Pakkiavu na Mabbibbig Ira
Ngatta iyaplika na karuan nga totolay i Salmo 12:7 anna 8 ta “nitabba ira na YAFU” (ta versikulo 6) ngem iyaplika yatun na New World Translation ta “maddagi-raging” (ta versikulo 5)?
Base ta konteksto, yaw nga versikulo ay tumukoy ta totolay.
Ta Salmo 12:1-4, mabibbig tam nga “awan ngana tu mapia nga tolay nga nabattang.” Sangawe, ikonsidera tam i Salmo 12:5-8, i versikulo ira nga nelavu ta pakkiavu.
“Ngem kagian na YAFU, ‘Sangoye ay angayak-ku ngana
i mazziga-riga nga pobre ira,
anna i maddagi-raging nga madara-darum ira.
Iyawa ku nira i kapaliag nga karagatad-da.’
Kurug anna mekatalo i nitabba ira na YAFU,
kagitta na pira nga nalunag ta ornuanna napakarennuan ta namippitu.
Egga ngamin ta pallevu i marakay nga totolay; dadayawad-da laman i marakay.
O AFU, kari tu iyegu nakami nga kanayun; paliaran nakami ta totolay ira nga kuddanatun.”
Mabibbig ta versikulo 5 i kagian na Dios meyannung ta “maddagi-raging.” Ipaliag na ira.
Iyammung gapa na versikulo 6 nga “kurug anna mekatalo i nitabba ira na YAFU, kagitta na pira nga nalunag ta ornu.” Kunnatun i mataga-tageno tam meyannung ta uvovug ni Jehova.—Sal. 18:30; 119:140.
Sangawe, ikonsidera tam i dua nga tumunug nga versikulo, Salmo 12:7, 8: “Egga ngamin ta pallevu i marakay nga totolay; dadayawad-da laman i marakay. O AFU, kari tu iyegu nakami nga kanayun; paliaran nakami ta totolay ira nga kuddanatun.” Anni i tukuyan danaw nga versikulo?
Megafu ta i versikulo 7 anna 8 ay tumunug ta versikulo 6 nga meyannung ta “nitabba ira na YAFU,” baka nonopan na karuan nga i kebalinan natun ay iyegu na Dios i nitabba na ira onu ta Uvovug na. Kurug gapa tu niyegu onu prinotektan na Dios i Biblia maski nu aru i kalaban nga nangikaguman nga igamma anna daralan yatun.—Isa. 40:8; 1 Ped. 1:25.
Ngem kurug gapa i mabibbig ta versikulo 5. Dati paga anna magadde sangawe, uuffunan anna ipaliag ni Jehova danuri “maddagi-raging” anna “madara-darum.”—Job 36:15; Sal. 6:4; 31:1, 2; 54:7; 145:20.
Nu kunnuri gafu, ta anni nga tumukoy i versikulo 7 anna 8?
Nu mas alippawatattam paga yaw nga salmo, mabbalin tu mas manawag nga tumukoy yatun ta totolay.
Ta Salmo 12:1, kinagi ni David i meyannung ta “matunung” nga pinalladdugan na marake nga totolay. Tapus mabibbig tam nga pagimmangan ni Jehova danatun nga minangngilogo. Ipasiguradu gafu naw nga salmo nga makapattalo ittam nga uffunan na Dios i totolena megafu ta kurug anna mekatalo i uvovug na ira.
Yatutta kakkagian gafu na versikulo 7 anna 8 nga iyegu anna protektan ni Jehova danuri maddagi-raging nga biktima na marake nga totolay.
Pinarigan na New World Translation i Hebreo nga Masoretiko. Namiddua gapa nga nangusa i Greek Septuagint tu “nakami” ta versikulo 7. Tumukoy gafu yatun ta matunung nga totolay nga maddagi-raging anna madara-darum. Kagian gapa na versikulo 7 nga iyegu na Dios danuri matalo ta “totolay ira nga kuddanatun” nga tumukoy ta “marakay nga totolay.” (Sal. 12:7, 8) Ta translation na Hebreo nga Katurakan ta lengguahe nga Aramaiko, mabibbig ta versikulo 7: “Sikaw, O YAFU, i mapprotekta ta matunung, mannanayun nga iyegu mu ira taw nga marake nga totolay. Maski sitaw, egga i marake, kagitta na alinta nga manussu ta daga na ána na totolay.” Yaw i tadday paga nga ebidensia nga ari tumukoy i Salmo 12:7 anna 8 ta nitabba ira na Dios.
Megafu tatun, mamaggiddanama yaw ira nga versikulo ta “matunung” nga totolay nga ipaliag ira noka na Dios.
