1. Anni ira i nagigiammum turi ta namegafu ka nga mab-Bible study?

 MANONO mu paga kari turi ta namegafu ka nga mab-Bible study? Baka nakaddagakka nga egga gabba ngagan na Dios. Awayya na gapa nga nabanna-bannayakka nga ari nga parigatan na Dios i totolay ta umafa-afi nga infiernu. Siguradu gapa nga nagayayya ka nga mammuan nga awayyam paga balo nga makavulu uli i minatay mu ira ta paraiso nga davvun.

2. Fuera paga ta nagigiammum ira ta Biblia, anni paga i napprogresowammu? (Efeso 5:1, 2)

² Durante nga mas ginigiammum i Biblia, mas gapa ziminakal i aya mu kani Jehova. Yatun nga aya i namaguyu nikaw nga iyaplika i nagigiammum. Nakangngua ka tu mas makasta ira nga desision base ta prinsipio ira na Biblia. Nagigiammum nu kunnasi i mannono anna kuan i fustu megafu ta kayà mu nga mapagayayya i Dios. Nu kunnasi nga paparigan na tadday nga abbing i minaggiddu nga magana na, pinarigammu gapa i Yamam ta langi.​—Bibbigan i Efeso 5:1, 2.

3. Anni ira nga pakkiavu i puede nga iyavu tam ta baggi tam?

³ Puede tam nga iyavu ta baggi tam: ‘Mas ayatakku ngana kari si Jehova sangawe anne turi ta gafù nga nabbalin tu Cristiano? Mas naparigakku ngana kari si Jehova kabalin na bawtismò gukaban na pangipasingakku tu aya ta wawwaragì?’ Nu matageno mu nga nallammin ngana ‘i pangaya mu gari ta gafu na,’ ari mu nakuan pakkafian i nono mu. Gitta na kunnatun gapa i nesimmu ta Cristiano ira ta ollu nga siglo. Ari nga nawawanan tu iddanama si Jesus ta nira. Ari gapa yayya mawawanan tu iddanama ta nittam. (Nep. 2:4, 7) Ammu na nga awayya tam paga metoli i aya nga natageno tam turi ta ollu nga nagigiammu tam i kinakurug.

4. Anni i gigiammuattam taw nga artikulo?

 ⁴ Taw nga artikulo, gigiammuattam nu kunnasi tam metulu-tuloy nga padakallan i aya tam kani Jehova anna ta tanakuan. Tapus innattam nu anni ira i bendision nga malawa tam anna na tanakuan nu padakallattam i aya tam.

5-6. Anni ira i inarubang ni apostol Pablo ta pamministerio na, ngem anni i nakoffun tapenu tulu-tuloy yayya nga makapasserbi kani Jehova?

⁵ Nagayayya si apostol Pablo ta passerbi na kani Jehova. Ngem aru nga pakarigatan i inarubang na. Maruddu nga mabbiahe si Pablo tu ararayyu anna ari tu mapaleg i pabbiahe tatun ira nga tiempo. Ta pabbiahe na, neparubang yayya ta ‘aru nga peligro ta dana-danum’ anna ‘aru nga peligro ta tulisan ira.’ Egga gapa ira i tiempo nga sinissillagan anna binara-barag yayya na kumokkontra ira ta nisa. (2 Cor. 11:23-27) Ari gapa kanayun nga appresian na wawwaragi si Pablo ta sakrifisio ira nga kukukuan na tapenu maduffunan ira.​—2 Cor. 10:10; Fil. 4:15.

⁶ Anni i nakoffun kani Pablo tapenu tulu-tuloy nga makapasserbi kani Jehova? Aru i nammuan ni Pablo meyannung kani Jehova ta Katurakan anna ta mismu nga ekspiriensa na ira. Nakumbinsi si Pablo nga iddeddukan yayya ni Jehova nga Dios. (Roma 8:38, 39; Efe. 2:4, 5) Yatutta mas gapa nga iniddu na si Jehova. Nipasingan ni Pablo i aya na kani Jehova gukaban na ‘panguffun na ta kakavvulu na ta angngurug.’—Heb. 6:10.

7. Anni i tadday nga makua tam tapenu mapadakal tam i aya tam kani Jehova?

⁷ Mapadakal tam i aya tam ta Dios gukaban na malallappo nga paggigiammu ta Biblia. Durante nga bibbigammu yatun, pannonopammu nu anni i ikakkagi natun meyannung kani Jehova. Iyavu mu ta baggim: ‘Kunnasi nga ipasingan naw nga parte na Biblia nga iddeddukan nà ni Jehova? Anni ira i nabibbig ku taw nga makoffun tapenu iddukakku si Jehova?’

8. Kunnasi nga makoffun ta nittam i pakimallo tapenu mapadakal i aya tam ta Dios?

⁸ Mapadakal tam gapa i aya tam kani Jehova nu kanayun nga ivuvvu tam ta pakimallo i mayan na futu tam. (Sal. 25:4, 5) Anni gapa i kuan ni Jehova? Tabbagan na i pakimallo tam ira. (1 Juan 3:21, 22) Istorian ni Khanh, tadday nga sister ta Asia: “Iniddu ku bi ta ollu si Jehova gafu ta nagigiammù meyannung nisa. Ngem mas ziminakal i aya ku ta nisa turi ta nasingakku i panabbag na ta pakimallo ku ira. Megafu tatun, ikaya ku nga kuan i gannug ira nga mamagayayya ta nisa.” b

9. Kunnasi nga nipasingan ni Timoteo nga pinadakal na i aya na ta tanakuan?

⁹ Piga ragun kabalin nga nabbalin tu Cristiano si Pablo, nakilala na i malalaki nga kabataan nga si Timoteo. Iddukan ni Timoteo si Jehova anna iddukan na i totolay. Turi kua, kinagi ni Pablo ta taga-Filipos ira: “Yaya laman i kagittà nga egga i pangikavurung na ta paddia-paddian nu.” (Fil. 2:20) Ari nga i kalalaki ni Timoteo nga mangorganisa onu mappalappa ta publiko i kinagi ni Pablo. Inappresia na lallagu i aya ni Timoteo para ta wawwaragi. Siguradu nga kakayà na kongregasion ira nga nasserbian ni Timoteo kada mabbisita yayya ta nira.​—1 Cor. 4:17.

10. Kunnasi nga nipasingan ni Anna kunne na gapa na atawa na i aya da para ta wawwaragi?

¹⁰ Magala-aleg ittam gapa tu makua tam tapenu makoffun ta wawwaragi tam. (Heb.  13:16) Kunnatun i ekspiriensa ni Anna nga nakagi ta nappasa nga artikulo. Kabalin na masikan nga bagiu, binisita da na lakena i balay na tadday nga Saksi nga familia. Nasingadda nga zinaral na bagiu i ato. Megafu tatun, awan tu marenu nga sinnun nga meyusa na familia. Kinagi ni Anna: “Ina mi i sinnudda ira, binabbalammi, anna nitoli mi yatun nga naplancha ngana anna nakappil. Para nikami, baddi laman nga uffun yatun. Ngem megafu tatun, nabbalikkami tu madukko nga makkorofun adde sangawe.” Megafu ta aya ni Anna kunne na gapa na atawa na para ta wawwaragi, nanguffun ira tu praktikal.​—1 Juan 3:17, 18.

11. (a) Anni i efekto na ta tanakuan na pappursigi tam nga mangipasingan tu aya? (b) Base ta Proverbio 19:17, anni i kuan ni Jehova nu mangipasingan ittam tu aya?

¹¹ Nu masippo ittam anna ipasingattam i aya ta tanakuan, masingadda i pappursigi tam nga parigan si Jehova. Magga appresiadda i kinasippo tam maski nu ari da nga mekagi yatun ta nittam. Magayayya si Khanh nga nakagi ta gafu kada manono na danuri i nanguffun ta nisa. Istorian na: “Mappappabalo ngà ta ngamin nga meddu nga sister nga nangivulu niakan ta pallayyagayya. Sunduaddà, imbitaddà nga mammerienda onu mal-lunch, tapus itulug dà mana saw ta balemi. Nanono ku nga dakal i sakrifisio da para nio. Kiningngua da yatun megafu ta ayataddà.” Siempre, ari tu ngamin nga uffunattam ay mappabalo ta nittam. Kunnaw i kagian ni Khanh tari ira ta nanguffun ta nisa: “Kayà ku nakuan gapa nga itoli bi i ngamin nga kinasippo nga kingngua da para ta niakan. Ngem kakku ngana ammu nu sitaw i paddianadda. Ngem ammu yatun ni Jehova. Yari tu ipakimallo ku nga yayya ngana i mamala-balo ta nira para ta nio.” Fustu si  Khanh. Masingan ni Jehova maski i kabadditan nga kukukuattam tapenu ipasingan i kinasippo. Imammatan na yatun bilang nabala-balor nga sakrifisio anna gatu nga mawag tu pagan na.​—Bibbigan i Proverbio 19:17.

12. Kunnasi nga mepasingan na brother ira i aya da para ta kongregasion? (Innan gapa i letratu ira.)

¹² Nu tadday ka nga brother, kunnasim mepasingan i aya mu ta tanakuan anna maduffunan ira? Niyavu na kabataan nga brother nga si Jordan ta tadday nga elder nu anni paga i makua na tapenu makoffun ta kongregasion. Kinomendan na elder i napprogresowan na anna kinagi na nu anni paga i makua na tapenu makoffun. Angngarigan na, kinagi na kani Jordan nga mabi yayya nga umay ta Kingdom Hall anna i-welcome na i tanakuan, makkomento yayya ta study ira, kanayun nga mallayyagayya kavulu i kagrupo na ira, anna magaleg tu praktikal nga meyuffun na ta tanakuan. Turi ta niyaplika ni Jordan yatun ira nga suhestion, ari na laman nga nagigiammu i bagu ira nga skill. Napadakal na gapa i aya na para ta wawwaragi. Nagigiammu ni Jordan nga nu mabbalin tu ministerial nga aripan i tadday nga brother, ari tu tatun pagalaman i gafu na panguffun na ta tanakuan, nu ari lagu, itulu-tuloy na i dati ngana nga panguffun na ta nira.​—1 Tim. 3:8-10, 13.

13. Kunnasi nga pinaguyu na aya si Christian tapenu mabbalin uli tu elder?

¹³ Kunnasi nu dati ka nga ministerial nga aripan onu elder? Ari nga kattaman ni Jehova i nakuam anna i aya nga namaguyu nikaw tapenu kuan yatun. (1 Cor. 15:58) Masingi-singan na gapa i aya nga tulu-tuloy mu nga ipasingan. Nadismaya i tadday nga brother nga si Christian turi ta nalsa yayya nga elder. Ngem kagian na: “Nadisidì nga kuan i adde na mawayyà tapenu masserbi kani  Jehova megafu ta aya—egga man onu awan tu pribilehiò.” Turi kua, netoli gabbalaman yayya bilang elder. Inamin ni Christian: “Mediu magalangan ngà nga masserbi uli. Ngem nadisidì nga nu ipamavulun ni Jehova nga masserbi ngà uli bilang elder megafu ta allo na, kuakku yatun megafu ta aya ku ta nisa anna ta wawwaragì.”

14. Anni i magigiammum ta kinagi ni Sister Elena?

¹⁴ Ipasa-pasingan gapa na aripan ira ni Jehova i aya ta kasittoleda. (Mat. 22:37-39) Angngarigan na, kunnaw i kinagi ni Sister Elena nga taga-Georgia: “Ta ollu na bi, mallayyagayya ngà gafu ta aya ku kani Jehova. Ngem durante nga ziminakal i aya ku ta Yamà ta langi, ziminakal gapa i aya ku para ta totolay. Nikagumakku nga pannonopan i problema ira nga ara-arubangadda anna i topiko ira nga awayya na tu makatukkal ta futu da. Gafu ta mas nga pinannonopakku yatun, mas ikaya ku nga duffunan ira.”​—Roma 10:13-15.

15-16. Gitta na masingan ta letratu, anni ira i bendision na pangipasingan tu aya ta tanakuan?

¹⁵ Nu ipasingattam i aya ta wawwaragi, ari laman tu ira i mabbenefisio. Turi ta namegafu i COVID-19 pandemic, sinudduan ni Brother Paolo anna na atawa na i aru nga bako nga sister nga usan i gadyet da ta pallayyagayya. Tadday nga sister i narigatan ta gafu na nga usan i gadyet na, ngem nagigiammu na gabbalaman yatun. Inusa na yatun tapenu  membitan na i parientes na ira nga magatende ta Memorial. Sasenta ta nira i nagatende ta videoconference! Nabbenefisio i sister anna i parientes na ira megafu ta lallappo ni Paolo anna na atawa na. Turi kua, nattura i sister kani Paolo: “Mabbalo ta panguffun nu nikami nga babbako. Ariakku vuluvuga mattaman i pangikavurung nikami ni Jehova anna i pabbabbannag nu nga nanuddu nikami.”

¹⁶ Nakagigiammu si Paolo ta kunnatun ira nga ekspiriensa. Nipanono ta nisa natun nga mas importante i aya anne ta karu na ammu onu kalalaki na tadday nga tolay. Istorian na: “Dati ngà nga circuit overseer. Makagì sangawe nga maski nu nattaman ngana na wawwaragi i palappa ku ira tagga, manono da lagapa i praktikal ira nga neyuffukku ta nira.”

17. Sinni paga i mabbenefisio nu ipasingattam i aya?

¹⁷ Nu ipasingattam i aya ta tanakuan, sittam mismu ay makalawa tu ari ekspektan ira nga benefisio. Napakurug yatun ni Jonathan nga taga-New Zealand. Tadday nga Sabadu na fugag, mapatu i tiempo, nasingan na i tadday nga brother nga payunir nga magitetadday nga mallayyagayya ta dalan. Nanono ni Jonathan nga vulunan yatun nga payunir kada Sabadu na fugag. Ari na nga inekspekta nga daka-dakal gabba i benefisio nga mala na ta kinasippo nga kingngua na. “Tatun bi nga tiempo ta pattolè,” inamin ni Jonathan, “ari ku kuruga ma-enjoy i pallayyagayya. Ngem durante nga gigginnakku i panuddu natun nga payunir anna nasingakku nga mavunga i ministerio na, na-enjoy ku ngana gapa i mallayyagayya. Napeggan ngà paga tu kofun nga manguffun niakan tapenu makkasta i espiritualidad ku, ma-enjoy i ministerio, anna mas nga maddukko kani Jehova.”

18. Anni i kayà ni Jehova nga kuattam?

¹⁸ Kayà ni Jehova nga mapadakal tam ngamin i aya tam ta nisa anna ta tanakuan. Gitta na nagigiammu tam, mapadakal tam i aya tam kani Jehova gukaban na pabbibbig ta Uvovug na, pannono tu mapia tatun, anna regular nga pakimallo ta nisa. Mapadakal tam gapa i aya tam ta wawwaragi gukaban na panguffuttam ta nira ta praktikal. Durante nga dumakal i aya tam, mas mabbalin ittam nga madukko kani Jehova anna ta wawwaragi tam. Magadde noka ta mannanayun danatun nga pakkorofun!