1. Kunnasi tam mapagayayya si Jehova?

 IMAJINAMMU nga niddammu tu regalu i tadday nga iddeddu mu. Makakkasta yatun anna talaga meyusa na. Magga matakitakka nu basta ngana laman nipena i regalum ta kahon tapus gitta na ari nga importante yatun nisa. Ngem nu usan na yatun nga niregalum anna kagian na ta niko tu mappappabalo yayya, magga magayayya ka. Anni i magigiammu tam tatun? Niyawa ni Jehova i Ana na para ta nittam. Aya i namaguyu ta nisa tapenu iyawa i tavvu. Siguradu nga magayayya si Jehova nu ipasingattam nga mappappabalo ittam tatun nga espesial nga regalu na anna ta aya na!—Juan 3:16; Roma 5:​7, 8.

2. Anni i gigiammuattam taw nga artikulo?

² Ta pappasa na tiempo, baka ari ngana kuruga espesial ta nittam i regalu nga tavvu. Nu kunnatun, gitta na nipay tam laman i regalu na Dios ta kahon. Magayayya ittam ta nalawa tam yatun, ngem gitta na ari ngana kuruga importante yatun ta nittam. Ngem tapenu kanayuttam lagapa nga ipappabalo i regalu, mawag nga kanayuttam nga pannonopan i kingngua na Dios anna ni Cristo para ta nittam. Makoffun yaw nga artikulo tapenu makua tam yatun. Gigiammuattam i bendisiottam ira sangawe anna ta mappange megafu ta tavvu. Ammuattam gapa nu kunnasi tam mepasingan nga ipappabalo tam i aya ni Jehova, mas ngana ta tiempo na Memorial.

I BENDISIOTTAM IRA SANGAWE

3. Anni i tadday ta bendisiottam sangawe megafu ta tavvu?

³ Sangawe pagalaman, malawa tam ngana i bendision ira megafu ta sakrifisio nga tavvu ni Cristo. Angngarigan na, pakoman ni Jehova i liwi-liwa tam megafu ta tavvu. Ari yayya nga obligadu nga pakoman ittam, ngem kayà na nga kuan yatun. Megafu ta pappabalo na salmista, kinagi na meyannung kani  Jehova: “Mapia ka anna minammakoma ka, AFU.”—Sal. 86:5; 103:​3, 10-13.

4. Sinni i mammakapia ta niyawa ni Jehova nga tavvu? (Lucas 5:32; 1 Timoteo 1:15)

⁴ Matageno na karuan nga ari ira mepangngo ta pamakoma ni Jehova. Ngem i kurug, awan tu maski sinni nittam i mepangngo ta pamakoma na. Maski si apostol Pablo ammu na nga ‘ari yayya nga mepangngo nga magalan tu apostol.’ Ngem kunnaw lagapa i kinagi na: “Megafu ta allo na Dios, nabbalin ngà tu apostol.” (1 Cor. 15:​9, 10) Nu mabbabawi ittam ta nakaliwatattam ira, pakoman ittam ni Jehova. Ngatta? Ari nga megafu ta mepangngo ittam para tatun. Pakoman na ittam megafu ta iddeddu na ittam. Nu matageno mu nga ari ka nga mepangngo ta pamakoma ni Jehova, daddammammu nakuan nga niyawa na i tavvu para ta minakkaliwa ira nga mabbabawi, ari tu ta totolay nga ari vuluvuga makaliwa.—Bibbigan i Lucas 5:32; 1 Timoteo 1:15.

5. Obligadu kari si Jehova nga pakoman ittam? Ipakanawag.

⁵ Ari tam nakuan vuluvuga nonopan nga obligadu si Jehova nga pakoman ittam gafu laman ta nabayag ittam ngana nga masserbi nisa. Appresian ni Jehova i kinamatalo tam. (Heb. 6:10) Ngem ari na nga niyawa i Ana na bilang pappaga ta passerbi tam ta nisa. Regalu na yatun para ta nittam. Ari gafu mepangngo nga nonopan tu obligadu si Jehova nga pakoman ittam megafu ta aru ngana i kingngua tam para ta nisa. Nu kunnatun gare i nonopattam, gitta na kakkagiattam nga ari tam kawagan i tavvu.—Ikumpara i Galacia 2:21.

6. Ngatta nallallappo si Pablo ta passerbi na kani Jehova?

⁶ Ammu ni Pablo nga maski anni paga i kuan na, arianna maobliga si Jehova nga pakoman yayya. Ngatta gafu ta nallallappo yayya ta passerbi? Ari nga tapenu pakurugan nga mepangngo yayya nga mapakoma. Kayà na laman ipasingan i pappabalo na ta allo ni Jehova. (Efe. 3:7) Kagitta gafu ni Pablo, mallallappo ittam ta passerbi tam, ari nga tapenu pakurugan kani Jehova nga mepangngo ittam ta pamakoma na. Kayà tam laman ipasingan nga ipappabalo tam i allo na.

7. Anni paga i bendisiottam sangawe megafu ta tavvu? (Roma 5:1; Santiago 2:23)

⁷ I tadday paga nga bendisiottam sangawe megafu ta tavvu ay awayya tam nga mabbalin tu madukko nga kofun ni Jehova. a Gitta na nakagi ta nappasa nga artikulo, ta keyana tam pagalaman, ari ittam ngana nga parte na familia na Dios. Ngem megafu ta tavvu, posible nga mabbalin ittam tu ‘kokkofun na Dios’ anna makiddukko nisa.—Bibbigan i Roma 5:1; Santiago 2:23.

8. Ngatta ipappabalo tam nakuan kani Jehova i pribilehio tam nga makimallo?

⁸ Megafu ta madukko nga pakikkofuttam kani Jehova, egga i pribilehio tam nga makimallo nisa. Ari laman nga gigginnan ni Jehova i pakimallo na aripan na ira nu maggarammammung ira. Gigginnan na gapa maski i personal nga pakimallo na kada tadday ta nittam. Nu makimallo ittam, memammo i panageno tam. Ngem ari laman tu yatun i makua na pakimallo. Makoffun gapa yatun tapenu mas maddukko ittam ta Dios. (Sal. 65:2; Sant. 4:8; 1 Juan 5:14) Ta kegga ni Jesus taw ta davvun, kanayun yayya makimallo. Ammu na gare nga gigginnan yayya ni Jehova anna makoffun yatun tapenu kanayun yayya nga madukko ta Yama na. (Luc. 5:16) Kuruga ipappabalo tam i sakrifisio nga tavvu  ni Jesus! Megafu gare tatun, awayya tam i mabbalin tu kofun ni Jehova anna makibbida tam paga yayya ta pakimallo.

I BENDISIOTTAM IRA TA MAPPANGE

9. Megafu ta tavvu, anni nga bendision ta mappange i malawa danuri na matalo?

⁹ Megafu ta tavvu, anni nga bendision ta mappange i malawa danuri na matalo kani Jehova? Mattolay ira tu mannanayun. Aru i makkagi nga imposible yatun. Masingi-singadda gare nga i paffuntan mabba na ngamin ay patay. Ngem i orihinal nga gakkag ni Jehova ay mattolay tu mannanayun i totolay. Nu ari nga nakaliwa si Adan, awan nakuan tu mannono nga imposible i pattolay tu mannanayun. Ngem maski nu gitta na imposible yatun sangawe, mangurug ittam tatun. Ammu tam gare nga kuruga mangina i nipaga ni Jehova tapenu mabbalin tu posible yatun—i inango na Ana na.—Roma 8:32.

10. Anni i iddanaman na nazelugan anna na tanakuan nga karneru?

¹⁰ Maski nu ta mappange ittam paga nga mattolay tu mannanayun, kayà ni Jehova tu agga-nono tam ngana yatun sangawe. Iddanaman na nazelugan nga mattolay ira ta langi anna immagurayadda i davvun kavulu si Cristo. (Nep. 20:6) Iddanaman gapa na tanakuan nga karneru nga mattolay ta paraiso nga davvun nga awan ngana tu maddaging anna maraddam. (Nep. 21:​3, 4) Tadday ka kari ta tanakuan nga karneru nga magiddanama nga mattolay tu mannanayun ta davvun? Ariammu nakuan nonopan nga mas makasta i bala-balo danuri na mattolay ta langi. Kuruga magayayya ittam noka nu mattolay ittam tu mannanayun taw ta davvun ta yatun mabba i nikaparatu tam.

11-12. Anni i karuan ta bendision ta Paraiso nga aba-abangattam? (Innan gapa i letratu ira.)

¹¹ Imajinammu i pattolem sonu paraiso ngana i davvun. Ari ka ngana mavurung nga baka mattaki ka onu matay ka. (Isa. 25:8; 33:24) Iyawa ngana ni Jehova nikaw i ngamin nga mapia nga gannug nga kayà mu. Anni saw i kayà mu gigiammuan? Kayà mu kari gigiammuan  i meyannung ta aya-ayam ira? Onu kayà mu nga gigiammuan nu kunnasi i makkansion onu maggitara? Baka kayà mu gapa nga gigiammuan nu kunnasi mad-drawing? Magga kawagan gapa saw ta Paraiso i totolay nga ammu da i maddisenio anna mamataddag tu babalay anna danuri makkusetcha. Kawagan gapa saw i totolay nga mammula anna mallutu tu maka-makan, mamadday tu rimienta, anna manguffun tapenu mamakasta ta itchura na pallevu tam. (Isa. 35:1; 65:21) Sonu mattolay ka tu mannanayun, makuam ngana i ngamin nga gannug nga kayà mu.

¹² Magayayya ka saw nga dafungan i mapaginnolay ira! (King. 24:15) Fermi gapa saw i ayayya mu nga mas makilala paga si Jehova gukaban na paggigiammum ta pinaratu na ira. (Sal. 104:24; Isa. 11:9) I kakastan ta ngamin, magayayya ka saw nga maddayaw kani Jehova megafu ta awan ngana tu rason tapenu makonsensia ka. Italim kari yatun ira nga bendision ta mappange tapenu laman “mappalappagustu ta manganannuan nga pagayaya nga irattal na katagarulian” sangawe? (Heb. 11:25) Magga ari! Sulit i maski anni nga isakrifisio tam sangawe para tatun ira nga bendision. Daddammammu yaw: Ari laman nga imahinasion i paraiso nga davvun. Duttal saw i tiempo nga mattolay ka tatun. Ngem nabbalin laman tu posible ngamin yatun megafu ta kuruga ayatan ittam ni Jehova anna niyawa na i Ana na tapenu matay para ta nittam.

IPASINGAN NGA MAPPAPPABALO KA TA AYA NI JEHOVA

13. Kunnasi tam mepasingan nga ipappabalo tam i aya ni Jehova? (2 Corinto 6:1)

¹³ Kunnasi tam mepasingan nga mappappabalo ittam kani Jehova ta pangiyawa na ta tavvu? Pagolluattam nakuan ta pattoletam i passerbi ta nisa. (Mat. 6:33) Natay si Jesus “tapenu danuri i matolay ay ari ngana nga mattolay para ta baggi da laggapa, nu ari megafu laman kani Cristo nga natay anna naginnolay megafu nira.” (2 Cor. 5:15) Mapia ngana laman ta nikallo ittam ni Jehova. Kayà tam gafu nga ipasingan nga nabala-balor ta nittam i nisakrifisio na anna talaga ipappabalo tam yatun.—Bibbigan i 2 Corinto 6:1.

14. Kunnasi tam mepasingan nga mattalo ittam ta pangigiya ni Jehova?

¹⁴ Mepasingattam gapa nga ipappabalo tam i aya ni Jehova nu mattalo ittam ta pangigiya na. Kunnasi? Mepasingattam yatun ta desisiottam ira. Angngarigan na, baka nonopammu nu mawag kari talaga tu mac-college ka onu alawatammu i tadday nga klase na trabahu. Makasta nu nonopammu nu anni i kayà ni Jehova nga kuammu. (1 Cor. 10:31; 2 Cor. 5:7) Nu tuttulattam i pangigiya ni Jehova, mas mattalo anna maddukko ittam ta nisa. Mas mabbalin gapa tu kuru-kurug i iddanama tam.—Roma 5:​3-5; Sant. 2:​21, 22.

15. Ta tiempo na Memorial, kunnasi tam mepasingan i pappabalo tam?

 ¹⁵ Egga paga i tadday nga makua tam tapenu mepasingattam nga ipappabalo tam i aya ni Jehova. Approbetchattam nakuan i tiempo na Memorial tapenu ipasingan kani Jehova nga ipappabalo tam i tavvu. Fuera ta pagatende ta Memorial, awayya tam gapa imbitan i tanakuan. (1 Tim. 2:4) Ipakanawag tam tari ira ta imbitattam nu anni i makua ta Memorial. Baka makoffun gapa nu ipagirom ta nira i video ira ta jw.org nga Ngatta Natay si Jesus? anna Daddamman i Patay ni Jesus. Siguraduan nakuan gapa na elder ira nga imbitadda i inactive ira. Magga magayayya si Jehova, si Jesus, i anghel ira, kunne na gapa sittam ta davvun nu egga i manoli ta kongregasion nga neyawawan nga karneru! (Luc. 15:​4-7) Sonu Memorial gapa, ikagumattam nakuan nga alawatan i wawwaragi mas ngana danuri bagu laman nga magatende onu danuri tatun pagalaman uli nga maki-Memorial. Kayà tam nga ipatageno ta nira nga welcome ira!—Roma 12:13.

16. Ngatta makasta nu planowammu nga palawan i ministeriom ta tiempo na Memorial?

¹⁶ Puedem kari nga palawan i ministeriom ta tiempo na Memorial? Makasta nu kuammu yatun tapenu mepasingammu i pappabalo mu ta ngamin nga kingngua na Dios anna ni Cristo para ta nittam. Nu mas gare aru i kukukuattam ta passerbi kani Jehova, mas matageno tam i panguffun na anna mas mattalo ittam ta nisa. (1 Cor. 3:9) Siguraduammu gapa nga matuttul mu i pabbibbig tu Biblia ta tiempo na Memorial nga masingan ta Pagsusuri sa Kasulatan Araw-araw onu ta chart nga malegan ta workbook ta study ta midweek. Puedem paga lagu nga usan ta study project mu i teksto ira tatun.

17. Anni i mamagayayya kani Jehova? (Innan gapa i kahon nga “ I Makuam Tapenu Ipasingan i Pappabalo Mu ta Aya ni Jehova.”)

¹⁷ Siempre, baka ariammu makua i ngamin nga suhestion taw nga artikulo megafu ta situasiommu. Ngem daddammammu nakuan nga ari ikumpara ni Jehova i makuam ta makua na tanakuan. I mayan na futum i inninnan na. Magayayya yayya nu masingan na nga mappappabalo ka ta espesial nga regalu na nga tavvu.—1 Sam. 16:7; Mar. 12:​41-44.

18. Ngatta mappappabalo ittam kani Jehova nga Dios anna kani Jesu-Cristo?

¹⁸ Megafu ta tavvu, mapakoma i liwi-liwa tam, mawayya tam nga mabbalin tu kofun si Jehova, anna egga i iddanama tam nga mattolay tu mannanayun. Megafu ta iddeddu na ittam, niyawa na yatun ira nga bendision. Kanayuttam nakuan gafu ipasingan nga mappabalo ittam ta aya ni Jehova. (1 Juan 4:19) Mappabalo ittam nakuan gapa kani Jesus. Megafu gare ta kuruga ayatan na ittam, niyawa na i inango na para nittam!—Juan 15:13.