1-2. (a) Segun ta bilin ni Jesus ta Mateo 28:18-20, anni i primeru nga responsibilidad na Cristiano nga kongregasion? (b) Anni ira nga pakkiavu i tabbagattam taw nga artikulo?

KITESSAYA i apostoles ta paggarammammudda ta vukig na Galilea kavulu si Jesus. Niyunnug yatun ni Jesus kabalin na paginnolena. (Mat. 28:16) Posible nga yatun i tiempo nga si Jesus ay ‘nappasingan ta nattaradday nga mangurug ira nga maturu tu lima-gatu.’ (1 Cor. 15:6) Ngatta nipagal ni Jesus i disipulosna tatun nga paggarammammung? Tapenu ikagina nira yaw nga kappagayayya nga bilin: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò.”​—Bibbigan i Mateo 28:18-20.

² I disipulos nga nakaginna ta kinagi ni Jesus ay nabbalin tu miembro na ollu-siglo nga Cristiano nga kongregasion. I primeru nga annungan natun nga kongregasion ay mangngua tu mas aru paga nga disipulos ni Cristo. * Ta maddaggun, napakaru i kongregasion na kurug ira nga Cristiano ta interu mundo, anna ari nanguli i primeru nga annungan danatun nga kongregasion. Taw nga artikulo, tabbagattam yaw nga appa nga pakkiavu: Ngatta kuruga importante i pangngua tu disipulos? Anni i nelagum tatun? Egga kari i papel na ngamin nga Cristiano ta pangngua tu disipulos? Anna ngatta kawagattam i pasensia taw nga trabahu?

3. Segun ta Juan 14:6 anna 17:3, ngatta kuruga importante i pangngua tu disipulos?

³ Ngatta kuruga importante i pangngua tu disipulos? Megafu ta danuri disipulos laman ni Cristo i awayyana nga mabbalin tu kofun na Dios. Fuera tatun, makkasta paga sangawe i pattolay danuri mattuttul kani Cristo anna egga iddanamada nga mattolay tu mannanayun ta mappange. (Bibbigan i Juan 14:6; 17:3.) Kurug tu nipeyabaga ni Jesus nittam yaw nga importante nga annungan, ngem kattam kuan yaw nga sitti-sittam laman. Kunnaw i pinattukoy ni apostol Pablo ta baggina anna ta kakavvuluna: “Katrabahu ittam na Dios.” (1 Cor. 3:9, NW ) Anni ngana mabba nga pribilehio nga niyawa ni Jehova anni Cristo ta imperfekto nga totolay!

4. Anni i mala tam nga leksion ta ekspiriensa da Ivan anni Matilde?

⁴ Kuruga mamagayayya nittam i pangngua tu disipulos. Nonopan i ekspiriensa da Ivan anna na atawana nga si Matilde nga taga-Colombia. Nilayyagayyadda i kabataan nga si Davier, nga nakkagi nira: “Kayà ku i manguli, ngem kakku makaya.” Boksingero si Davier, maddroga yayya, minaggillellaw, anna mal-live-in ira na nobiana nga si Erika. Niyistoria ni Ivan: “Inangngayammi yayya ta unu-unag nga bario, nu sitaw mabbisikleta kami tu piga oras ta finuyo nga dalan. Turi ta nemammatan ni Erika i panguloli ta kondukta anna appana-panono ni Davier, nab-Bible study ngana gapa yayya.” Nappasa i tiempo, nagimmang si Davier nga maddroga, magillellaw, anna mabboksing. Nikasalna gapa ngana si Erika. Kagian ni Matilde: “Nguri ta nabawtisowan si Davier anni Erika ta 2016, neraddammammi i dati nga kakkagian ni Davier, ‘Kayà ku i manguli, ngem kakku makaya.’ Makatangi kami ta sobra nga ayayya.” Kurug nga makatageno ittam tu sobra nga ayayya nu moffunattam i totolay nga mabbalin tu disipulos ni Cristo.

5. Anni i ollu nga kuattam tapenu mangngua tu disipulos?

⁵ I ollu nga kuattam tapenu mangngua tu disipulos ay “magaleg” tu totolay nga mapia i giffutuadda. (Mat. 10:11) Nu layyagayyattam i ngamin nga masimmuattam ta teritoria, mapakurug tam nga Saksi ni Jehova ittam. Mapakurug tam nga kurug nga Cristiano ittam gafu ta tuttuttulattam i bilin ni Cristo nga mallayyagayya.

6. Anni i kuattam tapenu magginna i totolay ta ilayyagayya tam?

⁶ Egga ira interesadu nga mannammuan i kinakurug ta Biblia, ngem aru gapa i gittana awan tu interesda ta gafu. Baka mawag tu kultibattam i interesda. Tapenu magginna i totolay ta ilayyagayya tam, mawag tu mapprepara ittam tu mapia. Mappili tu espesipiko ira nga topiko nga siguradu nga mamaginteres turi ira ta masimmuammu. Tapus planowammu nu kunnasim metallung i kada topiko.

7. Kunnasim nga igafu i pakiyuvovug mu ta tolay, anna ngatta importante nga ginnan anna irespetom yayya?

⁷ Angngariganna, awayyam iyavu ta makabbalay: “Awayyana kari nga apakku laman i opiniommu? Aru nga problema ta maddaggun i mangafekto ta totolay ta interu mundo. Mawag tam kari i tadday nga gobiernu nga mammaguray ta interu mundo tapenu masolba i problema ira ta mundo?” Tapus awayyam iyesplika i Daniel 2:44. Puedem gapa nga kagian yaw: “Anni tamma i kakastan nga kuattam tapenu mapadakal i ána nga egga makasta nga ugu-ugalida? Kayà ku mammuan i opiniommu.” Tapus ipakanawag mu i  Deuteronomio 6:6, 7. Maski anni nga topiko i napilim nga ipakiyuvovug, nonopan nu anni nga klase na tolay i magginna nikaw. Datim nga pannonopan nu kunnasi ira mabbenefisio ta kurug nga ituttuddu na Biblia. Nu kiyuvovugammu ira, importante nga ginnammu ira anna irespetom i opiniodda. Nu kunna i kuammu, mas malippawa mu ira, anna mas magginna ira nikaw.

8. Ngatta mawag i tulu-tuloy nga appursigi nu massinoli ittam?

⁸ Nige nga maddesision i tolay nu mappa-Bible study, aru nga tiempo anna appursigi i kawagan nga kuammu ta passinoli. Ngatta? Megafu ta baka awan ira ta tiempo na passinoli tam. Anna awayyana nga mawag tu makatotoli ka labbi nga makiyuvovug ta makabbalay adde ta komfortable ngana yayya nga alawatan i Bible study. Daddamman nga mas egga i posibilidad nga dumakal i tadday nga mula nu kanayun nga mabayatan. Kunnatun gapa, i aya na interesadu nga tolay kani Jehova anna kani Cristo ay egga i posibilidadna nga dumakal nu regular nga ipakiyuvovug tam nisa i Biblia.

9-10. Ngatta makagi tam nga egga i papel na kada Cristiano nga ministro ta panguffun nga magaleg tu totolay nga mapia i giffutuadda?

⁹ Egga i papel na kada Cristiano nga ministro ta panguffun nga magaleg tu totolay nga mapia i giffutuadda. Megitta yaw nga trabahu ta pagaleg tu abbing nga nawawan. Kunnasi? Nonopan i nesimmu ta abbing nga lalaki nga tallu i dagunna nga nallawan ta baleda tapus nawawan. Maggi 500 i nabboluntariu ta pagaleg nisa. Kabalin na ma-20 oras, nalegan yayya na tadday nga boluntariu ta kamangitan. Manaki natun nga tolay nga medayaw yayya megafu ta yayya i nakaleg ta abbing. Kunna: “Ginatu nga tolay i nakaleg ta abbing.”

¹⁰ Aru nga totolay i megitta tatun nga abbing.  Gittana nawawan ira. Awan tu iddanamada, yatutta magawag ira tu uffun. (Efe. 2:12) Maturu tu walu million nittam i mappuppursigi nga alegan danaw nga mepangngo nga tolay. Awayyana nga awan tu personal nga malegammu nga maya maki-Bible study nikaw. Ngem egga tanakuan nga nallayyagayya ta parehu nga teritoria nga nakaleg tu maya nga maggigiammu tu kinakurug ta Biblia. Nu egga brother onu sister nga nakaleg tu tolay nga nabbalin tu disipulo ni Cristo, ngamin nga nanguffun ta pagaleg ay egga rasodda nga magayayya.

11. Maski nu awan tu ikonduktam nga Bible study, anni ira i makuam tapenu makoffun ta pangngua tu disipulos?

¹¹ Maski nu awan tu ikonduktam nga Bible study ta maddaggun, egga lagapa ira i makuam tapenu makoffun ta pangngua tu disipulos. Angngariganna, nu egga bagu nga masingammu ta Kingdom Hall, awayyam ira arannian anna uffunan. Nu kuammu yatun, makumbinsim ira nga aya i panakkilalan na kurug ira nga Cristiano. (Juan 13:34, 35) Maski nu ababba laman i komentom ta study ira, matudduammu i babbaragu nga ibilleda tu sinsero anna marespeto i pangurugda. Awayyam gapa vulutan i bagu nga publisher ta ministerio anna uffunan yayya nga usan i Biblia tapenu tudduan i totolay. Nu kunnatun i kuammu, matudduammu yayya nga parigan si Cristo.​—Luc. 10:25-28.

12. Mawag kari tu sobra i kalalaki tam tapenu makangngua tu disipulos? Ipakanawag.

¹² Ariattam nakuan nonopan nga mawag tu sobra i kalalaki tam tapenu metuddu tam ta tanakuan nu kunnasi mabbalin tu disipulos ni Jesus. Ngatta? Ikonsidera i ehemplo ni Faustina nga taga-Bolivia. Arianna ammu i mabbibbig turi ta nasimmuan yayya na Saksi ira ni Jehova. Ngem sangawe, sisinu ngana yayya nga natudduan nga mabbibbig. Bawtisadu ngana yayya, anna kakayàna nga manuddu ta tanakuan. Maruddu nga lima i Bible study-na kada ligguan. Maski nu ari kuruga antigu ni Faustina i mabbibbig kumpara ta study-na ira, annam ngana i noffunanna nga mabawtisowan.​—Luc. 10:21.

13. Maski kuruga okupadu ittam, anni i karuan ta bendision nga malawa tam megafu ta pangngua tu disipulos?

¹³ Aru nga Cristiano i kuruga okupadu ta napakaru nga importante nga responsibilidadda. Ngem, egga lagapa i tiempoda nga mangikondukta tu paggigiammu ira ta Biblia, anna dakal i pagayayyada gafu tatun. Innan i ehemplo na single mother nga si Melanie nga taga-Alaska nga egga i ocho-anios nga anana nga babay. Full-time yayya ta trabahuna anna tattangngawanna i yamana nga egga i cancer-na. Si Melanie laman i Saksi ta nesisina nga lugarda. Kanayunna ipakimallo nga makapallayyagayya yayya maski sobra i lamminna gafu ta kayàna talaga i makaleg tu Bible study. Nappasa i tiempo, nasimmuanna si Sara nga  fermi i ayayyana tagga ta nammuanna nga egga i personal nga ngagan na Dios. Ari nabbayag, nappa-Bible study si Sara. Kinagi ni Melanie: “Kada Biernes na gabi, nababbannag ngà ngana, ngem umay kami lapa na ana ku nga mab-Bible study, yatutta nammakapia kami dua. Na-enjoymi dua i parresearch ta pakkiavu ira ni Sara, anna kitessaya kami nga makasingan nisa nga mabbalin tu kofun ni Jehova.” Magutu nga inattamman ni Sara i pangokkontra, pinanawanna i relihionna, anna nappabawtiso yayya.

14. (a) Kunnasi nga negitta ta gumaggimmanango danuri mangngua tu disipulos? (b) Anni i efekto nikaw na kinagi ni Pablo ta 2 Timoteo 4:1, 2?

¹⁴ Maski nu awan tu malegammu nga maya nga mabbalin tu disipulos, tulu-tuloy nga alegan danuri egga potensialna. Kinagi ni Jesus nga megitta ta pagimmanango i pangngua tu disipulos. Piga oras labbi nga mattrabahu i gumaggimmanango nigena nga makagafù tu manango. Maruddu nga dis-oras na gabi onu ummumma yayya nga mattrabahu, anna nu mittan ay mabbiahe yayya tu apapaddu. (Luc. 5:5) Kunnatun gapa, piga oras nga mapasensia nga “magimmanango” i karuan nga Cristiano ta nadduruma nga oras anna nadduruma nga lugar. Ta ngatta? Tapenu mas aru i masimmuadda. Maruddu nga danuri kunnatun i appursigida ay mabala-balakkan gafu ta makasimmu ira tu interesadu ta mensahe tam. Kayà mu kari nga purueban nga mallayyagayya ta oras nu sitaw mas egga posibilidadna nga makasimmu ka tu tolay onu ta lokasion nu sitaw mas malegammu ira?​—Bibbigan i 2 Timoteo 4:1, 2.

15. Ngatta mawag tu mapasensia ittam nu mangikondukta tu Bible study?

 ¹⁵ Ngatta kawagan i pasensia nu mangikondukta tu Bible study? Tadday nga rason ay megafu ta mawag nga ariattam laman uffunan i estudiante nga ammuan anna ayatan i doktrina ira na Biblia. Mawag gapa nga uffunattam yayya nga ammuan anna ayatan i Autor na Biblia, si Jehova. Fuera ta panuddu ta estudiante tam nu anni i ikikkiddaw ni Jesus ta disipulosna, mawag tu uffunattam yayya nga mannammuan nu kunnasi mattolay bilang kurug nga Cristiano. Mapasensia nakuan nga uffunattam yayya durante nga pappursigianna nga iyaplika i prinsipio ira na Biblia. Egga danuri nolida i appana-panono anna konduktada ta piga vulan laman; i karuan gapa mas anaddu nga tiempo.

16. Anni i nagigiammum ta ekspiriensa ni Raúl?

¹⁶ Ipasingan na ekspiriensa na tadday nga misionero ta Peru i benefisio na pabbalin tu mapasensia. “Dua ngana nga libru i nabalimmi nga ginigiammu ni Raúl,” kunna misionero. “Ngem aru lagapa i mawag tu ulianna. Problemadu i pagatawana, minaggageg yayya, anna awan tu respeto na ánana nisa gafu ta marake nga ugalina. Ngem regular yayya nga makistudy, yatutta kanayukku yayya bisitan tapenu uffunan yayya kunne na i familiana. Maturu tu tallu ragun kabalin na pinassimmumi, nakualipika yayya ta bawtismo.”

17. Anni i ikonsidera tam ta tumunug nga artikulo?

¹⁷ Nikagi nittam ni Jesus nga ‘umay ittam ta ngamin nga totolay ta ngamin nga lugu-lugar anna pabbalinattam ira tu disipulos.’ Tapenu metuppal yatun nga bilin, maruddu nga makiyuvovug ittam ta totolay nga nerumu-ruma i appana-panonoda kumpara nittam, nelagum danuri awan tu relihiodda onu danuri ari mangurug nga egga i Dios. Ikonsidera na tumunug nga artikulo nu kunnasi tam mepresenta i mapia nga dumug taw ira nga klase na totolay.