1. Segun ta Colosas 2:4, 8, kunnasi nga aripannan ni Satanas i appana-panono tam?

KAYÀ ni Satanas nga likurattam si Jehova. Tapenu makuana yatun nga gakkagna, influwensianna i appana-panono tam, nga gittana aripannanna i nono tam tapenu mapatuttul ta kayàna. Kayàna ittam nga kumbinsian onu illokuan tapenu tumuttul sa gukaban na pangusa ta pakkaraga tam ira tapenu tentan ittam.​—Bibbigan i Colosas 2:4, 8.

2-3. (a) Ngatta ginnattam nakuan i abiso nga mabibbig ta Colosas 2:8? (b) Anni i gigiammuattam taw nga artikulo?

² Talaga kari nga mappeppeligro ittam nga melogo ni Satanas? Wan! Daddamman nga ari nitura ni Pablo yaw nga abiso ta Colosas 2:8 ta ari ira nga Cristiano. Niturana yaw para ta nazelugan ira nga Cristiano. (Col. 1:2, 5) Nu danatun nga ollu nga Cristiano ay nappeligro, mas ngana nga mappeppeligro ittam ta maddaggun. (1 Cor. 10:12) Ngatta? Megafu ta netabbo ngana si Satanas taw ta davvun, anna puntirianna nga ilogo i matalo ira nga aripan na Dios. (Nep. 12:9, 12, 17) Kunne na paga, mattolay ittam ngana ta tiempo nga danuri marakay anna minaggappa-appe nga totolay ay “mabbalin tu mas marakay.”​—2 Tim. 3:1, 13.

³ Taw nga artikulo, gigiammuattam nu kunnasi usu-usan ni Satanas i “makelogo nga tuddu” tapenu influwensian i appana-panono tam. Ammuattam i tallu nga “pangilogo” onu marake nga planona. (Efe. 6:11) Ta tumunug gapa nga artikulo, ikonsidera tam nu kunnasi labanan i negatibo ira nga influwensia  na taktikana ira ta nono tam. Ngem ikonsidera tam labbi nu kunnasi nilogo ni Satanas i Israelita ira turi ta nakatallung ngana ira ta Nepromesa nga Davvun anna nu anni i magigiammu tam.

4-6. Segun ta Deuteronomio 11:10-15, anni nga bagu nga metodo na pakkusetcha i mawag nga gigiammuan na Israelita ira turi ta maddian ngana ira ta Nepromesa nga Davvun?

⁴ Ma-uto nga sinenta ni Satanas i Israelita ira tapenu makiparte ta idolatria. Kunnasina kingngua yatun? Ammuna nga mawagda i makan, yayya nga inusana yatun tapenu mepakua nira i kayàna. Turi ta simillung i Israelita ira ta Nepromesa nga Davvun, mawag nga uliadda i sistema na pakkusetchada. Ta Ehipto, padanuman na Israelita ira i mulu-mulada tu danum nga naggafu ta Bannag Nilo. Ngem ta Nepromesa nga Davvun, awan tu bannag yayya nga mawagda i danum maggafu ta urang anna lumay tapenu dumakal i mulada. (Bibbigan i Deuteronomio 11:10-15; Isa. 18:4, 5) Mawag gafu nga gigiammuan na Israelita ira i bagu ira nga metodo na pakkusetcha. Mariga yatun megafu ta magaru turi ira ta ekspiriensadu ta pakkusetcha ay natay ngana ta katanapan.

⁵ Niyesplika ni Jehova ta ilina nga nanguli ngana i situasiodda. Tapus niyammunna i tumunug nga abiso, nga gittana awan tu koneksionna ta pakkusetcha: “Magimmugug kamu tapenu ari nga matenta nga umarayyu i futunu anna maddayaw kamu ta tanakuan nga dios ira anna makkummag kamu nira.” (Deut. 11:16, 17) Ngatta nangabiso si Jehova kontra ta paddayaw ta falsu ira nga dios durante nga ikagina nira i paggigiammu tu bagu ira nga metodo ta pakkusetcha?

⁶ Ammu ni Jehova nga awayyana nga matenta i Israelita ira nga mappoffun ta pagano  nga totolay ta pallevuda tapenu makagigiammu tu bagu ira nga metodo ta pakkusetcha. Siempre, mas eksperto ira anne ta Israelita ira, anna makagigiammu paga nira i ili na Dios tu gannug ira nga makoffun, ngem egga i peligro natun. Influwensiadu i appana-panono na kusetcheru ira nga Canaanita na pangurugda kani Baal. Mangurug ira nga si Baal i makakkua ta langi anna i mangiyawa tu urang. Manaki ni Jehova nga melogo i ilina ta kunnatun nga falsu nga pangurug. Ngem, namippiga lagapa nga pinili na Israelita ira nga maddayaw kani Baal. (Num. 25:3, 5; Uk. 2:13; 1 Pat. 18:18) Innattam nu kunnasi nga kinontrol ni Satanas i Israelita ira.

7. Kunnasi nga napurueban i pangurug na Israelita ira turi ta nakatallung ngana ira ta Nepromesa nga Davvun?

⁷ I ollu nga taktika ni Satanas ay i pangiyusana ta normal nga pakkaraga nga morangan i davvun. Ari kuruga magurang ta Nepromesa nga Davvun ta pangultimu na Abril adde ta Setiembre kada dagun. Tapenu matolay i Israelita ira anna i mulu-mulada, nakadepende ira ta urang nga mamegafu laman ta Oktubre. Nilogo ni Satanas i Israelita ira tapenu kurugadda nga mawag tu parigadda i kostumbre ira na pagano ta pallevuda tapenu aru i maapitda. Kurugan danatun nga pagano nga egga ira i ritual nga mawag nga kuan tapenu magguyu i diosda anna mappa-urang. Danuri kurang i pangurugda kani Jehova ay nangurug nga yatun laman i solusion tapenu mebita i kuaresma, yayya nga nakiparte ira ta falsu ira nga paddayaw ta dios nga si Baal.

8. Anni i mekadua nga taktika nga inusa ni Satanas? Ipakanawag.

⁸ Nangiyusa si Satanas tu mekadua nga taktika ta Israelita ira. Sinentana ira nga mangngua tu seksual nga imoralidad. Zinayaw na pagano nga nasa-nasion i diosda ira gukaban na kuruga imoral ira nga annangnguada. Nelagum taw nga imoral nga klase na paddayaw i prostitusion na babbay anna lallaki ta templo. Ariadda laman kinunsinti i homoseksualidad anna i tanakuan nga klase na seksual nga imoralidad, nu ari, pinabbalidda tu normal laman danatun! (Deut. 23:17, 18; 1 Pat. 14:24) Kurugan na pagano ira nga danaw nga ritual i mamagaram ta diosda ira nga pakaruan i apit. Aru nga Israelita i natenta ta imoral ira nga ritual na pagano ira anna gafu tatun, pinilida nga passerbian i falsu ira nga dios. Ta kakuruganna, nabbalin ira tu aripan ni Satanas.

9. Segun ta Oseas 2:16, 17, kunnasi nga pinazzibbo ni Satanas i pagimamma na Israelita ira kani Jehova?

⁹ Nangusa si Satanas tu mekatallu nga taktika. Pinazzibbona i pagimamma na Israelita ira kani Jehova. Ta kaggawan ni profeta Jeremias, kinagi ni Jehova nga wawwanan na falsu ira nga profeta ta nono na totolena i ngaganna “megafu kani Baal.” (Jer. 23:27) Niyemmang na ili na Dios i pangusa ta ngagan ni Jehova anna sinaliadda yatun tu ngagan ni Baal, nga kayàna kagian, “Makakkua” onu “Yafu.” Gafu tatun, nazzibbo i pagimamma na Israelita ira ta nadduman ni Jehova anna ni Baal, yatutta alistu ngana laman nira nga ikivu ta paddayaw kani Jehova i ritual ira na paddayaw kani Baal.​—Bibbigan i Oseas 2:16, 17 anna i footnote.

10. Anni ira nga taktika i usu-usan ni Satanas ta maddaggun?

¹⁰ Ta maddaggun, parehu ira nga taktika i usu-usan ni Satanas. Aripannanna i totolay gukaban na pangiyusana ta normal ira nga pakkaragada, pangipoppoddu ta seksual nga imoralidad, anna pamazzibbo ta pagimammada  kani Jehova. Olluattam nga ikonsidera i ultimu nga taktika.

11. Kunnasi nga pazzibbakkan ni Satanas i pagimamma na totolay kani Jehova?

¹¹ Pazzibbakkan ni Satanas i pagimamma na totolay kani Jehova. Turi ta natay ngana i apostoles ni Jesus, egga karuan nga apostata nga nangiwara tu laddug nga tuttuddu. (King. 20:29, 30; 2 Tes. 2:3) Pinazzibbo danaw nga apostata i panakkilalan na tattadday nga kurug nga Dios. Angngariganna, inalsadda i ngagan na Dios ta kopia ira na Bibliada anna pinilida nga talian yatun tu “Yafu.” Turi ta inalsadda i ngagan na Dios anna sinaliadda yatun tu “Yafu,” narigatan ngana i mabbibbig ira tu Biblia nga masingan i nadduman ni Jehova ta tanakuan paga ira nga “yafu” nga natukoy ta Biblia. (1 Cor. 8:5) Parehu nga agaladda tu “Yafu” si Jehova anna si Jesus, yayya nga narigatan i totolay nga malippawa i nadduman na posision ni Jehova anna ni Jesus. (Juan 17:3) Gafu ta naguluan ira, nabuu i doktrina nga Trinidad​—tadday nga doktrina nga ari ituddu na Biblia. I resulta natun, aru i mangurug nga misterioso i Dios anna ariattam yayya makannammuan. Anni mabba nga kinaladdug yatun!​—King. 17:27.

12. Anni i ipoppoddu na falsu nga paddayaw, anna anni i resulta natun segun ta nepakanawag ta Roma 1:28-31?

¹² Tentan ittam ni Satanas nga mangngua tu seksual nga imoralidad. Ta tiempo na Israelita ira gari, inusa ni Satanas i falsu nga paddayaw tapenu ipoppoddu i imoralidad. Kunnatun gapa i kukukuanna ta maddaggun. Kukkunsintian na falsu nga relihion i imoral nga kondukta anna pabbalinadda paga lagu tu normal yatun. Gafu tatun, aru i magabbo nga massesserbi ira ta Dios ngem ariadda tuttuttulan i manawag ira nga moral nga estandartena. Dineskriba ni apostol Pablo i resulta natun ta turana ta Romano ira. (Bibbigan i Roma 1:28-31.) Nelagum ta “ganna-gannug nga ari mepangngo” i ngamin nga klase na seksual nga imoralidad, kasali i homoseksualidad. (Roma 1:24-27, 32; Nep. 2:20) Kuruga importante para nittam nga tuttulattam i manawag ira nga tuddu na Biblia!

13. Anni paga i tadday nga taktika nga usu-usan ni Satanas?

¹³ Usu-usan ni Satanas i normal ira nga pakkaraga tapenu manenta. Normal laman nga kayà tam nga makagigiammu nga mabbibbig, mattura, anna mabbilang gafu ta makoffun yatun ta passuporta ta baggi tam anna ta  familia tam. (1 Tim. 5:8) Maruddu nga mala tam danatun gukaban na pagiskuela tam anna malappo nga paggigiammu. Ngem mawag tu magimmugug ittam. Ari laman tu praktikal ira nga abilidad i ituttuddu na sistema na edukasion ta aru nga nasion, nu ari, maski i kinasirib na tolay. Ta eskuela ira, mepagaram ta estudiante ira nga kuestionadda i kegga na Dios anna ariadda irespeto i Biblia. Netuddu ta estudiante ira nga ngamin nga intelihente nga totolay ay kurugadda nga limittuag i inango megafu ta ebolusion. (Roma 1:21-23) Mekontra danatun nga tuttuddu ta “ka-uto na Dios.”​—1 Cor. 1:19-21; 3:18-20.

14. Anni ira nga ugali i kultiban na kinasirib na tolay?

¹⁴ I kinasirib na tolay ay arianna pagimportan onu kontranna i matunung ira nga estandarte ni Jehova. Kultiban natun i “neravvunan nga kata-katolay,” imbes tu i vunga na espiritu na Dios. (Gal. 5:19-23) Mamabbalin yatun ta totolay tu mapakatannang anna arogante, yatutta “ayatan na totolay i baggi da laman.” (2 Tim. 3:2-4) Yaw ira nga kualidad ay katulia na minappakalinno nga ugali nga kayà na Dios nga ipasingan na aripanna ira. (2 Sam. 22:28) Egga karuan nga Cristiano nga nagiskuela ta unibersidad nga nabbalin tu makamundo i appana-panonoda imbes nakuan tu makadios. Ikonsidera tam i tadday nga ekspiriensa nga mangipasingan ta posible nga mesimmu nu ariattam pagimportan yaw nga peligro.

15-16. Anni i magigiammum ta ekspiriensa na tadday nga sister?

¹⁵ Kunnaw i kinagi na tadday nga sister nga 15 ragun ngana ta ngamin-tiempo nga serbisiu: “Bawtisadu ngà nga Saksi, yayya nga nabibbig anna naginnà ngana i peligro ira na  pakkolehio, ngem ariakku gininna danatun. Abbo ku nu ari nga meyaplika nio yatun nga tabarang.” Anni ira nga problema i neparubang sa? Inaminna: “Ari tu gittana tagga, aru nga oras anna sikan i ufutakku nga magiskuela yatutta awan ngana kuruga tu tiempò nga maddasal kani Jehova, awan ngana gapa tu ganas ku nga mamministerio, anna awan ngana tu sikakku nga mapprepara tu mapia ta study ira. Mapia ngana laman ta turi ta natageno ku nga dara-daralan ngana na sobra nga ka-okupadù ta mas atannang nga edukasion i relasiokku kani Jehova, nanono ku nga mawag ku ngana i magimmang nga magiskuela. Kingnguà yatun.”

¹⁶ Anni i efekto na atannang nga edukasion ta appana-panono na sister? Kinagina: “Mappasirang ngà nga aminan nga gafu ta edukasiokku, nabbalin ngà tu minangngivuya ta tanakuan, mas ngana ta kapangngurug ku ira, inekspektà i mas paga anne ta mawayyada nga kuan, anna nisinà i baggì nira. Aru nga tiempo i nappasa nige nga nanguli i pagimamma ku. Nagigiammù tatun nga ekspiriensa nu kunnasi kadelikadu i ari pagimporta ta abiso ira na nelangitan nga Yama tam gukaban na organisasionna. Mas ammammunà ni Jehova anne ta pakannammù ta baggì. Nu nagginna ngà laman nakuan sa!”

17. (a) Anni nakuan i determinasiottam? (b) Anni i ikonsidera tam ta tumunug nga artikulo?

¹⁷ Determinadu ka nakuan nga ari mappa-aripan ta “awan tu kebalinan anna makelogo nga tuddu” na mundo ni Satanas. Ari ka vuluvuga mappelogo ta taktika ira ni Satanas. (1 Cor. 3:18; 2 Cor. 2:11) Ariammu vuluvuga ipamavulun nga pazzibbakkanna i pagimamma mu kani Jehova. Tuttulammu i atannang ira nga moral nga estandarte ni Jehova. Ariammu ipamavulun nga matenta naka ni Satanas nga ari ginnan i tabarang ni Jehova. Ngem anni i kuammu nu matageno mu nga nainfluwensiakka ngana na appana-panono naw nga mundo? Ipasingan na tumunug nga artikulo nu kunnasi ittam moffunan na Biblia tapenu daralan i appana-panono anna ugu-ugali nga ‘maladda i nikepataddagna.’​—2 Cor. 10:4, 5.