MAGIGIAMMU NGA ARTIKULO 4
KANSION 18 Mabbala-balo Megafu ta Tavvu
Anni i Ituddu Nittam na Tavvu?
“Nipasingan na Dios i pangaya na nittam.”—1 JUAN 4:9.
I MAGIGIAMMU TAM
I makasta ira nga kualidad ni Jehova nga Dios anna ni Jesu-Cristo nga ipasingan na tavvu.
1. Ngatta mammakapia ittam ta pagatende ta zinagun nga Memorial na patay ni Cristo?
SIGURADU nga umanugu ka tu nabala-balor nga regalu i tavvu! (2 Cor. 9:15) Megafu ta nisakrifisio ni Jesus i inango na, awayyam i mabbalin tu kofun ni Jehova nga Dios. Egga gapa i iddanamam nga matolay tu mannanayun. Aru gafu i rasottam nga mappabalo kani Jehova nga nangiyawa ta tavvu megafu ta pagiddu na ittam! (Roma 5:8) Tapenu mattalupaddian ittam nga minappabalo anna ari tam makattaman i kingngua ni Jehova anna ni Jesus para nittam, nidog ni Jesus nga magatende ittam ta zinagun nga Memorial na patena.—Luc. 22:19, 20.
2. Anni i gigiammuattam taw nga artikulo?
2 Sangawe nga dagun, iselebra tam i Memorial ta Sabadu, Abril 12, 2025. Siguradu nga ikaya tam ngamin i magatende tatun. Mas mabenefisiowan ittam ta tiempo na Memorial nu pannonopattam tu mapia i kingngua ni Jehova anna na Ana na para nittam. Taw nga artikulo, gigiammuattam nu anni i ituddu nittam na tavvu meyannung kani Jehova anna ta Ana na. Ta tumunug nga artikulo, mammuattam nu anni i bendisiottam ira megafu ta tavvu anna nu kunnasi tam mepasingan i pappabalo tam tatun.
I ITUDDU NITTAM NA TAVVU MEYANNUNG KANI JEHOVA
3. Kunnasi nga mapalubbangan i minillion nga totolay megafu ta patay na tadday? (Innan gapa i letratu.)
3 Ituddu nittam na tavvu i meyannung ta hustisia ni Jehova. (Deut. 32:4) Kunnasi? Nonopan yaw: Megafu ta ari nga pattuppal ni Adan, namana tam i liwa anna matay ittam gafu tatun. (Roma 5:12) Tapenu mapalubbangan ittam ta liwa anna patay, zinog ni Jehova si Jesus tapenu iyawa i baggi na bilang tavvu. Ngem kunnasi mapalubbangan i minillion nga totolay megafu ta sakrifisio na tadday nga perfekto nga tolay? Kinagi ni apostol Pablo: “Nu kunnasi i karu na nesipo nga nattagaruli megafu ta ari nga nipakimoray na tadday nga tolay [si Adan], kunnatun gapa i karu na mapakatunung nga totolay megafu ta pakimoray na tadday gapa nga tolay [si Jesus].” (Roma 5:19; 1 Tim. 2:6) Megafu ta ari pattuppal na tadday nga perfekto nga tolay, naaripan ittam na liwa anna patay. Yatutta tadday laman gapa nga minattuppal nga perfekto nga tolay i kawagan tapenu mapalubbangan ittam.
Tadday nga tolay i rason nu ngatta naaripan ittam ta liwa anna ta patay. Tadday gapa nga tolay i namalubbang ta nittam (Innan i parapo 3)
4. Ngatta ari nga nipamavulu ni Jehova nga mattolay tu mannanayun i minattuppal ira nga gaka ni Adan?
4 Talaga kari nga mawag tu matay si Jesus tapenu ipaliag ittam? Ngatta ari ngana laman nipamavulu ni Jehova nga mattolay tu mannanayun danuri minattuppal nisa maski nu gaka ira ni Adan? Nu para ta tolay, gitta na yatun i mepangngo nga solusion ta problema. Ngem nu i perfekto nga hustisia ni Jehova i mekonsidera, ari tu yatun i solusion. Nu kunnatun gare i kuan na, gitta na kinunsinti na i sadya nga ari pinattuppal ni Adan.
5. Ngatta makasiguradu ittam nga kanayun nga kuan ni Jehova i fustu?
5 Kunnasi nu nipamavulu ni Jehova nga mattolay tu mannanayun i imperfekto ira nga gaka ni Adan anna ari na ngana niyawa i tavvu? Anni tamma gapa i mesimmu nu ari nga sinuttul ni Jehova i sarili na nga estandarte ta fustu anna mali? Baka nonopan na totolay nga arianna mana saw tuttulan i estandarte na ta fustu anna mali ta karuan paga tu kuan na. Angngarigan na, baka paddudan na totolay nu tuppalan ni Jehova ngamin i nipromesa na. Ngem megafu ta kingngua ni Jehova nu anni i patas maski paga nu kawagan nga isakrifisio na i iddeddu na nga Ana, makasiguradu ittam nga kanayun nga kuan ni Jehova i fustu.
6. Anni i tanakuan nga kualidad nga ipasingan na tavvu? (1 Juan 4:9, 10)
6 Egga paga i kualidad nga namaguyu kani Jehova tapenu doban si Jesus bilang tavvu. Yatun i aya na ta nittam. (Juan 3:16; bibbigan i 1 Juan 4:9, 10.) Zinog ni Jehova i Ana na nga matay para ta nittam megafu ta ikaya na nga mattolay ittam tu mannanayun anna mabbalin ittam tu parte na familia na. Nonopan yaw: Turi ta nakaliwa si Adan, ari ngana yayya nga parte na familia ni Jehova. Megafu tatun, ta keyana tam pagalaman, ari ittam ngana gapa nga parte na familia ni Jehova. Ngem megafu ta tavvu, pakoman ni Jehova i liwi-liwa tam anna duttal saw i tiempo nga mabbalin tu parte na familia na i ngamin nga totolay nga mangurug anna mattuppal nisa. Fuera paga tatun, awayya tam i makiddukko kani Jehova anna ta wawwaragi sangawe. Talaga iddeddu ittam ni Jehova!—Roma 5:10, 11.
7. Ngatta mas malippawa tam i pagiddu ni Jehova megafu ta pazziga-riga ni Jesus?
7 Mas malippawa tam i pagiddu nittam ni Jehova nu ikonsidera tam i taki nga inattamman na Ana na tapenu meyawa i tavvu. Kagian ni Satanas nga awan tu aripan na Dios nga mattalupaddian tu matalo nu mariga nga kuan yatun. Tapenu pakurugan nga teko si Satanas, nipamavulu ni Jehova nga mazziga-riga si Jesus nige na nga matay. (Job 2:1-5; 1 Ped. 2:21) Nasingan mismu ni Jehova i panginsulto na totolay kani Jesus, i pallatigu na suddalu ira ta nisa, anna i pangipato da ta nisa ta kayu. Nasingan ni Jehova i mataka-taki nga nipappatay na iddeddu na nga Ana. (Mat. 27:28-31, 39) Angngarigan na, kinagi na manguyaw ira: “Innat-tam bi gafu ngay nu ikaya na Dios nga paliaran yaya!” Awayya nakuan nga kuan ni Jehova yatun. (Mat. 27:42, 43) Ngem nu kingngua na yatun, ari nga neyawa ni Jesus i inango na bilang tavvu anna awan nakuan tu iddanama tam. Yatutta nipamavulu ni Jehova nga mazziga-riga i Ana na adde ta matay.
8. Natakitan kari si Jehova turi ta nasingan na i Ana na nga mazziga-riga? Ipakanawag. (Innan gapa i letratu.)
8 Megafu kari ta si Jehova i makapangngua-sa-ngamin ay ari ngana yayya vuluvuga matakitan? Pinaratu ittam ni Jehova nga egga i panageno tam. Megafu ta pinaratu na ittam ta imahe na, kayà na vu kagian nga egga gapa i panageno ni Jehova. Kagian paga lagu na Biblia nga ‘naraddam’ anna ‘nallussaw’ yayya. (Sal. 78:40, 41) Nonopammu i nesimmu kani Abraham anna Isaac. Kinagi ni Jehova kani Abraham nga itavvung na i itatana nga ana na. (Gen. 22:9-12; Heb. 11:17-19) Magga naraddam si Abraham turi ta mapprepara yayya nga patayan i sarili na nga ana. Siguradu nga mas naraddam si Jehova turi ta masingi-singan na nga ziga-rigatan na totolay i Ana na anna turi ta pinateda yayya.—Innan ta jw.org i video nga Parigan i Pangurug Da—Abraham, Part 2.
Kuruga natakitan si Jehova turi ta nasingan na nga mazziga-riga i Ana na (Innan i parapo 8)
9. Anni i magigiammu tam ta Roma 8:32, 38, 39 meyannung ta aya ni Jehova?
9 Ituddu na tavvu nga kuruga ayatan ittam ni Jehova. Nu iddeddu naka na pinakamadukko nga kafamiliam onu kofummu, mas paga tatun i pagiddu ni Jehova nikaw. (Bibbigan i Roma 8:32, 38, 39.) Makasiguradu ittam gapa nga mas iddu ittam ni Jehova anne ta pangiddu tam ta baggi tam. Nu ikaya mu i mattolay tu mannanayun, mas nga ikaya ni Jehova. Nu ikaya mu nga mapakoma i liwi-liwa mu, mas nga ikaya ni Jehova. Ngem anni gapa i ikaya ni Jehova nga kuattam? Ikiddaw na laman nga ipappabalo tam i regalu na nga tavvu. Makua tam yatun nu mangurug anna mattuppal ittam ta nisa. I tavvu i kadakallan nga pamakurug nga iddeddu ittam ni Jehova. Sonu Paraiso, mas aru paga saw i magigiammu tam meyannung ta aya ni Jehova.—Ecl. 3:11.
I ITUDDU NITTAM NA TAVVU MEYANNUNG KANI JESUS
10. (a) Ngatta kuruga naraddam si Jesus ta patena? (b) Kunnasi nga nidefensa ni Jesus i ngagan ni Jehova? (Innan gapa i kahon nga “ Nidefensa ni Jesus i Ngagan ni Jehova ta Pabbalin Na tu Matalo.”)
10 Kuruga ikavurungan ni Jesus i nonopan na totolay meyannung ta Yama na. (Juan 14:31) Naakusan si Jesus nga kriminal anna ininsulto na kanu i Dios. Megafu tatun, kuruga maraddam yayya ta baka marake saw i nonopan na totolay meyannung ta Yama na. Yatutta nipakimallo na: “Ama, nu awayya na, ililli mà toye nga pazziga-riga ku!” (Mat. 26:39) Ngem megafu ta matalo si Jesus kani Jehova adde ta patena, pinakurug na nga laddug i kinagi ni Satanas meyannung ta Yama na.
11. Kunnasi nga nipasingan ni Jesus nga iddeddu na i totolay? (Juan 13:1)
11 Ituddu gapa na tavvu nga iddeddu ni Jesus i totolay, mas ngana i disipulo na ira. (Prov. 8:31; bibbigan i Juan 13:1.) Angngarigan na, ammu ni Jesus tu kuruga mariga i karuan nga annungan na taw ta davvun, mas ngana i mataka-taki nga kapatay na. Ngem kingngua kari laman ni Jesus danatun megafu ta yatun i nipakua ni Jehova nisa? Ari. Kingngua na yatun megafu ta iddeddu na i totolay. Nipasingan na yatun nga pangiddu na gukaban na pallayyagayya, panuddu, anna panguffun ta nira. Maski ta gabi nige nga natay si Jesus, binaggawan na i takki na apostoles na anna pinagaram anna binanna-bannayan na ira. (Juan 13:12-15) Turi ta agga-pato si Jesus, niddan na tu iddanama i kriminal ta biko na anna nitalo na kani Juan i panangngaw ta yena na. (Luc. 23:42, 43; Juan 19:26, 27) Ari laman gafu nipasingan ni Jesus tu iddeddu na i totolay gukaban na pangiyawa na ta inango na para ta nira. Nipasingan na gapa yatun maski ta pinattratu na ta nira.
12. Anni i kukukuan ni Jesus para nittam sangawe?
12 ‘Mittan laman nga natay’ si Jesus para nittam. Ngem adde ngana laman kari tatun i kingngua na? Ari. (Roma 6:10) Egga lagapa kukukuan na sangawe tapenu malawa tam i bendision ira nga nabbalin tu posible megafu ta tavvu. Anni ira i kukukuan na? Masserbi yayya bilang Patul tam, Atannang nga Pari, anna ulu na kongregasion. (1 Cor. 15:25; Efe. 5:23; Heb. 2:17) Irolluan na i pangammung ta nazelugan ira anna ta dakal nga ammung. Mabalin saw yatun nige nga mangultimu i dakal nga ziga. a (Mat. 25:32; Mar. 13:27) Siguraduan na gapa nga mapakan tu mapia ta espiritual i matalo ira nga aripan na taw nga pangurianan nga aggaw. (Mat. 24:45) Ta Marivu Dagun nga Pammagurena, tulu-tuloy yayya nga masserbi para ta nittam. Talaga niyawa ni Jehova i Ana na para nittam!
GIGIAMMUAN I ARU PAGA
13. Anni ira i kuammu tapenu mas aru paga i mammuammu meyannung ta aya na Dios anna ni Cristo para nittam?
13 Mas aru paga i mammuammu meyannung ta aya ni Jehova nga Dios anna ni Cristo Jesus para ta nittam nu kanayummu nga pannonopan tu mapia yatun. Ta tiempo na Memorial sangawe nga dagun, awayyam bibbigan tu mapia i Evanghelio. Ariammu pittanan nga bibbigan i napakaru nga kapitulo. Magimmakka anna innammu i karuan paga ira nga rason nu ngatta mawag tu ayatattam si Jehova anna si Jesus. Kuammu gapa i adde na mawayyam tapenu ibillay i nagigiammum.
14. Kunnasi nga makoffun i par-research tapenu mas aru i mammuattam meyannung ta tavvu anna ta tanakuan paga nga tuddu? (Salmo 119:97) (Innan gapa i letratu.)
14 Nu nabayag ka ngana ta kinakurug, baka manono mu nu egga kari paga i bagu ira nga magigiammum meyannung ta hustisia na Dios, ta aya na, anna ta tavvu. I kurug, egga la nga egga i bagu nga mammuattam tatun ira nga topiko. Anni gafu i kuammu? Gigiammuammu i publikasiottam ira. Nu egga i mabibbig mu ta Biblia nga ariammu kuruga malippawa, mar-research ka. Tapus ta interu aggaw, pannonopammu tu mapia i na-research mu anna nu anni i ituddu natun meyannung kani Jehova, ta Ana na, anna i pangaya da ta niko.—Bibbigan i Salmo 119:97.
Maski nu nabayag ittam ngana ta kinakurug, egga lagapa i makua tam tapenu mas maappresia tam i tavvu (Innan i parapo 14)
15. Ngatta ari ittam nakuan magimmang nga magaleg tu minas ta Biblia?
15 Ari ka nakuan magimmang maski nu ari ka paga nakaleg tu bagu onu makapa-interes ira nga minas kada mabbibbig ka tu Biblia onu mar-research ka. Nonopammu nga megitta ka ta tolay nga magaleg tu gold. Mawag na kunnatun nga tolay i aru nga tiempo nige na makaleg tu balabaddi nga gold. Ngem ari yayya magimmang magaleg megafu ta ammu na nga nabala-balor yatun maski kunnasi paga i kabaddi na. Mas nabalor i minas ira ta Biblia anne tatun nga gold! (Sal. 119:127; Prov. 8:10) Yatutta mappasensia ka nakuan anna tuttulammu i iskediul mu ta pabbibbig tu Biblia.—Sal. 1:2.
16. Kunnasi tam maparigan si Jehova anna si Jesus?
16 Ta paggigiammum, nonopammu nu kunnasim meyaplika danatun. Angngarigan na, parigammu i hustisia ni Jehova gukaban na patas nga pattratu ta tanakuan. Awayyam gapa parigan i pangaya ni Jesus ta Yama na anna ta tanakuan gukaban na sigga-paran nga pangngua ta ikaya ni Jehova anna panguffun ta tanakuan maski nu marigatan ittam nu mittan. Parigammu gapa si Jesus gukaban na pallayyagayya ta tanakuan tapenu egga i chansa da nga alawatan i nabalor nga regalu ni Jehova.
17. Anni i gigiammuattam ta tumunug nga artikulo?
17 Nu mas aru i mammuattam meyannung ta tavvu, mas iddukattam si Jehova anna i Ana na. Megafu tatun, mas iddukadda gapa ittam. (Juan 14:21; Sant. 4:8) Yatutta approbetchattam nakuan i probision ira ni Jehova tapenu mas aru paga i mammuattam meyannung ta tavvu. Gigiammuattam ta tumunug nga artikulo i bendisiottam ira megafu ta tavvu anna nu kunnasi tam mepasingan tu mappabalo ittam ta aya ni Jehova.
KANSION 107 I Nadiosan nga Panuttulan ta Aya
a I pangammung ta ‘ngamin nga pinaratu nga egga ta langi’ nga kinagi ni Pablo ta Efeso 1:10 ay tanakuan ta pangammung ta “totolay nga pinili na Dios” nga kinagi ni Jesus ta Mateo 24:31 anna Marcos 13:27. Tukuyan ni Pablo i tiempo nga pilian ni Jehova danuri makipammaguray kavulu ni Jesus gukaban na pangivuvvu nira tu masanto nga espiritu na. Tukuyan gapa ni Jesus i tiempo sonu naammung ngana ta langi i nabattang ira nga nazelugan ta davvun ta tiempo na dakal nga ziga.
