1-2. (a) Ngatta ariattam ngana makaddag nu igamma na gobiernu i paddayaw tam? (b) Anni i ikonsidera tam taw nga artikulo?

TA 2018, maturu tu 223,000 nga Saksi i maddian ta nasion ira nu sitaw interamente nga megamma i trabahu tam onu egga i restriksionna. Ari ngana nga kakkadda-kaddag yaw. Kagitta na nagigiammu tam ta nappasa nga artikulo, ekspektan na kurug ira nga Cristiano nga madara-darum ira. (2 Tim. 3:12) Maski sitaw i paddianattam, awayyana nga gavva anna awan tu abiso nga igamma na gobiernu i paddayaw tam ta meddu nga Dios tam nga si Jehova.

² Nu naddesision i gobiernu ta diannu nga igamma i paddayaw kani Jehova, baka iyavunu ta bagginu danaw: ‘Nawawan kari i fabor na Dios nittam yatutta madara-darum ittam? Mapagimmang kari na pangigamma i paddayaw tam kani Jehova? Mawag ku kari i magali ta lugar nga ari megamma i trabahu tam?’ Taw nga artikulo, tabbagattam danatun nga pakkiavu. Ikonsidera tam paga nu kunnasi ittam nga tulu-tuloy nga makapaddayaw kani Jehova maski megamma i trabahu tam anna nu anni ira i gannug nga ibita tam.

3. Segun ta 2 Corinto 11:23-27, kunnasi nga nadara-darum i matalo nga apostol nga si Pablo, anna anni i magigiammu tam ta ekspiriensa ni Pablo?

³ Nu igamma na gobiernu i paddayarayaw tam, baka nonopattam nga awan ngana i bendision na Dios nittam. Ngem daddamman, ari kebalinan na panara-darum nga ari ngana nga magayayya si Jehova nittam. Angngariganna, innattam i nesimmu  kani apostol Pablo. Siguradu nga egga nisa i fabor na Dios. Egga i pribilehiona nga nangitura tu 14 nga libru ta Cristiano nga Griego nga Katurakan, anna yayya i apostol nga nadog ta nasa-nasion. Ngem, grabe i nikadara-darumna. (Bibbigan i 2 Corinto 11:23-27.) Nagigiammu tam ta ekspiriensa ni apostol Pablo nga nu mittan ipamavulun ni Jehova nga madara-darum i matalo ira nga aripanna.

4. Ngatta ikalussaw ittam na mundo?

⁴ Niyesplika ni Jesus nu ngatta ekspektattam i pangokkontra. Kinagina nga mekalussaw ittam megafu ta ari ittam nga parte na mundo. (Juan 15:18, 19) Nu madara-darum ittam, ari kebalinan natun nga awan nittam i bendision ni Jehova. Ipasingan lallagu natun nga fustu i kukukuattam!

5. Egga kari i pakawayya na maski sinni nga tolay nga pagimmangan i paddayaw kani Jehova? Iyesplika.

⁵ Awan tu maski sinni nga tolay nga mangontra i permanente nga makapagimmang ta paddayaw ta makapangngua-sa-ngamin nga Dios nga si Jehova. Aru i namurueba ngem ariadda navviktoria. Innattam i nesimmu ta World War II. Tatun nga tiempo, grabe i panara-darum na gobiernu ira ta totolay na Dios. Nigamma na Nazi party ta Germany anna maski na gobiernu ira na Australia, Canada, anna na tanakuan paga nga nasion i trabahu na Saksi ira ni Jehova. Ngem anni i nesimmu? Ta pabbatta na gerra ta 1939, egga i 72,475 nga publisher ta interu mundo. Ngem turi ta nangultimu i gerra ta 1945, egga ngana i 156,299 nga publisher megafu ta binendisionan ni Jehova i ilina. Mas paga ta doble i pinakkaru na bilang na publisher ira!

6. Anni ira nga positibo nga gannug i mesimmu nu madara-darum ittam? Mangiyawa tu angngarigan.

⁶ Mas nga paladdan na panara-darum i determinasiottam nga passerbian si Jehova anna ari kuruga maganassing nga masserbi nisa. Angngariganna, tadday nga magatawa nga egga abbing nga anada i maddian ta nasion nu sitaw igaggamma na gobiernu i paddayaw tam. Imbes nga maganassing, narregular payunir ira. Narresayn paga lagu i yena ta trabahuna nga dakal i suelduna. Kinagi na yama nga mas aru i makkakkiavu meyannung ta Saksi ira ni Jehova megafu ta pangigamma. Megafu tatun, natagenona nga mas alistu ngana i mangigafu tu paggigiammu ira tu Biblia. Egga paga i positibo nga resultana ta tanakuan na pangigamma.  Kinagi na elder tatun nga nasion nga aru turi ira ta dati nga nagimmang nga nasserbi kani Jehova ay magata-atende ngana uli tu study anna mallayyagayya.

7. (a) Anni i magigiammu tam ta Levitico 26:36, 37? (b) Anni i kuammu ta tiempo na pangigamma?

⁷ Nu igamma na kalabattam ira i paddayaw tam, kayàda ittam nga ananassingan tapenu magimmang ta passerbi kani Jehova. Fuera paga ta pangigamma, posible nga mangiwara ira tu padda-padday nga istoria, maddog tu pulis ira nga makkurakkeg ta babaletam, kasowadda ittam, onu ipefukuda paga lagu i karuan nittam. Kayàda nga maganassing ittam megafu ta nepafukuda i karuan nittam. Nu maganassing ittam nira anna ta awayyada nga kuan nittam, baka sittam ngana mismu i “mangigamma” ta paddayaw tam kani Jehova. Ariattam vuluvuga kayà nga mabbalin tu kagitta danuri nakagi ta Levitico 26:36, 37. (Bibbigan.) Ariattam ipamavulun nga pakarianan onu pagimmangan na assing i espiritual ira nga aktibidad tam. Interu-futu nga mattalo ittam kani Jehova anna ari nga mappatantalaw. (Isa. 28:16) Sigga-pakimallo tam nga kiddawan i giyana. Ammu tam nga megafu ta suporta na Dios tam, ari ittam mapagimmang maski na pinakamakapangngua nga gobiernu ta matalo nga paddayaw nisa.​—Heb. 13:6.

8-9. (a) Anni nga personal nga desision i mawag nga kuan na ulu na familia onu na indibidual? (b) Anni i makoffun nira tapenu makapaddesision tu masirib?

⁸ Nu igamma na gobiernu i paddayaw tam ta lugarnu, baka manono mu nga magali ta nasion nu sitaw ari nga megamma yatun. Personal nga desision yaw anna awan tu mangidikta nikaw. Nige nga maddesision i tadday nga tolay, ikonsiderana labbi i kingngua na ollu-siglo ira nga Cristiano turi ta nadara-darum ira. Turi ta binara-barag na kumokkontra si Esteban adde ta natay, nawwawara i disipulos nga taga-Jerusalem ta Judea anna Samaria anna maski ta arayyu nga nasion gitta na Fenecia, Cipro, anna Antiokia. (Mat. 10:23; King. 8:1; 11:19) Awayyana gapa nga ikonsidera i kingngua ni Pablo turi ta egga mangana i periodo na pameppersigi. Naddisidi yayya nga ari manaw ta lugar ira nu sitaw megamma i pallayyagayya maski mappeligro yayya. Kingnguana yaw megafu ta kayàna nga ilayyagayya i mapia nga dumug anna pasikannan i wawwaragi ta siudad ira nu sitaw grabe i pameppersigi.​—King. 14:19-23.

⁹ Anni i magigiammu tam tatun ira nga rekord? Mawag nga maddesision i ulu na familia meyannung ta pagali. Nigena maddesision, sigga-pakimallo anna innanna nakuan tu mapia i sirkumstansia na familiana anna i posible nga positibo anna negatibo ira nga efekto natun nira. Taw nga gannug, mawag na kada Cristiano nga ‘akkatan i kargana laggapa.’ (Gal. 6:5) Ariattam nakuan husgan i tanakuan ta desisiodda.

10. Anni ira nga instruksion i iyawa na panga nga ofisina anna na elder ira?

¹⁰ Kunnasim metulu-tuloy i passerbim kani Jehova maski ta tiempo na pangigamma? Mangiyawa i panga nga ofisina ta elder ira ta kongregasion tu instruksion anna praktikal ira nga suhestion nu kunnasi makalawa tu espiritual ira nga makan, nu kunnasi i paggarammammung ta study, anna nu kunnasi ilayyagayya i mapia nga dumug. Nu ari makontak na panga nga ofisina i elder ira, i elder ira i manguffun nikaw anna ta kongregasion tapenu metulu-tuloy i paddayaw tam kani Jehova. Mangiyawa ira tu direksion nga mekunnay ta  Biblia anna ta publikasiottam ira.​—Mat. 28:19, 20; King. 5:29; Heb. 10:24, 25.

11. Ngatta makasiguradu ka nga ari ka nga mabbisin ta espiritual nga makan, anni i makuam tapenu maprotektammu i Bibliam anna i publikasiommu ira?

¹¹ Nipromesa ni Jehova nga ari mabbisin ta espiritual i aripanna ira. (Isa. 65:13, 14; Luc. 12:42-44) Makasiguradu ka gafu nga kuan na organisasionna i ngamin tapenu meyawa i kawagammu nga espiritual nga pamagaram tapenu makapattalupaddiakka nga matalo. Ngem egga i mawag tu kuammu. Ta tiempo na pangigamma, magaleg ka tu kapianan nga pangitaguan ta Bibliam anna ta tanakuan ira nga publikasiommu. Ariammu iwalang ta maski sitaw danatun nga nabalor nga material​—neyimprenta onu maski elektroniko—​ta lugar nga alistu nga malegan. Mawag tu magangngua i kada tadday nittam tu praktikal ira nga dakkua tapenu mattalupaddian nga matuyag ta espiritual.

12. Kunnasi nga iyunnug na elder ira i study tapenu ari mapansin i kukukuattam?

¹² Kunnasi gapa i linigguan nga study tam? Mangiyunnug i elder ira tu paggarammammung nga ari mapansin na mangokkontra ira. Awayyada iyunnug nga magistudy kamu ta baraddi nga grupo, anna posible nga manguloli i oras anna lugar ira na study. Maprotektammu i wawwaragim ta study ira gukaban na silensio nga pattallung anna pallawan ta lugar ira na study. Awayyana gapa nga massinnun tu ari nga formal tapenu ari manga tu atension.

13. Anni i magigiammu tam ta wawwaragi tam ta dati nga Soviet Union?

¹³ Meyannung ta pallayyagayya, madduruma yaw depende ta sirkumstansia na lugar ira. Gafu ta iddeddu tam si Jehova anna kakayà tam kagian ta tanakuan i meyannung ta Pappatulanna, magaleg ittam tu tiansa tapenu makapallayyagayya. (Luc. 8:1; King. 4:29) Kunnaw i komento na historiador nga si Emily B. Baran meyannung ta pallayyagayya na Saksi ira ni Jehova ta dati nga Soviet Union: “Turi ta kinagi na gobiernu ta Saksi ira ni Jehova nga bawal ira nga mallayyagayya ta tanakuan, nilayyagayyadda i karrubada, i katrabahuda, anna i kokkofudda. Turi ta nefuku i Saksi ira megafu tatun, nilayyagayyadda i tanakuan ira nga presu.” Maski paga ta pangigamma, ari lagapa nagimmang nga mallayyagayya i wawwaragi tam ta dati nga Soviet Union. Nu megamma noka i pallayyagayya ta lugarnu, paray nakuan tu kunnatun gapa i determinasionnu!

14. Anni i abiso nittam na Salmo 39:1?

¹⁴ Magimmugug ta pangibillay tu informasion ta tanakuan. Ta tiempo na pangigamma, mawag tu malippawa tam nga egga i “tiempo na ari pattannug.” (Ecl. 3:7) Protektattam nakuan i informasion ira nga mawag tu mesekreto, gitta na ngagan na kapangngurug tam, lokasion na study, nu kunnasi i pallayyagayya, anna i pangalawa tam tu espiritual nga  makan. Ariattam nga ikagi danaw nga gannug ta totolay nga mattrabahu ta gobiernu onu ta kokkofun anna paparientes tam ta nasiottam onu ta tanakuan nga nasion, Saksi man ira onu ari. Nu ariattam magimmugug tatun nga gannug, mapappeligro tam i seguridad na wawwaragi tam.​—Bibbigan i Salmo 39:1.

15. Anni i kayà nga kuan ni Satanas nittam, ngem anni nakuan i kuattam?

¹⁵ Ari ipamavulun tu passirinan ittam na simple ira nga problema. Ammu ni Satanas nga ari matuyag i nassirina nga familia. (Mar. 3:24, 25) Ari yayya magimmang nga magangngua tu gannug nga mamassirina nittam. Yari tu, iddanamanna nga marralaban ittam imbes nga yayya i labanattam.

16. Anni nga makasta nga ehemplo i nipasingan ni Sister Gertrud Poetzinger?

¹⁶ Maski danuri ekspiriensadu nga Cristiano ay mawag nga magimmugug ta kunnatun nga silu. Ikonsidera i ekspiriensa na dua nga nazelugan nga sister nga da Gertrud Poetzinger anni Elfriede Löhr. Nefuku ira kavulu i karuan nga sister ta kampu konsentrasion na Nazi. Nappassil si Gertrud kani Elfriede megafu ta si Elfriede i mangiyawa tu makapagaram ira nga mensahe ta karuan nga sister ta kampu. Ta pappasa na tiempo, nappasiran si Gertrud anna nakimemallo nga nappoffun kani Jehova. Niturana: “Mawag tu akseptattam nga egga danuri mas maabilidad onu mas aru i responsibilidadna anne nittam.” Kunnasina nalabanan i passilna? Naffokus si Gertrud ta makasta ira nga kualidad anna positibo nga disposision ni Elfriede. Megafu tatun, netolina i makasta nga relasionna kani Elfriede. Naattammadda i maddian ta kampu konsentrasion anna matalo ira nga nasserbi kani Jehova adde ta nabalidda i pattoleda ta davvun. Nu mappursigi ittam nga solban i ari pakkarantindian ta wawwaragi, ariattam ipamavulun i maski anni nga mamassirina nittam.​—Col. 3:13, 14.

17. Ngatta kanayun nakuan nga tuttulattam i direksion nga naggafu ta organisasion ni Jehova?

¹⁷ Kanayun tuttulan i direksion. Nu tuttulattam i direksion nga nalawa tam ta mapattalakkan anna responsable ira nga brother, malillitattam i problema ira. (1 Ped. 5:5) Angngariganna, ta tadday nga nasion nu sitaw megamma i trabahu, nibilin na responsable ira nga brother ta publisher ira nga ariadda mangiyawa tu literatura ta paginformal witnessing-da. Ngem, egga i payunir nga brother nga ari siminuttul tatun nga direksion anna nangiyawa lagapa tu literatura. Anni i resultana? Ari nabbayag, kabalin na informal witnessing-da, yayya anna i karuan nga kavuluna ay ininteroga na pulis. Sifi-sifutan balo ira na pulis ira anna kinumpiskada i literatura ira nga nitanegda. Anni i magigiammu tam tatun  nga ekspiriensa? Mawag tu tuttulattam i direksion maski nu ariattam umanugu tatun. Kanayun nga bendisionan ni Jehova i pakikoopera tam ta wawwaragi tam nga sinunnona nga mangirollu nittam.​—Heb. 13:7, 17.

18. Ngatta ariattam nakuan magangngua tu ari mepangngo ira nga regulasion?

¹⁸ Ari magangngua tu ari mepangngo ira nga regulasion. Nu magangngua i elder ira tu ari mepangngo ira nga regulasion, magaggangngua ira tu pakadammakkan na tanakuan. Neraddamman ni Brother Juraj Kaminský i nesimmu turi ta tiempo na pangigamma ta dati nga Czechoslovakia: “Turi ta naaresto i responsable ira nga brother anna aru nga elder, i karuan nga brother nga ari naaresto ay namadday tu sarilida nga regulasion para ta publisher ira anna idiktada nu anni i kuan na publisher ira anna nu anni i ariadda nga kuan.” Ari ittam niddan ni Jehova tu autoridad nga maddesision para ta tanakuan. I tolay nga mangngua tu ari mepangngo ira nga regulasion ay arianna protektan i seguridad na wawwaragi, lallagu, ididdiktana i mawag nga kurugadda.​—2 Cor. 1:24.

19. Segun ta 2 Cronicas 32:7, 8, ngatta makapaggutu ittam maski anni paga i kuan ni Satanas?

¹⁹ I pinakakalabattam, si Satanas nga Diablo, ay ari nga magimmang ta panara-darum ta matalo ira nga aripan ni Jehova. (1 Ped. 5:8; Nep. 2:10) Purueban ni Satanas anna danuri massuporta nisa nga igamma i paddayaw tam kani Jehova. Ngem, maski paga nu maganassing ittam, ariattam vuluvuga magimmang nga masserbi kani Jehova! (Deut. 7:21) Kavulu tam si Jehova, anna kanayunna ittam nga suportan maski nu megamma i trabahu tam.​—Bibbigan i 2 Cronicas 32:7, 8.

20. Anni i determinasiommu?

²⁰ Parigattam nakuan i determinasion na ollu-siglo ira nga wawwaragi tam, nga nakkagi ta mammaguray ta kaggawadda: “Sikamu laggapa i maddisidi nu matunung ta arubang na Dios tu matuttul kamu anne ta Dios. Ta arian na awayya tu ariam-mi nga ilammuyag i nasingan anna nagigginna mi ira.”​—King. 4:19, 20.