1. Mekunnay ta 1 Pedro 3:8, ngatta kakayà tam makavulu danuri totolay nga mangikavurung ta mataga-tageno anna ta pammakapianattam?

KAKAYÀ tam makavulu i totolay nga mangikavurung ta mataga-tageno anna ta pammakapianattam. Ipeda i baggida ta situasiottam, tapenu malippawa i nononopan anna mataga-tageno tam. Masingadda nu anni i mawag tam anna uffunadda ittam nige tam paga mappoffun. Appresiattam danuri ‘makipattageno’ * nittam.​—Bibbigan i 1 Pedro 3:8, NW.

2. Ngatta mawag tam mappursigi nga makipattageno?

² Bilang Cristiano, kayà tam ngamin nga maki-empatia, onu makipattageno. Ngem kakuruganna, ari tu alistu nga kuan yatun. Ngatta? Tadday nga rason ay megafu ta imperfekto ittam. (Roma 3:23) Negagangay nga baggi tam laman i agga-nono tam. Yari tu mawag tam mappursigi tapenu nonopan i tanakuan. Marigatan gapa i karuan nittam nga makipattageno megafu ta nedakallattam onu ta nappasattam. Mainfluwensian ittam gapa na ugali na totolay ta pallevu tam. Taw ta pangurianan nga aggaggaw, aru i awan tu konsiderasiodda ta mataga-tageno na tanakuan. “Ayatan na totolay i baggi da laman.” (2 Tim. 3:1, 2) Anni i makoffun nittam nu marigatan ittam nga makipattageno ta tanakuan?

3. (a) Kunnasi tam magigiammu nga ikavurungan i tanakuan? (b) Anni i ikonsidera tam taw nga artikulo?

³ Nu parigattam si Jehova nga Dios anna i Anana, si Jesu-Cristo, magigiammu tam nga ikavurungan i tanakuan. Si Jehova i Dios na aya, anna nangipasingan yayya tu kapianan nga ehemplo na pangikavurung ta tanakuan. (1 Juan 4:8)  Perfekto nga naparigan ni Jesus i personalidad na Yamana. (Juan 14:9) Ta keggana ta davvun, nipasinganna nu kunnasi makepasingan tu allo i tolay. Taw nga artikulo, ikonsidera tam labbi nu kunnasi nakipattageno si Jehova anna si Jesus ta tanakuan. Tapus ikonsidera tam nu kunnasi tam parigan i ehemploda.

4. Kunnasi ipasingan na Isaias 63:7-9 nga ikavurungan ni Jehova i mataga-tageno na aripanna ira?

⁴ Ituddu na Biblia nga ikavurungan ni Jehova i mataga-tageno na aripanna ira. Angngariganna, innattam nu anni i natageno ni Jehova turi ta nadduruma nga ziga i naekspiriensa na Israelita ira. “Ta ngamin nga ziga-rigada ay namazziga nisa,” kunna Uvovug na Dios. (Bibbigan i Isaias 63:7-9.) Mittan, gukaban ni profeta Zacarias, kinagi ni Jehova nga nu maparigatan i ilina, gittana maparigatan gapa yayya. Kunni Jehova ta aripanna ira: “Sinni laman nga manukkal nikamu ay manukkal ta vukal na matà.” (Zac. 2:8) Mananawag yatun nga ilustrasion nga mangipasingan ta pangikavurung ni Jehova ta ilina!

5. Mangiyawa tu angngarigan nu anni i kingngua ni Jehova tapenu uffunan i aripanna ira nga maziga-rigatan.

⁵ Ari laman nga makatageno tu allo si Jehova tari ira ta maziga-rigatan. Egga gapa i aksion nga kuanna tapenu uffunan ira. Angngariganna, tagga ta naparigatan bilang aripan i Israelita ira ta Ehipto, nalippawa ni Jehova i taki nga matagenoda yatutta napaguyu yayya nga palubbangan ira. Kunni Jehova kani Moises: “Talaga nasingakku i pazziga-riga na totolè . . . , anna naginnà i pakikuragda . . . ammù i taka-taki nga idaga-ragidda. Makkazza ngà tapenu kuragan ira ta lima na Ehipsio.” (Ex. 3:7, 8) Gafu ta ikallo ni Jehova i ilina, pinalubbanganna ira ta pakka-aripan. Piga siglo i nappasa, ta Nepromesa nga Davvun, inatake na kalaban ira i Israelita. Anni i kingngua ni Jehova? “Napaguyu yayya nga magallo ta daga-ragidda megafu ta manattazzi anna ta mangabuso nira.” Nakatageno mangana tu allo si Jehova para ta ilina yayya nga egga kingnguana tapenu uffunan ira. Nangidog yayya tu ukum ira tapenu ipaliag i Israel ta kalabadda.​—Uk. 2:16, 18.

6. Kunnasi nga nipasingan ni Jehova i pangikavurunna ta mataga-tageno na tadday maski ari tu fustu i appanonona?

 ⁶ Ikavurungan ni Jehova i mataga-tageno na totolena​—maski ari tu kanayun nga fustu i appana-panonoda. Ikonsidera i nesimmu kani Jonas. Zinog na Dios yaw nga profeta tapenu ilayyagayya i mensahe na pangukum kontra ta Ninevita ira. Turi ta nabbabawi ira, pinili na Dios nga ari ira daralan. Ngem ari magayayya si Jonas tatun nga nesimmu. “Nappatu i uluna” megafu ta ari nekurug i profesiyana nga kadaral. Ngem mapasensia lagapa si Jehova kani Jonas anna inuffunanna nga ulian i appanonona. (Jonas 3:10–4:11) Nalippawa gabbalaman ni Jonas i ituttuddu ni Jehova nisa anna nipetura yaw ni Jehova nisa tapenu pammakapianattam.—Roma 15:4. *

7. Anni i ipasiguradu nittam na pakilallang ni Jehova ta aripanna ira?

⁷ Ipasiguradu na pinakilallang ni Jehova ta totolena nga egga i empatiana ta aripanna ira. Matagenona i taki anna pazziga-riga na kataggi-tadday nittam. Si Jehova “i kurug nga makannammu ta futu na totolay.” (2 Cro. 6:30) Malippawana i kononaggan nga appanono anna mataga-tageno tam, anna i limitasiottam ira. Yari tu ‘arian na nga ipamavulun tu duttal nittam i tentasion nga ariattam awayya nga affutan.’ (1 Cor. 10:13) Kuruga makapabannay yatun nga promesa!

8-10. Anni ira nga gannug i nakoffun kani Jesus tapenu ikavurungan i tanakuan?

⁸ Ta kegga ni Jesus ta davvun, kuruga ikavurunganna i tanakuan. Egga i tallu nga gannug nga nakoffun nisa tapenu ikavurungan i tanakuan. Ollu, gitta na nakagi ta gafu, perfekto nga nepasingan ni Jesus i personalidad na nelangitan nga Yamana. Gitta na Yamana, iddeddu ni Jesus i totolay. Maski nagustuan ni Jesus i ngamin nga pinaratu ni Jehova ta uffunna, ‘netallugaring nga kakayàna i ána na totolay.’ (Prov. 8:31) Aya i namaguyu kani Jesus tapenu ikavurungan i mataga-tageno na tanakuan.

⁹ Mekadua, gitta ni Jehova, mabibbig ni Jesus i naddian na futu. Mammuanna i motibo anna mataga-tageno na totolay. (Mat. 9:4; Juan 13:10, 11) Yari tu nu matageno ni Jesus nga nabigaran i futu na totolay, paguyuan yayya na pangikavurung tapenu banna-bannayan ira.​—Isa. 61:1, 2; Luc. 4:17-21.

¹⁰ Mekatallu, naekspiriensa mismu ni Jesus i karuan nga problema na totolay. Angngariganna, posible nga ziminakal si Jesus ta pobre nga familia. Ta pakipattrabahu ni Jesus ta yamana nga si Jose, nagigiammuna i mattrabahu tu madammo. (Mat. 13:55; Mar. 6:3) Posible nga natay si Jose nige nga namegafu i ministerio ni Jesus. Yari tu natageno ni Jesus i taki na matayan. Ammu paga ni Jesus nu kunnasi i ziga na ari kapangngurug i kafamilia. (Juan 7:5) Danatun nga situasion anna tanakuan paga i nakoffun kani Jesus tapenu malippawa i problema anna mataga-tageno na ordinario nga totolay.

11. Anni ira nga situasion nga masingan i pangikavurung ni Jesus? Iyesplika. (Innan i letratu ta vungun.)

¹¹ Masingan i pangikavurung ni Jesus turi ta nammilagro yayya. Ari nammilagro si Jesus megafu laman ta obligadu yayya. ‘Ziminatu i allona’ turi ira ta mazziga-riga. (Mat. 20:29-34; Mar. 1:40-42) Angngariganna, nonopan i mataga-tageno ni Jesus turi ta niyarayyuna ta totolay i lalaki nga bangngag anna umal tapenu  pammapianna onu turi ta pinaginnolena i ana nga lalaki na balu. (Mar. 7:32-35; Luc. 7:12-15) Nakisimpatia si Jesus tatun nga totolay yari tu kayàna ira nga uffunan.

12. Ta rekord na Juan 11:32-35 kunnasi nakipattageno si Jesus kada Marta anni Maria?

¹² Nakipattageno si Jesus kada Marta anni Maria. Turi ta nasingan ni Jesus nga maddaddam ira ta patay na wagida nga si Lazaro, ‘ay siminangi yayya.’ (Bibbigan i Juan 11:32-35.) Ari yayya siminangi gafu ta arianna ngana makavulu i madukko nga kofunna. Ammuna mabba nga paginnolayanna si Lazaro. Siminangi yayya megafu ta natagenona i paddaddam na madukko nga kokkofunna ta patay ni Lazaro.

13. Ngatta makapagaram nittam i pakannammu ta pakipattageno ni Jesus?

¹³ Kuruga makapagaram nittam i pakannammu ta pakipattageno ni Jesus. Siempre, ari ittam tu perfekto kagittana. Ngem ayatattam yayya megafu ta minangngikallo nga pattratuna ta tanakuan. (1 Ped. 1:8) Makapasikan ta nono nga mammuan nga mammaguray ngana yayya sangawe bilang Patul ta Pappatulan na Dios. Arannina ngana nga pawanan i ngamin nga ziga-riga. Si Jesus i kapianan nga manguffun ta totolay tapenu mapalubbangan ta marake nga resulta na pammaguray ni Satanas, megafu ta naekspiriensana i nabbalin tu tolay. Wan, talaga dakal i appabalo tam nga egga i Mammaguray nga “ari tu tadday nga ari nga makatageno ta kalaray na kata-katolay tam.”​—Heb. 2:17, 18; 4:15, 16.

14. Mekunnay ta Efeso 5:1, 2, mapaguyu ittam nga kuan i anni?

¹⁴ Nu nonopattam i ehemplo ni Jehova anna ni Jesus, mapaguyu ittam nga mas paga nga makipattageno. (Bibbigan i Efeso 5:1, 2.) Kattam makabibbig tu futu. Maski kunna, malippawa tam i mataga-tageno anna kawagan na tanakuan. (2 Cor. 11:29) Ari tu kagitta na makasarili nga totolay ta pallevu tam, ‘ariattam nga nonopan i pammakapiattam laggapa, nu ari i pammakapian na kataggi-tadday nittam.’​—Fil. 2:4.

15. Sinni i mekiddaw nga mas makipattageno?

¹⁵ Mas ngana nga mekiddaw ta elder ira ta kongregasion nga makipattageno. Ammuda nga egga i tattabbagadda ta karneru nga netalo ta panangngalda. (Heb. 13:17) Tapenu moffunan i wawwaragi, mawag nga egga i empatia na elder ira. Kunnasi makipattageno i elder ira?

16. Anni i kuan na minakkisimpatia nga elder, anna ngatta importante yatun?

¹⁶ I minakkisimpatia nga elder ay mangiyawa tu tiempo ta wawwaragi. Makkakkiavu yayya anna mapasensia nga magginna. Mas ngana nga importante yatun nu egga i meddu nga karneru nga maya nga mangivuvvu ta nononopan anna mataga-tagenona ngem marigatan nga makkagi. (Prov. 20:5) Nu sigga-paran nga iyawa na elder i tiempona ta wawwaragi, mas egga i pattalo, pakikofun, anna aya ta nallatanadda.​—King. 20:37.

17. Para ta wawwaragi, anni i pinakakayàda nga kualidad na elder ira? Mangistoria tu angngarigan.

¹⁷ Aru nga wawwaragi i makkagi nga i pinakakayàda nga kualidad na elder ira ay i pangikavurudda ta mataga-tageno na tanakuan. Ngatta? “Mas kampante ka nga makiyuvovug nira, megafu ta ammum nga malippawa daka,” kunni Adelaide. Kunna paga: “Matageno mu nga ikavurungaddaka gukaban na reaksiodda nu makibbida ka nira.” Sigga-appresia nga meraddamman na tadday nga brother: “Nasingakku nga sikkatangi i  elder durante nga istoriakku sa i problemà. Kakku vuluvuga makattaman yatun.”​—Roma 12:15.

18. Kunnasi tam makultiba i pakipattageno ta tanakuan?

¹⁸ Siempre, ari laman tu i elder ira i mawag nga makipattageno. Mawag tam ngamin nga kultiban yaw nga kualidad. Kunnasi? Alippawatan i ziga-riga na kafamilia anna na kapangngurug tam ira. Ipasingan nga ikavurungammu i tinedyer ira ta kongregasion kunne na gapa danuri mataki, lakay anna bako, anna danuri natayan. Kamustan ira. Magginna tu mapia nu kagiadda i mataga-tagenoda. Ipatageno nira nga talaga malippawa mu i situasiodda. Uffunan ira adde ta mawayyam. Nu kuattam yatun, makepasingan ittam tu kurug nga aya.​—1 Juan 3:18.

19. Ngatta mawag nga minakkibagay ittam nu manguffun ta tanakuan?

¹⁹ Mawag tu minakkibagay tam nu manguffun ta tanakuan. Ngatta? Megafu ta madduruma i reaksion na totolay ta nadduruma nga situasion. Kakayà na karuan nga istorian i problemada, ngem manaki gapa na karuan. Maski kayà tam manguffun, ibita tam nakuan i makkiavu tu kepasiranadda. (1 Tes. 4:11) Maski paga kagiadda nittam i mataga-tagenoda, posible nga ari ittam umanugu ta kakkagiadda. Ngem, daddammattam nga yatun i mataga-tagenoda. Kayà tam nga sigga-paran nga magginna anna memmugug ta paguvovug.​—Mat. 7:1; Sant. 1:19.

20. Anni i ikonsidera tam ta tumunug nga artikulo?

²⁰ Fuera paga ta pakipattageno ta wawwaragi, kayà tam gapa nga ipasingan yaw nga makakkasta nga kualidad ta ministerio tam. Kunnasi ittam makipattageno durante ta pangngua tam tu disipulos? Yatun i ikonsidera tam ta tumunug nga artikulo.