Si Papa ay tadday nga elder ta United Church of Canada nga relihion na Protestante ta diammi. Yayya nga kada Liggu na umma, iyangay nakami na uriakku nga wagì ta klase ira nga niyunnug na simbahan para ta abbarabbing. Tapus nu alas-11 ngana na umma, mevulu kami nisa ta passimba na. Kada fugag gapa, ivulu nakami ni Mama ta Kingdom Hall. Mabi mi laman nga masingan i nadduman natun nga dua nga relihion.

Nikaga-kagi na yena mi i bagu ira nga nagigiammu na ta madukko nga kokkofun na nga da Bob anna Marion Hutcheson. Inalawa da gapa i kinakurug. Tapus ta 1958, nivulu dà na magatawa nga Hutcheson kavulu i tallu nga ána da ta Divine Will International Assembly ta New York City. Walu nga aggaw yatun. Nu nonopakku yatun, sangawè lang na-realize nga narigatan siguru ira ta pangivulu nio. Ngem yatun nga asembli i tadday ta pinaka-ariakku makattaman.

Tagga ta tinedyer ngà paga, maddiakkami ta koman, nu sitaw magalaga kami tu nadduruma nga ayam. Ninonono ku nga kayà ku i mabbalin tu veterinarian. Niyistoria yatun na yenà ta tadday nga elder ta kongregasion. Masippo yatun nga elder anna niperaddam na nio nga mattotolay ittam ngana ta “pangurianan ira nga aggaw.” Niyavu na gapa nio nu anni tamma i efekto na ta relasiokku kani Jehova nu mak-college ngà tu piga nga ragun. (2 Tim. 3:1) Gafu tatun, nadesisiokku nga ari ngana nga mak-college.

Nononopakku lagapa nu anni saw i kuakku nu mag-graduate ngà ta haiskul. Mallawa-lawan ngà kada weekend ngem kakku ma-enjoy yatun anna kakku maimajin nga mabbalin ngà tu payunir. Tatun gapa nga tiempo, kayà na ari tu Saksi nga yamà anna na angkal ku nga mattrabahu ngà tu full-time ta dakal nga insurance company ta Toronto. Atannang i posision na angkal ku tari, yayya nga inalawa ku yatun nga trabahu.

 Ta Toronto, kanayun ngà nga magovertime ta trabahu anna puru ari tu Saksi i kakavvulu ku, yayya nga ari ngà ngana nga regular ta study anna pallayyagayya. Naddian ngà bi ta kakè nga ari tu Saksi ngem kustu ta natay yayya, mawag ku i magaleg tu tanakuan nga paddianan.

I magatawa nga Hutcheson nga nangivulu bi nio ta 1958 nga kombension ay kwenta magana ku ngana. Inagaladdà nga maddian ta baleda anna zinuffunaddà nga mapprogreso ta espiritual. Ta 1960, nappa-baptize ngà kavulu i ana da nga si John. Tapus, nappayunir si John yayya nga napagaram ngà nga mas paga mallallappo ta ministerio. Napansin na brother ira ta kongregasion i papprogresò. Turi kua, natunno ngà bilang Theocratic Ministry School servant. a

Ta 1966, nakkasal kami ni Randi Berge, tadday nga malappo nga payunir nga kakayà na i masserbi nu sitaw mas dakal i pakawagan. Nangipasingan tu personal nga interes ta nikami i traveling overseer mi. Pinagaram nakami nga duffunan i kongregasion ta Orillia, Ontario. Yayya nga insigida kami nga nagali tari.

Ta paddattal mi ta Orillia, insigida ngà nga nar-regular payunir kagitta ni Randi. Nanala ku ngana gapa i fermi nga ayayya na ta ministerio! Tapus kukukuakku ngana gapa i adde na mawayyà nga mabbalin tu mapia nga payunir. Magayayya ngà ngana nga usan i Biblia anna masingan nga mantindian na totolay i kinakurug. Talaga bendision nga maduffunan i tadday nga magatawa ta Orillia nga inuli da i pattoleda anna nabbalin tu aripan ni Jehova.

Ta pabbisita mi ta Toronto, nakilalà si Arnold MacNamara, tadday ta brother ira nga mangirollu ta Bethel. Niyavu na nio nu kayà mi i magespesial payunir. Insigida nga kukku ta nisa: “Siempre gapa! Maski sitaw, basta ari tu ta Quebec!”  Nafektan ngà gare na negatibo nga mataga-tageno danuri na maguvovug tu English ta Canada meyannung ta gulu ira ta pulitika ta probinsia na Quebec nga French i paguvovug da. Tatun nga tiempo, napprotesta i totolay kontra ta gobiernu anna kayà da nga mesina i probinsia na Quebec ta Canada.

Kunni Arnold ta nio, “Ta Quebec laman sangawe nga mangidog i branch tu special pioneer ira.” Insigida nga minanugu ngà nga umay tari. Ammù nga kayà ni Randi nga masserbi kami tari. Turi kua, nanono ku nga tadday yatun ta kakastan nga desision nga kingngua mi!

Kabalimmi nga naggigiammu ni Randi tu French kavulu i tadday paga nga magatawa tu lima nga ligguan, minay kami ngana ta Rimouski. Ma-540 kilometro yatun ta northeast na Montreal. Aru paga i mawag tu magigiammu mi. Mas nga nasingammi yatun tagga ta nibibbig ku i anunsio ira ta tadday nga study. Kinagì nga ta mappapange nga kombension, aru saw i “ostrich nga delegadu,” imbes nakuan tu “Austrian nga delegadu.”

Ta Rimouski, egga i appa nga matalikarag nga single nga sister nga nevulu ta nikami nga appa, kunne na gapa i magatawa nga Huberdeau anna i dua tu ana da nga babay. Marrenta tu dakal nga balay nga egga i pitu tu kuarto na da Brother anna Sister Huberdeau, tapus manuffun nga mappaga tu renta i ngamin nga payunir nga maddian tatun. Agalammi yatun tu White House megafu ta puru furaw i arigi na ira kunne na gapa i pinta na. Magadde ta 12 onu 14 i maddian tatun. Gafu ta special pioneer kami ni Randi, kanayukkami nga mallawan ta umma, ta tangnganaggaw, kunne na gapa ta gabi. Yayya nga maappresia mi nga kanayun nga egga i puede mi nga makavulu ta pallawan, maski ta malallamming ira nga gabi ta winter.

Nabbalikkami tu close tatun ira nga matalo nga payunir, anna gitta na makkakafamilia kami ngana. Nu mittan, makkaravvulu kami ngamin nga magitubang ta pallevu na bonfire onu egga i agalammi tu “aggaw na pierogi.” Tatun nga aggaw, makkaravulu kami ngamin nga mallutu tu dumpling ira nga madduruma i palaman na ta unag na. Tadday ta brother ira ay musikeru, yayya nga nu Sabadu na gabi, makkaransion anna mattarala kami.

Napprogreso i teritoria mi ta Rimouski! Ta unag laman na lima nga dagun, magayayya kami ta aru i Bible study nga napprogreso adde ta bawtismo. Nabbalin ngana tu 35 i publisher ta kongregasion.

Ta kegga mi ta Quebec, makakkasta i nikasanay mi ta pallayyagayya. Nasingammi nu kunnasi nakami zinuffunan ni Jehova ta ministerio anna ta material. Nagustuammi ngana i totolay ira nga maguvovug tu French kunne na gapa i lengguahe anna kultura da. Yayya nga nagustuammi ngana gapa i tanakuan paga ira nga kultura.​—2 Cor. 6:13.

Kammi inekspekta nga pagalikan nakami na branch ta ili na Tracadie ta eastern nga parte na New Brunswick nga aranni ta bebay. Narigatakkami tatun megafu ta kakafirma mi laman tu tadday nga kontrata nga marrenta kami tu apartment anna naffirma ngà gapa tu kontrata nga manuddu ngà tu part-time ta tadday nga eskuela. Fuera tatun, bagu pagalaman nga nabbalin tu publisher i karuan ta Bible study mi ira anna maddaggukkami nga mamataddag tu Kingdom Hall.

Namippiga mi nga nipakimallo tatun nga weekend i meyannung ta pagali mi tapus nabbisita kami ta Tracadie nga dumu-duma ta Rimouski. Ngem nadesisiommi nga megafu ta kayà ni Jehova nga magali kami tari, umay kami. Pinuruebammi si Jehova anna nasingammi tu inalsa na i ngamin nga makefugag. (Mal. 3:10) Mas nabitakkami  ta pagali mi megafu ta masikan i espiritualidad ni Randi, ari yayya nga makasarili, anna ammu na i mamagalo.

Si Robert Ross laman i tattadday nga elder ta bagu nga kongregasiommi. Nappayunir ira tari na atawa na nga si Linda, tapus nadesisiodda nga maddian ngana tari kabalin nga neyana i kaka da. Maski paga egga i tangngawadda tu abbing nga lalaki, fermi nga napagaram kami ni Randi megafu ta minammadulo ira anna malallappo ta pallayyagayya.

Kabalimmi nga nappayunir tu dua nga ragun ta Tracadie, nakalawa kami mangana tu surpresa. Nembitakkami nga mat-traveling work. Pitu ragun nga nasserbi kami ta English ira nga circuit tapus kabalin natun, nare-asayn kami ta tadday nga French nga circuit ta Quebec. Kanayun nà nga komendan na district overseer mi ta Quebec nga si Léonce Crépeault ta palappa ku ira. Ngem kada kabalin natun, iyavu na nio, “Kunnasi tamma paga nga mabbalin tu mas praktikal yatun?” b Gafu tatun nga personal nga interes na ta nio, pinabbalikku tu mas espesipiko anna mas mabi nga mantindian i panuddù.

Tadday ta pinaka-ariakku makattaman nga asayment ku ay tagga ta 1978 nga “Victorious Faith” International Convention ta Montreal. Nattrabahu ngà bi ta Food Service. Ekspektammi tu 80,000 i umay anna nanguli i unnug ta pamakan. Nanguli i ngamin: i usammi ira nga pallutuan, i menu, anna i papprepara tu makan. Egga i 20 nga darakal nga ref mi, ngem nu mittan ari nga magandar danatun. Nige nga mamegafu i ollu nga aggaw, ari kami makatallung ta stadium adde ta tangnga na gabi tapenu mapprepara nakuan. Egga gare i mas nappollu nga pagayam tu sports tatun nga aggaw. Tapus mawag mi gapa nga pagandaran ngana i oven ira nige nga luttuag i bilag tapenu mallutu tu breakfast! Nababbannag kami ngem aru i nagigiammù megafu ta malallappo, manakam ta espiritual, anna minammagalo i kakavvulu ku nga boluntariu. Nabbalikkami tu close yayya nga makkorofukkami magadde sangawe. Kappagayayya nga maekspiriensa yaw nga ari makattaman nga kombension ta Quebec, i mismu nga probinsia nu sitaw grabe bi i pangokkontra ta nallatanan na 1940 anna 1960!

Kekkaru i nagigiammù ta kakavvulu ku ira nga overseer ta darakal nga kombension ta Montreal. Tadday nga dagun, si Brother David Splane  nga miembro ngana sangawe na Manangngal nga Baggi i nabbalin tu convention overseer. Ngem ta tadday nga kombension, turi ta nekiddaw nga sakan ngana i manammi tatun nga asayment, suportadu nà ni David.

Ta 2011, kabalin na 36 dagun nga pat-traveling work mi, nembitan ngà nga mabbalin tu instructor ta School for Congregation Elders. Ta unag na dua nga ragun, nagidda kami ni Randi ta 75 nga madduruma nga pagiddan, ngem sulit i kada sakrifisio mi. Ta ultimu na kada ligguan, fermi i appabalo na elder ira megafu ta nasingadda nu kunnasi nga ikavurungan na Manangngal nga Baggi i espiritualidad na elder ira.

Turi kua, nanuddu ngà ta School for Kingdom Evangelizers. Kanayun nga mababbannag anna mavuru-vurung i estudiante ira megafu ta napappannu i iskediul: maggi pitu oras kadaggaw ira nga magitubang ta klase, tallu oras kada gabi ira nga mangngua tu asayment, anna appa onu lima i asayment da kada ligguan. Nipakanawag mi ta nira na kavulu ku nga instructor nga ari da nga makua yatun nu awan tu uffun ni Jehova. Ari ku vuluvuga makattaman nu kunnasi makaddagan i estudiante ira nga makasingan nga nu mattalo laman ira kani Jehova, mas aru i metuppal da anne ta maski anni paga nga posible nga manono da.

Megafu ta personal nga interes ni Mama ta tanakuan, naduffunan i Bible study na ira nga mapprogreso anna nakoffun gapa yatun tapenu manguli i pagimamma ni Papa ta kinakurug. Tallu aggaw kabalin nga natay si Mama, nakaddagakkami ta minay si Papa ta Kingdom Hall tapenu magginna tu public talk. Tulu-tuloy yayya nga nakistudy ta tumunug nga 26 nga dagun. Maski nu ari nga na-baptize si Papa, kinagi na elder ira ta nio nga kanayun tu yayya i magollu nga duttal ta study ira kada ligguan.

Daka-dakal gapa i nabbalin tu efekto na yena mi ta nio anna ta uriakku nga babbay. Ngamin ta tallu nga uriakku nga babbay ay matalo nga massesserbi kani Jehova kavulu i gi-attawa da. Dua ta nira i masserbi ta branch office, tadday ta Portugal anna tadday gapa ta Haiti.

Sangawe, special pioneer kami ni Randi ta Hamilton, Ontario. Tagga bi ta egga kami paga ta traveling work, kakayà mi nga vulunan i tanakuan ta passinoli anna ta pab-Bible study da. Ngem sangawe, magayayya kami nga makasingan nga mapprogreso ta espiritual i mismu ira nga Bible study mi. Habang mabbalin gapa tu kokkofummi i wawwaragi ta bagu nga kongregasiommi, mapagaram kami nga makasingan nga dudduffunan ira ni Jehova ta makasta anna ta mariga ira nga tiempo.

Nu nonopakku ira i nesimmu ta nappasa, dakal i pappabalo mi ta personal nga interes nga nipasingan ta nikami na aru nga totolay. Megafu tatun, ikagumammi nga mangipasingan tu napafutuan nga pangikavurung para ta tanakuan. Pagarammammi ira nga kuadda i kapianadda ta passerbi kani Jehova. (2 Cor. 7:6, 7) Angngarigan na, ta tadday nga familia, payunir i atawa nga babay anna i ana nga lalaki anna i ana nga babay. Niyavu ku ta yama nu nanono na kari i mappayunir gapa. Kinagi na ta nio nga tallu i payunir nga supu-suportan na. Yayya nga niyavu ku ta nisa, “Mas masuportammu gafu ira anne kani Jehova?” Pinagaram ku yayya nga mappayunir kagitta da. Annam nga vulan laman i nappasa, nappayunir ngana yayya.

Tulu-tuloy mi lagapa ni Randi nga ‘ilammuyag ta ngamin nga gaka-gaka nga tumunug pagalaman’ i ‘makapabbaw ira nga kukukuan’ ni Jehova anna iddanamammi nga magayayya gapa ira ta passerbi ta nisa kagitta na naekspiriensa mi.​—Sal. 71:17, 18.