1. Anni i fokus na aru nga totolay sangawe?

 NAPANSIMMU kari nga aru nga totolay sangawe i nakafokus ta baggi da? Angngarigan na, usan na karuan i social media tapenu iparayag i baggi da anna nu anni i kukukuadda. Ngem baddi laman sangawe i mangiyawa tu dayaw kani Jehova nga Dios. Gigiammuattam taw nga artikulo i kebalinan na pangiyawa tu dayaw kani Jehova anna nu anni nakuan i mamaguyu nittam nga kuan yatun. Ammuattam gapa nu kunnasi tam nga meyawa ta Dios i dayaw nga mepangngo ta nisa anna nu kunnasi na nga idayaw i ngagan na ta mappange.

ANNI I KEBALINAN NA PANGIYAWA TU DAYAW KANI JEHOVA?

2. Kunnasi nga nipasingan ni Jehova i dayaw na ta Vukig Sinai? (Innan gapa i letratu.)

² Anni i dayaw? Ta Biblia, meyusa i uvovug nga “dayaw” ta maski anni nga gannug nga mamabbalin ta tadday nga tolay tu makapabbaw. Piga aggaw laman kabalin nga pinalawan ni Jehova i nasion na Israel ta Ehipto, nipasingan na ta nira nga maraya-rayaw yayya nga Dios. Imajinan i nesimmu: Minillion nga Israelita i naggarammammung ta gukag na Vukig Sinai tapenu ginnan si Jehova nga Dios da. Natakkabban na makannag nga kunam i vukig. Tapus kalanna nga nagatu i interu vukig. Nallunig gapa tu masikan, nakkili-kila, nagarugug, anna nakaginna ira tu kallitang nga guni na trumpeta. (Ex. 19:​16-18; 24:17; Sal. 68:8) Nonopan ngana laman i nikakaddag danatun nga Israelita turi ta nipasingan ni Jehova nga maraya-rayaw yayya.

3. Kunnasi tam meyawa kani Jehova i dayaw?

³ Ngem kumusta ittam gapa nga totolay? Talaga kari nga medayaw tam si Jehova? Wan! Kunnasi? Tadday ay gukaban na pangikagi ta tanakuan meyannung ta makapabbaw nga pakapangngua  na anna ta makasta ira nga kualidad na. Medayaw tam gapa yayya nu iyawa tam nisa i dayaw ta gannug ira nga metuppal tam ta uffun na. (Isa. 26:12) Makasta nga ehemplo si Patul David ta pangiyawa tu dayaw kani Jehova. Tagga ta nirollu na i pakimallo kavulu i nasion na Israel, kinagi na ta Dios: “Ta nikaw, O Jehova, i pabbaw anna i sikan anna i kasta anna i dayaw anna i gloria, ta kukuam i ngamin nga egga ta langi anna ta davvun.” Kabalin na pakimallo ni David, “zinayaw na interu kongregasion si Jehova.”—1 Cro. 29:​11, 20.

4. Kunnasi nga nidayaw ni Jesus si Jehova?

⁴ Ta kegga ni Jesus ta davvun, nidayaw na si Jehova gukaban na pangikagi ta totolay nga Yayya i nangiyawa ta pakapangngua na nga mammilagro. (Mar. 5:​18-20) Nidayaw paga ni Jesus i Yama na gukaban na pangikagi na meyannung Nisa anna ta pattratu na ta tanakuan. Mittan, nattuddu si Jesus ta sinagoga. Maggigginna gapa tatun i tadday nga babay nga 18 ragun ngana nga ziga-rigatan na demonio. Megafu tatun, arianna vuluvuga nga matunung i baggi na ta naddungkug onu fermi i pinadduku na. Talaga kakkallo yayya! Ta allo ni Jesus, inarannian na yatun nga babay anna masippo na nga kinagi: “Mammapia ka ngana!” Tapus nipotun ni Jesus i lima na ta babay anna insigida nga nattunung i baggi na babay. Megafu tatun, “naddayaw yaya ta Dios” ta netoli i makasta nga gawa-gawayyan anna i dignidad na! (Luc. 13:​10-13) Mepangngo laman nga idayaw natun nga babay si Jehova. Kunnatun ittam nakuan gapa.

ANNI I MAMAGUYU NITTAM NGA IDAYAW SI JEHOVA?

5. Ngatta mawag tu irespeto tam si Jehova?

⁵ Idayaw tam si Jehova megafu ta kuruga irespeto tam yayya. Aru i rason nu ngatta irespeto tam si Jehova. Angngarigan na, makapangngua-sa-ngamin si Jehova. Awan tu limitasion na pakapangngua na. (Sal. 96:​4-7) Masingan ta pinaratu na ira nga monag i sirib na. Yayya i Paggafuan na inango tam anna iyayawa na i kawagattam ira tapenu matolay. (Nep. 4:11) Matalo yayya. (Nep. 15:4) Mavviktoria i ngamin nga kukukuan na anna kanayun na nga tuppalan i promesa na ira. (Jos. 23:14) Yari ta kinagi ni profeta Jeremias meyannung kani Jehova: “Awan vuluvuga tu kagittam ta ngamin nga masirib ta nasa-nasion anna ta ngamin nga pappatuladda”! (Jer. 10:​6, 7) Aru gafu i rasottam nga irespeto i nelangitan nga Yama tam. Ngem ariattam laman nga irespeto si Jehova. Iddu tam gapa yayya.

6. Ngatta iddukattam si Jehova?

⁶ Idayaw tam si Jehova megafu ta iddeddu tam yayya. Iddu tam si Jehova megafu ta aru nga makakkarasta nga kualidad na. Minangngikallo anna minangngikabbi yayya. (Sal. 103:13; Isa. 49:15) Nu matakitan ittam, matakitan gapa yayya. (Zac. 2:8) Dudduffunan na ittam nga makilala yayya anna mabbalin tu Kofun na. (Sal. 25:14; King. 17:27) Minappakalinno gapa yayya; ‘magubbaw yayya tapenu i langi anna davvun ay masingan na. Iyatannang na i paddian na mariga ira.’ (Sal. 113:​6, 7) Megafu taw ira nga rason, kayà tam nga idayaw i Dios tam.—Sal. 86:12.

7. Anni nga pribilehio i egga ta nittam?

⁷ Idayaw tam si Jehova megafu ta kayà tam nga makilala yayya na tanakuan. Aru i ari nga makannammu ta kinakurug meyannung kani Jehova. Ngatta? Nangiwara gare si Satanas tu kinaladdug ira meyannung kani Jehova anna aru nga totolay i nangurug tatun. (2 Cor. 4:4) Ininfluwensian ni Satanas i totolay ira nga nonopan nga si Jehova ay maporay, awan tu allo na, anna yayya i makalliwa ta pazziga-riga ta  interu mundo. Ngem ammu tam i kinakurug meyannung ta Dios tam! Pribilehio tam nga ikagi ta tanakuan nu anni talaga nga klase na Dios yayya anna duffunattam i totolay nga dayawan gapa yayya. (Isa. 43:10) Nakafokus i Salmo 96 ta pangiyawa kani Jehova tu dayaw. Magigiammu tam taw nga Salmo nu kunnasi tam iyawa kani Jehova i dayaw nga mepangngo ta nisa.

KUNNASI TAM MEYAWA KANI JEHOVA I DAYAW NGA MEPANGNGO NISA?

8. Kunnasi tam medayaw si Jehova? (Salmo 96:​1-3)

⁸ Bibbigan i Salmo 96:​1-3. Medayaw tam si Jehova gukaban na kakkagiattam ira meyannung ta nisa. Ikagi nittam naw ira nga versikulo nga ‘makkansion ittam ta YAFU,’ ‘i ngagan na ay ettam idaya-rayaw,’ ‘i pamaliag na nittam ay ilammuyag tam,’ anna ‘ilammuyag tam ta nasa-nasion i dayaw na.’ Nu kuattam yatun ira, medayaw tam i nelangitan nga Yama tam. Ari nga nagalangan i matalo ira nga Judio anna i ollu-siglo ira nga Cristiano nga ikagi ta tanakuan i ngamin nga makasta nga gannug nga kingngua ni Jehova para ta nira anna idefensa i reputasion na. (Dan. 3:​16-18; King. 4:29) Kunnasi tam makua yatun?

9-10. Anni i magigiammum ta ekspiriensa ni Angelena? (Innan gapa i letratu.)

⁹ Ikonsidera i ekspiriensa ni Angelena a nga taga-United States. Magutu nga nidefensa na i reputasion ni Jehova ta kumpania nga pattrabahuan na. Turi ta bagu pagalaman yayya, nembitan yayya ta tadday nga miting kavulu i katrabahu na ira nga bagu gapa. Tatun nga miting, awayya da ikagi i meyannung ta baggi da. Yari tu nangiprepara si Angelena tu slideshow nga mangipasingan ta magayayya nga pattolena bilang Saksi ni Jehova. Ngem nige na paga nga mabbida, egga i katrabahu na nga lalaki nga nappakilala nga napadakal ta Saksi nga magana. Tapus nakkagi yatun nga lalaki tu marake ira meyannung ta nittam nga Saksi anna ta kurugattam ira. Kinagi ni Angelena: “Maggudu-gudu ngà. Ngem kinagì ta baggì: ‘Pagurayakku laman kari tu mangikagi yayya tu kinaladdug meyannung kani Jehova? Mawag tu idefensà si Jehova!’”

¹⁰ Turi ta nabalin ngana nabbida i katrabahu na, insigida nga nakimallo si Angelena. Tapus masippo nga kinagi na sa: “Parehas itta. Napadakal ngà gapa ta familia na Saksi anna Saksi ngà lapa adde sangawe.” Maka-stress  yatun nga situasion, ngem kalmadu laman si Angelena. Nipasingan na ta katrabahu na ira i picture ira kavulu i kokkofun na nga magayayya nga masserbi kani Jehova anna marespeto na nga niyesplika i pangurug na. (1 Ped. 3:15) Anni i resulta natun? Turi ta nabalin ngana nga nabbida si Angelena, nakkalma ngana yatun nga katrabahu na. Niyistoria paga lagu natun nga katrabahu na i makasta ira nga ekspiriensa na ta kabbinna turi ta kavulu na paga i Saksi nga magana na. Kinagi ni Angelena: “Mepangngo laman nga idefensà si Jehova. Talaga pribilehio nga ipakannammu i kinakurug meyannung ta nisa.” Medefensa tam gapa si Jehova nu para-paraketadda i ngagan na. Talaga dakal yaw nga pribilehio!

11. Kunnasi nga niyaplika na kurug ira nga maddayaw namegafu tagga i prinsipio ta Salmo 96:8?

¹¹ Bibbigan i Salmo 96:​8, NW. Medayaw tam si Jehova gukaban na pakkukua tam ira. Kanayun nga kunnatun i paddayaw na aripan ira ni Jehova ta nisa. (Prov. 3:9) Angngarigan na, mangiyawa i Israelita ira tu kuartu anna pakkukua da ira tapenu manguffun ta pamataddag ta templo anna ta panangngal tatun. (2 Pat. 12:​4, 5; 1 Cro. 29:​3-9) Naggastu gapa i karuan ta disipulos ni Jesus tu “naggafu laggapa nira” tapenu meyawa da i mawag ni Jesus anna na apostol na ira. (Luc. 8:​1-3) Kagian gapa na Biblia nga turi ta nazziga-riga i karuan nga Cristiano megafu ta bisin, nangipatuvug ta nira i wawwaragi ta tanakuan nga lugar tu maski anni laman nga awayya da nga meyuffun. (King. 11:​27-29) Sangawe, medayaw tam gapa si Jehova gukaban na boluntariu ira nga donasiottam.

12. Kunnasi nga medayaw si Jehova gukaban na donasiottam ira? (Innan gapa i letratu.)

¹² Ikonsidera i tadday nga ekspiriensa nga mangipasingan nu kunnasi nga medayaw na donasiottam ira si Jehova. Turi ta 2020, naka-ekspiriensa i Zimbabwe tu tiempo na maga. Minillion i nabbisin, kasali ngana si Sister Prisca. Maski kitazziga i situasiodda, nitulu-tuloy na lapa i mallayyagayya kada Mierkules anna Biernes maski ta tiempo na ammumula. Uyu-uyawan yayya na kakarruba na megafu ta mallayyagayya lallagu i kuan na imbes tu mattrabahu. Kagiadda nisa, “Magga matay kamu ta bisin nu.” Ngem sigga-komfiansa nga nitabbag ni Prisca nira, “Ari vuluvuga nga pagurayan ni Jehova i massesserbi ira nisa.” Ari nabbayag, nakalawa yayya tu  relief goods naggafu ta organisasion. Naggafu ta donasiottam ira yatun nga relief goods. Nakaddag i kakarruba ni Prisca. Kinagi da ta nisa, “Ari naka vuluvuga pinagurayan na Dios. Yayya nga kayà mi gapa nga mas mammammu yayya.” Megafu tatun, pitu ta karruba na i magatende ngana ta study.

13. Kunnasi tam medayaw si Jehova gukaban na kondukta tam? (Salmo 96:9)

¹³ Bibbigan i Salmo 96:9. Medayaw tam si Jehova gukaban na kondukta tam. Mawag nga marenu ta pisikal danuri papari nga masserbi ta templo ni Jehova. (Ex. 40:​30-32) Ngem egga paga i mas importante anne ta pabbalin tu marenu ta pisikal. Yatun i marenu nga kondukta. (Sal. 24:​3, 4; 1 Ped. 1:​15, 16) Mawag tu ikagumattam nga alsan “i dana nga kata-katolay”—maritta nga appana-panono anna kondukta—anna iyellung “i bagu nga kata-katolay”—appana-panono anna kondukta nga mangipasingan ta makasta ira nga kualidad ni Jehova. (Col. 3:​9, 10) Gukaban na uffun ni Jehova, awayya na nga manguli maski danuri nepallo i ka-imoral anna kavayolente da anna awayya da i mapeggan tu bagu nga kata-katolay.

14. Anni i magigiammum ta ekspiriensa ni Jack? (Innan gapa i letratu.)

¹⁴ Si Jack ay vayolente nga kriminal. Niddadda yayya tu palayaw nga Demonio. Megafu ta krimen ira nga kingngua na, nasentensian yayya tu patay. Ngem habang innaggan na i kapatena, minanugu yayya nga maki-Bible study ta tadday nga brother nga mabbisi-bisita ta affukutan. Maski kitaddake i dati nga pinattolay ni Jack, nanguli yayya anna pappasa na piga nga tiempo, nappa-baptize yayya. Megafu ta dakal i nangulian ni Jack, ta aggaw nga mapatay yayya, tumangi i guardia ira turi ta mappakannammu ngana ira nisa. Kagian na tadday nga suddalu ta affukutan: “Dati bi, si Jack i kadaketan taw nga affukutan, ngem sangawe yayya ngana i kasippattan.” Ta ligguan kabalin na patay ni Jack, nanoli danuri brother nga mangirollu ta study ta affukutan anna nakilala da i tadday nga presu nga first time na i magatende. Anni i namaguyu ta nisa nga magatende? Ari yayya makapangurug ta nangulian ni Jack anna ikaya na nga makannammuan nu anni i mawag tu kuan na tapenu medayaw si Jehova. Ipasingan laman natun nga awayya tam nga medayaw i nelangitan  nga Yama tam gukaban na kondukta tam!—1 Ped. 2:12.

KUNNASI NGA ARANNI NGANA NGA IDAYAW NI JEHOVA I NGAGAN NA?

15. Kunnasi nga aranni ngana nga idayaw ni Jehova i ngagan na? (Salmo 96:​10-13)

¹⁵ Bibbigan i Salmo 96:​10-13. Kagian naw nga ultimu ira nga versikulo na Salmo 96 nga si Jehova ay matunung nga Hues anna Patul. Kunnasi nga aranni ngana nga idayaw ni Jehova i ngagan na? Gukaban na pamanunnu na ira. Daralan na saw i Babilonia nga Dakal megafu ta para-paraketan natun i masanto nga ngagan na. (Nep. 17:​5, 16; 19:​1, 2) Sonu awan ngana i Babilonia nga Dakal, awayya na nga manono na karuan nga dayawan si Jehova kavulu tam. Kabalin natun, daralan saw ni Jehova i mundo ni Satanas ta Armagedon. Daralan na saw danuri kumokkontra nisa anna danuri mamara-parake ta ngagan na ngem paliaran na danuri mangaya anna tumuttuttul ta nisa anna danuri maya nga idayaw yayya. (Mar. 8:38; 2 Tes. 1:​6-10) Kabalin na Marivu Dagun nga Pammaguray ni Cristo, tumunug ngana gapa i ultimu nga kapurueba. Kabalin natun, interamente ngana saw nga mapakasanto i ngagan ni Jehova. (Nep. 20:​7-10) Tatun nga tiempo, “mapannu noka i davvun tu pakannammu ta gloria ni Jehova kagitta na nekapannu na bebay tu danum.”—Hab. 2:14.

16. Anni i determinasiommu? (Innan gapa i letratu.)

¹⁶ Kappagayayya sonu duttal i tiempo nga dayawan na ngamin nga totolay si Jehova nga gitta na mepangngo ta nisa. Ngem sangawe pagalaman, kuattam i adde na mawayya tam tapenu ikagi ta tanakuan i meyannung ta Dios tam anna makedayaw nakuan ta nisa i kondukta tam. Tapenu makapaffokus ittam taw nga importante nga responsibilidad, pinili na Manangngal nga Baggi i Salmo 96:8 (NW) bilang teksto tam ta dagun 2025: “Iyawa nu kani Jehova i dayaw nga mepangngo ta ngagan na.”