1. Kunnasi tam maparigan i meddu nga Yama nga si Jehova?

IDDEDDU ittam ni Jehova. (Juan 3:16) Kayà tam nga parigan i meddu nga Yama tam. Yari tu kayà tam mangipasingan tu ‘pagiddu nga kunna mawwaragi anna allo’ ta ngamin “tallugaring ta wawwagi tam.” (1 Ped. 3:8; Gal. 6:10) Nu meparubang ta mariga ira nga problema i kapangngurug tam, kayà tam ira nga uffunan.

2. Anni i gigiammuattam taw nga artikulo?

² Ngamin nga maya nga mesali ta familia ni Jehova ay meparubang noka ta mariga ira nga situasion. (Mar. 10:29, 30) Siguradu nga aru paga noka nga kapurueba i arubangattam megafu ta aranni ngana i pangultimu naw nga sistema. Kunnasi ittam nga makka-uffu-uffun? Innattam nu anni i magigiammu tam ta rekord ira na Biblia meyannung kada Lot, Job, anni Noemi. Gigiammuattam paga i problema ira nga meparubang ta wawwaragi tam ta maddaggun anna innattam nu kunnasi tam ira moffunan ta pangarubadda tatun.

3. Anni i mali nga desision ni Lot nga mabibbig ta 2 Pedro 2:7, 8? Anni ira i resultana?

³ Mali i desision ni Lot turi ta pinilina nga maddian ta Sodoma kavulu danuri nepallo i ka-imoralda nga totolay. (Bibbigan i 2 Pedro 2:7, 8.) Mariku nga lugar i Sodoma, ngem aru nga ziga-riga i neparubang kani Lot gafu ta pagalina tatun. (Gen. 13:8-13; 14:12) Awayyana nga ari mapanawan na atawa ni Lot i siudad onu i karuan nga totolay tatun yari tu arianna sinuppal si Jehova. Natay i atawa ni Lot turi ta nappa-uran  i Dios tu afi anna asufri ta Sodoma. Nonopan gapa i dua nga ana nga babay ni Lot. Netratu ira nga meyatawa ta lallaki nga nesipo ta natay ta Sodoma. Nawawan ni Lot i balena, i pakkukuana, anna i pinakamataki ta ngamin, i atawana. (Gen. 19:12-14, 17, 26) Durante taw nga mariga nga situasion, nofu kari i pasensia ni Jehova kani Lot? Ari.

4. Kunnasi nangipasingan tu pappasensia si Jehova kani Lot? (Innan i letratu ta vungun.)

⁴ Maski paga pinili ni Lot nga maddian ta Sodoma, nikallo yayya ni Jehova yatutta naddog tu anghel ira tapenu ipaliag yayya anna i familiana. Ngem, imbes nga insigida nga tuttulan ni Lot i apuradu nga bilin na anghel ira nga manaw ta Sodoma, ‘nibaya-bayagna’ lallagu. Mawag paga lagu tu guggunan na anghel ira i limana tapenu uffunan yayya anna i familiana nga mallawan ta siudad. (Gen. 19:15, 16) Tapus kinagi na anghel ira nga makkarela ira ta vinukig nga rehion. Ngem imbes nga tuttulan ni Lot si Jehova, nikiddona kani Jehova nga ta aranni nga ili ngana laman yayya nga umay. (Gen. 19:17-20) Mapasensia nga gininna ni Jehova si Lot anna nipamavulunna nga umay yayya tatun nga ili. Ngem nappasa i tiempo, naganassing si Lot nga maddian tatun nga lugar anna nagali yayya ta vinukig nga rehion, i ollu nga lugar nga kinagi ni Jehova nga angngayanna. (Gen. 19:30) Anni mabba i pasensia ni Jehova kani Lot! Kunnasi tam yayya nga maparigan?

5-6. Kunnasi tam meyaplika i 1 Tesalonica 5:14 ta pamarig tam ta Dios?

⁵ Kagitta ni Lot, awayyana nga egga i kapangngurug tam nga mali i desisionna anna marake i resulta natun nisa. Nu mesimmu yatun, anni i kuattam? Baka matenta ittam nga kagian nisa nga yayya lagapa i makalliwa, maski nu kurug nga nakaliwa yayya. (Gal. 6:7) Ngem, egga i mas makasta nga makua tam. Puede tam parigan i pinanguffun ni Jehova kani Lot. Kunnasi?

⁶ Naddog si Jehova tu anghel ira ari laman tapenu mangabiso, nu ari, tapenu uffunan ira nga melisi ta kadaral na Sodoma. Kunnatun gapa, mawag tam nga abisowan i kapangngurug tam nu masingattam nga egga i kukukuanna nga marake i parresultanna. Ngem egga paga i meyuffuttam. Maski nu arianna insigida nga meyaplika i nebase-Biblia ira nga tabarang nisa, mawag tu mapasensia ittam. Parigan i dua nga anghel. Imbes nga mawanan tu iddanama anna arayyuan i kapangngurug tam, mannono tu praktikal ira nga meyuffuttam. (1 Juan 3:18) Awayyana nga simboliko nga guggunattam i limana, anna uffunattam yayya tapenu iyaplikana i tabarang ira na Biblia.​—Bibbigan i 1 Tesalonica 5:14.

7. Kunnasi tam maparigan i pagimamma ni Jehova kani Lot?

⁷ Puede nga naffokus nakuan si Jehova ta kina-imperfekto ira ni Lot. Ngem, ininspiranna si apostol Pedro tapenu ideskriba si Lot bilang matunung nga tolay. Kuruga dakal i appabalo tam nga pakoman ni Jehova i liwa tam ira! (Sal. 130:3) Maparigattam kari i pagimamma ni Jehova kani Lot? Nu maffokus ittam ta makasta ira nga kualidad na wawwaragi tam, mabbalin ittam tu mas mapasensia nira. Nu kuattam yatun, mas sigga-paran ira nga alawatan i uffuttam.

8. Anni i makua tam megafu ta pangikallo?

⁸ Ari tu kagitta ni Lot, si Job ay nazziga-riga ari tu megafu ta mali nga desision. Ngem, grabe i nappasanna ira nga problema. Nawawan i pakkukuana ira, i sinaddagna ta lugarda, anna i makasta nga gawa-gawayyanna. Anna mas grabe paga, natay i ngamin nga ánada. Inakusan paga yayya na tallu nga falsu nga kofun.  Anni i tadday nga rason nu ngatta awan tu allo na tallu nga minaggappa-appe nga mamanna-bannay nisa? Ariadda inalippawa nu anni talaga i mesissimmu nisa. Yari tu mali i konklusiodda kani Job anna grabe i pinangakusada nisa. Kunnasi tam malillitan i kunnatun nga kamali? Daddammattam nakuan nga si Jehova laman i makannammu ta ngamin nga detalye meyannung ta situasion na tadday nga tolay. Ginnan tu mapia i kakkagian na tolay nga mazziga-riga. Ariammu laman ginnan i kakkagianna, nu ari, tagenappammu i zigana. Nu kunnatun i kuammu, mepasingammu i sinsero nga pakipattageno ta kapangngurug mu.

9. Nu egga i allo tam, anni i ariattam kuan, anna ngatta?

⁹ Nu egga i allo tam, fugaddattam i baggi tam ta pangiwara tu makadaral nga istoria meyannung ta problema ira na tanakuan. Imbes nga makapasikan, makadaral ta kongregasion i tadday nga chismoso onu chismosa. (Prov. 20:19; Roma 14:19) Awan tu allo anna konsiderasionna, anna i kaga-kagianna ay makabigag ta tolay nga mazziga-riga ngana. (Prov. 12:18; Efe. 4:31, 32) Anni ngana kastana nu ammuattam nu anni ira i positibo nga kualidad na tadday nga tolay anna nonopan nu kunnasi tam yayya moffunan tapenu marubanna i problemana!

10. Anni i mala tam nga leksion ta Job 6:2, 3?

¹⁰ Bibbigan i Job 6:2, 3. Nu mittan, ‘kokkomforme i kaga-kagian’ ni Job. Ngem inaminna gabbalaman nga egga ira i kinagina nga mali. (Job 42:6) Gitta ni Job, nu egga problema na tadday nga tolay nga maka-stress nisa, posible nga kokkomforme gapa i makagina, tapus pabbabawyanna gabbalaman danatun. Anni nakuan i reaksiottam? Imbes nga ivuya tam yayya, ikallo tam lallagu. Daddamman nga turi ta pinaratu ittam ni Jehova, arianna ittam dinisenio nga maka-ekspiriensa tu problema  anna stress gittana ta maddaggun. Yayya nga malippawa tam nakuan nu egga i matalo nga aripan ni Jehova nga maguvovug tu ari napannonopan gafu ta grabe i stress-na. Maski nu ari nga fustu i kakkagianna meyannung kani Jehova onu nittam, kattam insigida mapporay ta nisa onu husgan yayya ta kunnatun nga kakkagianna.​—Prov. 19:11.

11. Kunnasi nga maparigan na elder ira i ehemplo ni Elihu nu manabarang ira?

¹¹ Nu mittan, i tadday nga magattattam ta maka-stress nga problema ay mawagna i tabarang onu pangitunung. (Gal. 6:1) Kunnasi nga iyawa yatun na elder ira? Makasta nu parigadda si Elihu, nga naki-empatia kani Job durante nga gigginnanna si Job. (Job 33:6, 7) Nanabarang laman si Elihu kabalinna nga nalippawa i nononopan ni Job. Maparigan na elder ira i ehemplo ni Elihu nu magginna ira tu mapia anna puruebadda nga alippawatan i situasion na tadday nga tolay. Kabalinna, sonu manabarang ngana ira, mas malogon laman nga makadde yatun ta futu na magginna.

12. Anni i efektona kani Noemi na patay na atawana kunne na gapa i dua nga ánana nga lalaki?

¹² Si Noemi ay matalo nga babay anna iddukanna si Jehova. Ngem turi ta natay i atawana kunne na gapa i dua nga ánana nga lalaki, kayàna nga talianan i ngaganna nga Noemi tu “Mara,” nga kebalinanna “Mape.” (Ruth 1:3, 5, 20, ftn., 21) Ari yayya vuluvuga nga pinanawan na manuganna nga si Ruth maski ta tiempo ira na zigana. Fuera paga ta panguffun ni Ruth kani Noemi nga mapeggan tu kawaganna ira, naguvovug gapa yayya tu makapabannay nisa. Nakkagi si Ruth tu simple ngem sinsero ira nga pamanna-bannay kani Noemi tapenu ipasingan i pangiddu anna suportana nisa.​—Ruth 1:16, 17.

13. Ngatta kawagan danuri natayan tu atawa i suporta tam?

¹³ Nu egga i kapangngurug tam nga natayan tu atawa, kawaganna i suporta tam. I magatawa ay gittana dua nga fun na kayu nga nabbiko nga ziminakal. Ta pappasa na daga-ragun, naffuru-futafu ngana i gamuda dua. Nu napagamu nga nabaddul i tadday ta fun anna natay yatun, awayyana nga dakal i perwisiu natun ta tadday paga nga fun. Kunnatun gapa i mesimmu ta natayan tu atawa. Awayyana nga makatageno yayya tu sobra nga paddaraddam ta apaddu nga tiempo. Kunnaw i kinagi ni Paula * nga gavva i patay na atawana: “Interamente nga nanguli i pattolè, anna awan tu awawayyà. Nawawakku i bestfriend ku. Mekagì ta atawà i maski anni. Magayayya yayya nu magayayya ngà anna suportannà ta ngamin nga problemà. Yayya i kanayun nga aranniakku nu mamroblema ngà. Gittana naparalisa ngà.”

14-15. Kunnasi tam mabanna-bannayan i natayan tu atawa?

¹⁴ Kunnasi tam banna-bannayan i natayan tu atawa? I ollu nga kuattam ay kiyuvovugattam yayya, maski nu gittana mappasirattam onu ariattam ammu i kagiattam. Kinagi ni Paula nga natukoy ta gafu: “Matindiakku nu ngatta ari komfortable i totolay nga makibbida ta natayan. Mavurung ira nga baka makataki i makagida. Ngem mas mapia nu egga i kagiadda niko anne ta awan vuluvuga tu kagiadda.” Ari mabba nga ekspektan na natayan nga makkagi ittam tu kekkasta nga ideya. Kagian ni Paula: “Appresiakku maski i simple laman nga pakkagi na kokkofukku tu, ‘Condolence.’”

¹⁵ Istorian ni William nga piga ragun pagalaman nga natayan tu atawa: “Appresiakku nu iyistoria nio na tanakuan i makasta ira  nga ekspiriensada ta atawà; mepatageno nio nga meddu anna respetadu yayya. Dakal i meyuffun nio na kunnaw nga klase na suporta. Mabanna-bannayan ngà tatun megafu ta nabbalin tu kuruga meddu niakan i atawà anna importante i papelna ta pattolè.” Istorian na balu nga si Bianca: “Mabanna-bannayan ngà nu makimallo i tanakuan ta presensià anna mangibibbig ira tu teksto ira na Biblia nio. Makasta para nio nu magistoria ira tu meyannung ta atawà anna nu ginnadda i istoriakku meyannung nisa.”

16. (a) Anni i meyuffuttam ta natayan tu atawa? (b) Segun ta Santiago 1:27, anni i responsibilidad tam?

¹⁶ Nu kunnasi nga ari vuluvuga pinanawan ni Ruth i nabalu nga si Noemi, mawag gapa nga tulu-tuloy nga suportattam danuri natayan tu iddeddukan. Kunnaw i kagian ni Paula ta gafu: “Ta kabalin na patay na atawà, aru i minay nga nanguffun anna namanna-bannay nio. Ngem nappasa i tiempo, okupadu ngana ira uli ta inaggaw nga pattoleda. Ngem sakan, nanguli ngana i pattolè. Dakal i uffunna nu matindian na tanakuan nga mawag na natayan i suporta maski piga vulan onu dagun ngana i nappasa.” Siempre, nadduruma i kada indibidual. Egga danuri gittana mabi laman nga nakibagay ta nanguli nga sirkumstansiada. Egga gapa danuri meperaddam nira i taki na matayan kada kuadda i tadday nga aktibidad nga dati nga kukukuadda. Nadduruma i paddaddam na kada tolay. Daddammattam nakuan nga niddan ittam ni Jehova tu pribilehio anna responsibilidad nga uffunan danuri natayan tu atawa.​—Bibbigan i Santiago 1:27.

17. Ngatta kawagan danuri pinanawan na attawada i suporta tam?

 ¹⁷ Egga ira sigga-atawan nga meparubang ta grabe nga problema anna stress megafu ta pinanawan ira na atawada. Kunnaw i kagian ni Joyce nga nitali na atawana ta tanakuan nga babay: “Mas grabe i taki na diborsio anne ta nu natayan ngà tu atawa. Nu natay nakuan yayya ta aksidente onu taki, arianna pinili yatun. Ngem taw nga kaso, pinili na atawà nga panawannà. Nepasiranan ngà anna nawanan ngà tu dignidad.”

18. Anni i makua tam tapenu moffunan danuri nawanan tu atawa?

¹⁸ Nu mangngua ittam tu simple ira nga kinasippo turi ira ta nawanan tu atawa, mepasiguradu tam nira i pangaya tam. Yaw i tiempo nga pinaka-kawagadda i kurug ira nga kofun. (Prov. 17:17) Kunnasim mapakurug nga taddeka nga kofudda? Puedem ira imbitan ta balenu para ta simple nga pakkakan. Anna puedem gapa ira ivulu ta paddibersion anna pamministerio. Puede gapa nga sinaggi-mittan nga isali ira ta paddayarayaw na familiam. Nu kunnatun i kuammu, mapagayayya mu si Jehova, megafu ta ‘aranni yayya ta makafi i nonoda’ anna “iyegu na i balu ira.”​—Sal. 34:18; 68:5.

19. Anni i kagian na 1 Pedro 3:8 nga kuattam?

¹⁹ Aranni ngana i tiempo nga sonu mammaguray i Pappatulan na Dios ta davvun, ngamin nga “pakazigatan ira ay ari ngana nga mepanono.” Fermi nga iinnaggattam yatun nga tiempo sonu “ari ngana manono i nappasa ira nga ganna-gannug, ni tu mepafutu paga danatun.” (Isa. 65:16, 17) Adde ta ari paga zimittal yatun nga tiempo, makka-supu-suporta ittam anna pakurugattam ta kakkagian anna kukukuattam nga ayatattam i ngamin nga kapangngurug tam.​—Bibbigan i 1 Pedro 3:8.