1-2. Ngatta megitta i tadday nga Cristiano ta atatannang nga building? (1 Corinto 15:58)

 TURI ta 1978, nepataddag i kuruga atatannang nga building ta Tokyo, Japan nga magadde ta 60 nga story. Nononopan danuri na makasingan tatun nu mattalupaddian kari nga agga-taddag yatun maski nu kanayun nga mallunig tatun nga siudad. Kunnasi kari nga dinisenio na inhiniero ira yatun nga building? Kingngua da yatun tu kuruga matuyag ngem mawayya natun i makibagay tapenu sabayan i sikan na kayayyag na davvun. Megitta i Cristiano ira tatun nga atatannang nga building. Kunnasi?

² Mawag tu parehu nga matuyag anna minakkibagay i tadday nga Cristiano. Masikan nakuan i pangurug na nga i pattuttul ta dorob anna estandarte ira ni Jehova i fustu nga makua. (Bibbigan i 1 Corinto 15:58.) ‘Sigga-paran gapa yayya nga tumuttul’ anna ari nga makkompromiso. Ngem mawag gapa tu minakkibagay onu “rasonable” yayya nu posible, onu nu yatun i kawagan na situasion. (Sant. 3:17, NW ) Nu balanse i tadday nga Cristiano, ari yayya nga sosobra nga istrikto onu kuruga minappagustu. Gigiammuattam taw nga artikulo nu kunnasi tam mapatuyag i pangurug tam. Ammuattam gapa i lima nga taktika ni Satanas tapenu pakkafian i determinasiottam anna ammuattam nu kunnasi tam labanan danatun.

3. Anni ira nga dorob na Katannangan nga Minangngiyawa tu Dorob i mabibbig ta Kingngua 15:28, 29?

³ Megafu ta si Jehova i Katannangan nga Minangngiyawa tu Dorob, kanayun nga manawag i dorob na para ta totolena. (Isa. 33:22) Angngarigan na, egga i tallu nga kinagi na manangngal nga baggi ta ollu nga siglo nga mawag tu kuan na Cristiano ira  tapenu mattalupaddian nga matuyag i pangurug da: (1) lillitan i idolatria anna si Jehova laman i dayawadda, (2) tuttulan i dob ni Jehova nga sagradu i daga, anna (3) tuttulan i atannang ira nga estandarte ni Jehova ta moral. (Bibbigan i Kingngua 15:28, 29.) Kunnasi nga makua na Cristiano ira sangawe yatun nga tallu nga gannug?

4. Kunnasi tam masiguradu nga si Jehova laman i dayawattam? (Nepakannammu 4:11)

⁴ Lillitattam i idolatria anna si Jehova laman i dayawattam. Nidog ni Jehova ta Israelita ira nga yayya laman i dayawadda. (Deut. 5:6-10) Turi gapa ta sinenta na Diablo si Jesus, manawag nga kinagi ni Jesus nga si Jehova laman i mawag tu dayawattam. (Mat. 4:8-10) Ari ittam gafu nga maddayaw ta sinan-dios onu ta idolo ira. Ari ittam gapa nga mangidolo tu totolay, kasali ngana i lider ira na relihion, pulitiko, sikat ira ta sports, artista, onu singer. Ari tam ira nga tratuan nga gitta na dios ira. Si Jehova laman i suportattam anna yayya laman i dayawattam megafu ta ‘pinaro na ngamin i adde na.’—Bibbigan i Nepakannammu 4:11.

5. Ngatta tuttulattam i dob ni Jehova nga sagradu i inango anna i daga?

⁵ Tuttulattam i dob ni Jehova nga sagradu i inango anna i daga. Ngatta? Megafu ta kagian ni Jehova nga isimbolo na daga i inango, tadday nga nabalor nga regalu naggafu ta nisa. (Lev. 17:14) Tagga ta ollu bi nga nipamavulun ni Jehova nga kuman i totolay tu karne na aya-ayam, nibilin na ta nira nga ariadda kanan i daga. (Gen. 9:4) Tagga ta niyawa na i Mosaiko nga Dob ta Israel, nidog na uli yatun. (Lev. 17:10) Tapus kinagi na gapa ta manangngal nga baggi ta ollu siglo nga bilinadda i ngamin nga Cristiano nga ‘ari ira kuman tu daga’ onu tulu-tuloy nga lillitan yatun. (King. 15:28, 29) Kada mangngua ittam tu desision meyannung ta papporu, tuttulattam yatun nga dob tapenu mepasingan nga matuyag i pangurug tam. b

6. Anni ira i mawag tu ikagumattam nga kuan tapenu matuttul tam i atannang nga estandarte ira ni Jehova ta moral?

⁶ Istrikto nga tuttulattam i atannang ira nga estandarte ni Jehova ta moral. (Heb. 13:4) Tabarangngan ittam ni apostol Pablo nga “pallikuran” onu patayattam i miembro ira na baggi tam. Kayà na kagian, mawag tu kuattam i ngamin nga mawayya tam tapenu alsan ta baggi tam i maski anni nga marake nga pakkaraga. Lillitattam nga innan onu kuan i maski anni nga mattuppal ta imoralidad. (Col. 3:5; Job 31:1) Nu matenta ittam, insigida nga panakitattam i maski anni nga appana-panono onu annangngua nga makadaral ta relasiottam ta Dios.

7. Anni nakuan i determinadu nga kuattam, anna ngatta?

⁷ Ekspektan ni Jehova nga ‘mamarulo ittam ta napafutu.’ (Roma 6:17) Kanayun nga pammakapianattam i pangigiya na anna ari tam puede nga ulian i dorob na. (Isa. 48:17, 18; 1 Cor. 6:9, 10) Ikagumattam nga pagayayyatan si Jehova anna parigan i appana-panono na salmista nga nakkagi: “Dinisidì ngana tu i dorob mu ira ay parulattak-ku adde ta ikagatta na inango ku.” (Sal. 119:112) Ngem ikaguman ni Satanas nga pakkafian yatun nga determinasiottam. Anni ira i taktika na?

8. Kunnasi nga usan ni Satanas i pameppersigi tapenu pakkafian i determinasiottam?

⁸ Pameppersigi. Atakeyan ittam na Diablo ta pisikal anna ta emosional megafu ta kayà na nga pakkafian i determinasiottam. Gakkag na nga “kanan” ittam onu daralan i relasiottam kani Jehova. (1 Ped. 5:8) I Cristiano ira ta  ollu nga siglo ay naana-anassing, nasissillagan, anna napatay megafu ta determinadu ira nga mattalupaddian nga matuyag. (King. 5:27, 28, 40; 7:54-60) Magadde sangawe, usu-usan lagapa ni Satanas i pameppersigi. Masingan yatun ta brutal nga katratu na wawwaragi tam ta Russia anna ta tanakuan paga nga nasion, kunne na gapa ta personal nga kapeppersigi na wawwaragi megafu ta kumokkontra ira.

9. Ngatta mawag tu magimmugug ittam ta ari mataga-tageno nga pamipilit? Mangistoria tu angngarigan.

⁹ Ari mataga-tageno nga pamipilit. Fuera paga ta direkta nga pameppersigi, mangusa gapa si Satanas tu “pangilogo.” (Efe. 6:11) Kunnatun i naekspiriensa ni Brother Bob nga nahospital megafu ta major nga operasion. Kinagi ni Bob ta doktor na ira nga ari yayya nga mappa-blood transfusion maski anni paga i mesimmu. Minanugu i doktor nga magopera bilang pangirespeto ta desision na. Ngem ta gabi nige na operasion, turi ta nakalubbe ngana i familia ni Bob, binisita yayya na tadday paga nga doktor na. Kinagi natun nga doktor kani Bob nga ari mabba yayya nga matubbakkan tu daga. Ngem egga i ireserba da nga daga nu angngarigan na tu kawagan yatun. Baka nanono gare natun nga doktor nga ulian ni Bob i desision na nu awan ngana i familia na. Ngem nattalupaddian nga matuyag si Bob. Kinagi na tatun nga doktor nga ari yayya nga mappatubbo tu daga maski anni paga i mesimmu.

10. Ngatta silu i annonopan na totolay? (1 Corinto 3:19, 20)

¹⁰ Annonopan na totolay. Nu ibase tam laman i ganna-gannug ta annonopan na totolay, baka ari tam ngana nga tuttulan si Jehova anna i dorob na. (Bibbigan i 1 Corinto 3:19, 20.) Maruddu nga pagustuan laman na “ka-uto toye ta mundo” i neravvunan ira nga pakkaraga. Egga ira i Cristiano ta Pergamo anna ta Tiatira nga nappa-influwensia ta totolay ta pallevu da nga imoral anna maddayaw ta idolo. Nangiyawa si Jesus tu madammo nga tabarang tatun nga dua nga kongregasion megafu ta kinunsinti da i imoralidad. (Nep. 2:14, 20) Maski sangawe, influwensian ittam na totolay ta pallevu tam nga parigan i ugal nga appana-panono da. Awayya na tu kumbinsian ittam na kafamilia anna na kakilala tam ira nga sobra ngana mabba i ka-istrikto tam. Kayà da nga makkompromiso ittam. Angngarigan na, baka kagiadda tu okay laman nga pagustuattam i pakkaraga tam anna dadana ngana i estandarte ira ta moral na Biblia.

11. Anni i mawag tu lillitattam tapenu mabbalin ittam tu matuyag?

¹¹ Nu mittan, baka nonopattam nga ari tu kuruga manawag i direksion ni Jehova. Baka matenta ittam paga lagu nga “sossobran i gannug ira nga netura.” (1 Cor. 4:6, NW ) Kunnatun i nakaliwatan na mangirollu ira ta relihion ta tiempo ni Jesus. Inammungadda tu sarili da ira nga bilin i Dob yayya nga nadammakkan lallagu i ordinariu nga totolay. (Mat. 23:4) Sangawe, manawag i direksion nga iyayawa ni Jehova ta nittam gukaban na Uvovug na anna na organisasion na. Awan gafu tu rasottam nga ammungan i instruksion nga iyayawa na. (Prov. 3:5-7) Ari tam nakuan gafu nga sossobran nu anni i netura ta Biblia, ni tu mamadday ittam tu reglamento ira para ta wawwaragi meyannung ta personal ira nga gannug.

12. Kunnasi nga mangiwara si Satanas tu “awan tu kebalinan anna makelogo nga tuddu”?

¹² Pangilogo ira. Mangusa si Satanas tu “awan tu kebalinan anna makelogo nga tuddu” tapenu ilogo anna passirinan i totolay. (Col. 2:8) Ta ollu nga siglo, nelagum tatun i pilosopia ira nga nebase ta appana-panono na totolay, tuddu ira na Judio nga ari nebase ta Katurakan, anna i tuddu nga mawag tu tuttulan na Cristiano ira i Mosaiko nga Dob. Makelogo danatun megafu ta ari  lallagu nga manono na totolay i kurug nga Paggafuan na ka-uto, si Jehova. Sangawe, usu-usan ni Satanas i TV, Internet, anna social network ira tapenu mangiwara tu conspiracy theory ira anna pinadda-padday nga balita nga naggafu ta pulitiko ira. Kakkaru i kunnatun nga nasingattam ta tiempo na COVID-19 pandemic. c Napakaru i navvuru-vurung megafu ta nagginna ira ta makelogo nga informasion. Ngem nelilli tatun i Saksi ira ni Jehova nga nagginna ta pangigiya na organisasiottam.​—Mat. 24:45.

13. Ngatta magimmugug ittam nakuan kontra ira ta makawan ta fokus tam?

¹³ Gannug ira nga makawan ta fokus tam. Kanayun nakuan nga nakafokus ittam ta “mas importante nga ganna-gannug.” (Fil. 1:9, 10, NW ) Nu awan gare ittam ta fokus, aru nga tiempo anna sikan i masayang. I ganna-gannug ira nga normal nga kuattam ta kadaggaw, kagitta na pakkakan, paginum, parrelaks, anna sekular nga trabahu ay awayya na tu makawan ta fokus tam nu danatun laman i talattangngawattam. (Luc. 21:34, 35) Kadaggaw gapa nga makaginna anna makabibbig ittam tu balita ira meyannung ta papprotesta anna debate ira ta pulitika. Siguraduattam nakuan nga ari nga mawawwan i fokus tam megafu tatun ira nga paddarama da. Ta nu mesimmu yatun, baka mamegafu ngana gapa nga egga i panigattam ta nono anna ta futu tam. Usu-usan ni Satanas ngamin ira nga taktika nga nakagi ta nappasa ira nga parapo megafu ta gakkag na nga pakkafian i determinasiottam nga kuan i fustu. Ammuattam ngana nu kunnasi tam nga labanan danatun nga taktika na anna mattalupaddian nga matuyag.

14. Anni i makaduffun tapenu kanayun nga matuyag ittam anna masuportattam si Jehova?

¹⁴ Nonopan nu ngatta naddedika anna nappabawtiso ka. Kingnguam danatun nga desision megafu ta kayà mu nga suportan si Jehova. Nonopan gapa i nangumbinsi ta niko nga nalegammu i kinakurug. Ginigiammum i fustu nga pakannammu meyannung kani Jehova yayya nga irespeto anna ayatammu yayya bilang Yamam ta langi. Napeggakka gapa tu pangurug anna napaguyu ka nga mabbabawi.  Niyemmammu i mangngua tu ganna-gannug nga ikalussaw ni Jehova anna kukukuammu ngana i makapagayayya ta nisa. Nabanna-bannayakka megafu ta natageno mu nga pinakoma naka na Dios. (Sal. 32:1, 2) Nagatende ka gapa ta study ira anna nilayyagayyam ta tanakuan i makasta ira nga nagigiammum. Sangawe ta dedikadu anna bawtisadu ka ngana nga Cristiano, lumalakag ka ngana ta dalan mappange ta inango anna determinadu ka nga ari nga manaw tatun nga dalan.​—Mat. 7:13, 14.

15. Ngatta pammakapianattam i paggigiammu anna pannono tu mapia?

¹⁵ Gigiammuan i Uvovug na Dios anna pannonopan tu mapia yatun. I tadday nga fun na kayu ay mattalupaddian nga matuyag nu aralam i nikegamu natun. Mattalupaddian gapa nga matuyag i pangurug tam kani Jehova nu negamu yatun ta Uvovug na Dios. Habang dumaka-dakal i tadday nga kayu, mas nga umunag anna mas nga mawwara i gamu na ira. Nu maggigiammu anna mannono ittam tu mapia, mapatuyag tam i pangurug tam anna maponag tam i kombiksiottam nga kapianan i dala-dalan na Dios. (Col. 2:6, 7) Pannonopan nu kunnasi nga nakaduffun ta aripan ira ni Jehova ta nappasa i instruksion, pangigiya, anna proteksion na. Angngarigan na, nagginna tu mapia si Ezekiel turi ta memmugug nga ginukug na tadday nga anghel i templo nga nasingan na ta sirmata. Pinasikan naw nga sirmata si Ezekiel anna aru gapa i magigiammu tam tatun nu kunnasi tam nga matuttul i estandarte ira ni Jehova para ta marenu nga paddayaw. d (Eze. 40:1-4; 43:10-12) Pammakapianattam gapa nu iddattam tu tiempo nga gigiammuan anna pannonopan tu mapia i monag ira nga gannug ta Uvovug na Dios.

16. Kunnasi nga nabbalin nga proteksion kani Bob i matuyag nga futu? (Salmo 112:7)

¹⁶ Mapeggan tu matuyag nga futu. Nikagi ni Patul David i ari manguli nga pangaya na kani Jehova turi ta nikansion na yaw: “Matuyag i futù, O Dios.” (Sal. 57:7, NW ) Awayya tam gapa i mapeggan tu matuyag nga futu nga kayà na kagian, masikan i pattalo tam kani Jehova. (Bibbigan i Salmo 112:7.) Yatun i nakaduffun kani Bob nga nakagi ta gafu. Turi ta nikagi da ta nisa nga egga i ireserba da tu daga nu angngarigan  na tu kawagan na yatun, insigida nga simibbag yayya nga nu angngarigan tu tubbakkadda yayya tu daga, insigida nga manaw yayya ta hospital. Turi kua, kunnaw i niyistoria ni Bob: “Ari ngà vuluvuga nadduda ni tu navurung ta puede nga mesimmu.”

17. Anni i magigiammu tam ta ekspiriensa ni Bob? (Innan gapa i letratu.)

¹⁷ Nabbalin tu matuyag si Bob megafu ta dati ngana nga nadesision na nga ari makkompromiso nige paga yayya nga nehospital. Ollu, kayà na nga mapagayayya si Jehova. Mekadua, memmugug nga ginigiammu na i kakkagian na Biblia anna na nebase-Biblia ira nga publikasion nu ngatta sagradu i inango anna i daga. Mekatallu, kumbinsidu yayya nga mannanayun i pammakapianan ira na pattuttul ta direksion ni Jehova. Awayya tam gapa i mapeggan tu matuyag nga futu maski anni paga nga kapurueba i arubangattam.

18. Anni i magigiammu tam kani Barak meyannung ta pattalo kani Jehova? (Innan i letratu ta vungun.)

¹⁸ Mattalo kani Jehova. Nangaffu ta gerra si Barak megafu ta pattalo na ta direksion ni Jehova. Tatun nga tiempo, ari tu preparadu nga makiggerra i Israelita ira megafu ta awan vuluvuga tu armas da. Ngem kinagi ni Jehova kani Barak nga umay yayya nga makiggerra kontra ta panakallan na Canaanita ira nga si Sisera tuange ta suddalu na ira nga napakaru i armas da. (Uk. 5:8) Kinagi na profetisa nga si Debora kani Barak nga makkazza ira ta pina nga davvun tapenu labanan si Sisera anna i 900 nga karuahe na ira. Maski nu gitta na bentaha para ta kalaban nu ta pina nga davvun i parralaban, nattuppal lagapa si Barak. Ta pakkazza na suddalu ira ta Vukig Tabor, pinagurang ni Jehova tu masiki-sikan. Megafu tatun, neludag ta fuyo i karuahe ira ni Sisera anna pinangaffu ni Jehova si Barak. (Uk. 4:1-7, 10, 13-16) Pangaffutan ittam gapa ni Jehova nu mattalo ittam nisa anna ta direksion nga iyawa na gukaban na organisasion na.​—Deut. 31:6.

19. Ngatta kayà mu nga pattalupaddianan nga matuyag i pangurug mu?

¹⁹ Adde ta mattotolay ittam paga taw nga sistema na ganna-gannug, mawag tu kuattam i adde na mawayya tam tapenu mattalupaddian nga matuyag i pangurug tam. (1 Tim. 6:11, 12; 2 Ped. 3:17) Determinadu ittam nakuan gafu nga ari nga mappagugguyag ta kapeppersigi, ari nga mataga-tageno nga pamipilit, annonopan na totolay, pangilogo ira, anna gannug ira nga makawan ta fokus tam. (Efe. 4:14) Mattalupaddian ittam nakuan lallagu nga matuyag anna kanayuttam nga iddukan si Jehova anna tuppalan i dorob na. Ngem mawag gapa tu mabbalin ittam nga rasonable. Gigiammuattam ta tumunug nga artikulo nu ngatta perfekto nga ehemplo na pabbalin tu rasonable si Jehova anna si Jesus.