1. Ngatta mawag tu ginnattam i abiso ni Jesus?

TA PROFESIYA ni Jesus meyannung ta pangurianan ira nga aggaw, kinagina: “Magimmugug kamu, ta marakay nu yatun laman i talattangngawan nu i . . . avvuru-vurung nu nga meyannung toye ta maddaggun nga pattolay,” kebalinanna, i avvuru-vurung ta pagalegan onu ta inaggaw nga pattolay. (Luc. 21:34) Mawag tam ginnan yatun nga abiso. Ngatta? Megafu ta meparubang ittam ngamin ta maddaggun ta parehu nga kavvuru-vurung ira nga problema.

2. Anni nga kakkonsumision ira nga problema i meparubang ta wawwaragi tam?

² Nu mittan, makkonsumision ittam megafu ta napporotung nga problema. Ikonsidera i tumunug ira nga angngarigan. Si John * nga tadday nga Saksi anna egga i multiple sclerosis-na ay nakaddag anna grabe i pinakkafi na nonona turi ta pinanawan yayya na atawana 19 dagun kabalin na kasalda. Tapus, nagimmang paga nga masserbi kani Jehova i dua nga anana nga babay. Tanakuan gapa i problema na magatawa nga da Bob anni Linda. Nalsa ira ta trabahuda, ariadda ngana mapagan i baleda anna mawagda ngana nga magaleg tu tanakuan nga paddianadda. Tapus, kinagi na doktor kani Linda nga egga i takina ta futu nga awayyana nga ipatay, fuera paga ta grabe nga arthritis-na.

3. Anni i kagian na Filipos 4:6, 7 nittam meyannung kani Jehova?

³ Makasiguradu ittam nga ammu na Namaratu anna na meddu nga Yama tam nga si Jehova nu anni i efekto nittam na pavvuru-vuruttam. Yari tu kayàna ittam uffunan ta pangarubattam ta problema ira. (Bibbigan i Filipos 4:6, 7.) Aru i mabibbig tam nga angngarigan ta Biblia nu anni ira nga problema i  inattamman na aripan na Dios. Mabibbig paga nu kunnasi ira zinuffunan ni Jehova ta pangarubang ta kavvuru-vurung ira nga situasion. Ikonsidera tam i karuan nga angngarigan.

4. Anni ira nga mariga nga problema i neparubang kani Elias, anna anni i natagenona meyannung kani Jehova?

⁴ Nasserbi si Elias kani Jehova durante ta mariga ira nga tiempo anna neparubang ta mariga ira nga problema. Inatawa na tadday ta ari matalo nga patul ta Israel nga si Patul Ahab i tadday nga marake anna maddayaw kani Baal nga si Jezebel. Danatun nga dua ay nipagaramda i paddayaw kani Baal ta interu nasion anna aru nga profeta ni Jehova i nipapateda. Nakatammang si Elias. Napaliag gapa yayya ta grabe nga bisin megafu ta pattalona kani Jehova. (1 Pat. 17:2-4, 14-16) Kunne na paga, nattalo si Elias kani Jehova ta pakkomfruntana turi ira ta profeta anna maddayarayaw kani Baal. Pinagaramna i Israelita ira nga masserbi kani Jehova. (1 Pat. 18:21-24, 36-38) Napakurug mismu ni Elias nga sussuportan yayya ni Jehova tatun ira nga kavvuru-vurung nga tiempo.

5-6. Segun ta 1 Patul Ira 19:1-4, anni i natageno ni Elias, anna kunnasi nipasingan ni Jehova i pangidduna nisa?

⁵ Bibbigan i 1 Patul Ira 19:1-4. Nanassingan si Elias turi ta nigato ni Reyna Jezebel nga patayan yayya. Yatutta nattammang yayya ta Beer-sheba. Fermi i pinakkafi na nonona yari tu “nikiddona nga matay ngana nakuan yayya.” Ngatta kunnatun i matagenona? Imperfekto si Elias anna “kagitta tam gapa” i mataga-tagenona. (Sant. 5:17) Posible nga natavvunan ngana yayya na grabe  nga pavvuru-vurung anna sobra i bannagna. Awayyana nga nanono ni Elias nga awan tu sesserbi na panguffunna ta totolay nga masserbi kani Jehova, awan tu pinakkasta na paddia-paddian ta Israel, anna magitetadday ngana yayya nga nabattang nga masserbi kani Jehova. (1 Pat. 18:3, 4, 13; 19:10, 14) Baka makaddagan ittam ta reaksion naw nga matalo nga profeta. Ngem, natindian ni Jehova i mataga-tageno ni Elias.

⁶ Ari nga pinoryan ni Jehova si Elias ta pinangidaginna ta mataga-tagenona. Inuffunanna lallagu si Elias tapenu massikan uli. (1 Pat. 19:5-7) Nappasa i piga nga tiempo, meddu nga nitunung ni Jehova i appana-panono ni Elias gukaban na pangipasingan nisa ta makapabbaw nga pakapangnguana. Tapus nikagi ni Jehova nisa nga egga paga i 7,000 nga totolay ta Israel nga panakitadda i masserbi kani Baal. (1 Pat. 19:11-18) Gafu taw ira nga praktikal nga uffun, nepasingan ni Jehova kani Elias nga iddeddukanna yayya.

7. Anni nga pamasiguradu i mala tam ta pinanguffun ni Jehova kani Elias?

⁷ Egga kari i grabe nga pavvuru-vurungammu? Talaga mabanna-bannayattam nga mammuan nga nalippawa ni Jehova i mataga-tageno ni Elias! Ipasiguradu natun nga malippawana gapa i madaddammo nga mataga-tageno tam. Ammuna i limitasiottam, kunne na gapa i nononopan anna mataga-tageno tam. (Sal. 103:14; 139:3, 4) Kagitta ni Elias, nu mattalo ittam kani Jehova, uffunanna ittam nga arubangan i problema ira nga grabe nga mamavvurung nittam.​—Sal. 55:22.

8. Kunnasi naka uffunan ni Jehova nu grabe i pavvuru-vurummu?

⁸ Nu grabe i pavvuru-vurummu, mepatageno nikaw nga ari ngana vuluvuga nga manguli i situasiommu anna makkafi i nono mu. Nu mesimmu yatun, daddamman nga uffunan naka ni Jehova. Kunnasi naka nga uffunan? Kayàna nga ikagim nisa i problemam anna i mataga-tageno mu ira. Anna magga ginnanna i pakimemallo mu nisa. (Sal. 5:3; 1 Ped. 5:7) Yari tu kanayummu nga ipakimallo i problemam ira kani Jehova. Ariannaka nga direkta nga kiyuvovugan gittana kingnguana kani Elias, ngem makiyuvovug yayya nikaw gukaban na Uvovugna, i Biblia, anna na organisasionna. Banna-bannayan anna pagiddanaman naka na rekord ira nga mabibbig mu ta Biblia. Mapasikan gapa na wawwaragi i nono mu.​—Roma 15:4; Heb. 10:24, 25.

9. Kunnasi ittam moffunan na mapattalakkattam nga kofun?

⁹ Nibilin ni Jehova nga ipakua ni Elias i karuan nga trabahuna kani Eliseo. Megafu tatun, niddan ni Jehova si Elias tu mapia nga kofun nga makoffun nisa nu makkafi i nonona. Kunne na gapa, nu kagiattam ta mapattalakkattam nga kofun i mataga-tageno tam, mapalappawna i pakadammakkattam ira. (2 Pat. 2:2; Prov. 17:17) Nu gittana awan tu mapakkagianammu ta problemam anna mataga-tageno mu ira, makimallo kani Jehova tapenu makaleg ka tu manakam nga Cristiano nga mamasikan ta nono mu.

10. Kunnasi nga makapasikan nittam i ekspiriensa ni Elias, anna kunnasi ittam moffunan na Isaias 40:28, 29?

¹⁰ Inuffunan ni Jehova si Elias tapenu maattamman i problemana ira anna tapenu makapasserbi yayya nga matalo ta aru nga dagun. Pasikannan ittam na ekspiriensa ni Elias nga mawayya tam gapa nga magattam. Nu mittan megafu ta konsumision, nababbannag tam ngana ta pisikal anna emosional. Ngem nu mappoffun ittam kani Jehova, iddanna ittam tu sikan nga kawagattam tapenu tulu-tuloy i passerbi tam nisa.​—Bibbigan i Isaias 40:28, 29.

11-13. Anni i efekto na grabe nga pavvuru-vurung ta tallu nga aripan gari na Dios?

¹¹ Neparubang gapa ta grabe nga pavvuru-vurung i karuan nga karakter ta Biblia. Angngariganna, inattamman ni Hana i pasiran na kawan tu ana kunne na gapa i grabe nga panguyu-uyaw na karibalna nga atawa. (1 Sam. 1:2, 6) Megafu tatun, grabe i pinaddaraddam ni Hana yayya nga makatatangi yayya anna awan tu ganasna nga kuman.​—1 Sam. 1:7, 10.

¹² Egga ira i tiempo nga nakkafi i nono ni Patul David megafu ta grabe nga pavvuru-vurung. Nonopan i problema ira nga neparubang nisa. Makokkonsensia yayya ta karu na liwana. (Sal. 40:12) Narrebelde nisa i meddu nga anana nga si Absalom, nga narresulta ta kapatay ni Absalom. (2 Sam. 15:13, 14; 18:33) Trinaydor yayya na tadday ta kadukkotan nga kofunna. (2 Sam. 16:23–17:2; Sal. 55:12-14) Aru ta kansion nga nitura ni David ay mangideskriba ta pinakkafian na nonona kunne na gapa i matuyag nga pattalona kani Jehova.​—Sal. 38:5-10; 94:17-19.

¹³ Ta pappasa na tiempo, nappassil i tadday nga salmista ta estado na pattolay na marake ira nga tolay. Posible nga naggafu yayya ta linia na Levita nga si Asaf nga nasserbi ta “Templo” na Dios. Madaddammo i mataga-tageno naw nga salmista, yari tu nawawan i pagayayya anna pakkakontentuna. Tagikuranganna paga lagu ngana i bendision ira ta passerbina ta Dios.​—Sal. 73:2-5, 7, 12-14, 16, 17, 21.

14-15. Anni i magigiammu tam ta tallu nga ekspiriensa ta Biblia meyannung ta pappoffun kani Jehova?

¹⁴ Danatun nga tallu nga kurug nga maddayarayaw nga nakagi ay nattalo ta uffun ni Jehova. Nipakimemalloda kani Jehova i pakavurungadda ira. Nivuvvuda nisa i ngamin  nga rason na pavvuru-vurudda. Ariadda gapa nagimmang nga umay ta lugar nga paddayarayawan kani Jehova.​—1 Sam. 1:9, 10; Sal. 55:22; 73:17; 122:1.

¹⁵ Meddu nga sinabbag ni Jehova i kada tadday nira. Napeggan tu memammo nga nono si Hana. (1 Sam. 1:18) Nitura ni David: “I matunung nga tolay ay aru nga ziga i attamman na, ngem palubbangan yaya na YAFU ta ngamin nga ziga na.” (Sal. 34:19) Ta pappasa na tiempo, natageno gabbalaman na salmista nga ‘kinemmi [ni Jehova] i ziwanan nga limana,’ gukaban na meddu nga panabaranna nisa tapenu megiya yayya. Nikansionna: “Ngem niakan ay kuruga makapabbaw tu i Dios ay aranniak-ku, tu i kapaliag ay alerak-ku ta Makapangngua nga YAFU.” (Sal. 73:23, 24, 28) Anni i magigiammu tam tatun ira nga ekspiriensa? Nu mittan, makkonsumision ittam ta karu na madammo ira nga problema tam. Ngem marubattam danatun nu monag nga pannonopattam nu kunnasi i pinanguffun ni Jehova ta tanakuan, makimallo tam nisa, anna mattuppal nisa gukaban na pangngua ta ipakuana nittam.​—Sal. 143:1, 4-8.

16-17. (a) Ngatta ariattam nakuan isina i baggi tam kani Jehova anna ta totolena? (b) Kunnasi ittam massikan uli?

¹⁶ Egga paga i magigiammu tam tu importante nga leksion tatun nga tallu nga ekspiriensa ​—ariattam nakuan isina i baggi tam kani Jehova anna ta totolena. (Prov. 18:1) Kunnaw i kinagi ni Nancy nga nadepres turi ta pinanawan yayya na atawana: “Aru i aggaw nga kayà ku nga magitetadday ngà anna kakku kayà i makibbida ta maski sinni. Ngem, kada isisinà i baggì, mas nga marraddam ngà.” Nanguli i situasion ni Nancy turi ta nagaleg yayya tu tiansa nga uffunan danuri problemadu. Kinagina: “Maggigginna ngà durante nga istorian na tanakuan i pakarigatadda ira. Natageno ku nga nu mas egga i empatià nira, mawawan i pangikallo ku ta baggì.”

¹⁷ Massikan ittam uli gukaban na pagatende ta study ira ta kongregasion. Nu egga ittam ta study, iddiddattam si Jehova tu oportunidad nga ‘manguffun anna mamanna-bannay’ nittam. (Sal. 86:17) Tatun, pasikannanna ittam gukaban na masanto nga espirituna, na Uvovugna, anna na totolena. Ta study ira, egga i tiansa tam nga “makkapasa-pasikan.” (Roma 1:11, 12) Kinagi ni sister Sophia: “Si Jehova anna i wawwaragi ira i nanguffun niakan nga magattam. Pinaka-importante niakan i pagatendè ta study ira. Nammuakku nga nu mas mallallappo ngà ta ministerio anna ta kongregasion, mas marubakku i pavvuru-vurung anna i problema ira.”

18. Nu nakkafi i nono tam, anni i meyawa ni Jehova nittam?

¹⁸ Nu nakkafi i nono tam, daddammattam nga nipromesa ni Jehova nga permanentena nga alsan noka i pavvuru-vurung ira. Uffunanna paga ittam nga arubangan i grabe ira nga pavvuru-vurung ta maddaggun. Iddanna ittam tu “pakkaraga anna pakawayya” tapenu labanattam i pakkafi na nono anna i kawan tu iddanama.​—Fil. 2:13.

19. Anni i ipasiguradu nittam na Roma 8:37-39?

¹⁹ Bibbigan i Roma 8:37-39. Nipasiguradu ni apostol Pablo nittam nga awan vuluvuga tu mangisina nittam ta aya na Dios. Kunnasi tam moffunan i wawwaragi tam nga magattattam ta madammo ira nga problema? Ta tumunug nga artikulo, gigiammuattam nu kunnasi tam maparigan si Jehova gukaban na pangipasingan tu pangikallo anna passuporta ta kapangngurug tam nu grabe i pavvuru-vurudda.