1. Ngatta maganassing ittam nu karuan?

 MAGANASSING ittam ngamin nu karuan. Siempre, megafu ta pinaggigiammu tam tu Biblia, ari ittam ngana maganassing ta natay, ta demonio ira, onu ta mesimmu ta mappange. Ngem mattotolay tam pagalaman ta “kanninipang” nga tiempo, nu sitaw egga i gerra, krimen, anna taki. (Luc. 21:11) Awayya na gapa tu maganassing ittam ta totolay, kasali tatun i gobiernu ira nga manattazzi nittam onu maski paga lagu i kafamilia tam ira nga kumontra ta kurug nga paddayaw. Mavuru-vurung i karuan nga baka ari da makayanan i maddaggun nga kapurueba da onu i kapurueba ira ta mappange.

2. Anni i situasion ni David ta Gat?

² Egga ira i tiempo nga naganassing si David. Angngarigan na, turi ta ikaya yayya nga patayan ni Patul Saul, nattammang yayya ta siudad na Filisteo ira ta Gat. Turi kua, nammuan ni Patul Akis na Gat nga si David bi yuri i minakkigerra nga “rinivu-rivu” i pinatay na nga Filisteo. Megafu tatun, “fermi i paganassing” ni David. (1 Sam. 21:​10-12) Mavurung yayya ta kuan ni Akis nisa. Kunnasi nga nalabanan ni David i paganassing na?

3. Base ta Salmo 56:​1-3, 11, kunnasi nga nalabanan ni David i assing na?

³ Ta Salmo 56, nikagi ni David i mataga-tageno na habang egga yayya ta Gat. Nipakanawag na tatun nu ngatta maganassing yayya anna nu kunnasi na nga nalabanan yatun. Turi ta naganassing si David, nammakatalo yayya kani Jehova. (Bibbigan i Salmo 56:​1-3, 11.) Ari yayya nakkamali ta nattalakkan na. Ta uffun ni Jehova, nakanono si David tu nerumu-ruma ngem efektibo nga istratehiya: Nagappappe yayya nga maguyung! Megafu tatun, ari yayya nga pinatay ni Akis. Pinapanaw na ngana laman yayya, yari tu nakatammang yayya.—1 Sam. 21:13–22:1.

4. Kunnasi tam mapasikan i pattalo tam kani Jehova? Mangiyawa tu angngarigan.

 ⁴ Malabanattam gapa i assing gukaban na pattalo kani Jehova. Ngem kunnasi tam mapasikan i pattalo tam kani Jehova, netallugaring nu maganassing ittam? Nonopan yaw nga situasion. Nu nammuammu nga egga i taki mu, baka maganassikka ta ollu na. Ngem malabanammu yatun nga assing mu nu mattalo ka ta doktor mu. Awayya na tu aru ngana i noffunan na nga pasiente nga kaparehas na taki mu. Ginnan naka tu mapia durante nga ipakanawag mu i paganassingammu ira anna talaga matageno mu nga ikavurungan naka. Awayya na gapa tu mangikagi yayya tu papporu nga efektibo ta aru nga pasiente na. Kunnatun gapa ta pattalo tam kani Jehova. Mapasikattam yatun gukaban na paggigiammu tam ta nakua na ngana, ta maddaggun nga kukukuan na, anna ta kuan na para nittam ta mappange. Yatun i kiningngua ni David. Durante nga gigiammuattam i karuan nga nakatura ta Salmo 56, pannonopan nu kunnasim gapa mapasikan i pattalo mu kani Jehova anna malabanan i assing mu.

ANNI NGANA IRA I NAKUA NI JEHOVA?

5. Anni i pinannonopan tu mapia ni David tapenu malabanan na i assing na? (Salmo 56:​12, 13)

⁵ Turi ta mappeppeligro i inango ni David, agga-nono na i nakua ngana ira ni Jehova. (Bibbigan i Salmo 56:​12, 13.) Kunnatun i kingngua ni David ta interu nga pattolena. Angngarigan na, pinannonopan na tu mapia i pinaratu ira ni Jehova. Danatun i nangipanono ta nisa nga si Jehova i pinakamakapangngua anna iddeddukan na i pinaratu na ira. (Sal. 65:​6-9) Pinannonopan gapa tu mapia ni David i nakua ira ni Jehova para ta tanakuan. (Sal. 31:19; 37:​25, 26) Mas gapa nga pinannonopan na i nakua ngana ira ni Jehova para nisa. Inuffunan yayya ni Jehova anna prinotektan na yayya namegafu ta kabbinna. (Sal. 22:​9, 10) Megafu tatun nga pannonono na, siguradu nga mas nattalo yayya kani Jehova!

6. Nu maganassing ittam, anni i makaduffun tapenu mattalo ittam kani Jehova?

⁶ Nu maganassikka, iyavu mu ta baggim, ‘Anni ngana ira i nakua ni Jehova?’ Nonopammu i pinaratu na ira. Angngarigan na, ‘innattam’ tu mapia i mammanu anna i lappaw  ira. Tattangngallan ira ni Jehova maski nu ari mabba ira nga naparatu ta imahe na anna ari da yayya nga medayaw. Megafu tatun, mas mattalo ittam nga tangngallan gapa ittam ni Jehova. (Mat. 6:​25-32) Gigiammuammu gapa nu anni i kiningngua ni Jehova para ta maddayaw ira nisa. Awayyam nga gigiammuan i tadday nga karakter na Biblia nga nangipasingan tu nerumu-ruma nga pangurug, onu awayyam mabbibbig tu ekspiriensa na aripan ira ni Jehova ta kaggawattam. a Pannonopammu gapa tu mapia nu kunnasi naka nga sinangngallan ni Jehova. Kunnasi naka inuffunan nga mammuan i kinakurug? (Juan 6:44) Kunnasi na nga sinabbag i pakimallo mu ira? (1 Juan 5:14) Kunnasi ka nga mabbenefisio ta kadaggaw megafu ta sakrifisio na iddeddukan na nga Ana?—Efe. 1:7; Heb. 4:​14-16.

7. Kunnasi nga nakoffun kani Vanessa i ekspiriensa ni profeta Daniel?

⁷ Neparubang ta kappaganassing nga situasion si Sister Vanessa b nga taga-Haiti. Egga i kalugaran na nga inaggaw nga makatatawag anna makatete-text nisa. Pilitan yayya natun nga lalaki nga maki-sex ta nisa. Ngem manaki ni Vanessa. Nabbalin tu agresibo yatun nga lalaki anna inananassing na paga lagu yayya. “Maganassing ngà,” kinagi na. Kunnasi nga nalabanan ni Vanessa i assing na? Kiningngua na i mawayya na tapenu maprotektan i baggi na. Tadday nga elder i nanguffun ta nisa tapenu mereport yatun ta pulis. Naffokus gapa yayya ta papprotekta ni Jehova ta aripan na ira ta nappasa. Istorian ni Vanessa, “I ollu nga nanono ku ay si profeta Daniel. Netabbo yayya ta avvu na mabisi-bisin ira nga leon maski nu awan tu nakaliwatan na. Ngem sinangngallan yayya ni Jehova. Nakimallo ngà kani Jehova nga yayya ngana i bahala ta nio. Kabalin natun, ari ngà ngana nga maganassing.”—Dan. 6:​12-22.

ANNI I KUKUKUAN NI JEHOVA SANGAWE?

8. Ta anni nga kumbinsidu si David? (Salmo 56:8)

⁸ Maski nu fermi nga nappeligro i inango ni David ta Gat, ari yayya naffokus ta gannug ira nga mamaganassing ta nisa. Naffokus lallagu yayya ta kukukuan ni Jehova para nisa tatun nga tiempo. Ammu ni David nga igigiya anna popprotektan yayya ni Jehova anna malippawa na i mataga-tageno na. (Bibbigan i Salmo 56:8.) Suportadu gapa si David na matalo nga kokkofun na kagitta ni Jonatan, anna na Atannang nga Pari nga si Ahimelec nga nanguffun nisa ta praktikal. (1 Sam. 20:​41, 42; 21:​6, 8, 9) Maski nu igato yayya nga patayan ni Patul Saul, nakatammang yayya. Kumbinsidu yayya nga ammu ni Jehova i mesissimmu anna i efekto natun ta nisa.

9. Anni i sifi-sifutan ni Jehova ta kada tadday ta nittam?

⁹ Nu meparubakka ta kapurueba nga mamaganassing niko, daddammammu nga ammu ni Jehova i kapuruebam anna i mataga-tageno mu megafu tatun. Angngarigan na, nasifutan ni Jehova ari laman i nikamaltratu na Israelita ira ta Ehipto, nu ari lagu, pati ‘i taka-taki nga nidaga-ragidda.’ (Ex. 3:7) Nikansion ni David nga parehu nga nasingan ni Jehova i “ziga-riga” anna i “avvuru-vurung” na. (Sal. 31:7) Turi ta nazziga-riga i totolay na Dios maski paga resulta yatun na marake nga desisiodda, ‘namazziga yatun ta nisa.’ (Isa. 63:9) Nu maganassikka, malippawa ni Jehova i mataga-tageno mu anna kakayà naka nga uffunan tapenu malabanammu i assing.

10. Ngatta kumbinsidu ka nga sisifutan naka ni Jehova anna uffunan naka ta kapuruebam?

 ¹⁰ Nu egga i kappaganassing nga kapurueba nga ara-arubangammu, baka ari mu masingan i panguffun ni Jehova ta niko. Anni i puedem nga kuan? Kiddawammu ta nisa nga masingammu i panguffun na. (2 Pat. 6:​15-17) Tapus pannonopammu yaw: Napasikakka ngana kari ta tadday nga palappa onu komento ta study? Napagaram ka ngana kari ta tadday nga artikulo, video, onu orihinal nga kansion? Egga ngana kari i nangi-share ta niko tu nagigiammu na onu teksto nga makapasikan ta nono? Baka tagilappawattam i minaggiddu nga pawwaragi tam anna i espiritual nga makan nga malalawa tam. Ngem nerumu-ruma yatun nga regalu naggafu kani Jehova. (Isa. 65:13; Mar. 10:​29, 30) Pakurugan danatun nga ikavurungan naka. (Isa. 49:​14-16) Pakurugan gapa danatun nga mepangngo yayya ta pattalo mu.

11. Anni i nakoffun kani Aida tapenu labanan i assing na?

¹¹ Inobserba ni Aida nga taga-Senegal nu kunnasi yayya nga inuffunan ni Jehova turi ta napurueban yayya. Megafu ta yayya i kaka nga ana, ekspektan na magana na nga mattrabahu yayya tapenu mapeggan yayya tu makalanno nga kuartu nga passuporta ta baggi na anna ta magana na. Ngem turi ta pinasimple na i pattolena tapenu makapappayunir, namroblema si Aida ta finansial. Napporay i familia na anna nivuya da yayya. Istorian na: “Naganassing ngà ta baka ari ku ngana maduffunan i magana ku anna ikalussodà saw ngamin. Pinaliwa ku paga lagu si Jehova megafu ta nipamavulu na nga fermi nga mazziga i situasiommi.” Tapus egga i palappa nga naginna na ta study. “Nipanono ta nikami na ispiker nga ammu ni Jehova i ngamin nga bigag ta futu tam. Megafu ta tabarang na elder ira anna na tanakuan, nepasiguradu ta nio nga iddukan nà ni Jehova. Gafu gapa tatun, mas nga nakimallo ngà ngana kani Jehova. Habang masingakku nga tattabbagan na i pakimallo ku ira, natageno ku i nerumu-ruma nga imammo.” Ta pappasa na tiempo, nakaleg gabbalaman si Aida tu trabahu nga passuporta ta pappayunir na anna nakeyawa gapa yayya tu finansial nga uffun ta magana na anna ta tanakuan. Istorian na: “Nagigiammù nga italo i ngamin kani Jehova. Sangawe, kada  makimallo ngà, matageno ku nga mawawan i assikku.”

ANNI I KUAN NI JEHOVA TA MAPPANGE?

12. Base ta Salmo 56:​9, ta anni nga makkomfiansa si David?

¹² Bibbigan i Salmo 56:9. Taw nga versikulo, mabibbig tam i nakoffun paga kani David tapenu malabanan na i assing na. Maski nu mappeppeligro i inango na, pinannonopan na tu mapia i kuan ni Jehova para ta nisa. Ammu ni David nga ipaliag yayya ni Jehova ta fustu nga tiempo. Si Jehova mabba gare i nangikagi nga si David i mabbalin tu tumunug nga patul na Israel. (1 Sam. 16:​1, 13) Para kani David, anni laman nga nipromesa ni Jehova ay gitta na natuppal ngana.

13. Anni i siguradu nga kuan noka ni Jehova?

¹³ Anni i nipromesa ni Jehova nga kuan na para niko? Ari tam ekspektan nga ililli na ittam ta ngamin nga problema. c Ngem daddammattam nga anni laman i kapurueba tam sangawe, pawanan yatun ni Jehova sonu napabagu nga mundo. (Isa. 25:​7-9) Makapangngua-ta-ngamin i Namaratu ta nittam, yari tu siguradu nga mawayya na nga paginnolayan i natay, pammapian ittam, anna pawanan i ngamin nga kumokkontra.—1 Juan 4:4.

14. Anni ira i awayya tam nga pannonopan tu mapia?

¹⁴ Nu maganassing ka, pannonopammu tu mapia i kuan ni Jehova ta mappange. Nonopammu i matageno mu sonu awan ngana si Satanas, sonu mapawan ngana ngamin i marake anna matunung laman i mabattang, anna sonu sisinu nga mawawan ta kadaggaw i kina-imperfekto tam. Nepagiraw ta tadday nga demonstrasion ta 2014 nga rehional kombension nu kunnasi tam pannonopan tu mapia i iddanama tam. Nipakanawag na tadday nga yama ta familia na nga nu profesiya nakuan meyannung ta mesimmu ta Paraiso i 2 Timoteo 3:​1-5, kunnaw i mabibbig tatun: “Duttal noka ta napabagu nga mundo i kappagayayya ira nga tiempo. Ta i totolay noka ay minaggiddu, agga-nono da i espiritual nga ganna-gannug, ammu da i limitasiodda, minappakalinno, minaddayarayaw ta Dios, minakkimoray ta magana da, minappabalo, matalo, ayatadda i kafamilia da, kanayun nga kuadda i nipromesa da, kanayun nga makasta i kagiadda ta tanakuan, egga pangifugag da ta baggi da, malumamo, ayatadda i mapia, mapammakatalakkan, makonsiderasion, minaggiddu ta Dios anne ta pappaga-pagayayya, kurug nga debosion ta Dios i motibo da; anna makiddukko ka ta kuddanatun nga totolay.” Paggiristorian nu kari na kafamiliam onu kapangngurug mu nu kunnasi noka i pattolay ta napabagu nga mundo?

15. Kunnasi nga nilabanan ni Tanja i assing na?

¹⁵ Nalabanan ni Sister Tanja nga taga-North Macedonia i assing na gukaban na pannonono ta mappange ira nga bendision. Fermi i pangokkontra na magana na ta paki-Bible study na. Istorian na: “Karuan ira ta ikassikku nga mesimmu ay talaga nesimmu. Taka-takitan nà na yenà kada kabalin na study. Inananassing nà gapa na magana ku nga patayaddà nu mabbalin ngà tu Saksi ni Jehova.” Turi kua, napapanaw si Tanja ta baleda. Anni i kingngua ni Tanja? Istorian na: “Ninonono ku nga nu matalo ngà kanayun, magayayya ngà saw ta mannanayun. Ninono ku gapa nga maski anni i awayya na tu mawawakku taw nga mundo, talianan saw ni Jehova yatun tu bendision ta Paraiso anna makattamakku ngana saw i ngamin nga marake nga nesimmu.” Talaga ari nga winawwan ni Tanja i kinamatalo na. Ta uffun ni Jehova, nakaleg yayya tu paddianan na. Nakitawa  si Tanja ta tadday nga matalo nga brother anna sangawe, magayayya ira nga makkavulu ta ngamin-tiempo nga passerbi.

MAS PAGA NGA MATTALO KA KANI JEHOVA

16. Anni i makaduffun tapenu masikan i nono tam sonu mesimmu i Lucas 21:​26-28?

¹⁶ Sonu dakal nga ziga, “makkafi i nono na totolay megafu ta assing da.” Ngem matalo lagapa saw anna masikan i nono na totolay na Dios. (Bibbigan i Lucas 21:​26-28.) Ngatta awan ngana saw tu ikassittam? Tatun gare nga tiempo, sanay ittam ngana saw nga mattalo kani Jehova. Nakoffun bi i nappasa-pasan ira ni Tanja ta nappasa nga parapo tapenu marubanna i karuan paga nga mariga nga situasion. Istorian na: “Nagigiammù nga maduffunan ittam ni Jehova nga attamman i maski anni nga situasion anna bendisionan na ittam. Nu karuan, gitta na kontroladu na tanakuan i situasiottam. Ngem i kurug, mas kontroladu ni Jehova yatun. Maski gapa nu mariga i problema tam, egga lagapa saw i pagaddetan natun.”

17. Anni i meduffun na teksto tam ta dagun 2024? (Innan i letratu ta vungun.)

¹⁷ Aru sangawe i awayya na tu mamaganassing ta nittam. Ngem parigattam nakuan si David. Ari yayya nga nappaffu ta assing. I teksto tam ta dagun 2024 ay pakimallo ni David kani Jehova: “Nu i assing ay duttal niakan, sikaw i ek-ku pammakatalakkan.” (Sal. 56:3) Meyannung tatun nga versikulo, kagian na tadday nga iskolar na Biblia nga “ari tu agga-nono ni David i paganassingan na ira, ni tu i problema na ira. Agga-nono na lallagu i Manavvu nga mangipaliag ta nisa.” Agga-nono mu nakuan i teksto tam ta dagun ta tumunug ira nga vulan, jebi nu egga ka ta situasion ira nga kappaganassing. Nonopammu tu mapia i kingngua ira ni Jehova para niko ta nappasa, i kukukuan na ira sangawe, anna i kuan na noka ta mappange. Nu kuammu danatun, kagitta ni David, mekagim gapa: “Mammakatalo ngà ta Dios, awan tu assing ku vuluvuga.”—Sal. 56:4.