1-2. Anni i kagian na Biblia meyannung ta karuan ira nga patul na Israel?

 MABIBBIG tam ta Biblia nga egga i maturu tu 40 nga lallaki nga nappatul ta Israel. a Mammuattam tatun i kurug anna makapa-interes ira nga detalye meyannung ta karuan ta nira. Angngarigan na, nagangngua tu marake maski i mapia ira nga patul. Tadday tatun i mapia nga patul nga si David. Kinagi ni Jehova: ‘Pinarulo na aripakku nga si David i bili-bilikku anna sinuttul nà ta interu futu na anna mapia laman i kingngua na ta imamma ku.’ (1 Pat. 14:8) Ngem nakangngua tu imoral si David kavulu i sigga-atawan nga babay anna pinlano na paga lagu nga mapatay i atawa natun nga babay ta gerra.—2 Sam. 11:​4, 14, 15.

² Ngem aru gapa nga patul nga nabbalin tu ari nga matalo kani Jehova i egga i kingngua da nga mapia. Tadday tatun si Rehoboam. Para kani Jehova, “kingngua na nu anni i marake.” (2 Cro. 12:14) Ngem sinuttul ni Rehoboam i bilin ni Jehova nga ari yayya nga makiggerra kontra ta mafulu nga tribu na Israel anna pagurayan na ira nga mappili tu patul da. Pinatuyag na gapa i siudad ira nga immagurayan na yatutta naprotektan i totolay na Dios.—1 Pat. 12:​21-24; 2 Cro. 11:​5-12.

3. Anni i gigiammuattam taw nga artikulo?

³ Ngem yaw i pakkiavu: Nu nagangngua tu mapia anna marake i patul ira na Israel, anni gafu i basehan ni Jehova tapenu makagi na nga matalo i tadday nga patul? Makasta nu matabbag yatun nga pakkiavu tapenu mantindiattam nu anni i ikikkiddaw ni Jehova ta nittam. Gigiammuattam i tallu nga nikonsidera ni Jehova tapenu makagi na nu mapia onu marake i  tadday nga patul: i kondision na futu da, i pabbabawi da, anna i panuttul da ta fustu nga paddayaw kani Jehova.

BUU I FUTU DA PARA KANI JEHOVA

4. Anni i tadday nga nadduman na matalo ira nga patul ta patul ira nga ari nga matalo?

⁴ I patul ira nga namagayayya kani Jehova ay buu i futu da nga naddayaw ta nisa. b Kunnatun i mapia nga patul nga si Jehosafat. ‘Inaleg na si Jehova ta interu nga futu na.’ (2 Cro. 22:9) Kunnaw gapa i kagian na Biblia meyannung kani Josias: “Awan tu patul nga nappollu nisa nga kagitta na, nga nanoli kani Jehova ta interu futu na.” (2 Pat. 23:25) Kunnasi gapa si Solomon nga marake i kingngua na turi ta lakay ngana yayya? “Ari tu buu i futu na.” (1 Pat. 11:4) Ari gapa nga matalo nga patul si Abiam anna kunnaw i kagian na Biblia meyannung ta nisa: “Ari tu buu i futu na para kani Jehova.”—1 Pat. 15:3.

5. Anni i kayà kagian na passerbian si Jehova nga buu i futu tam?

⁵ Anni gafu i kayà kagian na passerbian si Jehova nga buu i futu tam? I tadday nga tolay nga buu i futu na ay ari laman nga masserbi ta Dios megafu ta ammu na nga yatun i mawag nga kuan na. Masserbi yayya megafu ta aya anna debosion na. Ari gapa nga mawawan yatun nga aya anna debosion na kani Jehova ta interu nga pattolena.

6. Anni i kuattam tapenu kanayun nga buu i futu tam? (Proverbio 4:23; Mateo 5:​29, 30)

⁶ Kunnasi tam nga maparigan i matalo ira nga patul tapenu kanayun nga buu i futu tam? Arayyuattam i marake ira nga influwensia. Angngarigan na, awayya na nga magaddua i futu tam megafu ta kuestionable ira nga dibersion. Kunnatun gapa i efekto ta nittam na marake nga kakavvulu anna materialistiko nga appana-panono. Nu mapansin tam tu mamegafu ngana nga makkafi i pangaya tam kani Jehova megafu ta tadday nga gannug, insigida ittam nakuan nga magguyu tapenu alsan yatun.—Bibbigan i Proverbio 4:23; Mateo 5:​29, 30.

7. Ngatta mawag nga arayyuattam i marake ira nga influwensia?

⁷ Ari tam nakuan itulu nga magaddua i futu tam. Nu ari ittam nga magimmugug, baka nonopattam nga ari ittam mafektan na marake ira nga influwensia gafu ta busy ittam mabba ta espiritual ira nga aktibidad. Imajinammu nga egga ka ta lawan tapus gitta na malussiakka gafu ta patu na. Ta pakadde mu ta balem, ni-on mu i aircon na kuartom. Anni tamma i mesimmu nu pinagurayammu nga agga-vuka i puerta na kuartom? Magga tullung lagapa i patu tapus ari nga mallamming i kuarto. I punto? Ari nga makalanno tu busy ittam ta espiritual ira nga aktibidad tapenu makagi tam nga madukko ittam kani Jehova. Mawag nga gitta na iserra tam i futu tam tapenu ari nga makatallung i marake ira nga influwensia nga awayya na tu maggaddua tatun.—Efe. 2:2.

NABBABAWI IRA

8-9. Anni i reaksion ni Patul David anna ni Patul Hezekias turi ta nevuya ira? (Innan i letratu.)

⁸ Gitta na nakagi ta ollu nga parapo, nakaliwa tu madammo si Patul David. Ngem turi ta nivuya yayya ni profeta Natan meyannung ta nakaliwatan na, nappakalinno yayya anna nabbabawi. (2 Sam. 12:13) Masingattam ta kinakkagi na ta Salmo 51 nga talaga napafutuan i pabbabawi na. Ari nga nagappappe si David nga nabbabawi tapenu laman illokuan si Natan onu tapenu ari yayya nga makastigo.—Sal. 51:​3, 4, 17, superskripsion.

 ⁹ Nakaliwa gapa si Patul Hezekias kani Jehova. Kagian na Biblia: “Nappalagopog i futu na. Gafu tatun, napporay i Dios nisa, maski ta Juda anna Jerusalem.” (2 Cro. 32:25) Ngatta tamma ta nabbalin tu palagopog si Hezekias? Awayya na nga megafu ta pinarriku yayya ni Jehova, inuffunan na yayya nga maffu i Asiriano ira, onu megafu ta milagro nga pammapia na ta kappatay nga taki. Awayya na nga megafu ta pride, niparayag na i kinariku na ta Babilonio ira. Yatutta nivuya yayya ni profeta Isaias. (2 Pat. 20:​12-18) Ngem kagitta ni David, nappakalinno si Hezekias anna nabbabawi yayya. (2 Cro. 32:26) Megafu tatun, para kani Jehova, si Hezekias ay matalo nga patul anna “kanayun na nga kingngua i fustu.”—2 Pat. 18:3.

10. Anni i reaksion ni Patul Amazias turi ta nevuya yayya?

¹⁰ Tanakuan labbi gapa i nesimmu kani Patul Amazias na Juda. Kingngua na i fustu “ngem ari tu buu i futu na.” (2 Cro. 25:2) Anni i nakkamalian na? Kabalin na nga affutan i Edomita ira ta uffun ni Jehova, nakkummag yayya ta dios da. c Tapus turi ta kinonfrunta yayya na profeta ni Jehova, ari vuluvuga nagginna yatun nga patul anna pinapanaw na i profeta.—2 Cro. 25:​14-16.

11. Segun ta 2 Corinto 7:​9, 11, anni i mawag nga kuattam tapenu mapakoma ittam? (Innan gapa i letratu ira.)

¹¹ Anni i magigiammu tam ta patul ira nga nabbiridattam? Mawag nga mabbabawi ittam ta nakaliwatattam ira anna kuattam i adde na mawayya tam nga ari ngana kuan uli danatun. Kunnasi nu nivuya ittam na elder ira ta gannug nga gitta na alappaw laman mabba? Ari tam nakuan nonopan nga ari ittam nga ayatan ni Jehova onu kokkontran ittam na elder ira. Natabarangngan anna nevuya gapa maski i mapia ira nga patul na Israel. (Heb. 12:6) Nu mevuya ittam gafu, mawag nga (1) mapakalinno nga alawatattam yatun, (2) manguli ittam, anna (3) itulu-tuloy tam lagapa i interu-futu nga passerbi tam kani Jehova. Nu mabbabawi ittam, pakoman ittam ni Jehova.—Bibbigan i 2 Corinto 7:​9, 11.

SINUTTUL DA I FUSTU NGA PADDAYAW KANI JEHOVA

12. Ngatta neruma i matalo ira nga patul?

¹² Sinuttul na patul ira nga nibilang ni Jehova nga matalo i fustu nga paddayaw ta nisa. Pinagaram da gapa i totolay ni Jehova nga kuan i kunnatun. Siempre, gitta na nagigiammu tam, egga gapa i nakkurangadda. Ngem para kani Jehova laman i debosiodda anna nikagumadda nga daralan i idolatria ta imagurayadda. d

13. Ngatta nibilang ni Jehova nga ari matalo si Patul Ahab?

¹³ Kunnasi gapa i patul ira nga nibilang ni Jehova nga ari tu matalo? Ari mabba gapa nga puru marake ngana laman i kingngua da. Maski i marake nga si Patul Ahab ay nangipasingan gapa tu kinapakalinno anna pabbabawi ta nikapatay ni Nabot. (1 Pat. 21:​27-29) Nangipataddag gapa yayya tu siudad ira anna pinangaffu na i Israel ta gerra ira. (1 Pat. 20:​21, 29; 22:39) Ngem egga i kitaddake nga kingngua ni Ahab. Megafu ta influwensia na atawa na, nipoppollu na i falsu nga paddayaw. Ari yayya vuluvuga nabbabawi tatun nga kingngua na.—1 Pat. 21:​25, 26.

14. (a) Ngatta ari tu matalo para kani Jehova si Patul Rehoboam? (b) Anni i napparehuan na magaru ta patul nga ari tu matalo?

 ¹⁴ Si Rehoboam i tadday paga nga patul nga ari tu matalo. Kagitta na nakagi ta parapo 2, aru gapa i mapia nga kingngua na ta pammagurena. Ngem turi ta matuyag ngana i pappatul na, ari na ngana sinuttul i Dob ni Jehova anna nipoppollu na ngana i paddayaw ta falsu ira nga dios. (2 Cro. 12:1) Turi kua, egga ira i tiempo nga naddayaw yayya kani Jehova anna egga gapa i tiempo nga naddayaw yayya ta falsu ira nga dios. (1 Pat. 14:​21-24) Ari laman tu da Rehoboam anna Ahab i patul ira nga pinanawadda i fustu nga paddayaw. Kakurugan na, kunnatun i kingngua na magaru ta patul ira nga ari matalo. Manawag gafu nga para kani Jehova, dakal i efekto na ta pakkagi na nu mapia onu marake i tadday nga patul depende nu sinuttul natun nga patul i fustu nga paddayaw.

15. Ngatta importante kani Jehova i panuttul ta fustu nga paddayaw?

¹⁵ Ngatta kunnari ngana laman ka-importante para kani Jehova i panuttul ta fustu nga paddayaw? I tadday nga rason ay megafu ta i patul gare i makarresponsibilidad ta pangigiya ta totolay na Dios ta fustu nga paddayaw. Marresulta gapa ta tanakuan nga madammo ira nga liwa anna kawan na hustisia i falsu nga paddayaw. (Os. 4:​1, 2) Fuera tatun, dedikadu kani Jehova i patul ira na Israel anna i Israelita ira. Yatutta igitta na Biblia ta pakidallaw i pakiparte da ta falsu nga paddayaw. (Jer. 3:​8, 9) Nu manallaw onu makidallaw i tadday nga tolay, fermi nga matakitan na i atawa na. Kunnatun gapa i dedikadu ira nga aripan ni Jehova nga makiparte ta falsu nga  paddayaw. Mabbalin ira tu ari matalo kani Jehova anna fermi nga matakitadda yayya. e—Deut. 4:​23, 24.

16. Para kani Jehova, anni i dakal nga nadduman na matunung ta marake nga tolay?

¹⁶ Anni gafu i magigiammu tam? Determinadu ittam nakuan nga lillitan i falsu nga paddayaw. Ngem mawag gapa nga tuttulattam i fustu nga paddayaw anna kanayun ittam nakuan nga busy ta passerbi tam. Mananawag i kinagi ni profeta Malakias meyannung ta nadduman na mapia ta marake nga tolay ta pagimamma ni Jehova. Nitura na: “Masingan nu uli i pakkaduman na matunung nga tolay anna na marake nga tolay, na tadday nga massesserbi ta Dios anna na tadday nga ari tu massesserbi sa.” (Mal. 3:18) Ari tam nakuan gafu itulu nga pakkafian na maski anni i nono tam adde ta iyemmattam ngana i passerbi tam kani Jehova. Kasali tatun i kina-imperfekto tam anna i nakkamaliattam ira. Nu iyemmattam i passerbi kani Jehova, madammo nga liwa yatun.

17. Kunnasi nga afektan na pappili tam tu atawa i debosiottam kani Jehova?

¹⁷ Nu single ka anna planom i mangatawa onu makitawa, makoffun nikaw i tura ira ni Malakias tapenu makapili ka tu mapia nga atawa. Nonopan yaw: Awayya na nga egga gapa ira i makasta nga ugali na tadday nga tolay. Ngem nu ari yayya nga masserbi ta kurug nga Dios, matunung kari i paningan ta nisa ni Jehova? (2 Cor. 6:14) Nu mabbalin saw yayya tu atawam, makoffun kari yayya tapenu mapakastam i espiritualidad mu? Kunnatun i nesimmu kani Patul Solomon. Awayya na nga egga gapa ira i makasta nga ugali na pagano ira nga atawa na. Ngem ari ira nga masserbi  kani Jehova yatutta sisinu da nga nakumbinsi si Solomon nga maddayaw ta falsu ira nga dios.—1 Pat. 11:​1, 4.

18. Anni nakuan i ituddu na magana ta ána da?

¹⁸ Usan nu nakuan nga magana ira i rekord ira ta Biblia meyannung ta patul ira tapenu magustuan gapa na ána nu i masserbi kani Jehova. Ipalippawa nu nira nga ta pagimamma ni Jehova, mapia onu marake i tadday nga patul depende ta pattuttul natun nga patul ta fustu nga paddayaw. Ipasingan nu nakuan ta ána nu ta kakkagian anna kukukuan nu nga ipoppollu nu i espiritual ira nga gannug anne ta tanakuan paga ira nga aktibidad. Nelagum tatun i paggigiammu tu Biblia, pakistudy, anna pallayyagayya. (Mat. 6:33) Mawag tu kuan nu yatun tapenu ari nga nonopan na ána nu nga obligadu ira nga mabbalin tu Saksi ni Jehova megafu laman ta Saksi kamu nga magana da. Nu kunnatun gare saw i nonopadda, mabbalin tu ari kuruga importante ta nira i passerbi kani Jehova onu baka iyemmadda paga lagu i passerbi da.

19. Egga kari paga i chansa nga manoli kani Jehova i tadday nga nagimmang nga masserbi nisa? (Innan gapa i kahon nga “ Makatoli Ka Kani Jehova!”)

¹⁹ Egga kari paga i chansa nga manoli kani Jehova i tadday nga nagimmang nga masserbi nisa? Wan, megafu ta awayya na i mabbabawi anna passerbian uli si Jehova. Tapenu makua na yatun, mawag na i mappakalinno anna alawatan i panguffun na elder ira ta kongregasion. (Sant. 5:14) Maski nu marigatan yayya nga kuan yatun, sulit yatun megafu ta metoli nisa i fabor ni Jehova!

20. Nu parigattam i matalo ira nga patul, kunnasi ittam nga imammatan ni Jehova?

²⁰ Anni gafu i nagigiammu tam ta patul ira na Israel? Maparigattam i matalo ira nga patul nu kanayun nga buu i futu tam para kani Jehova. Makagigiammu ittam nakuan ta nakaliwatattam ira, mabbabawi ittam, anna manguli. Ari tam nakuan kattaman nga nabala-balor i panuttul ta paddayaw ta tattadday anna kurug nga Dios. Nu kanayukka nga matalo kani Jehova, matunung ka ta pagimamma na.