Tapenu mapagayayya si Jehova, mawag tam i pangurug. Ngem kagian na Biblia nga “ari tu ngamin i totolay ay egga i pangurug da.” (2 Tes. 3:2) Turi ta kinagi ni apostol Pablo yaw, tukuyan na i “marakay nga totolay” nga mameppersigi ta nisa. Ngem egga paga i mas alawa nga kebalinan na kinagi na. Ari mangurug i karuan nga totolay nga egga i Dios nga namaratu ta ngamin nga gannug. (Roma 1:20) Kakkagian gapa na karuan nga mangurug ira ta Dios. Ngem ari tu makalanno yatun tapenu mapagayayya si Jehova.

Mawag tu kumbinsidu ittam nga kuru-kurug si Jehova anna ‘bala-balattan na’ danuri masikan i pangurug da nisa. (Heb. 11:6) Tadday nga aspeto na vunga na masanto nga espiritu i pangurug. Tapenu mapeggan tu masanto nga espiritu, mawag tu kiddawattam yatun kani Jehova ta pakimallo. (Luc. 11:​9, 10, 13) Mapeggan ittam gapa tu masanto nga espiritu nu bibbigattam i Biblia nga netura ta uffun na espiritu ni Jehova. Tapus pannonopattam tu mapia i nabibbig tam anna iyaplika tam i nagigiammu tam. Nu kuattam yatun, mainfluwensian na espiritu ni Jehova i pattoletam. Uffunan ittam natun nga mapeggan tu pangurug nga mamagayayya nisa.