1. Ngatta makasta nga mapprepara para ta kalamidad ira?

 MAKEPALIAG tu inango i papprepara. Angngarigan na, nu egga i kalamidad, dakal i chansa nga mapaliag anna makoffun ta tanakuan danuri napprepara. Kunnaw i kinagi na tadday nga organisasion ta Europe nga manguffun ta totolay: “Dakal i bentaha na papprepara tu mapia.”

2. Ngatta mawag nga mapprepara ittam para ta dakal nga ziga? (Mateo 24:44)

² Gavva saw nga mamegafu i “dakal nga ziga.” (Mat. 24:21, NW ) Neruma yatun ta tanakuan ira nga kalamidad megafu ta ammu tam nga magga mesimmu yatun. Ma-2,000 dagun ngana i nappasa, inabisowan ni Jesus i tagatuttul na ira nga mappara-paran onu mapprepara para tatun nga aggaw. (Bibbigan i Mateo 24:44.) Nu preparadu ittam, mas mabi para ta nittam nga attamman yatun nga mariga nga tiempo anna uffunan i tanakuan nga makua gapa yatun.​—Luc. 21:36.

3. Kunnasi nga makoffun ta nittam i pagattattam, allo, anna aya tapenu preparadu ittam sonu dakal nga ziga?

³ Egga i tallu nga kualidad nga makoffun ta nittam tapenu preparadu ittam sonu dakal nga ziga. Anni i kuattam nu mekiddaw ta nittam nga ilayyagayya i madammo nga mensahe na pamanunnu anna ikalussaw ittam na kumokkontra ira? (Nep. 16:21) Mawag tam i pagattattam tapenu tuttulan si Jehova anna mattalo nga protektan na ittam. Anni i kuattam nu mawawwan na wawwaragi i karuan onu i ngamin nga pakkukua da? (Hab. 3:17, 18) Mawag tam i mangipasingan tu allo tapenu meyawa i uffun nga kawagadda. Anni i kuattam nu mawag tam nga makipaddian kavulu na wawwaragi tam megafu ta pangatake na alyansa na nasa-nasion? (Eze. 38:10-12) Mawag tam i dakal nga pangaya ta nira tapenu malampasan yatun nga mariga nga tiempo.

4. Kunnasi nga ipagaram na Biblia nga mawag tu itulu-tuloy tam nga ipasingan i pagattattam, allo, anna aya?

 ⁴ Pagaramman ittam na Biblia nga tulu-tuloy nga ipasingan i pagattattam, allo, anna aya. Kagian na Lucas 21:19: “Ta pagatta-attam nu, mala nu i inango nga adde ta ngangangay.” Mabibbig gapa ta Colosas 3:12: ‘Mawag tu minaggallallo kamu.’ Kagian gapa na 1 Tesalonica 4:9, 10: “Mismu i Dios i nangituddu nikamu tu makka-aya-aya kamu. . . . Ngem ikiddaw mi nikamu, wawwagi mi ira, tu mas mammungan paga i pangaya nu.” Netura ngamin danatun nga teksto para ta disipulo ira nga dati ngana nga mangipasingan tu pagattattam, allo, anna aya. Ngem mawag tu ari ira magimmang nga mas paga ipasingan danatun nga kualidad. Mawag tam gapa nga kuan yatun. Gigiammuattam nu kunnasi nga nipasingan na ollu-siglo ira nga Cristiano i kada tadday tatun nga kualidad. Tapus innattam nu kunnasi tam nga maparigan danatun nga disipulos tapenu mapakurug tam nga preparadu ittam para ta dakal nga ziga.

5. Kunnasi nga inattamman na ollu-siglo ira nga Cristiano i kapurueba ira?

⁵ Mawag nga magattam i ollu-siglo ira nga Cristiano. (Heb. 10:36) Fuera paga gare ta problema ira nga gagangay ta tolay, mapurueban gapa ira megafu ta Cristiano ira. Aru ta nira i pineppersigi ari laman na mangirollu ira ta relihion na Judio anna na ofisial ira na Roma, nu ari, maski paga na mismu nga familia da. (Mat. 10:21) Mawag da gapa labanan i influwensia na apostata ira anna i tuttuddu da nga mamassirina ta kongregasion. (King. 20:29, 30) Ngem nakapagattam danatun nga Cristiano. (Nep. 2:3) Kunnasi? Pinannonopadda tu mapia i makasta ira nga ehemplo na pagattattam nga mabibbig ta Katurakan, kagitta ni Job. (Sant. 5:10, 11) Nakimallo ira para ta sikan. (King. 4:29-31) Agga-nono da gapa i makasta ira nga resulta na pagattattam da.​—King. 5:41.

6. Anni i magigiammum ta kingngua ni Merita tapenu maattamman na i panazza-tazzi?

⁶ Makapagattam ittam gapa nu kanayuttam nga gigiammuan anna pannonopan tu mapia i ehemplo ira na pagattattam ta Uvovug na Dios anna ta publikasiottam ira. Kunnatun i kingngua ni Sister Merita nga taga-Albania, yari tu naattamman na i panazza-tazzi na familia na. Kinagi na: “Talaga napagaram ngà turi ta ginigiammù i istoria ni Job ta Biblia. Grabe i nikaziga-riga na anna ari na ammu nu sinni i naggafuan na kapurueba na ira, ngem kunnaw lagapa i kinagi na: ‘Adde sonu matay ngà, ariakku wawwanan i integridad ku!’ (Job 27:5) Nanono ku nga mas grabe i problema ira nga neparubang kani Job. Sakan, ammù nu sinni i naggafuan na kapurueba ira. Ngem yayya, ari na ammu.”

7. Maski nu awan tu madammo nga problema tam sangawe, anni i mawag nga kuattam?

⁷ Mas makapagattam ittam gapa nu kanayun ittam nga makimallo kani Jehova anna nu ikagi tam ta nisa i ngamin nga pakavurungattam. (Fil. 4:6; 1 Tes. 5:17) Baka awan mabba tu madammo nga problemam sangawe. Ngem kanayukka lapa kari nga mappoffun kani Jehova kada mavurukka, maguluan, onu ari mu ammu i kuammu? Nu kanayukka nga mappoffun ta Dios tam maski ta alappaw ira nga problemam sangawe, magga kunnatun gapa saw i kuammu nu meparubakka ta mas madammo ira nga problema. Makapakkomfiansa ka nga ammu na nu kanni anna nu kunnasi naka nga uffunan.​—Sal. 27:1, 3.

8. Kunnasi nga ipasingan na ehemplo ni Mira nga makoffun ta problema ira ta mappange i pagattattam sangawe? (Santiago 1:2-4) (Innan gapa i letratu.)

⁸ Dakal i chansa nga maattammattam saw i dakal nga ziga nu magattam ittam sangawe. (Roma 5:3) Ngatta makagi tam yatun?  Napakurug na aru nga wawwaragi nga kada attammadda i mariga nga problema sangawe, makoffun yatun tapenu maattammadda i tumunug nga problema. Megafu ta nakapagattam ira, nassikan i pangurug da nga kakayà ira nga uffunan ni Jehova. Megafu gapa tatun nga pangurug, maattammadda uli i tumunug nga problema. (Bibbigan i Santiago 1:2-4.) Kunnatun i naekspiriensa na payunir nga si Mira nga taga-Albania. Nakaduffun ta nisa nga magattattam sangawe i pinagattam na ta nappasa ira nga problema na. Inamin na nga nu mittan, matageno na nga gitta na yayya laman i aru i problema na. Ngem ninono na i karu na neyuffun ta nisa ni Jehova ta nappasa nga 20 nga dagun. Tapus kunna ta baggi na: ‘Ari mu pawanan i kinamatalo mu. Ari mu nga balewalaan i ngamin nga pinanguffun niko ni Jehova tapenu maattammammu i aru nga mariga nga problema.’ Awayyam gapa pannonopan nu kunnasi naka inuffunan ni Jehova nga magattam. Ariammu madduda nga masingi-singan na nga atta-attammammu i tadday nga problema. Siguradu nga bala-balakkan naka saw. (Mat. 5:10-12) Sonu mamegafu ngana i dakal nga ziga, ammum ngana saw nu kunnasi i magattam anna determinadu ka ngana saw nga ari magimmang nga magattam.

9. Kunnasi nga nangipasingan tu allo i kongregasion ta Antiokia na Siria?

⁹ Naka-ekspiriensa tu grabe nga bisin i Cristiano ira ta Judea. Turi ta nakannammuan na kongregasion ta Antiokia na Siria i meyannung tatun, siguradu nga nikallo da i wawwaragi da ta Judea. Yari tu nagguyu ira tapenu manguffun. Kunnasi? “Dinisidi na disipulo ira tu mangituvug i kataggi-tadday nira ta anni laman nga awayya da nga meyuffun ta wawwagi ira ta angngurug nga taga-Judea.” (King. 11:27-30) Maski nu arayyu i paddianan na wawwaragi nga afektadu na bisin, determinadu lagapa nga manuffun i Cristiano ira ta Antiokia.​—1 Juan 3:17, 18.

10. Kunnasi tam mepasingan i allo ta kapangngurug tam ira nga nafektan na kalamidad? (Innan gapa i letratu.)

¹⁰ Mepasingattam gapa i allo sangawe nu mammuattam nga nafektan na kalamidad i kapangngurug tam ira. Insigida ittam nga mabboluntariu tapenu makaduffun. Awayya tam makkiavu ta elder ira nu puede ittam nga manguffun ta disaster relief. Awayya tam i maddona ta worldwide work onu ipakimallo danuri biktima na kalamidad. b (Prov. 17:17) Angngarigan na, turi ta 2020, maturu tu 950 nga Disaster Relief Committee i nabuu ta interu mundo tapenu uffunan danuri nafektan na COVID-19 pandemic. Mappappabalo ittam ta wawwaragi nga nabboluntariu ta disaster relief. Megafu ta pangikallo da ta wawwaragi da, nangitaneg ira tu ayuda, nash-shepherding ira, anna nar-repair onu nangipataddag uli tu babalay anna lugar ira nga paddayarayawan.​—Ikumpara i 2 Corinto 8:1-4.

11. Kunnasi nga medayaw i Yama tam ta langi nu mangipasingan ittam tu allo?

¹¹ Nu mangipasingan ittam tu allo kabalin na kalamidad, masingan na tanakuan i sakrifisio ira nga kukukuattam. Angngarigan na, turi ta 2019, zinaral na bagiu nga Dorian i Kingdom Hall ta Bahamas. Durante nga ipataddag uli na wawwaragi tam i Kingdom Hall, niyavu da ta tadday nga kontraktor nga ari tu Saksi nu piga i labor na tapenu kuan i karuan nga kawagan nga trabahu. Kunnaw i nitabbag na ta nira: “Ipeyusà ngana tu libre . . . i equipment. Donasiokku ngana gapa i labor anna i materiales. . . . Kayà ku nga kuan yaw para ta  organisasion nu. Nabbilib ngà gare ta panuffun [nu] ta kapangngurug nu ira.” Ari nga ammammu na magaru nga totolay ta mundo si Jehova. Ngem masingan na aru ta nira i kukukuan na Saksi ira ni Jehova nga panguffun ta tanakuan. Kuruga magayayya ittam nga makannammuan nga megafu ta ipasa-pasingattam i allo ta tanakuan, mapaguyu i totolay nga mas paga ammuan si Jehova nga “ari nga maguku-gukug i inaggallallo na”!—Efe. 2:4.

12. Ngatta makoffun nittam i pangipasingan tu allo sangawe tapenu preparadu ittam sonu dakal nga ziga? (Nepakannammu 13:16, 17)

¹² Ngatta mawag tam i mangipasingan tu allo sonu dakal nga ziga? Nakagi ta Biblia nga maka-ekspiriensa tu problema ira sangawe anna sonu dakal nga ziga danuri ari nga massuporta ta gobiernu ira naw nga mundo. (Bibbigan i Nepakannammu 13:16, 17.) Awayya na nga mawag saw na wawwaragi tam i uffun tapenu mala i inaggaw nga pakawagadda. Sonu duttal i Patul tam nga si Cristo Jesus tapenu mamanunnu tu totolay, paray nakuan tu madanganan na ittam nga mangipasingan tu allo anna agalan na ittam tapenu ‘tullung ta pammagurayan.’—Mat. 25:34-40.

13. Gitta na nakagi ta Roma 15:7, kunnasi nga pinadakal na ollu-siglo ira nga Cristiano i pangaya da ta kataggi-tadday?

¹³ Aya i panakkilalan na ollu-siglo ira nga Cristiano. Ngem mabi kari laman para ta nira i mangipasingan tu aya? Madduruma i naggafuan na wawwaragi ta kongregasion na Roma. Egga ta nira i Judio nga nakasanayadda nga tumuttul ta Mosaiko nga Dob. Egga gapa i Hentil ira nga tanakuan i kostumbre da. Posible nga i karuan nga Cristiano ay aripan anna i karuan gapa ay ari nga aripan. Baka i karuan paga lagu ay pakiyafuan na aripan ira. Kunnasi nga netulu-tuloy natun ira nga Cristiano i makka-aya-aya maski nu egga ira i padduruma da? Pinagaram ira ni apostol Pablo nga ‘alawatadda i kataggi-tadday.’ (Bibbigan i Roma 15:7.) Anni i kayà na kagian? I kebalinan na uvovug nga netransleyt tu ‘alawatan’ ay masippo nga padulakkan i tadday nga tolay ta balena onu akseptan bilang kofun. Angngarigan na, kinagi ni Pablo kani Filemon nga masippo nga ‘alawatan na uli’ i nattammang nga aripan nga si Onesimo. (Flm. 17) Inalawa gapa ni Priscila anna ni Akila si Apolos maski nu awan kuruga tu ammu na meyannung ta Cristianismo kumpara ta nira. “Inimbitad-da yaya ta balay da.” (King. 18:26) Ari nga pinagurayan danatun nga Cristiano nga passirinan ira na padduruma da anna inalawa da i kataggi-tadday.

14. Kunnasi nga nangipasingan tu aya si Anna kunne na gapa i atawa na?

¹⁴ Awayya tam gapa i mangipasingan tu aya ta wawwaragi tam nu makikkofun ittam ta nira. Maruddu nga mapaguyu ira natun tapenu mangipasingan gapa tu aya ta nittam. (2 Cor. 6:11-13) Kunnatun i naekspiriensa ni Anna kunne na gapa i atawa na ta pammisionero da. Turi ta kadadattal da ta bagu nga asayment da ta West Africa, namegafu i COVID-19 pandemic. Megafu ta pandemic, ari nga posible nga makavulu da ta personal i wawwaragi. Kunnasi gafu mepasingan na magatawa i aya da? Nav-video call ira ta wawwaragi tapenu kumustan ira anna tapenu ikagi da ta nira nga kakayà da ira nga mas makilala tu mapia. Nagayayya yatun ira nga familia ta aya nga nepasingan ta nira. Yayya nga kanayudda ngana gapa nga tawa-tawagan anna i-message da Anna. Ngatta kingngua yatun na magatawa? Kinagi ni Anna: “Ari ku vuluvuga makattaman i aya nga nipasingan na wawwaragi ta nio anna ta familià ta makasta anna marake nga tiempo. Napaguyu ngà na ehemplo da nga mangipasingan gapa tu aya.”

15. Anni i magigiammum ta pangaya ni Vanessa ta ngamin nga wawwaragi? (Innan gapa i letratu.)

 ¹⁵ Madduruma i naggafuan anna i ugali tam ngamin ta kongregasion. Mapadakal tam i pangaya tam ta wawwaragi nu agga-sinnattam i makasta ira nga ugali da. Dati bi, marigatan si Sister Vanessa nga massesserbi ta New Zealand nga makasundu i karuan nga kakongregasion na. Ngem dinesision na nga imbes tu arayyuan na danuri maka-irita i ugali da, mas lallagu makikavulu yayya ta nira. Megafu tatun, nasingan na nu anni i iniddu ni Jehova ta nira. Kinagi na: “Mamegafu turi ta nabbalin tu circuit overseer i atawà, makavulu mi i mas aru nga wawwaragi nga nadduruma i ugali da. Mas mabi ku ngana laman ira nga makasundu. Kakayà ku ngana sangawe i madduruma nga ugali. Siguradu nga kakayà gapa yatun ni Jehova megafu ta maski nu madduruma ittam, pinakkaravvulu na ittam.” Nu magigiammu tam nga innan i tanakuan kagitta na paningan ni Jehova ta nira, mapakurug tam nga ayatattam ira.​—2 Cor. 8:24.

16. Ngatta importante saw i aya ta tiempo na dakal nga ziga? (Innan gapa i letratu.)

¹⁶ Importante saw i aya ta tiempo na dakal nga ziga. Sonu mamegafu yatun, sitaw i pakalegattam tu proteksion? Kunnaw i nipakua ni Jehova ta totolena turi ta natallung i Babilonia gari: “Sikamu nga ilì, tullukkamu ta unu-unag ira nga kuarto nu, anna iserra nu i puerta ira. Mattagu kamu tu manganannuan adde ta mabalin i poray.” (Isa. 26:20) Posible nga kunnatun gapa saw i mepakua ta nittam ta dakal nga ziga. Awayya na nga tumukoy i “unu-unag ira nga kuarto” ta kongregasiottam ira. Ta tiempo na dakal nga ziga, maleg tam i proteksion nga nipromesa ni Jehova nu kanayun ittam nga makikavulu ta kapangngurug tam ira. Ikagumattam ngana gafu nga ari laman nga pasa-pasensian i wawwaragi tam. Talaga ayatattam nakuan ira. Posible nga nakadepende tatun i kepaliag tam!

17. Nu mapprepara ittam sangawe, anni i makua tam sonu dakal nga ziga?

¹⁷ Kuruga mariga nga tiempo para ta ngamin nga totolay i “dakal nga aggaw ni Jehova.” (Zef. 1:14, 15) Mazziga-riga gapa saw maski i totolay ni Jehova. Ngem nu mapprepara ittam sangawe, mawayya tam i mabbalin tu kalmadu anna moffunattam i tanakuan. Maattammattam saw i maski anni nga problema nga meparubang nittam. Nu mazziga saw i kapangngurug tam ira, kuattam i adde na mawayya tam tapenu duffunan ira gukaban na pangipasingan tu allo anna pangiyawa ta pakawagadda ira. Nu ayatattam gapa i wawwaragi tam sangawe, magga ipasingattam saw i aya tam ta nira ta mappange. Siguradu nga bala-balakkan ittam ni Jehova tu mannanayun nga inango ta mundo nu sitaw awan ngana saw tu kalamidad anna ziga-riga.​—Isa. 65:17.