1. Ngatta i Memorial i pinaka-importante nga aggaw na dagun? (Lucas 22:​19, 20)

 PARA ta totolay ni Jehova, i Memorial na Patay ni Cristo i pinaka-importante nga aggaw na dagun. Yatun laman nga okasion i kinagi ni Jesus nga selebran na tagatuttul na ira. (Bibbigan i Lucas 22:​19, 20.) Aru i rasottam nu ngatta aba-abangattam i Memorial. Gigiammuattam i karuan tatun.

2. Anni i karuan nga rason nu ngatta aba-abangattam i Memorial?

² Ta Memorial, mapannonopattam i kabalor na tavvu. Iperaddam nittam natun nu kunnasi tam mepasingan i pappabalo ta sakrifisio ni Jesus. (2 Cor. 5:​14, 15) Chansa tam gapa yatun nga “makkapasa-pasikan” ta wawwaragi tam. (Roma 1:12) Kada dagun, aru nga inactive i magatende. Megafu ta aya anna pamagaram nga nalawa na karuan ta Memorial, napaguyu ira nga manoli kani Jehova. Aru gapa nga interesadu i napaguyu nga mappa-Bible study megafu ta nasingan anna naginna da. Megafu taw, talaga espesial i Memorial para ta nittam!

3. Kunnasi nga mapattaradday na Memorial i wawwaragi tam ta interu mundo? (Innan gapa i letratu.)

³ Nonopan gapa nu kunnasi nga pattaraddayan na Memorial i wawwaragi tam ta interu mundo. Ta interu mundo, maggarammammung i Saksi ira ni Jehova durante nga mesimmu i pallammag na bilag ta diadda. Makaginna ittam ngamin tu palappa nga mangipasigo ta kabalor na tavvu. Makkansion ittam tu dua nga kansion na pammadayaw, mepasa i pan anna i binarayang, anna napafutuan nga ikagi tam i “amen” ta appa ira  nga pakimallo. Ta unag laman na 24 nga oras, kunnatun nga unnug i tuttulan na ngamin nga kongregasion. Maimajimmu kari i pagayayya ni Jehova anna ni Jesus nu masingadda nga nattaradday ittam nga mangidayaw ta nira?

4. Anni i gigiammuattam taw nga artikulo?

⁴ Taw nga artikulo, tabbagattam yaw ira nga pakkiavu: Kunnasi tam meprepara i futu tam para ta Memorial? Kunnasi tam nga moffunan i tanakuan tapenu mammakapia tatun? Kunnasi tam gapa moffunan danuri inactive? Makoffun i tabbag tatun ira nga pakkiavu tapenu makaprepara ittam taw nga sagradu nga okasion.

KUNNASI TAM NGA MEPREPARA I FUTU TAM PARA TA MEMORIAL?

5. (a) Ngatta pannonopattam i kabalor na tavvu? (Salmo 49:​7, 8) (b) Anni i nagigiammum ta video nga Ngatta Natay si Jesus?

⁵ I tadday ta pinaka-importante nga makua tam tapenu meprepara i futu tam para ta Memorial ay i pannono tam ta balor na sakrifisio nga tavvu ni Jesu-Cristo. Nu sittam laman, awan vuluvuga tu makua tam tapenu matavvu i baggi tam ta liwa anna patay. (Bibbigan i Salmo 49:​7, 8; innan gapa i video nga Ngatta Natay si Jesus?) a Yari tu niyunnug ni Jehova nga matay si Jesus para ta nittam. Daka-dakal gafu i nisakrifisio ni Jehova anna ni Jesus. (Roma 6:23) Nu mas pannonopattam tu mapia i nisakrifisio ni Jehova anna ni Jesus para ta nittam, mas maappresia tam i tavvu. Gigiammuattam i karuan ta sigga-paran nga nisakrifisio ni Jehova anna ni Jesus ta pangiyawa da ta tavvu. Ngem ammuattam labbi i kawagan tapenu meyawa yatun.

6. Anni i kawagan tapenu meyawa i tavvu?

⁶ I tavvu ay balor nga mepaga tapenu matubus i tadday nga gannug. Perfekto i ollu nga tolay nga si Adan turi ta naparatu yayya. Ngem turi ta nakaliwa yayya, winawwan na i chansa nga mattolay tu mannanayun, ari laman tu para nisa, nu ari lagu, para ta ngamin nga ána na. Tapenu matubus onu metoli i nawawan ni Adan, nisakrifisio ni Jesus i perfekto nga inango na. Ta interu nga pinattolay ni Jesus ta davvun, “ari yaya vuluvuga nga nattagaruli anna ari vuluvuga nga nassiri-siri.” (1 Ped. 2:22) Turi ta natay si Jesus, napagan na perfekto nga inango na i eksakto nga kawagan tapenu matubus i inango nga winawwan ni Adan.—1 Cor. 15:45; 1 Tim. 2:6.

7. Anni i karuan ta kapurueba nga inarubang ni Jesus ta kegga na ta davvun?

⁷ Kanayun nga sinuttul ni Jesus i Yama na ta langi maski paga napakaru nga kapurueba i inarubang na ta kegga na ta davvun. Maski perfekto nga abbing si Jesus, mawag tu makimoray yayya ta imperfekto nga magana na. (Luc. 2:51) Bilang kabataan, mawag na nga labanan i pamipilit na tanakuan nga ari na tuttulan i magana na onu mabbalin tu ari nga matalo kani Jehova. Turi gapa ta adulto ngana si Jesus, sinenta yayya ni Satanas nga Diablo anna pinurueban na paga lagu i kinamatalo ni Jesus ta Dios. (Mat. 4:​1-11) Kakayà ni Satanas nga makaliwa si Jesus tapenu ari na nga meyawa i tavvu.

8. Anni paga ira nga kapurueba i inattamman ni Jesus?

⁸ Aru paga nga kapurueba i inattamman ni Jesus ta kegga na ta davvun. Pineppersigi da yayya anna pinuruebadda yayya nga patayan. (Luc. 4:​28, 29; 13:31) Mawag gapa tu pasensian na i pakkamalian na tagatuttul na ira. (Mar. 9:​33, 34) Ta kabista anna ta kasentensia na, zinigi-riga da yayya anna nigala-galo da. Tapus mataka-taki anna kappasiran i nikapapatay na. (Heb. 12:​1-3) Mawag gapa tu attamman  na mismu i ultimu nga kapurueba na megafu ta inalsa ni Jehova i pangiyegu na nisa. b—Mat. 27:46.

9. Anni i matageno tam ta pinassakrifisio ni Jesus? (1 Pedro 1:8)

⁹ Fermi i nikaziga-riga ni Jesus tapenu laman meyawa i tavvu. Nu nonopattam i ngamin nga sigga-paran nga nisakrifisio ni Jesus para ta nittam, magga mas ayatattam yayya.—Bibbigan i 1 Pedro 1:8.

10. Anni i sigga-paran nga nisakrifisio ni Jehova para ta tavvu?

¹⁰ Kunnasi gapa ta parte ni Jehova? Anni i sigga-paran nga nisakrifisio na tapenu meyawa ni Jesus i tavvu? Si Jehova anna si Jesus i pinakamadukko nga mattama. (Prov. 8:30) Imajinammu gafu i natageno ni Jehova turi ta attattamman ni Jesus i napakaru nga kapurueba ta davvun. Siguradu nga mataka-taki para nisa nga masingan i Ana na nga mapammanakitan, mamaltratu, anna mapurueban.

11. Anni i natageno ni Jehova ta nikapatay ni Jesus? Mangusa tu angngarigan.

¹¹ Ammu na maski sinni nga magana nga natayan tu ana i fermi nga daddam nga efekto na kunnatun nga trahedia. Maski masikan i pangurug tam ta paginnolay, ari natun nga malsa i daddam nga matageno tam nu matayan ittam. Makoffun yatun nga angngarigan tapenu malippawa tam nu kunnasi kataki para kani Jehova nga masingan i iddeddukan na nga Ana nga mazziga-riga anna matay turi ta Nisan 14, 33 C.E. c—Mat. 3:17.

12. Anni ira i makua tam habang aba-abangattam i Memorial?

¹² Habang aba-abangattam i Memorial, awayya tam nga i-personal study onu gigiammuan ta Family Worship i meyannung ta tavvu. Usan i Research Guide for Jehovah’s Witnesses (nu available ta lengguahe nu) onu i karuan paga nga publikasiottam tapenu mammuan nu i mas aru nga detalye meyannung ta tavvu. d Siguraduammu gapa nga patuttulammu i iskediul na pabbibbig tu Biblia para ta Memorial ta Pattolay Anna Ministerio Tam nga Cristiano—Workbook ta Study. Ta aggaw gapa na Memorial, ari mu nakuan kattaman nga girawan i espesial nga programa na Morning Worship. Nu iprepara tam i futu tam para ta Memorial, magga moffunattam i tanakuan tapenu mammakapia gapa ira tatun.—Ezra 7:10.

 UFFUNAN I TANAKUAN NGA MAMMAKAPIA

13. Anni i ollollu nga kuattam tapenu moffunan i tanakuan nga mammakapia ta Memorial?

¹³ Kunnasi tam moffunan i tanakuan nga mammakapia ta Memorial? Siempre, mawag nga imbitattam labbi ira. Yatun i ollollu nga mawag tu kuattam. Fuera tari ira ta imbitattam ta teritoria tam, awayya tam ilista i kakilala tam ira nga puede tam imbitan. Kasali tatun i parientes tam, katrabahu, kaeskuela, anna tanakuan paga. Maski nu ari nga makalanno i ne-print nga kopia na imbitasiottam, i-send tam i link na imbitasion ta nira. Kattam laman gare makagi ngem baka aru i umay nira.—Ecl. 11:6.

14. Anni i efekto na personal nga pagimbita? Mangistoria tu ekspiriensa.

¹⁴ Ariammu tagibadditan i personal nga pangiyembitam para ta Memorial. Awayya na gare nga mas mapaguyu ira tatun tapenu magatende. Egga i tadday nga sister nga ari tu Saksi i atawa na. Nakaddag yayya turi ta kinagi na atawa na nga mevulu yayya ta Memorial. Ngatta nakaddagan i sister? Mamippiga na ngana gare yayya nga inimbita ngem manaki na i umay. Ngatta gafu ta kayà na ngana i umay? Kagian na atawa na: “Personal nga nembitan ngà.” Tapus niyistoria na nga tadday nga elder nga kakilala na i nagimbita ta nisa. Nagatende i atawa na sister tatun nga dagun anna ta tumunug paga ira nga dagun.

15. Anni nakuan i daddammattam nu magimbita ittam para ta Memorial?

¹⁵ Daddammammu nakuan nga awayya na tu egga i pakkiavu na nembitammu ira, mas ngana nu ari paga ira nga naka-atende ta study tam ira. Makasta gafu nu pannonopattam i awayya na tu iyavu da anna iprepara i tabbag tam tatun. (Col. 4:6) Angngarigan na, baka egga i makkiavu: ‘Anni i makua tatun?’ ‘Kunnasi kabayag yatun?’ ‘Anni i meyusa nga sinnun?’ ‘Egga kari i mapagan?’ ‘Egga kari i makolekta?’ Nu imbitattam i tadday ta Memorial, puede tam nga iyavu, “Egga kari i pakkiavu mu?” tapus tabbagattam nu egga i pakkiavu da. Awayya tam gapa nga usan i video ira nga Daddamman i Patay ni Jesus anna Anni Kukukuadda  ta Kingdom Hall? tapenu moffunan yatun nga tolay nga malippawa nu anni i kukukuattam ta study. Puede tam gapa nga i-share i makasta ira nga punto ta leksion 28 na libru nga Magayayya nga Mattolay tu Mannanayun!

16. Anni paga ira i awayya na nga iyavu danuri na magatende ta Memorial?

¹⁶ Kabalin na Memorial, baka aru paga i pakkiavu na interesadu ira nga first time da laman i magatende. Baka mattaka ira nu ngatta baddi laman onu awan paga lagu tu kiminan tu pan onu mininum tu binarayang. Baka nononopadda nu mamippiga ittam nga masselebra tu Memorial. Baka ikaya da gapa nga mammuan nu kunnatun kari lagapa i makua ta ngamin nga study na Saksi ira ni Jehova. Maski nu aru tatun i mepakanawag ta palappa ta Memorial, baka mawag na bagu laman ira nga nagatende i mas detalyadu nga pakanawag. Makoffun ta nittam i artikulo ta jw.org nga “Ngatta Tanakuan i Pangiselebra na Saksi ira ni Jehova ta Pamugag na Yafu Kumpara ta Karuan nga Relihion?” tapenu matabbag i karuan ta pakkiavu da. Ikaya tam nga kuan i adde na mawayya tam—nige, durante, anna kabalin na Memorial—tapenu moffunan nga mammakapia tatun nga selebrasion danuri “mepangngo nga mangalawa.”—King. 13:​48, NW.

UFFUNAN I INACTIVE IRA

17. Kunnasi nga moffunan na elder ira danuri inactive? (Ezekiel 34:​12, 16)

¹⁷ Ta tiempo na Memorial, kunnasi nga moffunan na elder ira danuri inactive? Ipasingammu nga ikavurungammu ira. (Bibbigan i Ezekiel 34:​12, 16.) Nige na Memorial, kuammu nakuan i adde na mawayyam tapenu bisitan onu tawagan ira. Ipasiguradum nakuan nga ikavurungammu ira anna ikaya mu ira nga uffunan. Imbitammu ira ta Memorial. Nu magatende ira, i-welcome mu ira. Kabalin na Memorial, bisitan onu tawagammu nakuan lagapa yatun ira nga meddu nga wawwaragi anna iyawa mu i anni laman nga espiritual nga uffun nga kawagadda tapenu manoli kani Jehova.—1 Ped. 2:25.

18. Kunnasi makoffun i ngamin ta inactive ira? (Roma 12:10)

 ¹⁸ Egga i makua na ngamin ta kongregasion tapenu moffunan i inactive ira nga nagatende ta Memorial. Ipasingattam nakuan nga ayatan anna irespeto tam ira, anna masippo nakuan i pattratu tam ta nira. (Bibbigan i Roma 12:10.) Daddammattam nakuan nga awayya na tu magalangan yaw ira nga meddu nga karneru nga makistudy uli. Awayya na gare nga maganassing ira ta makagi na wawwaragi nira. e Lillitammu gafu i makkiavu tu gannug ira nga mepasiranan ira onu makkagi tu makataki ta nira. (1 Tes. 5:11) Kapangngurug tam yaw ira nga wawwaragi. Magayayya ittam nga makavulu uli ira ta paddayaw!—Sal. 119:176; King. 20:35.

19. Kunnasi ittam mammakapia nu daddammattam i patay ni Jesus?

¹⁹ Pia ngana laman ta kinagi ni Jesus nga daddammattam i patena kada dagun anna ammu tam nga kuruga importante yatun. Nu magatende ittam ta Memorial, mammakapia ittam anna i tanakuan. (Isa. 48:​17, 18) Mas dumakal i aya tam kani Jehova anna kani Jesus. Mepasingattam i pappabalo tam ta kingngua da para ta nittam. Mas maddukko ittam ta wawwaragi. Moffunattam gapa i tanakuan nga maekspiriensa i bendision ira nga nabbalin tu posible megafu ta tavvu. Kuattam gafu i adde na mawayya tam tapenu makaprepara para ta Memorial—i pinaka-importante nga aggaw ta interu dagun!