1. Anni i magustuan na magaru nga interesadu nga totolay nu magatende ira ta study tam? (Innan gapa i letratu.)

 IMAJINAN i tadday nga magatawa nga first time da i makistudy ta Kingdom Hall na Saksi ira ni Jehova. Talaga nagustuadda i mapatu nga nipangalawa na wawwaragi ta nira anna i pakka-aya-aya na kongregasion. Ta pallabbe da, kinagi na babay ta atawa na, ‘Nerumu-ruma i Saksi ira ni Jehova ta tanakuan ira nga kakilala tam. Nagenjoy ngà ta pakikavulu ku nira.’

2. Ngatta nagimmang nga masserbi kani Jehova i karuan?

² Kurug tu espesial i pakka-aya-aya na Cristiano ira ta kongregasion. Ngem siempre, ari tu perfekto i Saksi ira ni Jehova. (1 Juan 1:8) Yayya nga nu mas makilala tam i wawwaragi ta kongregasion, magga mas masingattam i pakkamaliadda ira. (Roma 3:23) Kaddaraddam nga nagimmang nga masserbi kani Jehova i karuan megafu ta kina-imperfekto na tanakuan.

3. Anni i panakkilalan na kurug ira nga tagatuttul ni Jesus? (Juan 13:34, 35)

³ Nonopan uli i tema nga teksto naw nga artikulo. (Bibbigan i Juan 13:34, 35.) Anni kari i panakkilalan na kurug ira nga tagatuttul ni Jesus? Aya, ari tu i pabbalin tu perfekto. Sifutan gapa nga ari tu kinagi ni Jesus: ‘Kannammuan nu tu disipulo takamu.’ I kinagi na: “Kannammuan ngamin na totolay tu disipulo takamu.” Ipasingan gafu ni Jesus nga ari laman tu i tagatuttul na i makannammu nu sinni ira i kurug nga disipulos na gukaban na ari makasarili nga pakka-aya-aya da. Masingan gapa yatun danuri na ari nga parte na Cristiano nga kongregasion.

4. Anni i kayà nga makannammuan na karuan nga totolay meyannung ta kurug ira nga Cristiano?

 ⁴ Baka manono na karuan nga ari tu Saksi ni Jehova: ‘Ngatta aya i panakkilalan na kurug nga disipulos ni Jesus? Kunnasi nga nipasingan ni Jesus i aya na ta apostoles na? Kunnasi tam maparigan i ehemplo ni Jesus?’ Maski i Saksi ira, makasta nu pannonopadda i tabbag tatun ira nga pakkiavu. Makaduffun yatun tapenu mas mepasingattam i aya, jebi nu egga ira i pakkamalian na wawwaragi.​—Efe. 5:2.

5. Ipakanawag i kinagi ni Jesus ta Juan 15:12, 13.

⁵ Nipakanawag ni Jesus nga espesial i pakka-aya-aya na disipulos na ira. (Bibbigan i Juan 15:12, 13.) Sifutan nga nidob yaw ni Jesus ta nira: “Makka-aya-aya kamu ta kunna nipangaya ku nikamu.” Anni i kayà kagian natun? Kagitta na tumunug nga kinagi ni Jesus, yatun ay minassakrifisio nga aya—i klase na aya nga mamaguyu ta tadday nga Cristiano nga matay paga lagu para ta kapangngurug na nu kawagan. b

6. Kunnasi ipasigo na Uvovug na Dios nga kuruga importante i aya?

⁶ Ipasigo na Uvovug na Dios nga kuruga importante i aya. Aru nga totolay i makkagi nga faborito da i tumunug ira nga teksto ta Biblia: “I Dios ay aya.” (1 Juan 4:8) “Ayatam-mu i ikattolem ta kunna pangaya mu ta baggim.” (Mat. 22:39) “I aya ay takkabban na i aru nga liwa-liwa.” (1 Ped. 4:8) “I aya ay mannanayun.” (1 Cor. 13:8) Manawag nga ipasingan danaw nga teksto na Biblia anna na tanakuan paga nga kuruga importante nga ipasingattam yatun nga makakkasta nga kualidad.

7. Ngatta ari vuluvuga metuddu ni Satanas ta totolay nga makka-aya-aya ira anna mattaradday?

⁷ Aru nga totolay i makkiavu: ‘Kunnasì nga  mammuan nu anni i kurug nga relihion? Ikakkagi na ngamin nga relihion nga ira i mangituddu ta kinakurug. Ngem madduruma i ituttuddu na kada tadday ta nira meyannung ta Dios.’ Namalattuag si Satanas tu napakaru nga falsu nga relihion tapenu maguluan i totolay. Ari da ngana lallagu ammu nu anni i kurug nga relihion. Ngem ari vuluvuga mapattaradday ni Satanas i totolay ta interu mundo tapenu makka-aya-aya. Si Jehova laman i makangngua ta kunnatun. Ammu tam yatun megafu ta maggafu kani Jehova i aya. Danuri laman gafu egga ta nira i espiritu na anna i pamendision na i kurug nga makka-aya-aya. (1 Juan 4:7) Yatun i rason nu ngatta kinagi ni Jesus nga i minassakrifisio nga aya i panakkilalan na kurug nga disipulos na.

8-9. Anni i efekto ta totolay na aya nga naobserba da ta Saksi ira ni Jehova?

⁸ Kagitta na niprofesiya ni Jesus, aru nga totolay i makasingan nu sinni ira i kurug nga disipulos na megafu ta kurug nga pakka-aya-aya da. Angngarigan na, manono paga ni Brother Ian i ollu nga kombension nga inatendeyan na ta tadday nga sports stadium aranni ta baleda. Piga vulan nige natun, naggiraw tu gayam si Ian tatun balaman nga stadium. Istorian na: “Daka-dakal i nadduman na ugali nari ira na naggiraw ta gayam anna na Saksi ira ta kombension. Kitassippo i Saksi ira, makasta i assissinnudda, anna ari tu makukkul i ána da.” Kagian na paga: “Masingakku nga kontentu anna memammo danaw nga totolay. Kunnatun i kayà ku. Awan tu matandaanakku ta nakagi ta palappa ira tatun nga aggaw. Ngem ari ku vuluvuga makattaman i ugali nga nasingakku ta Saksi ira.” c Siempre yatun nga ugali ay megafu ta egga i kurug nga pakka-aya-aya tam. Megafu ta ayatattam i wawwaragi tam, masippo anna marespeto i pattratu tam ta nira.

⁹ Kunnatun gabbalaman i natageno ni Brother John turi ta makikkistudy ngana yayya: “Sobra i sippo . . . na ngamin tari. Gitta da i santo. Megafu ta kurug nga aya da, nakumbinsi ngà nga nalegakku ngana i kurug nga relihion.” d Namippiga ngana nga napakurug na kuddanatun nga ekspiriensa nga i totolay ni Jehova i kurug nga Cristiano.

10. Kanni i chansa tam nga mangipasingan tu Cristiano nga aya? (Innan gapa i footnote.)

¹⁰ Kagitta na nakagi ta gafu, awan tu kapangngurug tam nga perfekto. Nu mittan, makekagi ira onu makangngua tu makapataki ta nittam. e (Sant. 3:2) Nu mesimmu yatun, egga i chansa tam nga makepasingan tu Cristiano nga aya depende ta reaksion tam. Anni gafu i magigiammu tam ta ehemplo ni Jesus?​—Juan 13:15.

11. Anni ira nga marake nga ugali i nipasingan da Santiago anni Juan? (Innan gapa i letratu.)

¹¹ Ari nga inekspekta ni Jesus nga mabbalin tu perfekto i tagatuttul na ira. Megafu ta aya na ta nira, zinuffunan na ira nga itunung i marake ira nga ugali da tapenu mapagayayya da si Jehova. Mittan, kinagi na dua ta apostoles na nga da Santiago anni Juan ta yena da nga ikiddona kani Jesus nga meddan ira tu prominente nga posision ta Pappatulan. (Mat. 20:20, 21) Masingan tatun nga kingngua da Santiago anni Juan nga minappakatannang anna ambisioso ira.​—Prov. 16:18.

12. Da Santiago anni Juan laman kari i nakepasingan tu marake nga ugali? Ipakanawag.

 ¹² Ari laman tu da Santiago anni Juan i nakepasingan tu marake nga ugali tatun nga nesimmu. Sifutan i reaksion na karuan nga apostoles: “Turi ta naginna yaw na kakavvulu da nga mafulu nga disipulo, marakay i nono da ta mawwagi.” (Mat. 20:24) Awayya na tu manono tam nga nakkatabba-tabbag da Santiago, Juan, anna i karuan paga nga apostol. Posible nga kinagi na karuan nga apostol: ‘Sinni kamu gapa tapenu ikiddonu i prominente ira nga posision ta Pappatulan? Ari laman gapa tu sikamu i nabbanna-bannag kavulu si Jesus. Kualipikadu kami gapa kagitta nu para ta prominente ira nga posision!’ Maski anni paga i nanono da onu kinagi da, tatun nga tiempo nakattamadda i makka-aya-aya anna mangipasingan tu kinasippo ta kataggi-tadday.

13. Anni i reaksion ni Jesus ta pakkafian na apostoles na? (Mateo 20:25-28)

¹³ Anni i reaksion ni Jesus tatun nga situasion? Ari na ira pinoryan. Ari na gapa kinagi ta nira nga magaleg ngana laman yayya tu mas mapia nga apostoles, danuri mas mapakalinno anna kanayun nga makka-aya-aya. Imbes tu kunnatun, mapasensia nga kiniyuvovug ira ni Jesus megafu ta ammu na nga kayà da nga kuan nu anni i fustu. (Bibbigan i Mateo 20:25-28.) Iniddu anna makasta lagapa i pinattratu na ta nira maski nu ari tu yatun i ollu ni  tu i ultimu nga tiempo nga nakkatutturia ira nu sinni i katannangan ta paddian ta nira.​—Mar. 9:34; Luc. 22:24.

14. Anni nga kultura i naddakallan na apostoles ni Jesus?

¹⁴ Magga nikonsidera ni Jesus i kultura nga naddakallan na apostoles na. (Juan 2:24, 25) Napalevutan ira tu Judio ira nga eskriba anna Fariseo nga mangituddu ta totolay nga mabbalin laman ira tu importante nu prominente i posisiodda. (Mat. 23:6; ikumpara i video nga Pinakamagandang Puwesto sa Sinagoga ta study note na Mateo 23:6.) Minappakatunung gapa i Judio ira nga lider na relihion. f (Luc. 18:9-12) Ammu ni Jesus nga makafekto i kunnatun nga appana-panono ta pagimamma na apostoles ta baggi da anna ta tanakuan nga tolay. (Prov. 19:11) Megafu tatun, ari na nga inekspekta nga ari vuluvuga makkamali i disipulos na anna pinasensian na ira nu makkamali ira. Ammu na gare nga mapia i giffutuadda yayya nga mapasensia nga zinuffunan na ira nga mabbalin tu minangngiddu, imbes tu minappakatannang anna ambisioso.

15. Anni i magigiammu tam ta nesimmu kada Santiago anni Juan?

¹⁵ Aru i magigiammu tam ta nesimmu kada Santiago anni Juan. Nakkamali ira kustu nikiddaw da i prominente nga posision ta Pappatulan. Ngem nakkamali gapa i karuan nga apostol megafu ta nipamavuludda yatun nga situasion nga manaral ta pattaradday da. Ngem masippo lagapa i pinattratu ni Jesus ta ngamin nga 12 nga apostoles na anna iddu na lagapa ira. Anni gafu i magigiammu tam tatun? Dakal i efekto na kukukuan na karuan nga tolay. Ngem dakal gapa i efekto na reaksiottam ta pakkamalian anna pakkafiadda. Anni gafu i kuattam nu natakitan ittam ta kingngua na kapangngurug tam? Puede tam nga iyavu ta baggi tam: ‘Ngatta sobra ngana mabba nga afektadu ngà ta kingngua na? Nallawan kari i marake nga ugalì nga mawag ku nga pakappian? Posible kari nga yatun nga tolay nga nakataki ta nio ay egga i problema na? Maski gapa rasonable nga matageno ku nga natakitan ngà, awayyà kari i mangipasingan tu aya anna pakoman ngana laman yatun nga tolay?’ Nu iyugali tam gafu i makka-aya-aya, mas mepasingattam nga sittam i kurug nga disipulos ni Jesus.

16. Anni paga i magigiammu tam ta ehemplo ni Jesus?

¹⁶ Magigiammu tam gapa ta ehemplo ni Jesus nga ikagumattam nakuan nga alippawatan i kapangngurug tam ira. (Prov. 20:5) Mawayya ni Jesus nga bibbigan i mayan na futu, ngem sittam ari. Ngem puede tam lagapa nga pasa-pasensian i kina-imperfekto na wawwaragi tam. (Efe. 4:1, 2; 1 Ped. 3:8) Mas mabi tam nga makua yatun nu ammammu tam ira. Gigiammuattam i tadday nga ekspiriensa.

17. Kunnasi nga nammakapia i tadday nga manangngal ta sirkito ta pangikaguman na nga mas paga nga kilalan i kapangngurug na?

¹⁷ Manono paga na tadday nga manangngal ta sirkito nga massesserbi ta East Africa i brother nga abbo na tu mariga pakibagayan. Anni i kingngua na manangngal ta sirkito? Istorian na: “Imbes tu lisiakku yatun nga brother, nadisidì nga mas paga nga kilalan yayya.” Megafu tatun, egga ira i nakannammuan  na manangngal ta sirkito meyannung ta nikapadakal natun nga brother nga nanginfluwensia ta ugali na. Istorian na paga: “Tagga ta nammuakku nga kitezziga balo para tatun nga brother nga kuan ira i panguli nga kayà na tapenu laman makabagayan na i tanakuan nga tolay anna nu kunnasi kadakal ngana i nangulian na, naappresià yayya. Nabbalikkami tu madukko nga makkofun.” Nu ikagumattam gafu nga alippawatan i wawwaragi tam, maruddu nga mas malogon para ta nittam nga iddukan ira.

18. Anni ira nga pakkiavu i awayya tam nga iyavu ta baggi tam nu natakitan ittam na tadday nga wagi? (Proverbio 26:20)

¹⁸ Nu mittan, baka manono tam nga mawag tu kibbidattam i tadday nga wagi nga nakataki ta nittam. Ngem makasta nu iyavu tam labbi danaw ta baggi tam: ‘Ammù kari i ngamin nga detalye?’ (Prov. 18:13) ‘Awayya na kari tu ari na mabba nga sinadya nga takitan ngà?’ (Ecl. 7:20) ‘Nakuà ngana gapa kari yatun nga kamali ta tanakuan?’ (Ecl. 7:21, 22) ‘Nu kibbidakku yatun nga tolay, mas dumakal kari i problema imbes tu masolba yatun?’ (Bibbigan i Proverbio 26:20.) Nu pannonopattam labbi danatun nga pakkiavu, awayya na tu manono tam nga puede tam nga palampasan i nakkamalian na wagi tam megafu ta iddukattam yayya.

19. Anni i determinadu nga kuammu?

¹⁹ Bilang tadday nga grupo, ipasa-pasingan na Saksi ira ni Jehova nga ira i kurug nga disipulos ni Jesus. Bilang indibidual gapa, mapakurug tam tu sittam i kurug nga disipulos ni Jesus nu napafutuan nga ayatattam i wawwaragi tam maski nu egga ira i pakkafiadda. Nu kuattam yatun, maduffunattam i tanakuan tapenu makilala da nu anni i kurug nga relihion anna tapenu mevulun gapa ira ta nittam ta paddayaw kani Jehova, i Dios na aya. Determinadu ittam nakuan gafu nga tulu-tuloy nga ipasingan i aya nga panakkilalan na kurug ira nga Cristiano.