana kari nga imajinan nu anni i itchura ni Jehova? Nu makimallo ka ta nisa, anni i manonono mu? Maski nu ari tam nga masingan si Jehova, madduruma i deskripsion na Biblia ta nisa. Nagalan si Jehova nga “bilag anna kalatag” anna i “afi nga mangufu.” (Sal. 84:11, NW; Heb. 12:29) Dineskriba paga lagu yayya ni Ezekiel nga kagitta na tadday nga safiro nga batu, kumili-kili nga metal, anna mananawag nga rainbow. (Eze. 1:26-28) Megafu tatun ira nga deskripsion, awayya na tu fermi nga mappabbaw ittam kani Jehova onu baka umalinno i anningattam ta baggi tam.
2. Ngatta marigatan i karuan nga makiddukko kani Jehova?
2 Megafu ta ari tam masingan si Jehova, baka marigatan ittam nga kurugan nga iddeddu na ittam. Nononopan na karuan nga ari ira vuluvuga nga iddukan ni Jehova megafu ta nappasa-pasadda. Awayya na gare nga ari ira iniddu na yama da. Malippawa ni Jehova i kunnatun ira nga mataga-tageno tam anna i efekto natun ta nittam. Ngem tapenu moffunan na ittam, nipakannammu na i makakkasta nga personalidad na ta Uvovug na.
3. Ngatta gigiammuattam nakuan i aya ni Jehova?
3 I kapianan nga uvovug nga mangideskriba kani Jehova ay aya. Kagian na Biblia nga “i Dios ay aya.” (1 Juan 4:8) Ngamin nga kukukuan na ay megafu ta aya. Kuruga dakal anna masiki-sikan i aya ni Jehova, yatutta ipasingan na yatun maski tari ira ta ari mangiddu ta nisa. (Mat. 5:44, 45) Taw nga artikulo, gigiammuattam i meyannung kani Jehova anna ta aya na. Nu mas aru gare i mammuattam meyannung ta nisa, mas iddukattam yayya.
IDDEDDU ITTAM NI JEHOVA
4. Anni i efekto nikaw na pangiddu ni Jehova? (Innan gapa i letratu.)
4 ‘I Yafu ay minaggiddeddu.’ (Sant. 5:11) Ta Biblia, nikumpara ni Jehova i baggi na ta tadday nga minaggiddu nga yena. (Isa. 66:12, 13) Imajinammu i tadday nga yena nga ayatan anna tangngallan na i beybi na. Pagayaman na yayya ta takki na tapus malumamo na yayya nga kibbidan. Nu tumangi i ana na onu egga i mataki nisa, siguraduan na yena nga iyawa na i kawagan na ana na. Nu matakitan ittam gapa, makapattalo ittam ta aya ni Jehova. Nitura na salmista: “Nu aru i kavuru-vurungan na nono ku, i pamanna-bannem i mangiyawa ta pagayaya ku.”—Sal. 94:19.
“Nu kunnasi nga banna-bannayan na yena i ana na, banna-bannayattakamu gapa kanayun” (Innan i parapo 4)
5. Kunnasi ka nga mammakapia ta matalo nga aya ni Jehova?
5 Matalo si Jehova. (Sal. 103:8) Ayatan na lagapa ittam maski nu makkamali ittam. Namippiga nga tinakitan na nasion na Israel si Jehova. Ngem nipasiguradu na lagapa ta nira i mannanayun nga pangaya na. Kinagi na ta nira: “Nabbalikka tu nabalor ta paningakku, nedayaw ka, anna iniddu taka.” (Isa. 43:4, 5) Ari vuluvuga nga nanguli i aya na Dios. Kanayun ittam nga makapattalo tatun. Maski nu nakangngua ittam tu madammo ira nga liwa, ari ittam nga panawan ni Jehova. Nu mabbabawi ittam anna manoli ittam nisa, masingattam nga ari lagapa nanguli i pangaya na ta nittam. Nipasiguradu na nga “dakal i pamakoma na.” (Isa. 55:7) Mabibbig ta Biblia nga nu pakoman na ittam, ‘duttal nittam i banna-bannay nga maggafu ta Yafu.’—King. 3:19, 20.
6. Anni i magigiammu tam ta Zacarias 2:8 meyannung kani Jehova?
6 Bibbigan i Zacarias 2:8. Nikumpara ittam ni Jehova ta vukal na mata na. Sensitibo anna nabalor nga parte na baggi i mata. Gitta na kakkagian gafu ni Jehova: ‘I sinni laman nga manukkal nikamu, sikamu nga totolè, ay sinukkal na i nabalor niakan.’ Megafu ta iddukan ittam ni Jehova, sigga-sifu yayya ta mataga-tageno tam anna kakayà na ittam nga protektan. Matakitan yayya nu matakitan ittam. Makapakkomfiansa ittam gafu nga kiddawan yaw kani Jehova: “Nu kunnasi i pagimmugug mu ta matam, kunnatun gapa i pangiyegu mu niakan.”—Sal. 17:8.
7. Ngatta mawag nga kumbinsidu ittam nga iddeddu ittam ni Jehova?
7 Kayà ni Jehova nga mabbalikka tu kumbinsidu nga iddeddu naka. Ngem ammu na nga megafu ta nappasa-pasattam, awayya na tu nononopattam nu iddukan na kari ittam. Awayya na gapa tu egga ira i situasion sangawe nga mamadduda nittam nu ayatan ittam ni Jehova. Kunnasi ittam mabbalin tu kumbinsidu nga ayatan na ittam? Gigiammuattam i pangipasingan ni Jehova tu aya na kani Jesus, ta nazelugan ira, anna ta nittam ngamin.
KUNNASI NGA IPASA-PASINGAN NI JEHOVA I AYA NA?
8. Ngatta kumbinsidu si Jesus nga iddukan yayya na Yama na?
8 Si Jehova anna i Ana na i pinakamabayag nga nakkavulu ta interu uniberso. Ta binillion nga dagun nga pinakkavvulu da ta langi, nabbalin ira tu madukko anna talaga iniddu da i kataggi-tadday. Manawag nga kinagi ni Jehova i pangaya na kani Jesus ta Mateo 17:5. Puede nakuan nga kunnaw laman i ikagi ni Jehova, ‘Yayya i kuruga makapagayayya niakan.’ Ngem megafu ta kayà na nga makannammuattam nu kunnasi na nga ka-iddu si Jesus, inagalan na yayya nga ‘iddeddukakku nga Ana ku.’ Proud si Jehova kani Jesus anna ta sigga-paran nga pangiyawa na ta inango na. (Efe. 1:7) Ari gapa vuluvuga nga pinaddudan ni Jesus nga iddukan yayya na Yama na. Namippiga nga sigga-komfiansa nga kinagi na yatun.—Juan 3:35; 10:17; 17:24.
9. Anni nga uvovug i mangipasingan ta pangaya ni Jehova ta nazelugan ira? Ipakanawag. (Roma 5:5)
9 Nipasingan gapa ni Jehova i pangaya na para ta nazelugan ira. (Bibbigan i Roma 5:5.) Sifutan i uvovug na “niyaluvu.” Dineskriba yatun na tadday nga referensia bilang “mevuvvu ta nittam kagitta na pagagi na danum.” Fugurammu yatun nga pangiyilustra ta kadakal na pangaya ni Jehova para ta nazelugan ira! Ammu na nazelugan ira nga ‘iddeddukan ira na Dios.’ (Judas 1) Kunnaw gapa i nitura ni apostol Juan meyannung ta mataga-tageno da: “Innan nu i kadakal na pangaya na Yama nittam! Wan, kuruga dakal megafu ta mangagan ittam tu ána na Dios.” (1 Juan 3:1) Ngem danuri nazelugan laman kari i ayatan ni Jehova? Ari. Pinakurug ni Jehova nga ayatan na ittam ngamin.
10. Anni i kadakallan nga pangipasingan ni Jehova tu aya na para nikaw?
10 Anni i kadakallan nga pangipasingan ni Jehova tu aya na? I tavvu. Nerumu-ruma yatun nga pangipasingan tu aya! (Juan 3:16; Roma 5:8) Niyawa ni Jehova i iddeddu na nga Ana. Nipamavulu na nga matay yayya para ta ngamin nga totolay tapenu mapakoma i liwi-liwa tam anna mabbalin ittam tu kokkofun na. (1 Juan 4:10) Nu mas nga pannonopattam tu mapia i kadakal na nisakrifisio ni Jehova anna ni Jesus, mas malippawa tam i kadakal na pangaya da ta kada tadday ta nittam. (Gal. 2:20) Ari nga neyawa i tavvu megafu laman ta yatun i ikikkiddaw na hustisia ni Jehova. Regalu yatun nga neyawa megafu ta aya. Nipasingan ni Jehova i aya na para ta nittam gukaban na pangisakrifisio na ta pinakamabalor ta nisa—si Jesus. Nipamavulun ni Jehova nga mazziga-riga anna matay i Ana na para ta nittam.
11. Anni i magigiammu tam ta Jeremias 31:3?
11 Gitta na nagigiammu tam ta nappasa ira nga parapo, ari laman nga basta matageno ni Jehova i aya. Ikagi na gapa yatun. (Bibbigan i Jeremias 31:3.) Niyaranni ittam ni Jehova ta nisa megafu ta iddukan na ittam. (Ikumpara i Deuteronomio 7:7, 8.) Awan tu maski anni onu maski sinni nga makawayya nga mangigungay nittam ta aya na. (Roma 8:38, 39) Anni i matageno mu megafu tatun nga aya? Bibbigammu i Salmo 23, tapus innammu i efekto na aya anna panangngal ni Jehova kani David anna i efekto natun ta nittam ngamin.
ANNI I MATAGENO MU MEGAFU TA AYA NI JEHOVA?
12. Anni i pinakatema na Salmo 23?
12 Bibbigan i Salmo 23:1-6. I Salmo 23 ay tadday nga kansion nga mangikagi ta pakkomfiansa ta aya anna panangngal ni Jehova. Si David i nattura tatun nga salmo. Dineskriba na tatun i madukko nga relasion na ta Pastor na nga si Jehova. Ari vuluvuga nadduda si David nga mappegiya kani Jehova, anna kanayun yayya nga nattalo ta nisa. Ammu ni David nga ipasingan ni Jehova i aya na ta inaggaw nga pattolena. Ngatta kumbinsidu yayya tatun?
13. Ngatta kumbinsidu si David ta panangngal ni Jehova?
13 “Awan ngana tu awagak-ku.” Natageno ni David nga natangngallan yayya tu mapia megafu ta kanayun nga iyawa ni Jehova i ngamin nga mawag na. Magayayya gapa si David megafu ta kofun na si Jehova anna faboran na yayya. Yatutta kumbinsidu yayya nga maski anni paga i mesimmu ta mappange, magga kanayun nga iyawa ni Jehova i ngamin nga mawag na. Imbes tu mavurung si David, nattalo yayya ta aya anna panangngal ni Jehova nisa yatutta nabbalin yayya tu magayayya anna kontentu.—Sal. 16:11.
14. Kunnasi ittam nga ayatan anna tangngallan ni Jehova?
14 Ayatan anna tangngallan ittam ni Jehova jebi nu egga ira i marake nga mesimmu ta nittam. Maturu tu 20 dagun nga nasserbi ta Bethel si Claire. a Egga i tiempo nga natageno na tu awan tu makua na megafu ta natturunug i madammo nga problema ta unag na familia na. Na-stroke i yama na, na-disfellowship i wagi na nga babay, nalugi i negosio da, anna nawawwan i balay da. Kunnasi nga nipasingan i Jehova i aya anna panangngal na ta nira? Istorian ni Claire: “Siniguradu ni Jehova nga ari vuluvuga makkurang i familià ta kada aggaw. Mas aru paga i niyawa na anne ta mawag mi! Nononopakku yatun ira nga tiempo nga natageno ku i aya anna panangngal ni Jehova anna ari ku makattaman yatun. Danatun gare i nanguffun niakan tapenu magayayya lagapa nga masserbi kani Jehova maski egga ira i problema.”
15. Ngatta nassikan si David? (Innan gapa i letratu.)
15 “Iyawa na niakan i bagu nga sikan.” Egga ira i tiempo nga nakkafi si David megafu ta karu na problema na. (Sal. 18:4-6) Ngem nassikan yayya megafu ta aya anna panangngal ni Jehova nisa. Nigiya ni Jehova i nababbannag nga kofun na ta “kakaddattan” anna “malumamo ira nga danum.” Megafu tatun nassikan uli si David anna netulu-tuloy na i magayayya nga passerbi na.—Sal. 18:28-32.
Turi ta mappeppeligro i inango ni David, nassikan yayya megafu ta pangiddu anna panangngal ni Jehova ta nisa (Innan i parapo 15)
16. Kunnasi naka nga napasikan na aya ni Jehova?
16 Maski gapa nu napakaru i problema tam sangawe, ‘ari ittam paga nga napawan megafu ta matalo nga aya ni Jehova.’ (Sila. 3:22; Col. 1:11) Kunnatun i nappasan ni Rachel. Narigi-rigatan yayya turi ta pinanawan yayya na atawa na anna pinanawan gapa na atawa na si Jehova durante na COVID-19 pandemic. Anni i kingngua ni Jehova para ta nisa? Istorian na: “Siniguradu ni Jehova nga matageno ku tu egga ira i mangiddu niakan. Aru nga kokkofun i nakikavulu niakan, nangiyangay tu makan, nangikagi tu makapagaram ira nga mensahe anna teksto, nangngizzi niakan, anna kanayun nga mangiperaddam niakan nga tattangngallan nà ni Jehova. Kanayun ngà nga mappappabalo kani Jehova megafu ta niddan nà tu daka-dakal nga familia nga mangiddu niakan.”
17. Ngatta ‘awan vuluvuga tu ikassing’ ni David?
17 “Awan vuluvuga tu paganassingak-ku, ta egga ka nga mamulu-vulu niakan.” Mamippiga nga nappeligro i inango ni David anna napakaru i masikan nga kalaban na. Ngem megafu ta aya ni Jehova, natageno na nga protektadu yayya. Ammu ni David nga kavulu na si Jehova ta kada situasion anna yatun i namasikan ta nono na. Yatutta nikansion na: “Ta ngamin nga ikassing ku ay pinaliag nà” ni Jehova. (Sal. 34:4) Maski nu egga ira i tiempo nga kuruga maganassing si David, nalabanan na yatun megafu ta iddeddu yayya ni Jehova.
18. Kunnasi naka nga mapasikan na pangiddu ni Jehova nu maganassikka?
18 Iddeddu ittam ni Jehova maski nu meparubang ittam ta kappaganassing ira nga situasion. Kunnasi ittam nga pasikannan natun? Niyistoria na pioneer nga si Susi i natageno da na atawa na turi ta nappakamatay i ana da nga lalaki: “Nu egga i gavva nga trahedia nga mesimmu, kakkallo ka anna awan tu awayyam nga makua. Ngem megafu ta pangiddu ni Jehova ta nikami, natageno mi nga protektadu kami.” Kunnaw gapa i niyistoria ni Rachel nga nakagi ta nappasa ira nga parapo: “Egga i tadday nga gabi nga madaddammo i gakò. Mavuru-vurung ngà anna maganassing ngà. Ngem nitatangi ku i ngamin kani Jehova. Tatun mismu nga tiempo, natageno ku tu binanna-bannayan nà ni Jehova anna pinalappaw na i panageno ku, kagitta na kukukuan na tadday nga yena ta beybi na. Tapus, nekatrugan ngà ngana. Ari ku vuluvuga makattaman yatun.” Appa nga dagun nga nefuku i elder nga si Tasos megafu ta nammanaki yayya nga massuddalu. Kunnasi na nga natageno i pangiddu anna panangngal ni Jehova nisa? Istorian na: “Niyawa ni Jehova i ngamin nga mawag ku. Sossobra paga lagu i niyawa na. Yatun i mas namakkomfiansa niakan nga metalo ku i ngamin ta nisa. Inusa na gapa i espiritu na tapenu matageno ku lagapa i pagayayya maski nu makapakafi ta nono i diakku. Yatun i nangumbinsi niakan nga nu mas mattalo ngà kani Jehova, mas matageno ku i pangiddu na niakan. Yatutta nar-regular pioneer ngà maski egga ngà ta affukutan.”
MAKIDDUKKO KA TA MINAGGIDDEDDU NGA DIOS MU
19. (a) Anni i efekto na aya na Dios ta pakimallo tam ira? (b) Anni i pinakakayà mu nga deskripsion na aya ni Jehova? (Innan i kahon nga “ Teksto ira nga Mangipatageno tu Iddeddu Ittam ni Jehova”)
19 Pinakurug na ekspiriensa ira nga ginigiammu tam nga kavulu tam “i Dios nga minaggiddu” nga si Jehova. (2 Cor. 13:11) Interesadu yayya ta kada tadday ta nittam. Kumbinsidu ittam nga ‘ari manguli i pangaya na’ ta nittam. (Sal. 32:10) Nu mas pannonopattam i pangipasingan na ta aya na ta nittam, mas mabbalin yayya tu kuru-kurug ta nittam anna mas maddukko ittam ta nisa. Ari ittam gapa vuluvuga mabbabang nga umaranni ta nisa anna ikagi nga talaga kawagattam i pangaya na. Meyistoria tam gapa ta nisa i ngamin nga pakavurungattam megafu ta siguradu ittam nga malippawa na ittam anna kakayà na ittam nga uffunan.—Sal. 145:18, 19.
20. Ngatta maddukko ittam kani Jehova megafu ta aya na?
20 Kakayà tam i umaranni ta patu na afi nu malallamming i tiempo. Kakayà tam gapa nga umaranni kani Jehova megafu ta mapapatu i pangaya na. Masiki-sikan i aya ni Jehova anna iddeddu na ittam. Yatutta alawatammu nakuan i mapapatu nga pangaya ni Jehova nikaw. Paray nakuan ta yaw gapa i ikagi tam ta nisa: “Ayatak-ku i YAFU” nga Jehova!—Sal. 116:1.
ANNI I TABBAG MU?
-
Kunnasim nga ideskriba i aya ni Jehova?
-
Ngatta kumbinsidu ka nga iddeddu naka ni Jehova?
-
Anni i matageno mu megafu ta aya ni Jehova?
KANSION 108 I Matalo nga Aya na Dios
a Natalian i karuan nga ngagan.