1. Anni i magigiammu tam ta Salmo 15:​1-5?

 TA NAPPASA nga artikulo, nagigiammu tam nga puede mabbalin tu bisita ni Jehova ta tolda na danuri nidedika da i inango da ta nisa anna danuri mattalupaddian nga madukko nga kokkofun na. Ngem kunnasi tam nga makua yatun? Aru i magigiammu tam ta Salmo 15 meyannung taw. (Bibbigan i Salmo 15:​1-5.) Ikagi naw nga Salmo i mawag nga kuattam tapenu mabbalin tu madukko nga kofun na Dios.

2. Anni i nononopan ni David turi ta kinagi na i meyannung ta tolda ni Jehova?

² Kunnaw i nakagi ta gafu na Salmo 15: “O Jehova, sinni i puede nga mabbalin tu bisita ta toldam? Sinni i puede nga maddian ta masanto nga vukig mu?” (Sal. 15:​1, NW) Turi ta kinagi ni David i meyannung ta ‘tolda’ ni Jehova, awayya na tu nononopan na i tabernakulo nga naddian bi ta Gibeon tu piga nga tiempo. Turi ta kinagi gapa ni David i meyannung ta “masanto nga vukig,” awayya na tu tukuyan na i Vukig Sion ta Jerusalem. Maggi 10 kilometro yatun ta zita na Gibeon. Tatun nga nepataddag ni David i tolda nga paddianan na arka na pakkasinabban adde sonu mepataddag i templo nga permanente nga paddianan na arka.—2 Sam. 6:17.

3. Ngatta mawag tu alippawatattam i Salmo 15? (Innan gapa i letratu.)

³ Siempre, magaru ta Israelita ira i ari vuluvuga nasserbi ta tabernakulo. Baddi laman gapa ta nira i nakatallung ta unag na tolda nu sitaw nepappan i arka na pakkasinabban. Ngem awayya na nga mabbalin tu bisita ta tolda ni Jehova i ngamin  nga matalo nga aripan na gukaban na pabbalin anna pattalupaddian tu kofun na. Yatun i kayà tam ngamin. Mabibbig ta Salmo 15 i ugali ira nga mawag tu ipasingattam tapenu mattalupaddian ittam nga kofun ni Jehova.

MAKIMORAY ANNA KANAYUN NGA MANGNGUA TA MAPIA

4. Ngatta makagi tam nga ari laman tu pappabawtiso i ipakua ni Jehova nittam? (Isaias 48:1)

⁴ Mabibbig ta Salmo 15:2 nga i kofun na Dios ay “yuri i makimoray ta Dios ta ngamin nga adde na, anna kanayun nga mangngua ta mapia.” Mawag tu itulu-tuloy tam nga kuan yatun. Ngem talaga kari nga mawayya tam i “makimoray ta Dios ta ngamin nga adde na?” Siempre awan tu tolay nga perfekto. Ngem nu kuattam i ngamin nga mawayya tam nga tuttulan si Jehova, imammatan na ittam nga ‘makimoray ta ngamin nga adde na.’ Turi ta nidedika tam i baggi tam ta Dios anna nappabawtiso, pamegafuanan pagalaman yatun. Angngarigan na, ta tiempo na Biblia, nu Israelita i tadday, ari tu automatiko nga kualipikadu ngana yayya nga mabbalin tu bisita ni Jehova. Egga ira i Israelita nga nagagal nisa ngem ari tu ta “kinakurug anna kinatunung.” (Bibbigan i Isaias 48:1.) Tapenu mepasingan na Israelita ira nga ikaya da i mabbalin tu bisita ni Jehova, mawag tu napafutuan nga gigiammuadda i ipakua ni Jehova anna tuttulan danatun. Kunnatun gapa sangawe. Tapenu mabbalin tu madukko nga kofun ni Jehova, ari laman tu pappa-baptize anna pabbalin tu Saksi i kawagan. Mawag tu ‘kanayuttam nga mangngua tu mapia.’ Kunnasi tam makua yatun?

5. Anni i kebalinan na panuttul kani Jehova ta ngamin nga gannug?

⁵ Anni i kebalinan na “makimoray ta Dios ta ngamin nga adde na, anna kanayun nga mangngua ta mapia”? Para kani Jehova, ari  laman nga kebalinan natun i kanayun nga pakistudy ta Kingdom Hall. (1 Sam. 15:22) Mawag tu ikagumattam nga tuttulan i Dios ta ngamin nga kuattam, maski paga magitadday ittam. (Prov. 3:6; Ecl. 12:​13, 14) Mawag gafu tu kuattam i ngamin nga mawayya tam tapenu tuttulan si Jehova maski ta baraddi nga gannug. Nu kuattam yatun, mepasingattam nga talaga ayatattam yayya anna megafu tatun mas iddukan na ittam.—Juan 14:23; 1 Juan 5:3.

6. Base ta Hebreo 6:​10-12, anni i mas importante anne ta nakua tam ta nappasa?

⁶ Kuruga appresian ni Jehova i nakua tam para nisa ta nappasa. Ngem ari tu yatun i rason nga makapattalupaddian ittam ngana nga bisita ni Jehova ta tolda na. Manawag nga nakagi yatun ta Hebreo 6:​10-12. (Bibbigan.) Ari nga kattaman ni Jehova i kikkingngua tam. Ngem ikaya na nga itulu-tuloy tam nga iyawa i interu-kararua nga paddayaw “adde ta pangurianan.” Mabbalin yayya tu kofuttam ta mannanayun “nu ari nga makkafi i nono tam.”—Gal. 6:9.

MAWAG TU KURUG ANNA NAPAFUTU I PAGUVOVUG MU

7. Anni i kebalinan na kurug anna napafutu nga paguvovug?

⁷ Nu ikaya na tadday nga mabbalin tu bisita ni Jehova ta tolda na, mawag tu “kurug anna napafutu i paguvovug na.” (Sal. 15:2) Makalanno ngana kari nga ari ittam matteko? Ari. Kayà ni Jehova nga mapattalakkan ittam ta ngamin nga kakkagian anna kukukuattam. (Heb. 13:18) Nabalor yatun megafu ta “kala-kalussaw ni Jehova i tolay nga minangngilloku, ngem madukko nga kofun na i matunung ira.”—Prov. 3:32.

8. Anni i mawag nga lillitattam?

⁸ Danuri ‘kurug anna napafutu i paguvovug da’ ay ari nga magappappe nga tumuttul ta Dios nu egga i tanakuan nga tolay, ngem magangngua mabba tu marake nu awan tu makasingan. (Isa. 29:13) Lillitadda i mangilloku. Nonopan na minangngilloku nga tolay nga ari tu kanayun nga kapianan i dob ira ni Jehova. (Sant. 1:​5-8) Baka ari na nga tuttulan si Jehova ta gannug ira nga para nisa ay ari  kuruga importante. Tapus, nu gitta na awan tu marake nga efekto na ari na nga pattuttul, baka mangngua paga saw yayya tu mas marake ira nga gannug. Megafu tatun, ari nga alawatan ni Jehova i paddayaw na. (Ecl. 8:11) Ngem kayà tam i mabbalin tu mapattalakkan ta ngamin nga gannug.

9. Anni i magigiammu tam ta ollu nga pakasingan ni Jesus kani Nataniel? (Innan gapa i letratu.)

⁹ Kuruga importante nga ‘kurug anna napafutu i paguvovug tam.’ Masingattam yatun ta nesimmu turi ta inimbita ni Felipe i kofun na nga si Nataniel nga makissingan kani Jesus. Maski nu yatun pagalaman i ollu nga pakasingan ni Jesus kani Nataniel, kinagi na: “Yaw i kurug nga Israelita nga awan sa i pagappa-appe.” (Juan 1:47) Siempre para kani Jesus, mapattalakkan i ngamin nga disipulos na. Ngem nerumu-ruma i pabbalin tu mapattalakkan ni Nataniel. Imperfekto gapa si Nataniel kagitta tam. Ngem awan vuluvuga tu pagappappe nisa. Naappresia yatun ni Jesus anna kinomendan na si Nataniel tatun. Siguradu nga kayà tam gapa nga kunnatun i makagi ni Jesus ta nittam!

10. Ngatta mawag tu magimmugug ittam ta kakkagiattam? (Santiago 1:26)

¹⁰ Magaru ta netura ta Salmo 15 ay meyannung ta pattratu tam ta tanakuan. Kagian na Salmo 15:3 nga i bisita ni Jehova ta tolda na ay “ari nga mamara-parake ta ikattolay na; ari nga mangngua tu marakay ta kakkofun na, ni mangipala-palakag ta makadaral ta kadduba ira.” Nu para-paraketattam i tanakuan, matakitattam ira anna ari ittam ngana mabbalin tu bisita ni Jehova ta tolda na.—Bibbigan i Santiago 1:26.

11. Anni i pamara-parake, anna anni i mesimmu ta ari mabbabawi nga minammara-parake?

¹¹ Espesipiko nga kinagi na salmista i meyannung ta pamara-parake. Anni i pamara-parake? Yatun i pakkagi tu ari kurug nga informasion nga makadaral ta reputasion na  tadday nga tolay. Malsa ta kongregasion i ari nga mabbabawi nga minammara-parake.—Jer. 17:10.

12-13. Anni ira nga situasion i ari tam sadya nga mapara-parake i kokkofuttam? (Innan gapa i letratu.)

¹² Iperaddam nittam na Salmo 15:3 nga i bisita ira ni Jehova ay ari nga mangngua tu marake ta kasittoleda anna ari da nga paraketan i kokkofudda. Anni ira i nelavu tatun?

¹³ Awayya na tu ari tam sadya nga maparake i tadday nga tolay gukaban na pagistoria onu pangiwara tu negatibo nga informasion. Innan yaw ira nga situasion: (1) nagimmang nga mappayunir i tadday nga sister, (2) nallawan ta Bethel i tadday nga magatawa, onu (3) ari ngana nga elder onu ministerial servant i tadday nga brother. Mepangngo kari nga magispekulasion ittam nu ngatta nesimmu yaw ira nga situasion anna istorian yatun ta tanakuan? Aru i rason nu ngatta nesimmu yaw ira nga panguli nga ari tam ammu. I tadday gafu nga bisita ni Jehova ta tolda na ay “ari nga mangngua tu marakay ta kakkofun na, ni mangipala-palakag ta makadaral ta kadduba ira.”

IKAKUA DANURI MAKIMORAY KANI JEHOVA

14. Ipakanawag nu sinni danuri “ari nga ikaya na Dios” nga panakitattam.

¹⁴ Kagian na Salmo 15:4 nga i kofun ni Jehova ay ‘uyawan na i ari ikaya na Dios.’ Kunnasi tam makagi nga i tadday nga tolay ay ari nga ikaya na Dios? Awan tu kepangngattattam nga makkagi nu sinni i ari nga ikaya na Dios. Ngatta? Megafu ta imperfekto ittam, awayya na tu kakayà tam laman i totolay nga kasundu tam. Ngem manaki tam i totolay nga ari tam ikaya i ugali da. Danuri laman gafu “ari nga ikaya” ni Jehova i mawag tu panakitattam. (1 Cor. 5:11) Nelavu taw danuri pakakuadda i mangngua tu marake, ari mangirespeto ta kuru-kurugattam, onu danuri daraladda i espiritualidad tam.—Prov. 13:20.

15. Kunnasi tam mekakua “danuri i makimoray” kani Jehova?

¹⁵ Nakagi gapa ta Salmo 15:4 nga mawag tu ikakua tam “danuri i makimoray ta YAFU.” Yari tu magaleg ittam tu chansa nga ipasingan i kinasippo anna respeto ta kokkofun ira ni Jehova. (Roma 12:10) Kunnasi? Base ta Salmo 15:4, i bisita ni Jehova ta tolda na ay ‘magga parulattan na i nitabba na, maski nu anni i mesimmu sa.’ Nu ari tam nga tuppalan i promesa tam ira, magga matakitattam i tanakuan. (Mat. 5:37) Angngarigan na, ekspektan ni Jehova nga i bisita na ira ay tuppaladda i tabba da ta atawa da ta aggaw na kasal da. Magayayya gapa yayya ta magana ira nga kuadda i mawayya da tapenu tuppalan i nipromesa da ta ána da. Megafu ta aya tam ta Dios anna ta kasittoletam, kuattam i ngamin nga mawayya tam tapenu tuppalan i promesa tam ira.

16. Anni paga i makua tam tapenu mekakua i kokkofun ira ni Jehova?

¹⁶ Anni paga i makua tam tapenu mekakua i kokkofun ira ni Jehova? Mabbalin tu minammadulo anna vuka-palag. (Roma 12:13) Nu egga i tiempo tam nga maddibersion onu marrelaks kavulu i wawwaragi tam, mas maddukko ittam nira anna kani Jehova. Nu minammadulo gapa ittam, maparigattam si Jehova.

ARI VULUVUGA AYATAN I KUARTU

17. Ngatta nakagi ta Salmo 15 i meyannung ta kuartu?

¹⁷ Mabibbig tam nga i bisita ira ni Jehova ay ‘arian na nga paganakan i ipagatu na anna ari nga makipaga ta pattestigu ta tolay nga awan tu liwa na.’ (Sal. 15:5) Ngatta nakagi taw nga Salmo i meyannung ta kuartu? Megafu ta nu ayatattam i kuartu, mabbalin tu mas importante yatun nittam anne ta kasittoletam anna  maski ta Dios. (1 Tim. 6:10) Ta tiempo na Biblia, inabuso na karuan i pobre nga wawwaragi da gukaban na pattuki tu interes ta nipagatu da. Nangalawa gapa i karuan nga hues tu suhul tapus ari tu patas i pinanentensia da ta inosente nga biktima. Kalussaw ni Jehova i kunnatun ira nga annangngua.—Eze. 22:12.

18. Anni ira nga pakkiavu i makoffun ta nittam nga pannonopan i pagimamma tam ta kuartu? (Hebreo 13:5)

¹⁸ Makasta nu pannonopattam i pagimamma tam ta kuartu. Iyavu mu ta baggim: ‘Agga-nono ku kari laman i kuartu anna nu anni i magatang natun? Nu maggatu ngà, mabayag ngà kari nga mappaga anna nonopakku nga ari mabba tu mawag na nakagatukakku yatun? Matageno ku kari nga importante ngà megafu ta egga i kuartù ngem itu ngà mabba? Nonopakku kari nga materialistiko i wawwaragi ira nga mariku? Makikkofun ngà laman kari tari ta aru i kuartu da ngem manaki ku ta pobre?’ Makakkasta i pribilehio tam nga mabbalin tu bisita ni Jehova. Maprotektattam yatun nga pribilehio nu ariattam vuluvuga ayatan i kuartu. Nu kuattam yatun, ari ittam vuluvuga panawan ni Jehova!—Bibbigan i Hebreo 13:5.

IDDEDDUKAN NI JEHOVA I KOKKOFUN NA

19. Ngatta ikaya ni Jehova nga kuattam i ngamin nga gannug nga nakagi ta Salmo 15?

¹⁹ Nangultimu i Salmo 15 taw nga promesa: “I tolay nga mangngua taw ira ay awan vuluvuga tu mesimmu sa” nga marake. (Sal. 15:5) Tatun nga salmo, nipakanawag na salmista nu ngatta ikaya ni Jehova nga tuttulattam danatun. Kayà gare ni Jehova nga magayayya ittam. Yari ta nu kuattam i ipakua na ira, mas makkasta i pattoletam anna protektan na ittam.—Isa. 48:17.

20. Anni i iinnaggan na bisita ira ni Jehova?

²⁰ Iinnaggan na bisita ira ni Jehova i makakkasta nga mappange. Maginnennag i matalo ira nga nazelugan tapenu makatallung ta ‘napakaru nga lugar nga paddianan’ nga niprepara ni Jesus para nira ta langi. (Juan 14:2) Danuri neravvunan i iddanama da ay excited ngana nga matuppal i promesa ira ta Nepakannammu 21:3. Talaga daka-dakal nga pribilehio megafu ta ikaya ni Jehova nga mabbalin ittam tu bisita ta tolda na adde ta mannanayun!