Ziminakal i karuan ta kultura nu sitaw alinno i paningan na lallaki ta babbay. Angngarigan na, kinagi ni Hans nga circuit overseer ta Bolivia: “Ziminakal i karuan ta kultura nga macho, yayya nga matageno da nga mas atannang i lallaki anne ta babbay.” a Kinagi gapa ni Shengxian nga elder ta Taiwan: “Ta lugar mi, aru nga lallaki i mannono tu ari dapat makisali i babbay ta pabbirida da. Nu kinagi na lalaki i opinion na babay meyannung ta tadday nga gannug, awayya na tu alinno i paningan na barkada na nisa.” Pasimple gapa nga ireruma na tanakuan nga lallaki i babbay. Angngarigan na, mangikagi ira tu joke nga mangiyalinno ta babbay.

Pia ngana laman ta awayya nga manguli i tadday nga lalaki maski anni paga nga kultura i zinakallan na. Malabanan na i kunnatun nga panageno nga mas atannang i lallaki anne ta babbay. (Efe. 4:​22-24) Makua na yatun nu parigan na si Jehova. Mepakanawag taw nga artikulo i pattratu ni Jehova ta babbay, kunnasi nga maparigan na brother ira i pattratu ni Jehova ta babbay, anna nu kunnasi ipasingan na elder ira nga irespeto da i sister ira.

I PATTRATU NI JEHOVA TA BABBAY

Si Jehova i perfekto nga ehemplo na pattratu ta babbay. Minaggallallo yayya nga Yama anna iddukan na i ngamin nga ana na. (Juan 3:16) I matalo ira nga sister ay kagitta na meddu nga ána na nga babbay. Innattam nu kunnasi ipasingan ni Jehova i aya anna respeto na ta babbay.   

 Arian na ira ireruma. Pinaratu ni Jehova i lallaki anna babbay segun ta kasissinnan na. (Gen. 1:27) Arian na kingngua i lallaki nga mas ma-uto onu mas malalaki anne ta babbay. Ari na gapa faboran i lallaki anne ta babbay. (2 Cro. 19:7) Parefu gapa nga pinaratu na ira nga egga i abilidad da nga alippawatan i kinakurug ta Biblia anna parigan i makasta ira nga kualidad na. Parefu gapa nga appresian na i pangurug na lallaki anna babbay—maski nu iddanamadda i mattolay tu mannanayun ta paraiso nga davvun onu masserbi kunna patul anna papari ta langi. (2 Ped. 1:1) Manawag nga ari nga ireruma ni Jehova i babbay.   

Ginnan na ira. Ikakaya ni Jehova nga mammuan i mataga-tageno anna pakavurungan na babbay. Angngarigan na, gininna anna sinabbag na i pakimallo ira ni Rachel anna ni Hana. (Gen. 30:22; 1 Sam. 1:​10, 11, 19, 20) Nipetura gapa ni Jehova ta Biblia i meyannung ta lallaki nga nagginna ta babbay. Angngarigan na, sinuttul ni Abraham i kinagi ni Jehova nga ginnan na i atawa na nga si Sara. (Gen. 21:​12-14) Nagginna si Patul David kani Abigail. Kakurugan na, ammu na nga si Jehova i nangidog kani Abigail tapenu kibbidan yayya. (1 Sam. 25:​32-35) Nagginna si Jesus ta yena na nga si Maria megafu ta nala na yatun ta Yama na. (Juan 2:​3-10) Ipasingan naw ira nga angngarigan nga irespeto ni Jehova i babbay gukaban na pagginna ta nira.

Mattalo yayya ta nira. Angngarigan na, nattalo si Jehova kani Eva nga manguffun yayya ta panangngal ta interu davvun. (Gen. 1:28) Ta kunnatun nga kingngua ni Jehova, ipasingan na nga imammatan na si Eva nga ari tu mas alinno ta atawa na nga si Adan, nu ari, egga i meyuffun na ta nisa. Nattalo gapa si Jehova ta profetisa ira nga da Debora anna Hulda nga mangiyawa tu tabarang para ta totolay na, kasali i tadday nga hues anna patul. (Uk. 4:​4-9; 2 Pat. 22:​14-20) Ta tiempo tam gapa, italo ni Jehova ta Cristiano ira nga babbay i trabahu na. Massesserbi danatun nga matalo ira nga sister bilang publisher, payunir, anna misionero. Manguffun ira ta paddisenio, pamataddag, anna pammentena ta Kingdom Hall anna fasilidad ira. Egga ta Bethel i karuan ta nira anna i karuan gapa ta remote translation office. Danatun nga sister ay megitta ta dakal nga armada nga usu-usan ni Jehova tapenu metuppal i urena. (Sal. 68:11) Manawag gafu nga ari nga imammatan ni Jehova i babbay nga makafi onu awan tu meyuffudda.

KUNNASI NGA MAPARIGAN NA BROTHER IRA I PATTRATU NI JEHOVA TA BABBAY?

Brother ira, tapenu mammuattam nu paparigattam si Jehova ta pattratu ta sister ira, mawag tu sifutattam tu mapia i appana-panono anna agguyu-guyu tam. Ngem mawag tam i uffun. Nonopan yaw: Makoffun i X-ray machine tapenu mammuan nu anni i problema ta futu na tadday. Makoffun gapa ta nittam i mapia nga kofun anna i Uvovug na Dios tapenu mammuattam nu egga i negatibo nga mataga-tageno tam meyannung ta babbay. Anni i kuattam tapenu moffunan ittam?

Pakkiavutan i mapia nga kofun. (Prov. 18:17) Mappaduffun ittam ta mapammakatalakkan nga kofun nga masippo anna rasonable. Puede tam nga iyavu ta nisa: “Anni i makagim ta pattratù ta sister ira? Matageno da kari nga irespetò ira? Egga kari i awayyà paga nga makua tapenu mapakasta i pattratù ta nira?” Nu egga i suhestion na kofummu nga mawag paga nga kuammu, iwasammu i marrason. Ikagumammu nga magadjust.

Gigiammuan i Uvovug na Dios. Anni i kapianan nga makua tam tapenu makannammuattam nu makasta i pattratu tam ta sister ira? Mawag tu usattam i Uvovug na Dios tapenu masifutattam i appanono anna guyu-guyu tam. (Heb. 4:12) Ta paggigiammu tam tu Biblia, mabibbig tam i lallaki nga makasta i nipattratu da ta babbay anna i lallaki nga ari tu kunnatun i kingngua da. Tapus ikumpara tam i kingngua da ta kukukuattam. Makaduffun gapa nu pakkumparattam i teksto ira ta Biblia tapenu ari tam usan i teksto bilang passuporta ta mali nga pagimamma tam ta babbay. Angngarigan na, kinagi na Biblia nga i atawa nga babay ay ‘mekakua nga kunna mas  malaray nga banga.’ b (1 Ped. 3:​7, NW) Kebalinan kari naw nga mas alinno i babay, nga ari yayya kuruga bright onu maabilidad kumpara ta lalaki? Ari gapa! Ikumparam yatun nga kinagi ni Pedro ta nakagi ta Galacia 3:​26-29 nga pinili ni Jehova i babbay anna lallaki nga kavulu ni Jesus nga mammaguray ta langi. Nu gigiammuattam i Uvovug na Dios anna pakkiavutattam i mapia nga kofun meyannung ta makagi na ta pattratu tam ta babbay, magigiammu tam nga irespeto i sister tam ira.

KUNNASI IPASINGAN NA ELDER IRA NGA IRESPETO DA I SISTER IRA?

Makagigiammu i brother ira ta meddu ira nga elder nu kunnasi da nga irespeto i sister ira. Kunnasi nga mangipasingan tu ehemplo i elder ira? Innattam i karuan ta kukukuadda.

Komendadda i sister ira. Mapia nga ehemplo si apostol Pablo para ta elder ira. Egga ira i sister nga kinomendan na ta tura na ta Roma. (Roma 16:12) Maimajimmu kari i pagayayya nga natageno natun ira nga sister sa nebibbig ta kongregasion i tura ni Pablo? Kunnatun gapa i elder ira. Komendadda i sister ira megafu ta makasta ira nga ugali da anna ta kukukuadda para ta kani Jehova. Megafu tatun, matageno na sister ira nga kuruga merespeto anna maappresia ira. Awayya na tu i makapagaram ira nga uvovug na tadday nga elder i mismu nga kawagadda habang matalo ira nga masserbi kani Jehova.—Prov. 15:23.

Napafutuan anna espesipiko nakuan i komendasion na elder ira ta sister ira. Ngatta? Kinagi ni Sister Jessica: “Makasta nu kagian na brother ira ta sister i ‘mabbalo.’ Ngem mas appresiammi nu komendan nakami na brother ira ta espesipiko ira  nga kingngua mi, kagitta na panuddu ta ána mi tu magimammo ira ta study anna ta passakrifisio mi nga dagatan i Bible study mi tapenu maka-atende ta study.” Nu komendan na elder ira i sister ira ta espesipiko ira nga kukukuadda, matageno na sister ira nga mawag ira ta kongregasion.

Ginnadda i sister ira. Ammu na minappakalinno ira nga elder nga ari laman tu ira i egga i makasta tu suhestion na. Makkiavu i kuddanatun ira nga elder ta sister ira ta suhestiodda anna ginnadda ira tu mapia. Nu kuadda yatun, mapagaram da i sister ira anna ira mismu i mabenefisiowan. Kunnasi? Kinagi ni Gerardo nga tadday nga elder ta Bethel: “Kiddawakku i suhestion na sister ira tapenu mas nga makuà i trabahù. Maruddu gare nga mas nabayag ngana nga kingngua da i trabahu anne ta magaru nga brother ira.” Ta kongregasion, magaru nga payunir ay sister, yatutta kilalang-kilala da i totolay ta teritoria. Kinagi ni Bryan nga tadday nga elder: “Napakaru i makakkarasta nga ugali anna abilidad na sister ira nga kakawagan na organisasion. Approbetchammu gafu danatun!”

Ari insigida nga balewalaan na masirib ira nga elder i suhestion na sister ira. Ngatta? Kinagi ni Edward nga tadday nga elder: “Makaduffun ta brother i opinion anna ekspiriensa na tadday nga sister tapenu mas makomprendi na i ganna-gannug, anna magigiammu na gapa i makipattageno.” (Prov. 1:5) Maski ari paga meyusa na tadday nga elder i suhestion na sister, mappabalo lagapa yayya ta obserbasion na anna ta pangikagi na ta ammu na.

I-train da i sister ira. Maningan tu oportunidad i masirib ira nga elder tapenu sanayan i sister ira. Angngarigan na, awayya da ira tudduan nu kunnasi i mam-meeting for field service nu awan tu bawtisadu nga brother. Awayya da gapa nga sanayan ira nga magoperate tu tools onu makina ira tapenu makaduffun ira ta construction anna maintenance projects na organisasion. Ta Bethel, i-train na overseer ira i sister ta madduruma nga annungan, kagitta na maintenance, purchasing, accounting, computer programming, anna tanakuan paga. Nu i-train na elder ira i sister ira, ipasingadda nga imammatadda i sister ira nga makoffun anna mapammakatalakkan.

Usan na magaru nga sister i training nga nalawa da tapenu mabenefisiowan i tanakuan. Angngarigan na, usadda i training ta construction tapenu maduffunan i tanakuan nga mepataddag uli i babalay da kabalin na kalamidad. Usan na tanakuan nga sister i nagigiammu da ta public witnessing tapenu ma-train i mas aru paga nga sister. Anni i natageno na sister ira megafu ta pat-train na elder ta nira? Kinagi ni Sister Jennifer: “Ta nipattrabahù ta tadday nga Kingdom Hall construction project, ni-train nà tu mapia na tadday tu overseer. Nasingan na i trabahu nga kingnguà anna kinomendan nà tatun. Kakayà ku i makipattrabahu nisa megafu ta natageno ku nga egga i meduffukku anna pattalakkan nà.”

BENEFISIO NA PATTRATU TA SISTER IRA NGA KAGITTA NA FAMILIA

Iddeddu tam i matalo ira nga sister nga kagitta na pagiddu ni Jehova nira! Yatutta tratuattam ira tu kagitta na familia tam. (1 Tim. 5:​1, 2) Tagibalorattam ira anna magayayya ittam nga makipattrabahu ta nira. Fermi gapa i pagayayya tam nu matageno da nga ayatan anna suportattam ira. Kinagi ni Sister Vanessa: “Mappabalo ngà kani Jehova ta parte ngà na organisasion na. Aru nga brother i fermi nga namagaram nio.” Kinagi na sister ta Taiwan: “Mappabalo ngà megafu ta tagibaloran ni Jehova anna na organisasion na i babbay anna merespeto i panageno mi. Nalladda i pangurug ku megafu tatun anna mas naappresià nga parte ngà na organisasion ni Jehova.”

Siguradu nga proud si Jehova kada masingan na nga ikakkaguman na matalo ira nga brother nga iddukan anna irespeto i babbay kagitta na kukukuan na! (Prov. 27:11) “Ari nga irespeto na magaru nga lallaki i babbay taw ta mundo,” kagian ni Benjamin nga elder ta Scotland. “Yatun ta nu egga ira ta Kingdom Hall, ikaya tam ipatageno ta nira i nakkaduman na.” Kuattam nakuan i adde na mawayya tam nga parigan si Jehova. Ayatan anna irespeto tam nakuan i iddeddukattam ira nga sister.—Roma 12:10.