NAPANNU i Biblia tu sinsero ira nga kinagi na totolay nga ‘egga panagenoda nga kagitta tam gapa.’ (Sant. 5:17) Angngariganna, alistu tam laman nga malippawa i kinagi ni Pablo nga mabibbig ta Roma 7:21-24: “Nu i mapia i ikaya ku nga kuan, i marakay lallagu i awayyà laman nga kuan. . . . Pakallallo ngà mabba ta kunnaw nga paddia-paddiak-ku!” Nu laba-labanattam i kina-imperfekto tam ira, makapagaram nga mammuan nga maski i matalo nga lalaki nga si Pablo ay nakatageno gapa tu kunnaw.

Egga paga i kinagi ni Pablo nga tanakuan nga panagenona. Kunna: I ‘Ana na Dios ay nangaya niakan anna nangitavvung ta inango na megafu niakan.’ (Gal. 2:20) Siguradu si Pablo tatun. Kunnatun kari gapa i ‘mataga-tageno’ tam? Awayyana nga ari gapa nga kanayun.

Nu makokkonsensia lagapa ittam megafu ta liwa tam ta nappasa, awayyana nga ariattam kurugan nga ayatan anna mapakoma ittam ni Jehova, kunne na paga nga marigatattam nga imammatan i tavvu bilang personal nga regalu nittam. Kunnatun kari i kayà ni Jesus nga pagimamma tam ta sakrifisiona? Nu kunnatun i pagimamma tam, anni i makoffun nittam nga moli yatun? Gigiammuattam danatun nga pakkiavu.

Wan, kayà ni Jesus nga imammatattam nga personal nga regalu i sakrifisiona. Ngatta makasiguradu ittam tatun? Nonopan i nerekord ta Lucas 23:39-43. Nepato ta estaka i tadday nga lalaki nga nebiko kani Jesus. Inaminna i marake nga nakuana ta nappasa. Posible nga madammo nga krimen i nakuana megafu ta i kunnatun laman nga krimen i mepangngo nga masentensian ta kapatay ta estaka. Grabe i vuru-vurung naw nga lalaki tapus nipakimemallona kani Jesus: “Daddammam-mà noka nu mammaguray ka ngana!”

Anni i reaksion ni Jesus? Nonopan nga attattamman ni Jesus i taki tapenu laman makalipay ta kriminal. Maski paga mataka-takitan yayya, nangngizzi si Jesus anna binanna-bannayanna i lalaki. Kinagina: ‘Ta kakurugan na kagiak-ku nikaw toye nga aggaw ay makitappaddiakka niakan ta Paraiso.’ Puede laman nakuan nga ikagi ni Jesus ta lalaki nga ‘minay i Ana na Tolay tapenu iyawana i inangona tapenu matavvu i aru nga totolay.’ (Mat. 20:28) Ngem napansinnu kari nga meddu nga kinagi ni Jesus nga para mismu ta lalaki i sakrifisiona? Talaga masippo i pinakkagina gafu ta niyusana i uvovug nga “nikaw” anna “niakan.” Anna kinagina paga ta lalaki nga mattolay yayya noka ta paraiso nga davvun.

Siguradu nga kayà ni Jesus nga akseptan naw nga lalaki i sakrifisio ni Jesus bilang personal nga regalu sa. Nu kunnatun i panageno ni Jesus tatun nga kriminal nga awan paga lagu tu tiansana nga masserbi ta Dios, siguradu gafu nga mas paga i matagenona ta bawtisadu nga Cristiano nga massesserbi ta Dios. Anni gafu i makoffun nittam nga talaga kurugan nga personal nga mabbenefisio ittam mismu ta panavvu ni Cristo maski paga ta nappasa ira nga nakaliwatattam?

Megafu ta nipa-annung ni Jesus kani Pablo i pallayyagayya, nalippawana nga natay si Jesus para nisa. Kunnasi? Nipakanawagna: “Mabbala-balo ngà kani Cristo nga Yafu tam nga nangiyawa ta sikak-ku nga mangngua ta annungak-ku. Mabbala-balo ngà ta nikwenta nà tu pammakatalakkan, sinullo nà nga masserbi sa, maski paga nu naguvovug ngà gari ta kontra sa, zinara-darum ku, anna pinasa-pasiranak-ku yaya.” (1 Tim. 1:12-14) Megafu ta niddan ni Jesus si Pablo tu annungan maski paga ta aru nga marake nga nakuana, nepasiguradu ni Jesus i allo, aya, anna pattalona nisa mismu. Nitalo gapa ni Jesus ta kada tadday nittam i annungan nga mallayyagayya. (Mat. 28:19, 20) Makoffun kari gapa yatun nga annungan tapenu malippawa tam nga natay gapa si Jesus para nittam?

Niyesplika ni Albert nga bagu pagalaman nga nakatoli kabalinna nga nadisfellowship tu maggi 34 dagun: “Ariakku makattaman i liwi-liwa ku. Ngem nu egga ngà ta ministerio, matageno ku i natageno ni apostol Pablo nga personal gapa nga nipa-annung niakan ni Jesus i pallayyagayya. Mas magayayya ngà anna mas positibo ngà meyannung ta baggì, ta pattolè, anna ta mappange ku.”​—Sal. 51:3.

Kunni Allan nga dati nga kriminal anna vayolente nigena nagigiammu i kinakurug: “Agga-nono ku lagapa danuri inaggrabiadù. Nu mittan, makokkonsensia ngà. Ngem mappabalo ngà kani Jehova megafu ta nipamavulunna i imperfekto nga kagittà nga mangilayyagayya tu mapia nga dumug ta tanakuan. Nu masingakku i reaksion na totolay ta mapia nga dumug, mepanono niakan i pia anna aya ni Jehova. Matageno ku nga usu-usannà tapenu uffunan danuri marigi-rigatan megafu ta marake ira nga nakuada.”

Ta pallayyagayya tam, makangngua ittam tu mapia anna positibo ira i manonono tam. Ipasiguradu natun i allo, aya, anna i pattalo ni Jesus nittam.

Adde ta ari paga nadaral i marake nga sistema ni Satanas, awayyana nga makokkonsensia ittam lagapa megafu ta nappasa ira nga liwa tam. Anni i makoffun nittam tapenu labanan yatun?

“Pia ngana laman ta ‘mas makawayya i Dios anne ta futu tam,’” kunni Jean, nga kanayun nga makokkonsensia megafu ta doble-kara nga pattolena ta kabbinna. (1 Juan 3:19, 20) Kagitta ni Jean, mabanna-bannayan ittam gapa megafu ta ammu tam nga malippawa ni Jehova anna ni Jesus nga minakkaliwa ittam. Daddamman nga meddu nga niyawada i tavvu, ari tu para ta perfekto nga totolay, nu ari, para turi ira ta mabbabbabawi.​—1 Tim. 1:15.

Makumbinsi ittam nga para nittam mismu i tavvu nu nonopattam tu mapia nu kunnasi i pinattratu ni Jesus ta imperfekto nga totolay anna nu kuattam i adde na mawayya tam tapenu tuppalan i ministerio tam nga nipa-annungna nittam. Nu kuattam yatun, makagi tam i kinagi ni Pablo: I ‘Ana na Dios ay nangaya niakan anna nangitavvung ta inango na megafu niakan.’